हैंహైHaindavamஹிહિં
📍
Font Size:
శ్రీ గాయత్రీ పంజర స్తోత్రం
భగవంతం దేవదేవం బ్రహ్మాణం పరమేష్ఠినం ।
విధాతారం విశ్వసృజం పద్మయోనిం ప్రజాపతిం ॥ 1 ॥
శుద్ధస్ఫటికసంకాశం మహేంద్రశిఖరోపమం ।
బద్ధపింగజటాజూటం తడిత్కనకకుండలం ॥ 2 ॥
శరచ్చంద్రాభవదనం స్ఫురదిందీవరేక్షణం ।
హిరణ్మయం విశ్వరూపముపవీతాజినావృతం ॥ 3 ॥
మౌక్తికాభాక్షవలయస్తంత్రీలయసమన్వితః ।
కర్పూరోద్ధూలితతనుం స్రష్టారం నేత్రగోచరం ॥ 4 ॥
వినయేనోపసంగమ్య శిరసా ప్రణిపత్య చ ।
నారదః పరిపప్రచ్ఛ దేవర్షిగణమధ్యగః ॥ 5 ॥
నారద ఉవాచ ।
భగవన్ దేవదేవేశ సర్వజ్ఞ కరుణానిధే ।
శ్రోతుమిచ్ఛామి తత్తత్వం భోగమోక్షైకసాధనం ॥ 6 ॥
ఐశ్వర్యస్య సమగ్రస్య ఫలదం ద్వంద్వవర్జితం ।
బ్రహ్మహత్యాదిపాపఘ్నం పాపాద్యరిభయాపహం ॥ 7 ॥
యదేకం నిష్కలం సూక్ష్మం నిరంజనమనామయం ।
యత్తే ప్రియతమం లోకే తన్మే బ్రూహి పితర్మమ ॥ 8 ॥
బ్రహ్మోవాచ ।
శృణు నారద వక్ష్యామి బ్రహ్మమూలం సనాతనం ।
సృష్ట్యాదౌ మన్ముఖే క్షిప్తం దేవదేవేన విష్ణునా ॥ 9 ॥
ప్రపంచబీజమిత్యాహురుత్పత్తిస్థితిహేతుకం ।
పురా మయా తు కథితం కశ్యపాయ సుధీమతే ॥ 10 ॥
సావిత్రీపంజరం నామ రహస్యం నిగమత్రయే ।
ఋష్యాదికం చ దిగ్వర్ణం సాంగావరణకం క్రమాత్ ॥ 11 ॥
వాహనాయుధమంత్రాస్త్రమూర్తిధ్యానసమన్వితం ।
స్తోత్రం శృణు ప్రవక్ష్యామి తవ స్నేహాచ్చ నారద ॥ 12 ॥
బ్రహ్మనిష్ఠాయ దేయం స్యాదదేయం యస్య కస్యచిత్ ।
ఆచమ్య నియతః పశ్చాదాత్మధ్యానపురఃసరం ॥ 13 ॥
ఓమిత్యాదౌ విచింత్యాథ వ్యోమహేమాబ్జసంస్థితం ।
ధర్మకందగతజ్ఞానాదైశ్వర్యాష్టదలాన్వితం ॥ 14 ॥
వైరాగ్యకర్ణికాధీనాం ప్రణవగ్రహమధ్యగాం ।
బ్రహ్మవేదిసమాయుక్తాం చైతన్యపురమధ్యగాం ॥ 15 ॥
తత్త్వహంససమాకీర్ణాం శబ్దపీఠే సుసంస్థితాం ।
నాదబిందుకలాతీతాం గోపురైరపి సంవృతాం ॥ 16 ॥
విద్యాఽవిద్యాఽమృతత్వాది ప్రకారైరపిసంవృతాం ।
నిగమార్గలసంఛన్నాం నిర్గుణద్వారవాటికాం ॥ 17 ॥
చతుర్వర్గఫలోపేతాం మహాకల్పవనైర్వృతాం ।
సాంద్రానందసుధాసింధునిగమద్వారవాటికాం ॥ 18 ॥
ధ్యానధారణయోగాది తృణగుల్మలతావృతాం ।
సదసచ్చిత్స్వరూపాఖ్య మృగపక్షిసమాకులాం ॥ 19 ॥
విద్యాఽవిద్యావిచారాఖ్యలోకాలోకాచలావృతాం ।
పంచీకరణపంచోత్థభూతతత్త్వనివేదితాం ॥ 20 ॥
అవికారసమాశ్లిష్టనిజధ్యానగుణావృతాం ।
వేదోపనిషదర్థాఖ్య దేవర్షిగణసేవితాం ॥ 21 ॥
ఇతిహాసగ్రహగణైః సదారైరభివందితాం ।
గాథాప్సరోభిర్యక్షైశ్చ గణకిన్నరసేవితాం ॥ 22 ॥
నారసింహముఖైశ్చాపి పురుషైః కల్పచారణైః ।
కృతగానవినోదాదికథాలాపనతత్పరాం ॥ 23 ॥
తదిత్యవాఙ్మనోగమ్యతేజోరూపధరాం పరాం ।
జగతః ప్రసవిత్రీం తాం సవితుః సృష్టికారిణీం ॥ 24 ॥
వరేణ్యమిత్యన్నమయీం పురుషార్థఫలప్రదాం ।
అవిద్యావర్ణవర్జ్యాం చ తేజోవద్భర్గసంజ్ఞికాం ॥ 25 ॥
దేవస్య సచ్చిదానంద పరబ్రహ్మరసాత్మికాం ।
ధీమహ్యహం స వై తద్వద్బ్రహ్మాద్వైతస్వరూపిణీం ॥ 26 ॥
ధియో యో నస్తు సవితా ప్రచోదయాదుపాసితాం ।
పరోఽసౌ సవితా సాక్షాద్దేవోనిర్హరణాయ చ ॥ 27 ॥
పరోరజస ఇత్యాది పరబ్రహ్మాత్మసావదోం ।
ఆపో జ్యోతిరితి ద్వాభ్యాం పాంచభౌతికసంజ్ఞికాం ॥ 28 ॥
రసోఽమృతం బ్రహ్మపదైస్తాం నిత్యాం తాపినీం పరాం ।
భూర్భువఃసువరిత్యేతైర్నిగమత్వప్రకాశికాం ॥ 29 ॥
మహర్జనస్తపఃసత్యలోకోపరిసుసంస్థితాం ।
తాదృగస్యా విరాడ్రూపం రహస్యం ప్రవదామ్యహం ॥ 30 ॥
వ్యోమకేశాకులాకాశ ద్యోకిరీటవిరాజితాం ।
తటిద్భ్రుకుటినాక్రాంతవిధివిష్ణుశివార్చితాం ॥ 31 ॥
గురుభార్గవకర్ణాంతాం సోమసూర్యాగ్నిలోచనాం ।
ఇడాపింగలసౌషుమ్ణ వామనాసాపుటాన్వితాం ॥ 32 ॥
సంధ్యాద్విరోష్ఠపుటితాం లసద్వాగ్భవజిహ్వికాం ।
సంధ్యాసౌ ద్యుమణేః కంఠలసద్బాహుసమన్వితాం ॥ 33 ॥
పర్జన్యహృదయాసక్తవసుసుస్తనమండలాం ।
ఆకాశోదరవిత్రస్తనాభ్యవాంతరదేశికాం ॥ 34 ॥
ప్రాజాపత్యాఖ్యజఘనామింద్రాణీకటిసంజ్ఞికాం ।
ఊరూ మలయమేరుభ్యాం శోభమానాం సురద్విషం ॥ 35 ॥
జానునీ జహ్నుకుశికౌ వైశ్వదేవలసద్భుజాం ।
అయనద్వయజంఘాద్యసురాద్యపితృసంజ్ఞికాం ॥ 36 ॥
పదాంఘ్రినఖరోమాలిభూతలద్రుమలాంఛితాం ।
గ్రహరాశ్యర్క్షదేవర్షిమూర్తిం చ పరసంజ్ఞికాం ॥ 37 ॥
తిథిమాసర్తువర్షాఖ్యసుకేతునిమిషాత్మికాం ।
అహోరాత్రార్ధమాసాఖ్యామార్యాం చంద్రమసాత్మికాం ॥ 38 ॥
మాయాకల్పితవైచిత్ర్యసంధ్యాచ్ఛాదనసంవృతాం ।
జ్వలత్కాలానలప్రఖ్యాం తడిత్కోటిసమప్రభాం ॥ 39 ॥
కోటిసూర్యప్రతీకాశాం చంద్రకోటిసుశీతలాం ।
సుధామండలమధ్యస్థాం సాంద్రానందామృతాత్మికాం ॥ 40 ॥
వాగతీతాం మనోరమ్యాం వరదాం వేదమాతరం ।
చరాచరమయీం నిత్యాం బ్రహ్మాక్షరసమన్వితాం ॥ 41 ॥
ధ్యాత్వా స్వాత్మన్యభేదేన బ్రహ్మపంజరమారభేత్ ।
పంజరస్య ఋషిశ్చాహం ఛందో వికృతిరుచ్యతే ॥ 42 ॥
దేవతా చ పరో హంసః పరబ్రహ్మాధిదేవతా ।
ప్రణవో బీజశక్తిః స్యాదోం కీలకముదాహృతం ॥ 43 ॥
తత్తత్త్వం ధీమహి క్షేత్రం ధియోఽస్త్రం యః పరం పదం ।
మంత్రమాపో జ్యోతిరితి యోనిర్హంసః సవేధకం ॥ 44 ॥
వినియోగస్తు సిద్ధ్యర్థం పురుషార్థచతుష్టయే ।
తతస్తైరంగషట్కం స్యాత్తైరేవ వ్యాపకత్రయం ॥ 45 ॥
పూర్వోక్తదేవతాం ధ్యాయేత్సాకారగుణసమ్యుతాం ।
పంచవక్త్రాం దశభుజాం త్రిపంచనయనైర్యుతాం ॥ 46 ॥
ముక్తావిద్రుమసౌవర్ణామోషధీశసమాననాం ।
వాణీం పరాం రమాం మాయాం చామరైర్దర్పణైర్యుతాం ॥ 47 ॥
షడంగదేవతామంత్రై రూపాద్యవయవాత్మికాం ।
మృగేంద్రవృషపక్షీంద్రమృగహంసాసనస్థితాం ॥ 48 ॥
అర్ధేందుబద్ధముకుటకిరీటమణికుండలాం ।
రత్నతాటంకమాంగల్యపరగ్రైవేయనూపురాం ॥ 49 ॥
అంగులీయకకేయూరకంకణాద్యైరలంకృతాం ।
దివ్యస్రగ్వస్త్రసంఛన్నరవిమండలమధ్యగాం ॥ 50 ॥
వరాఽభయాబ్జయుగలాం శంఖచక్రగదాంకుశాం ।
శుభ్రం కపాలం దధతీం వహంతీమక్షమాలికాం ॥ 51 ॥
గాయత్రీం వరదాం దేవీం సావిత్రీం వేదమాతరం ।
ఆదిత్యపథగాం దేవీం స్మరేద్బ్రహ్మస్వరూపిణీం ॥ 52 ॥
విచిత్రమంత్రజననీం స్మరేద్విద్యాం సరస్వతీం ।
త్రిపదా ఋఙ్మయీ పూర్వా ముఖీ బ్రహ్మాస్త్రసంజ్ఞికా ॥ 53 ॥
చతుర్వింశతితత్త్వాఖ్యా పాతు ప్రాచీం దిశం మమ ।
చతుష్పాదా యజుర్బ్రహ్మదండాఖ్యా పాతు దక్షిణా ॥ 54 ॥
షట్త్రింశత్తత్త్వయుక్తా సా పాతు మే దక్షిణాం దిశం ।
ప్రత్యఙ్ముఖీ పంచపదీ పంచాశత్తత్త్వరూపిణీ ॥ 55 ॥
పాతు ప్రతీచీమనిశం సామబ్రహ్మశిరోంకితా ।
సౌమ్యా బ్రహ్మస్వరూపాఖ్యా సాథర్వాంగిరసాత్మికా ॥ 56 ॥
ఉదీచీం షట్పదా పాతు చతుఃషష్టికలాత్మికా ।
పంచాశత్తత్త్వరచితా భవపాదా శతాక్షరీ ॥ 57 ॥
వ్యోమాఖ్యా పాతు మే చోర్ధ్వం దిశం వేదాంగసంస్థితా ।
విద్యున్నిభా బ్రహ్మసంజ్ఞా మృగారూఢా చతుర్భుజా ॥ 58 ॥
చాపేషుచర్మాసిధరా పాతు మే పావకీం దిశం ।
బ్రాహ్మీ కుమారీ గాయత్రీ రక్తాంగీ హంసవాహినీ ॥ 59 ॥
బిభ్రత్కమండల్వక్షస్రక్స్రువాన్మే పాతు నైరృతీం ।
చతుర్భుజా వేదమాతా శుక్లాంగీ వృషవాహినీ ॥ 60 ॥
వరాఽభయకపాలాక్షస్రగ్విణీ పాతు మారుతీం ।
శ్యామా సరస్వతీ వృద్ధా వైష్ణవీ గరుడాసనా ॥ 61 ॥
శంఖారాబ్జాభయకరా పాతు శైవీం దిశం మమ ।
చతుర్భుజా వేదమాతా గౌరాంగీ సింహవాహనా ॥ 62 ॥
వరాభయాబ్జయుగలైర్భుజైః పాత్వధరాం దిశం ।
తత్తత్పార్శ్వస్థితాః స్వస్వవాహనాయుధభూషణాః ॥ 63 ॥
స్వస్వదిక్షు స్థితాః పాంతు గ్రహశక్త్యంగదేవతాః ।
మంత్రాధిదేవతారూపా ముద్రాధిష్ఠానదేవతాః ॥ 64 ॥
వ్యాపకత్వేన పాత్వస్మానాపహృత్తలమస్తకీ ।
తత్పదం మే శిరః పాతు ఫాలం మే సవితుఃపదం ॥ 65 ॥
వరేణ్యం మే దృశౌ పాతు శ్రుతిం భర్గః సదా మమ ।
ఘ్రాణం దేవస్య మే పాతు పాతు ధీమహి మే ముఖం ॥ 66 ॥
జిహ్వాం మమ ధియః పాతు కంఠం మే పాతు యఃపదం ।
నః పదం పాతు మే స్కంధౌ భుజౌ పాతు ప్రచోదయాత్ ॥ 67 ॥
కరౌ మే చ పరః పాతు పాదౌ మే రజసోఽవతు ।
సా మే నాభిం సదా పాతు కటిం వై పాతుమేవదోం ॥ 68 ॥
ఓమాపః సక్థినీ పాతు గుహ్యం జ్యోతిః సదా మమ ।
ఊరూ మమ రసః పాతు జానునీ అమృతం మమ ॥ 69 ॥
జంఘే బ్రహ్మపదం పాతు గుల్ఫౌ భూః పాతు మే సదా ।
పాదౌ మమ భువః పాతు సువః పాత్వఖిలం వపుః ॥ 70 ॥
రోమాణి మే మహః పాతు లోమకం పాతు మే జనః ।
ప్రాణాంశ్చ ధాతుతత్త్వాని తదీశః పాతు మే తపః ॥ 71 ॥
సత్యం పాతు మమాయూంషి హంసో వృద్ధిం చ పాతు మే ।
శుచిషత్పాతు మే శుక్రం వసుః పాతు శ్రియం మమ ॥ 72 ॥
మతిం పాత్వంతరిక్షసద్ధోతా దానం చ పాతు మే ।
వేదిషత్పాతు మే విద్యామతిథిః పాతు మే గృహం ॥ 73 ॥
ధర్మం దురోణసత్పాతు నృషత్పాతు వధూం మమ ।
వరసత్పాతు మే మాయాఽమృతసత్పాతు మే సుతాన్ ॥ 74 ॥
వ్యోమసత్పాతు మే బంధూన్ భ్రాతౄనబ్జశ్చ పాతు మే ।
పశూన్మే పాతు గోజాశ్చ ఋతజాః పాతు మే భువం ॥ 75 ॥
సర్వం మే అద్రిజా పాతు యానం మే పాత్వృతం సదా ।
మమ సర్వం బృహత్పాతు విభురోం పాతు సర్వదా ॥ 76 ॥
అనుక్తమథ యత్స్థానం శరీరాంతర్బహిశ్చ యత్ ।
తత్సర్వం పాతు మే నిత్యం హంసః సోఽహమహర్నిశం ॥ 77 ॥
ఇదం తు కథితం సమ్యఙ్మయా తే బ్రహ్మపంజరం ।
సంధ్యయోః ప్రత్యహం భక్త్యా జపకాలే విశేషతః ॥ 78 ॥
ధారయేద్ద్విజవర్యో యః శ్రావయేద్వా సమాహితః ।
స విష్ణుః స శివః సోఽహం సోఽక్షరః స విరాట్ స్వరాట్ ॥ 79 ॥
శతాక్షరాత్మకం దేవ్యా నామాష్టావింశతిః శతం ।
శృణు వక్ష్యామి తత్సర్వమతి గుహ్యం సనాతనం ॥ 80 ॥
భూతిదా భువనా వాణీ వసుధా సుమనా మహీ ।
తుర్యా శోభా ద్విజప్రీతా కామధుక్ భక్తసిద్ధిదా ॥ 81 ॥
విశ్వా చ విజయా వేద్యా సంధ్యా బ్రాహ్మీ సరస్వతీ ।
హరిణీ జననీ నందా సవిసర్గా తపస్వినీ ॥ 82 ॥
పయస్వినీ సతీ త్యాగా చైందవీ సత్యవీ రసా ।
శైవీ లాస్యప్రియా తుష్టా జప్యా సత్యా సతీ ధ్రువా ॥ 83 ॥
భక్తవశ్యా చ గాయత్రీ భీమా విష్ణుప్రియా జయా ।
విశ్వా తుర్యా పరా రేచ్యా నిర్ఘృణీ యమినీ భవా ॥ 84 ॥
గోవేద్యా చ జరిష్ఠా చ స్కందినీ ధీర్మతిర్హిమా ।
అనంతా రవిమధ్యస్థా సావిత్రీ బ్రాహ్మణీ త్రయీ ॥ 85 ॥
అపర్ణా చండికా ధ్యేయా మనుశ్రేష్ఠా చ సాత్వికీ ।
భీషణా యోగినీ పక్షీ నదీ ప్రజ్ఞా చ చోదినీ ॥ 86 ॥
ధనినీ యామినీ పద్మా రోహిణీ రమణీ ఋషిః ।
బ్రహ్మిష్ఠా భక్తిగమ్యా చ కామదా బలదా వసుః ॥ 87 ॥
ఆద్యా వర్ణమయీ హృద్యా లక్ష్మీః శాంతా రమాఽచ్యుతా ।
సేనాముఖీ సామమయీ బహులా దోషవర్జితా ॥ 88 ॥
సర్వకామదుఘా సోమోద్భవాఽహంకారవర్జితా ।
తత్పరా సుఖదా సిద్ధిః వేద్యా పూజ్యా ప్రసాదినీ ॥ 89 ॥
విప్రప్రసాదినీ పూజ్యా విశ్వవంద్యా వినోదినీ ।
ద్విపదా చ చతుష్పాదా త్రిపదా చైవ షట్పదా ॥ 90 ॥
అష్టాపదీ నవపదీ సా సహస్రాక్షరాత్మికా ।
అమోఘఫలదాఽనాదిః సర్వా సర్వాంగసుందరీ ॥ 91 ॥
శర్వాణీ వైష్ణవీ చంద్రచూడా త్రిణయనా క్షమా ।
విశ్వమాతా త్రయీసారా త్రికాలజ్ఞానరూపిణీ ॥ 92 ॥
చంద్రమండలమధ్యస్థా భక్తపాపవినాశినీ ।
వరదా ఛందసాం మాతా బ్రాహ్మణ్యపదదాయినీ ॥ 93 ॥
య ఇదం పరమం గుహ్యం సావిత్రీమంత్రపంజరం ।
నామాష్టవింశతిశతం శృణుయాచ్ఛ్రావయేత్పఠేత్ ॥ 94 ॥
మర్త్యానామమృతత్త్వాయ భీతానామభయాయ చ ।
మోక్షాయ చ ముముక్షూణాం శ్రీకామానాం శ్రియే సదా ॥ 95 ॥
విజయాయ యుయుత్సూనాం వ్యాధితానామరోగకృత్ ।
వశ్యాయ వశ్యకామానాం విద్యాయై వేదకామినాం ॥ 96 ॥
ద్రవిణాయ దరిద్రాణాం పాపినాం పాపశాంతయే ।
వాదినాం వాదవిజయే కవీనాం కవితాప్రదం ॥ 97 ॥
అన్నాయ క్షుధితానాం చ స్వర్గాయ స్వర్గమిచ్ఛతాం ।
పశుభ్యః పశుకామానాం పుత్రేభ్యః పుత్రకాంక్షిణాం ॥ 98 ॥
క్లేశినాం శోకశాంత్యర్థం నృణాం శత్రుభయాయ చ ।
రాజవశ్యాయ ద్రష్టవ్యం పంజరం నృపసేవినాం ॥ 99 ॥
భక్త్యర్థం విష్ణుభక్తానాం విష్ణోః సర్వాంతరాత్మని ।
నాయకం విధిసృష్టానాం శాంతయే భవతి ధ్రువం ॥ 100 ॥
నిఃస్పృహాణాం నృణాం ముక్తిః శాశ్వతీ భవతీ ధ్రువం ।
జప్యం త్రివర్గసమ్యుక్తం గృహస్థేన విశేషతః ॥ 101 ॥
మునీనాం జ్ఞానసిద్ధ్యర్థం యతీనాం మోక్షసిద్ధయే ।
ఉద్యంతం చంద్రకిరణముపస్థాయ కృతాంజలిః ॥ 102 ॥
కాననే వా స్వభవనే తిష్ఠంఛుద్ధో జపేదిదం ।
సర్వాన్కామానవాప్నోతి తథైవ శివసన్నిధౌ ॥ 103 ॥
మమ ప్రీతికరం దివ్యం విష్ణుభక్తివివర్ధనం ।
జ్వరార్తానాం కుశాగ్రేణ మార్జయేత్కుష్ఠరోగిణాం ॥ 104 ॥
మృగమంగం యథాలింగం కవచేన తు సాధకః ।
మండలేన విశుద్ధ్యేత సర్వరోగైర్న సంశయః ॥ 105 ॥
మృతప్రజా చ యా నారీ జన్మవంధ్యా తథైవ చ ।
కన్యాదివంధ్యా యా నారీ తాసామంగం ప్రమార్జయేత్ ॥ 106 ॥
తాస్తాః సంవత్సరాదర్వాగ్ధ్రియేయుర్గర్భముత్తమం ।
పతివిద్వేషిణీ యా స్త్రీ అంగం తస్యాః ప్రమార్జయేత్ ॥ 107 ॥
తమేవ భజతే సా స్త్రీ పతిం కామవశం నయేత్ ।
అశ్వత్థే రాజవశ్యార్థం బిల్వమూలే సురూపభాక్ ॥ 108 ॥
పాలాశమూలే విద్యార్థీ తేజస్వ్యభిముఖో రవేః ।
కన్యార్థీ చండికాగేహే జపేచ్ఛత్రుభయాయ చ ॥ 109 ॥
శ్రీకామో విష్ణుగేహే చ ఉద్యానే స్త్రీర్వశీ భవేత్ ।
ఆరోగ్యార్థే స్వగేహే చ మోక్షార్థీ శైలమస్తకే ॥ 110 ॥
సర్వకామో విష్ణుగేహే మోక్షార్థీ యత్ర కుత్రచిత్ ।
జపారంభే తు హృదయం జపాంతే కవచం పఠేత్ ॥ 111 ॥
కిమత్ర బహునోక్తేన శృణు నారద తత్త్వతః ।
యం యం చింతయతే నిత్యం తం తం ప్రాప్నోతి నిశ్చితం ॥ 112 ॥
ఇతి శ్రీమద్వసిష్ఠసంహితాయాం బ్రహ్మనారదసంవాదే శ్రీ గాయత్రీ పంజర స్తోత్రం ।
Recite with devotion and pure heart
Regular practice brings spiritual benefits