śrīgāyatrī jaganmātā parabrahmasvarūpiṇī । paramārthapradā japyā brahmatejovivardhinī ॥ 1 ॥ brahmāstrarūpiṇī bhavyā trikāladhyeyarūpiṇī । trimūrtirūpā sarvajñā vedamātā manonmanī ॥ 2 ॥ bālikā taruṇī vṛddhā sūryamaṇḍalavāsinī । mandehadānavadhvaṃsakāriṇī sarvakāraṇā ॥ 3 ॥ haṃsārūḍhā vṛṣārūḍhā garuḍārohiṇī śubhā । ṣaṭkukṣistripadā śuddhā pañcaśīrṣā trilocanā ॥ 4 ॥ trivedarūpā trividhā trivargaphaladāyinī । daśahastā candravarṇā viśvāmitravarapradā ॥ 5 ॥ daśāyudhadharā nityā santuṣṭā brahmapūjitā । ādiśaktirmahāvidyā suṣumnākhyā sarasvatī ॥ 6 ॥ caturviṃśatyakṣarāḍhyā sāvitrī satyavatsalā । sandhyā rātriḥ prabhātākhyā sāṅkhyāyanakulodbhavā ॥ 7 ॥ sarveśvarī sarvavidyā sarvamantrādiravyayā । śuddhavastrā śuddhavidyā śuklamālyānulepanā ॥ 8 ॥ surasindhusamā saumyā brahmalokanivāsinī । praṇavapratipādyārthā praṇatoddharaṇakṣamā ॥ 9 ॥ jalāñjalisusantuṣṭā jalagarbhā jalapriyā । svāhā svadhā sudhāsaṃsthā śrauṣaḍvauṣaḍvaṣaṭkriyā ॥ 10 ॥ surabhiḥ ṣoḍaśakalā munibṛndaniṣevitā । yajñapriyā yajñamūrtiḥ sruksruvājyasvarūpiṇī ॥ 11 ॥ akṣamālādharā cā'kṣamālāsaṃsthā'kṣarākṛtiḥ । madhucchandaṛṣiprītā svacchandā chandasāṃ nidhiḥ ॥ 12 ॥ aṅgulīparvasaṃsthānā caturviṃśatimudrikā । brahmamūrtī rudraśikhā sahasraparamā'mbikā ॥ 13 ॥ viṣṇuhṛdgā cāgnimukhī śatamadhyā daśāvarā । sahasradalapadmasthā haṃsarūpā nirañjanā ॥ 14 ॥ carācarasthā caturā sūryakoṭisamaprabhā । pañcavarṇamukhī dhātrī candrakoṭiśucismitā ॥ 15 ॥ mahāmāyā vicitrāṅgī māyābījanivāsinī । sarvayantrātmikā sarvatantrarūpā jagaddhitā ॥ 16 ॥ maryādāpālikā mānyā mahāmantraphalapradā । ityaṣṭottaranāmāni gāyatryāḥ proktavānmuniḥ ॥ 17 ॥ etadaṣṭottaraśataṃ nityaṃ bhaktiyutaḥ śuciḥ । trisandhyaṃ yaḥ paṭhetsarvamantrasiddhimavāpnuyāt ॥ 18 ॥ iti śrīvasiṣṭha prokta śrī gāyatryaṣṭottaraśatanāma stotram ।