yājñavalkya uvāca – svāmin sarvajagannātha saṃśayo'sti mahānmama । catuḥṣaṣṭikalānāṃ ca pātakānāṃ ca tadvada ॥ 1 ॥ mucyate kena puṇyena brahmarūpaṃ kathaṃ bhavet । dehaśca devatārūpo mantrarūpo viśeṣataḥ । kramataḥ śrotumicchāmi kavacaṃ vidhipūrvakam ॥ 2 ॥ brahmovāca – asya śrīgāyatrīkavacasya brahmaviṣṇurudrā ṛṣayaḥ, ṛgyajuḥsāmātharvāṇi chandāṃsi, parabrahmasvarūpiṇī gāyatrī devatā, bhūrbījaṃ, bhuvaḥ śaktiḥ, svaḥ kīlakaṃ, śrīgāyatrīprītyarthe jape viniyogaḥ ॥ ṛṣyādinyāsaḥ – oṃ brahmaviṣṇurudra ṛṣibhyo namaḥ śirasi । ṛgyajuḥsāmātharvacchandobhyo namaḥ mukhe । parabrahmasvarūpiṇī gāyatrīdevatāyai namaḥ hṛdi । bhūḥ bījāya namaḥ guhye । bhuvaḥ śaktaye namaḥ pādayoḥ । svaḥ kīlakāya namaḥ nābhau । viniyogāya namaḥ sarvāṅge । karanyāsaḥ – oṃ bhūrbhuvaḥ svaḥ tatsavituriti aṅguṣṭhābhyāṃ namaḥ । oṃ bhūrbhuvaḥ svaḥ vareṇyamiti tarjanībhyāṃ namaḥ । oṃ bhūrbhuvaḥ svaḥ bhargo devasyeti madhyamābhyāṃ namaḥ । oṃ bhūrbhuvaḥ svaḥ dhīmahīti anāmikābhyāṃ namaḥ । oṃ bhūrbhuvaḥ svaḥ dhiyo yo naḥ iti kaniṣṭhikābhyāṃ namaḥ । oṃ bhūrbhuvaḥ svaḥ pracodayāditi karatala karapṛṣṭhābhyāṃ namaḥ ॥ aṅganyāsaḥ – oṃ bhūrbhuvaḥ svaḥ tatsavituriti hṛdayāya namaḥ । oṃ bhūrbhuvaḥ svaḥ vareṇyamiti śirase svāhā । oṃ bhūrbhuvaḥ svaḥ bhargo devasyeti śikhāyai vaṣaṭ । oṃ bhūrbhuvaḥ svaḥ dhīmahīti kavacāya hum । oṃ bhūrbhuvaḥ svaḥ dhiyo yo naḥ iti netratrayāya vauṣaṭ । oṃ bhūrbhuvaḥ svaḥ pracodayāditi astrāya phaṭ ॥ prārthanā – varṇāstrāṃ kuṇḍikāhastāṃ śuddhanirmalajyotiṣīm । sarvatattvamayīṃ vande gāyatrīṃ vedamātaram ॥ atha dhyānam – muktāvidrumahemanīladhavalacchāyairmukhaistrīkṣaṇai- -ryuktāmindunibaddharatnamukuṭāṃ tattvārthavarṇātmikām । gāyatrīṃ varadābhayāṅkuśakaśāṃ śūlaṃ kapālaṃ guṇaṃ śaṅkhaṃ cakramathāravindayugalaṃ hastairvahantīṃ bhaje ॥ atha kavacam – oṃ gāyatrī pūrvataḥ pātu sāvitrī pātu dakṣiṇe । brahmavidyā ca me paścāduttare māṃ sarasvatī ॥ 1 ॥ pāvakīṃ me diśaṃ rakṣetpāvakojjvalaśālinī । yātudhānīṃ diśaṃ rakṣedyātudhānagaṇārdinī ॥ 2 ॥ pāvamānīṃ diśaṃ rakṣetpavamānavilāsinī । diśaṃ raudrīmavatu me rudrāṇī rudrarūpiṇī ॥ 3 ॥ ūrdhvaṃ brahmāṇī me rakṣedadhastādvaiṣṇavī tathā । evaṃ daśa diśo rakṣet sarvato bhuvaneśvarī ॥ 4 ॥ brahmāstrasmaraṇādeva vācāṃ siddhiḥ prajāyate । brahmadaṇḍaśca me pātu sarvaśastrāstrabhakṣakaḥ ॥ 5 ॥ brahmaśīrṣastathā pātu śatrūṇāṃ vadhakārakaḥ । sapta vyāhṛtayaḥ pāntu sarvadā bindusamyutaḥ ॥ 6 ॥ vedamātā ca māṃ pātu sarahasyā sadaivatā । devīsūktaṃ sadā pātu sahasrākṣaradevatā ॥ 7 ॥ catuḥṣaṣṭikalā vidyā divyādyā pātu devatā । bījaśaktiśca me pātu pātu vikramadevatā ॥ 8 ॥ tatpadaṃ pātu me pādau jaṅghe me savituḥ padam । vareṇyaṃ kaṭideśaṃ tu nābhiṃ bhargastathaiva ca ॥ 9 ॥ devasya me tu hṛdayaṃ dhīmahīti galaṃ tathā । dhiyo me pātu jihvāyāṃ yaḥ padaṃ pātu locane ॥ 10 ॥ lalāṭe naḥ padaṃ pātu mūrdhānaṃ me pracodayāt । tadvarṇaḥ pātu mūrdhānaṃ sakāraḥ pātu phālakam ॥ 11 ॥ cakṣuṣī me vikārastu śrotraṃ rakṣettu kārakaḥ । nāsāpuṭe vakāro me rekārastu kapolayoḥ ॥ 12 ॥ ṇikārastvadharoṣṭhe ca yakārastūrdhva oṣṭhake । āsyamadhye bhakārastu rgokārastu kapolayoḥ ॥ 13 ॥ dekāraḥ kaṇṭhadeśe ca vakāraḥ skandhadeśayoḥ । syakāro dakṣiṇaṃ hastaṃ dhīkāro vāmahastakam ॥ 14 ॥ makāro hṛdayaṃ rakṣeddhikāro jaṭharaṃ tathā । dhikāro nābhideśaṃ tu yokārastu kaṭidvayam ॥ 15 ॥ guhyaṃ rakṣatu yokāra ūrū me naḥ padākṣaram । prakāro jānunī rakṣeccokāro jaṅghadeśayoḥ ॥ 16 ॥ dakāro gulphadeśaṃ tu yātkāraḥ pādayugmakam । jātavedeti gāyatrī tryambaketi daśākṣarā ॥ 17 ॥ sarvataḥ sarvadā pātu āpojyotīti ṣoḍaśī । idaṃ tu kavacaṃ divyaṃ bādhāśatavināśakam ॥ 18 ॥ catuḥṣaṣṭikalāvidyāsakalaiśvaryasiddhidam । japārambhe ca hṛdayaṃ japānte kavacaṃ paṭhet ॥ 19 ॥ strīgobrāhmaṇamitrādidrohādyakhilapātakaiḥ । mucyate sarvapāpebhyaḥ paraṃ brahmādhigacchati ॥ 20 ॥ puṣpāñjaliṃ ca gāyatryā mūlenaiva paṭhetsakṛt । śatasāhasravarṣāṇāṃ pūjāyāḥ phalamāpnuyāt ॥ 21 ॥ bhūrjapatre likhitvaitat svakaṇṭhe dhārayedyadi । śikhāyāṃ dakṣiṇe bāhau kaṇṭhe vā dhārayedbudhaḥ ॥ 22 ॥ trailokyaṃ kṣobhayetsarvaṃ trailokyaṃ dahati kṣaṇāt । putravān dhanavān śrīmān nānāvidyānidhirbhavet ॥ 23 ॥ brahmāstrādīni sarvāṇi tadaṅgasparśanāttataḥ । bhavanti tasya tulyāni kimanyatkathayāmi te ॥ 24 ॥ abhimantritagāyatrīkavacaṃ mānasaṃ paṭhet । tajjalaṃ pibato nityaṃ puraścaryāphalaṃ bhavet ॥ 25 ॥ laghusāmānyakaṃ mantraṃ mahāmantraṃ tathaiva ca । yo vetti dhāraṇāṃ yuñjan jīvanmuktaḥ sa ucyate ॥ 26 ॥ saptavyāhṛtayo vipra saptāvasthāḥ prakīrtitāḥ । saptajīvaśatā nityaṃ vyāhṛtī agnirūpiṇī ॥ 27 ॥ praṇave nityayuktasya vyāhṛtīṣu ca saptasu । sarveṣāmeva pāpānāṃ saṅkare samupasthite ॥ 28 ॥ śataṃ sahasramabhyarcya gāyatrī pāvanaṃ mahat । daśaśatamaṣṭottaraśataṃ gāyatrī pāvanaṃ mahat ॥ 29 ॥ bhaktimānyo bhavedvipraḥ sandhyākarma samācaret । kāle kāle tu kartavyaṃ siddhirbhavati nānyathā ॥ 30 ॥ praṇavaṃ pūrvamuddhṛtya bhūrbhuvaḥsvastathaiva ca । turyaṃ sahaiva gāyatrījapa evamudāhṛtam ॥ 31 ॥ turīyapādamutsṛjya gāyatrīṃ ca japeddvijaḥ । sa mūḍho narakaṃ yāti kālasūtramadhogatiḥ ॥ 32 ॥ mantrādau jananaṃ proktaṃ mantrānte mṛtasūtakam । ubhayordoṣanirmuktaṃ gāyatrī saphalā bhavet ॥ 33 ॥ mantrādau pāśabījaṃ ca mantrānte kuśabījakam । mantramadhye tu yā māyā gāyatrī saphalā bhavet ॥ 34 ॥ vācikaṃ tvekameva syādupāṃśu śatamucyate । sahasraṃ mānasaṃ proktaṃ trividhaṃ japalakṣaṇam ॥ 35 ॥ akṣamālāṃ ca mudrāṃ ca gurorapi na darśayet । japaṃ cākṣasvarūpeṇānāmikāmadhyaparvaṇi ॥ 36 ॥ anāmā madhyayā hīnā kaniṣṭhādikrameṇa tu । tarjanīmūlaparyantaṃ gāyatrījapalakṣaṇam ॥ 37 ॥ parvabhistu japedevamanyatra niyamaḥ smṛtaḥ । gāyatryā vedamūlatvādvedaḥ parvasu gīyate ॥ 38 ॥ daśabhirjanmajanitaṃ śatenaiva purā kṛtam । triyugaṃ tu sahasrāṇi gāyatrī hanti kilbiṣam ॥ 39 ॥ prātaḥ kāleṣu kartavyaṃ siddhiṃ vipro ya icchati । nādālaye samādhiśca sandhyāyāṃ samupāsate ॥ 40 ॥ aṅgulyagreṇa yajjaptaṃ yajjaptaṃ merulaṅghane । asaṅkhyayā ca yajjaptaṃ tajjaptaṃ niṣphalaṃ bhavet ॥ 41 ॥ vinā vastraṃ prakurvīta gāyatrī niṣphalā bhavet । vastrapucchaṃ na jānāti vṛthā tasya pariśramaḥ ॥ 42 ॥ gāyatrīṃ tu parityajya anyamantramupāsate । siddhānnaṃ ca parityajya bhikṣāmaṭati durmatiḥ ॥ 43 ॥ ṛṣiśchando devatākhyā bījaśaktiśca kīlakam । viniyogaṃ na jānāti gāyatrī niṣphalā bhavet ॥ 44 ॥ varṇamudrā dhyānapadamāvāhanavisarjanam । dīpaṃ cakraṃ na jānāti gāyatrī niṣphalā bhavet ॥ 45 ॥ śaktinyāsastathā sthānaṃ mantrasambodhanaṃ param । trividhaṃ yo na jānāti gāyatrī niṣphalā bhavet ॥ 46 ॥ pañcopacārakāṃścaiva homadravyaṃ tathaiva ca । pañcāṅgaṃ ca vinā nityaṃ gāyatrī niṣphalā bhavet ॥ 47 ॥ mantrasiddhirbhavejjātu viśvāmitreṇa bhāṣitam । vyāso vācaspatiṃ jīvastutā devī tapaḥ smṛtau ॥ 48 ॥ devī japtā sahasraṃ sā hyupapātakanāśinī । lakṣajāpye tathā tacca mahāpātakanāśinī ॥ 49 ॥ koṭijāpyena rājendra yadicchati tadāpnuyāt । na deyaṃ paraśiṣyebhyo hyabhaktebhyo viśeṣataḥ । śiṣyebhyo bhaktiyuktebhyo hyanyathā mṛtyumāpnuyāt ॥ 50 ॥ iti śrī gāyatrī kavacam ।