uṣaḥkālagamyāmudātta svarūpāṃ akārapraviṣṭāmudārāṅgabhūṣām । ajeśādi vandyāmajārcāṅgabhājāṃ anaupamyarūpāṃ bhajāmyādisandhyām ॥ 1 ॥ sadā haṃsayānāṃ sphuradratnavastrāṃ varābhītihastāṃ khagāmnāyarūpām । sphuratsvādhikāmakṣamālāṃ ca kumbhaṃ dadhanāmahaṃ bhāvaye pūrvasandhyām ॥ 2 ॥ pravāla prakṛṣṭāṅga bhūṣojjvalantīṃ kirīṭollasadratnarājaprabhātām । viśālorubhāsāṃ kucāśleṣahārāṃ bhaje bālakāṃ brahmavidyāṃ vinodām ॥ 3 ॥ sphuraccandrakāntāṃ śaraccandravaktrāṃ mahācandrakāntādri pīnastanāḍhyām । triśūlākṣahastāṃ trinetrasya patnīṃ vṛṣārūḍhapādāṃ bhaje madhyasandhyām ॥ 4 ॥ ṣaḍādhārarūpāṃ ṣaḍādhāragamyāṃ ṣaḍadhvātiśuddhāṃ yajurvedarūpām । himādreḥ sutāṃ kundadantāvabhāsāṃ maheśārdhadehāṃ bhaje madhyasandhyām ॥ 5 ॥ suṣumnāntarasthāṃ sudhāsevyamānā- -mukārāntarasthāṃ dvitīyasvarūpām । sahasrārkaraśmi prabhāsatrinetrāṃ sadā yauvanāḍhyāṃ bhaje madhyasandhyām ॥ 6 ॥ sadāsāmagānāṃ priyāṃ śyāmalāṅgīṃ akārāntarasthāṃ karollāsicakrām । gadāpadmahastāṃ dhvanatpāñcajanyāṃ khageśopaviṣṭāṃ bhajemāstasandhyām ॥ 7 ॥ pragalbhasvarūpāṃ sphuratkaṅkaṇāḍhyāṃ ahaṃlambamānastanaprāntahāram । mahānīlaratnaprabhākuṇḍalābhyāṃ sphuratsmeravaktrāṃ bhaje turyasandhyām ॥ 8 ॥ sadātattvamasyādi vākyaikagamyāṃ mahāmokṣamārgaika pātheyarūpām । mahāsiddhavidyādharaiḥ sevyamānāṃ bhaje'haṃ bhavottāraṇīṃ turyasandhyām ॥ 9 ॥ hṛdambhojamadhye parāmnāyamīḍe sukhāsīnasadrājahaṃsāṃ manojñām । sadā hemabhāsāṃ trayīvidyamadhyāṃ bhajāma stuvāmo vadāma smarāmaḥ ॥ 10 ॥ sadā tatpadaistūyamānāṃ savitrīṃ vareṇyāṃ mahābhargarūpāṃ trinetrām । sadā devadevādi devasya patnīṃ ahaṃ dhīmahītyādi pādaika juṣṭām ॥ 11 ॥ anāthaṃ daridraṃ durācārayuktaṃ śaṭhaṃ sthūlabuddhiṃ paraṃ dharmahīnam । trisandhyāṃ japadhyānahīnaṃ maheśīṃ paraṃ cintayāmi prasīda tvameva ॥ 12 ॥ itīdaṃ bhujaṅgaṃ paṭhedyastu bhaktyā samādhāya citte sadā śrībhavānīm । trisandhyasvarūpāṃ trilokaikavandyāṃ sa mukto bhavetsarvapāpairajasram ॥ 13 ॥ iti śrī gāyatrī bhujaṅga stotram ।