Sri Gayatri Mantra Kavacham

nārada uvāca । svāmin sarvajagannātha saṃśayo'sti mama prabho । catuḥṣaṣṭikalābhijña pātakādyogavidvara ॥ 1 ॥ mucyate kena puṇyena brahmarūpaḥ kathaṃ bhavet । dehaśca devatārūpo mantrarūpo viśeṣataḥ ॥ 2 ॥ karma tacchrotumicchāmi nyāsaṃ ca vidhipūrvakam । ṛṣiśchando'dhidaivaṃ ca dhyānam ca vidhivadvibho ॥ 3 ॥ śrīnārāyaṇa uvāca । astyekaṃ paramaṃ guhyaṃ gāyatrīkavacaṃ tathā । paṭhanāddhāraṇānmartyaḥ sarvapāpaiḥ pramucyate ॥ 4 ॥ sarvānkāmānavāpnoti devīrūpaśca jāyate । gāyatrīkavacasyāsya brahmaviṣṇumaheśvarāḥ ॥ 5 ॥ ṛṣayo ṛgyajuḥsāmātharvaśchandāṃsi nārada । brahmarūpā devatoktā gāyatrī paramā kalā ॥ 6 ॥ tadbījaṃ bharga ityeṣā śaktiruktā manīṣibhiḥ । kīlakaṃ ca dhiyaḥ proktaṃ mokṣārthe viniyojanam ॥ 7 ॥ caturbhirhṛdayaṃ proktaṃ tribhirvarṇaiḥ śiraḥ smṛtam । caturbhiḥ syācchikhā paścāt tribhistu kavacaṃ smṛtam ॥ 8 ॥ caturbhirnetramuddiṣṭaṃ caturbhiḥ syāttadastrakam । atha dhyānam pravakṣyāmi sādhakābhīṣṭadāyakam ॥ 9 ॥ muktāvidrumahemanīladhavalacchāyairmukhaistrīkṣaṇai- -ryuktāmindunibaddharatnamukuṭāṃ tattvārthavarṇātmikām । gāyatrīṃ varadā'bhayāṅkuśakaśāḥ śubhraṃ kapālaṃ guṇaṃ śaṅkhaṃ cakramathāravindayugalaṃ hastairvahantīṃ bhaje ॥ 10 ॥ gāyatrī pūrvataḥ pātu sāvitrī pātu dakṣiṇe । brahmasandhyā tu me paścāduttarāyāṃ sarasvatī ॥ 11 ॥ pārvatī me diśaṃ rakṣetpāvakīṃ jalaśāyinī । yātudhānī diśaṃ rakṣedyātudhānabhayaṅkarī ॥ 12 ॥ pāvamānī diśaṃ rakṣetpavamānavilāsinī । diśaṃ raudrīṃ ca me pātu rudrāṇī rudrarūpiṇī ॥ 13 ॥ ūrdhvaṃ brahmāṇi me rakṣedadhastādvaiṣṇavī tathā । evaṃ daśa diśo rakṣetsarvāṅgaṃ bhuvaneśvarī ॥ 14 ॥ tatpadaṃ pātu me pādau jaṅghe me savituḥ padam । vareṇyaṃ kaṭideśe tu nābhiṃ bhargastathaiva ca ॥ 15 ॥ devasya me taddhṛdayaṃ dhīmahīti ca gallayoḥ । dhiyaḥ padaṃ ca me netre yaḥ padaṃ me lalāṭakam ॥ 16 ॥ naḥ pātu me padaṃ mūrdhni śikhāyāṃ me pracodayāt । tatpadaṃ pātu mūrdhānaṃ sakāraḥ pātu bhālakam ॥ 17 ॥ cakṣuṣī tu vikārārṇastukārastu kapolayoḥ । nāsāpuṭaṃ vakārārṇo rekārastu mukhe tathā ॥ 18 ॥ ṇikāra ūrdhvamoṣṭhaṃ tu yakārastvadharoṣṭhakam । āsyamadhye bhakārārṇo rgokāraścubuke tathā ॥ 19 ॥ dekāraḥ kaṇṭhadeśe tu vakāraḥ skandhadeśakam । syakāro dakṣiṇaṃ hastaṃ dhīkāro vāmahastakam ॥ 20 ॥ makāro hṛdayaṃ rakṣeddhikāra udare tathā । dhikāro nābhideśe tu yokārastu kaṭiṃ tathā ॥ 21 ॥ guhyaṃ rakṣatu yokāra ūrū dvau naḥ padākṣaram । prakāro jānunī rakṣeccokāro jaṅghadeśakam ॥ 22 ॥ dakāraṃ gulphadeśe tu yakāraḥ padayugmakam । takāravyañjanaṃ caiva sarvāṅgaṃ me sadā'vatu ॥ 23 ॥ idaṃ tu kavacaṃ divyaṃ bādhāśatavināśanam । catuḥṣaṣṭikalāvidyādāyakaṃ mokṣakārakam ॥ 24 ॥ mucyate sarvapāpebhyaḥ paraṃ brahmādhigacchati । paṭhanācchravaṇādvāpi gosahasraphalaṃ labhet ॥ 25 ॥ iti śrīdevībhāgavate mahāpurāṇe dvādaśaskandhe śrī gāyatrī mantrakavacaṃ nāma tṛtīyo'dhyāyaḥ ॥

Recite with devotion and pure heart

Regular practice brings spiritual benefits

More stotras of Gayatri: