bhagavantaṃ devadevaṃ brahmāṇaṃ parameṣṭhinam । vidhātāraṃ viśvasṛjaṃ padmayoniṃ prajāpatim ॥ 1 ॥ śuddhasphaṭikasaṅkāśaṃ mahendraśikharopamam । baddhapiṅgajaṭājūṭaṃ taḍitkanakakuṇḍalam ॥ 2 ॥ śaraccandrābhavadanaṃ sphuradindīvarekṣaṇam । hiraṇmayaṃ viśvarūpamupavītājināvṛtam ॥ 3 ॥ mauktikābhākṣavalayastantrīlayasamanvitaḥ । karpūroddhūlitatanuṃ sraṣṭāraṃ netragocaram ॥ 4 ॥ vinayenopasaṅgamya śirasā praṇipatya ca । nāradaḥ paripapraccha devarṣigaṇamadhyagaḥ ॥ 5 ॥ nārada uvāca । bhagavan devadeveśa sarvajña karuṇānidhe । śrotumicchāmi tattatvaṃ bhogamokṣaikasādhanam ॥ 6 ॥ aiśvaryasya samagrasya phaladaṃ dvandvavarjitam । brahmahatyādipāpaghnaṃ pāpādyaribhayāpaham ॥ 7 ॥ yadekaṃ niṣkalaṃ sūkṣmaṃ nirañjanamanāmayam । yatte priyatamaṃ loke tanme brūhi pitarmama ॥ 8 ॥ brahmovāca । śṛṇu nārada vakṣyāmi brahmamūlaṃ sanātanam । sṛṣṭyādau manmukhe kṣiptaṃ devadevena viṣṇunā ॥ 9 ॥ prapañcabījamityāhurutpattisthitihetukam । purā mayā tu kathitaṃ kaśyapāya sudhīmate ॥ 10 ॥ sāvitrīpañjaraṃ nāma rahasyaṃ nigamatraye । ṛṣyādikaṃ ca digvarṇaṃ sāṅgāvaraṇakaṃ kramāt ॥ 11 ॥ vāhanāyudhamantrāstramūrtidhyānasamanvitam । stotraṃ śṛṇu pravakṣyāmi tava snehācca nārada ॥ 12 ॥ brahmaniṣṭhāya deyaṃ syādadeyaṃ yasya kasyacit । ācamya niyataḥ paścādātmadhyānapuraḥsaram ॥ 13 ॥ omityādau vicintyātha vyomahemābjasaṃsthitam । dharmakandagatajñānādaiśvaryāṣṭadalānvitam ॥ 14 ॥ vairāgyakarṇikādhīnāṃ praṇavagrahamadhyagām । brahmavedisamāyuktāṃ caitanyapuramadhyagām ॥ 15 ॥ tattvahaṃsasamākīrṇāṃ śabdapīṭhe susaṃsthitām । nādabindukalātītāṃ gopurairapi saṃvṛtām ॥ 16 ॥ vidyā'vidyā'mṛtatvādi prakārairapisaṃvṛtām । nigamārgalasañchannāṃ nirguṇadvāravāṭikām ॥ 17 ॥ caturvargaphalopetāṃ mahākalpavanairvṛtām । sāndrānandasudhāsindhunigamadvāravāṭikām ॥ 18 ॥ dhyānadhāraṇayogādi tṛṇagulmalatāvṛtām । sadasaccitsvarūpākhya mṛgapakṣisamākulām ॥ 19 ॥ vidyā'vidyāvicārākhyalokālokācalāvṛtām । pañcīkaraṇapañcotthabhūtatattvaniveditām ॥ 20 ॥ avikārasamāśliṣṭanijadhyānaguṇāvṛtām । vedopaniṣadarthākhya devarṣigaṇasevitām ॥ 21 ॥ itihāsagrahagaṇaiḥ sadārairabhivanditām । gāthāpsarobhiryakṣaiśca gaṇakinnarasevitām ॥ 22 ॥ nārasiṃhamukhaiścāpi puruṣaiḥ kalpacāraṇaiḥ । kṛtagānavinodādikathālāpanatatparām ॥ 23 ॥ tadityavāṅmanogamyatejorūpadharāṃ parām । jagataḥ prasavitrīṃ tāṃ savituḥ sṛṣṭikāriṇīm ॥ 24 ॥ vareṇyamityannamayīṃ puruṣārthaphalapradām । avidyāvarṇavarjyāṃ ca tejovadbhargasañjñikām ॥ 25 ॥ devasya saccidānanda parabrahmarasātmikām । dhīmahyahaṃ sa vai tadvadbrahmādvaitasvarūpiṇīm ॥ 26 ॥ dhiyo yo nastu savitā pracodayādupāsitām । paro'sau savitā sākṣāddevonirharaṇāya ca ॥ 27 ॥ parorajasa ityādi parabrahmātmasāvadom । āpo jyotiriti dvābhyāṃ pāñcabhautikasañjñikām ॥ 28 ॥ raso'mṛtaṃ brahmapadaistāṃ nityāṃ tāpinīṃ parām । bhūrbhuvaḥsuvarityetairnigamatvaprakāśikām ॥ 29 ॥ maharjanastapaḥsatyalokoparisusaṃsthitām । tādṛgasyā virāḍrūpaṃ rahasyaṃ pravadāmyaham ॥ 30 ॥ vyomakeśākulākāśa dyokirīṭavirājitām । taṭidbhrukuṭinākrāntavidhiviṣṇuśivārcitām ॥ 31 ॥ gurubhārgavakarṇāntāṃ somasūryāgnilocanām । iḍāpiṅgalasauṣumṇa vāmanāsāpuṭānvitām ॥ 32 ॥ sandhyādviroṣṭhapuṭitāṃ lasadvāgbhavajihvikām । sandhyāsau dyumaṇeḥ kaṇṭhalasadbāhusamanvitām ॥ 33 ॥ parjanyahṛdayāsaktavasusustanamaṇḍalām । ākāśodaravitrastanābhyavāntaradeśikām ॥ 34 ॥ prājāpatyākhyajaghanāmindrāṇīkaṭisañjñikām । ūrū malayamerubhyāṃ śobhamānāṃ suradviṣam ॥ 35 ॥ jānunī jahnukuśikau vaiśvadevalasadbhujām । ayanadvayajaṅghādyasurādyapitṛsañjñikām ॥ 36 ॥ padāṅghrinakharomālibhūtaladrumalāñchitām । graharāśyarkṣadevarṣimūrtiṃ ca parasañjñikām ॥ 37 ॥ tithimāsartuvarṣākhyasuketunimiṣātmikām । ahorātrārdhamāsākhyāmāryāṃ candramasātmikām ॥ 38 ॥ māyākalpitavaicitryasandhyācchādanasaṃvṛtām । jvalatkālānalaprakhyāṃ taḍitkoṭisamaprabhām ॥ 39 ॥ koṭisūryapratīkāśāṃ candrakoṭisuśītalām । sudhāmaṇḍalamadhyasthāṃ sāndrānandāmṛtātmikām ॥ 40 ॥ vāgatītāṃ manoramyāṃ varadāṃ vedamātaram । carācaramayīṃ nityāṃ brahmākṣarasamanvitām ॥ 41 ॥ dhyātvā svātmanyabhedena brahmapañjaramārabhet । pañjarasya ṛṣiścāhaṃ chando vikṛtirucyate ॥ 42 ॥ devatā ca paro haṃsaḥ parabrahmādhidevatā । praṇavo bījaśaktiḥ syādoṃ kīlakamudāhṛtam ॥ 43 ॥ tattattvaṃ dhīmahi kṣetraṃ dhiyo'straṃ yaḥ paraṃ padam । mantramāpo jyotiriti yonirhaṃsaḥ savedhakam ॥ 44 ॥ viniyogastu siddhyarthaṃ puruṣārthacatuṣṭaye । tatastairaṅgaṣaṭkaṃ syāttaireva vyāpakatrayam ॥ 45 ॥ pūrvoktadevatāṃ dhyāyetsākāraguṇasamyutām । pañcavaktrāṃ daśabhujāṃ tripañcanayanairyutām ॥ 46 ॥ muktāvidrumasauvarṇāmoṣadhīśasamānanām । vāṇīṃ parāṃ ramāṃ māyāṃ cāmarairdarpaṇairyutām ॥ 47 ॥ ṣaḍaṅgadevatāmantrai rūpādyavayavātmikām । mṛgendravṛṣapakṣīndramṛgahaṃsāsanasthitām ॥ 48 ॥ ardhendubaddhamukuṭakirīṭamaṇikuṇḍalām । ratnatāṭaṅkamāṅgalyaparagraiveyanūpurām ॥ 49 ॥ aṅgulīyakakeyūrakaṅkaṇādyairalaṅkṛtām । divyasragvastrasañchannaravimaṇḍalamadhyagām ॥ 50 ॥ varā'bhayābjayugalāṃ śaṅkhacakragadāṅkuśām । śubhraṃ kapālaṃ dadhatīṃ vahantīmakṣamālikām ॥ 51 ॥ gāyatrīṃ varadāṃ devīṃ sāvitrīṃ vedamātaram । ādityapathagāṃ devīṃ smaredbrahmasvarūpiṇīm ॥ 52 ॥ vicitramantrajananīṃ smaredvidyāṃ sarasvatīm । tripadā ṛṅmayī pūrvā mukhī brahmāstrasañjñikā ॥ 53 ॥ caturviṃśatitattvākhyā pātu prācīṃ diśaṃ mama । catuṣpādā yajurbrahmadaṇḍākhyā pātu dakṣiṇā ॥ 54 ॥ ṣaṭtriṃśattattvayuktā sā pātu me dakṣiṇāṃ diśam । pratyaṅmukhī pañcapadī pañcāśattattvarūpiṇī ॥ 55 ॥ pātu pratīcīmaniśaṃ sāmabrahmaśiroṅkitā । saumyā brahmasvarūpākhyā sātharvāṅgirasātmikā ॥ 56 ॥ udīcīṃ ṣaṭpadā pātu catuḥṣaṣṭikalātmikā । pañcāśattattvaracitā bhavapādā śatākṣarī ॥ 57 ॥ vyomākhyā pātu me cordhvaṃ diśaṃ vedāṅgasaṃsthitā । vidyunnibhā brahmasañjñā mṛgārūḍhā caturbhujā ॥ 58 ॥ cāpeṣucarmāsidharā pātu me pāvakīṃ diśam । brāhmī kumārī gāyatrī raktāṅgī haṃsavāhinī ॥ 59 ॥ bibhratkamaṇḍalvakṣasraksruvānme pātu nairṛtīm । caturbhujā vedamātā śuklāṅgī vṛṣavāhinī ॥ 60 ॥ varā'bhayakapālākṣasragviṇī pātu mārutīm । śyāmā sarasvatī vṛddhā vaiṣṇavī garuḍāsanā ॥ 61 ॥ śaṅkhārābjābhayakarā pātu śaivīṃ diśaṃ mama । caturbhujā vedamātā gaurāṅgī siṃhavāhanā ॥ 62 ॥ varābhayābjayugalairbhujaiḥ pātvadharāṃ diśam । tattatpārśvasthitāḥ svasvavāhanāyudhabhūṣaṇāḥ ॥ 63 ॥ svasvadikṣu sthitāḥ pāntu grahaśaktyaṅgadevatāḥ । mantrādhidevatārūpā mudrādhiṣṭhānadevatāḥ ॥ 64 ॥ vyāpakatvena pātvasmānāpahṛttalamastakī । tatpadaṃ me śiraḥ pātu phālaṃ me savituḥpadam ॥ 65 ॥ vareṇyaṃ me dṛśau pātu śrutiṃ bhargaḥ sadā mama । ghrāṇaṃ devasya me pātu pātu dhīmahi me mukham ॥ 66 ॥ jihvāṃ mama dhiyaḥ pātu kaṇṭhaṃ me pātu yaḥpadam । naḥ padaṃ pātu me skandhau bhujau pātu pracodayāt ॥ 67 ॥ karau me ca paraḥ pātu pādau me rajaso'vatu । sā me nābhiṃ sadā pātu kaṭiṃ vai pātumevadom ॥ 68 ॥ omāpaḥ sakthinī pātu guhyaṃ jyotiḥ sadā mama । ūrū mama rasaḥ pātu jānunī amṛtaṃ mama ॥ 69 ॥ jaṅghe brahmapadaṃ pātu gulphau bhūḥ pātu me sadā । pādau mama bhuvaḥ pātu suvaḥ pātvakhilaṃ vapuḥ ॥ 70 ॥ romāṇi me mahaḥ pātu lomakaṃ pātu me janaḥ । prāṇāṃśca dhātutattvāni tadīśaḥ pātu me tapaḥ ॥ 71 ॥ satyaṃ pātu mamāyūṃṣi haṃso vṛddhiṃ ca pātu me । śuciṣatpātu me śukraṃ vasuḥ pātu śriyaṃ mama ॥ 72 ॥ matiṃ pātvantarikṣasaddhotā dānaṃ ca pātu me । vediṣatpātu me vidyāmatithiḥ pātu me gṛham ॥ 73 ॥ dharmaṃ duroṇasatpātu nṛṣatpātu vadhūṃ mama । varasatpātu me māyā'mṛtasatpātu me sutān ॥ 74 ॥ vyomasatpātu me bandhūn bhrātṝnabjaśca pātu me । paśūnme pātu gojāśca ṛtajāḥ pātu me bhuvam ॥ 75 ॥ sarvaṃ me adrijā pātu yānaṃ me pātvṛtaṃ sadā । mama sarvaṃ bṛhatpātu vibhuroṃ pātu sarvadā ॥ 76 ॥ anuktamatha yatsthānaṃ śarīrāntarbahiśca yat । tatsarvaṃ pātu me nityaṃ haṃsaḥ so'hamaharniśam ॥ 77 ॥ idaṃ tu kathitaṃ samyaṅmayā te brahmapañjaram । sandhyayoḥ pratyahaṃ bhaktyā japakāle viśeṣataḥ ॥ 78 ॥ dhārayeddvijavaryo yaḥ śrāvayedvā samāhitaḥ । sa viṣṇuḥ sa śivaḥ so'haṃ so'kṣaraḥ sa virāṭ svarāṭ ॥ 79 ॥ śatākṣarātmakaṃ devyā nāmāṣṭāviṃśatiḥ śatam । śṛṇu vakṣyāmi tatsarvamati guhyaṃ sanātanam ॥ 80 ॥ bhūtidā bhuvanā vāṇī vasudhā sumanā mahī । turyā śobhā dvijaprītā kāmadhuk bhaktasiddhidā ॥ 81 ॥ viśvā ca vijayā vedyā sandhyā brāhmī sarasvatī । hariṇī jananī nandā savisargā tapasvinī ॥ 82 ॥ payasvinī satī tyāgā caindavī satyavī rasā । śaivī lāsyapriyā tuṣṭā japyā satyā satī dhruvā ॥ 83 ॥ bhaktavaśyā ca gāyatrī bhīmā viṣṇupriyā jayā । viśvā turyā parā recyā nirghṛṇī yaminī bhavā ॥ 84 ॥ govedyā ca jariṣṭhā ca skandinī dhīrmatirhimā । anantā ravimadhyasthā sāvitrī brāhmaṇī trayī ॥ 85 ॥ aparṇā caṇḍikā dhyeyā manuśreṣṭhā ca sātvikī । bhīṣaṇā yoginī pakṣī nadī prajñā ca codinī ॥ 86 ॥ dhaninī yāminī padmā rohiṇī ramaṇī ṛṣiḥ । brahmiṣṭhā bhaktigamyā ca kāmadā baladā vasuḥ ॥ 87 ॥ ādyā varṇamayī hṛdyā lakṣmīḥ śāntā ramā'cyutā । senāmukhī sāmamayī bahulā doṣavarjitā ॥ 88 ॥ sarvakāmadughā somodbhavā'haṅkāravarjitā । tatparā sukhadā siddhiḥ vedyā pūjyā prasādinī ॥ 89 ॥ vipraprasādinī pūjyā viśvavandyā vinodinī । dvipadā ca catuṣpādā tripadā caiva ṣaṭpadā ॥ 90 ॥ aṣṭāpadī navapadī sā sahasrākṣarātmikā । amoghaphaladā'nādiḥ sarvā sarvāṅgasundarī ॥ 91 ॥ śarvāṇī vaiṣṇavī candracūḍā triṇayanā kṣamā । viśvamātā trayīsārā trikālajñānarūpiṇī ॥ 92 ॥ candramaṇḍalamadhyasthā bhaktapāpavināśinī । varadā chandasāṃ mātā brāhmaṇyapadadāyinī ॥ 93 ॥ ya idaṃ paramaṃ guhyaṃ sāvitrīmantrapañjaram । nāmāṣṭaviṃśatiśataṃ śṛṇuyācchrāvayetpaṭhet ॥ 94 ॥ martyānāmamṛtattvāya bhītānāmabhayāya ca । mokṣāya ca mumukṣūṇāṃ śrīkāmānāṃ śriye sadā ॥ 95 ॥ vijayāya yuyutsūnāṃ vyādhitānāmarogakṛt । vaśyāya vaśyakāmānāṃ vidyāyai vedakāminām ॥ 96 ॥ draviṇāya daridrāṇāṃ pāpināṃ pāpaśāntaye । vādināṃ vādavijaye kavīnāṃ kavitāpradam ॥ 97 ॥ annāya kṣudhitānāṃ ca svargāya svargamicchatām । paśubhyaḥ paśukāmānāṃ putrebhyaḥ putrakāṅkṣiṇām ॥ 98 ॥ kleśināṃ śokaśāntyarthaṃ nṛṇāṃ śatrubhayāya ca । rājavaśyāya draṣṭavyaṃ pañjaraṃ nṛpasevinām ॥ 99 ॥ bhaktyarthaṃ viṣṇubhaktānāṃ viṣṇoḥ sarvāntarātmani । nāyakaṃ vidhisṛṣṭānāṃ śāntaye bhavati dhruvam ॥ 100 ॥ niḥspṛhāṇāṃ nṛṇāṃ muktiḥ śāśvatī bhavatī dhruvam । japyaṃ trivargasamyuktaṃ gṛhasthena viśeṣataḥ ॥ 101 ॥ munīnāṃ jñānasiddhyarthaṃ yatīnāṃ mokṣasiddhaye । udyantaṃ candrakiraṇamupasthāya kṛtāñjaliḥ ॥ 102 ॥ kānane vā svabhavane tiṣṭhañchuddho japedidam । sarvānkāmānavāpnoti tathaiva śivasannidhau ॥ 103 ॥ mama prītikaraṃ divyaṃ viṣṇubhaktivivardhanam । jvarārtānāṃ kuśāgreṇa mārjayetkuṣṭharogiṇām ॥ 104 ॥ mṛgamaṅgaṃ yathāliṅgaṃ kavacena tu sādhakaḥ । maṇḍalena viśuddhyeta sarvarogairna saṃśayaḥ ॥ 105 ॥ mṛtaprajā ca yā nārī janmavandhyā tathaiva ca । kanyādivandhyā yā nārī tāsāmaṅgaṃ pramārjayet ॥ 106 ॥ tāstāḥ saṃvatsarādarvāgdhriyeyurgarbhamuttamam । patividveṣiṇī yā strī aṅgaṃ tasyāḥ pramārjayet ॥ 107 ॥ tameva bhajate sā strī patiṃ kāmavaśaṃ nayet । aśvatthe rājavaśyārthaṃ bilvamūle surūpabhāk ॥ 108 ॥ pālāśamūle vidyārthī tejasvyabhimukho raveḥ । kanyārthī caṇḍikāgehe japecchatrubhayāya ca ॥ 109 ॥ śrīkāmo viṣṇugehe ca udyāne strīrvaśī bhavet । ārogyārthe svagehe ca mokṣārthī śailamastake ॥ 110 ॥ sarvakāmo viṣṇugehe mokṣārthī yatra kutracit । japārambhe tu hṛdayaṃ japānte kavacaṃ paṭhet ॥ 111 ॥ kimatra bahunoktena śṛṇu nārada tattvataḥ । yaṃ yaṃ cintayate nityaṃ taṃ taṃ prāpnoti niścitam ॥ 112 ॥ iti śrīmadvasiṣṭhasaṃhitāyāṃ brahmanāradasaṃvāde śrī gāyatrī pañjara stotram ।