tatkāraṃ campakaṃ pītaṃ brahmaviṣṇuśivātmakam । śāntaṃ padmāsanārūḍhaṃ dhyāyet svasthāna saṃsthitam ॥ 1 ॥ sakāraṃ cintayecchāntaṃ atasīpuṣpasannibham । padmamadhyasthitaṃ kāmyamupapātakanāśanam ॥ 2 ॥ vikāraṃ kapilaṃ cintyaṃ kamalāsanasaṃsthitam । dhyāyecchāntaṃ dvijaśreṣṭho mahāpātakanāśanam ॥ 3 ॥ tukāraṃ cintayetprājña indranīlasamaprabham । nirdahetsarvaduḥkhastu graharogasamudbhavam ॥ 4 ॥ vakāraṃ vahnidīptābhaṃ cintayitvā vicakṣaṇaḥ । bhrūṇahatyākṛtaṃ pāpaṃ takṣaṇādeva nāśayet ॥ 5 ॥ rekāraṃ vimalaṃ dhyāyecchuddhasphaṭikasannibham । pāpaṃ naśyati tat kṣipramagamyāgamanodbhavam ॥ 6 ॥ ṇikāraṃ cintayedyogī vidyudvallīsamaprabham । abhakṣyabhakṣajaṃ pāpaṃ tatkṣaṇādeva naśyati ॥ 7 ॥ yaṅkāraṃ tārakāvarṇaminduśekharabhūṣitam । yogināṃ varadaṃ dhyāyedbrahmahatyāghanāśanam ॥ 8 ॥ bhakāraṃ kṛṣṇavarṇaṃ tu nīlameghasamaprabham । dhyātvā puruṣahatyādi pāpaṃ nāśayati dvijaḥ ॥ 9 ॥ rgokāraṃ raktavarṇaṃ tu kamalāsana saṃsthitam । taṃ gohatyākṛtaṃ pāpaṃ nāśayecca vicintayan ॥ 10 ॥ dekāraṃ makaraśyāmaṃ kamalāsanasaṃsthitam । cintayetsatataṃ yogī strīhatyādahanaṃ param ॥ 11 ॥ vakāraṃ śuklavarṇaṃ tu jājīpuṣpasamaprabham । guruhatyā kṛtaṃ pāpaṃ dhyātvā dahati tatkṣaṇāt ॥ 12 ॥ syakāraṃ ca tadā pītaṃ suvarṇa sadṛśaprabham । manasā cintitaṃ pāpaṃ dhyātvā dahati niścayam ॥ 13 ॥ dhīkāraṃ cintayecchubhraṃ kundapuṣpasamaprabham । pitṛmātṛvadhātpāpānmucyate nātra saṃśayaḥ ॥ 14 ॥ makāraṃ padmarāgābhāṃ cintayeddīptatejasam । pūrvajanmārjitaṃ pāpaṃ tatkṣaṇādeva naśyati ॥ 15 ॥ hikāraṃ śaṅkhavarṇaṃ ca pūrṇacandrasamaprabham । aśeṣapāpadahanaṃ dhyāyennityaṃ vicakṣaṇaḥ ॥ 16 ॥ dhikāraṃ pāṇḍuraṃ dhyāyetpadmasyoparisaṃsthitam । pratigrahakṛtaṃ pāpaṃ tatkṣaṇādeva naśyati ॥ 17 ॥ yokāraṃ raktavarṇaṃ tu indragopasamaprabham । dhyātvā prāṇivadhaṃ pāpaṃ dahatyagnirivendhanam ॥ 18 ॥ dvitīyaccaiva yaḥ prākto yokāro raktasannibhaḥ । nirdahetsarvapāpāni nānyaiḥ pāpaiśca lipyate ॥ 19 ॥ nakāraṃ tu mukhaṃ pūrvamādityodayasannibham । sakṛddhyātvā dvijaśreṣṭha sagacchedaiśvaraṃ param ॥ 20 ॥ nīlotpaladalaśyāmaṃ prakāraṃ dakṣiṇānanam । sakṛddhyātvā dvijaśreṣṭha sagacchedvaiṣṇavaṃ padam ॥ 21 ॥ śvetavarṇaṃ tu tatpītaṃ cokāraṃ paścimānanam । sakṛddhyātvā dvijaśreṣṭha rudreṇa sahamodate ॥ 22 ॥ śuklavarṇendusaṅkāśaṃ dakāraṃ cottarānanam । sakṛddhyātvā dvijaśreṣṭha sagacchedbrahmaṇaḥpadam ॥ 23 ॥ yātkārastu śiraḥ proktaścaturthavadanaprabhaḥ । pratyakṣa phalado brahmā viṣṇu rudrātmakaḥ smṛtaḥ ॥ 24 ॥ evaṃ dhyātvā tu medhāvī japaṃ homaṃ karoti yaḥ । na bhavetpātakaṃ tasya amṛtaṃ kiṃ na vidyate । sākṣādbhavatyasau brahmā svayambhūḥ parameśvaraḥ ॥ 25 ॥ iti śrī gāyatryakṣaravallī stotram ।