കമലാംബികാ സ്തോത്രം

ബന്ധൂകദ്യുതിമിന്ദുബിംബവദനാം ബൃന്ദാരകൈർവന്ദിതാം

മന്ദാരാദി സമർചിതാം മധുമതീം മന്ദസ്മിതാം സുന്ദരീം ।

ബന്ധച്ഛേദനകാരിണീം ത്രിനയനാം ഭോഗാപവർഗപ്രദാം

വന്ദേഽഹം കമലാംബികാമനുദിനം വാഞ്ഛാനുകൂലാം ശിവാം ॥ 1 ॥

ശ്രീകാമേശ്വരപീഠമധ്യനിലയാം ശ്രീരാജരാജേശ്വരീം

ശ്രീവാണീപരിസേവിതാംഘ്രിയുഗലാം ശ്രീമത്കൃപാസാഗരാം ।

ശോകാപദ്ഭയമോചിനീം സുകവിതാനന്ദൈകസന്ദായിനീം

വന്ദേഽഹം കമലാംബികാമനുദിനം വാഞ്ഛാനുകൂലാം ശിവാം ॥ 2 ॥

മായാ മോഹവിനാശിനീം മുനിഗണൈരാരാധിതാം തന്മയീം

ശ്രേയഃസഞ്ചയദായിനീം ഗുണമയീം വായ്വാദി ഭൂതാം സതാം ।

പ്രാതഃകാലസമാനശോഭമകുടാം സാമാദി വേദൈസ്തുതാം

വന്ദേഽഹം കമലാംബികാമനുദിനം വാഞ്ഛാനുകൂലാം ശിവാം ॥ 3 ॥

ബാലാം ഭക്തജനൗഘചിത്തനിലയാം ബാലേന്ദുചൂഡാംബരാം

സാലോക്യാദി ചതുർവിധാർഥഫലദാം നീലോത്പലാക്ഷീമജാം ।

കാലാരിപ്രിയനായികാം കലിമലപ്രധ്വംസിനീം കൗലിനീം

വന്ദേഽഹം കമലാംബികാമനുദിനം വാഞ്ഛാനുകൂലാം ശിവാം ॥ 4 ॥

ആനന്ദാമൃതസിന്ധുമധ്യനിലയാമജ്ഞാനമൂലാപഹാം

ജ്ഞാനാനന്ദവിവർധിനീം വിജയദാം മീനേക്ഷണാം മോഹിനീം ।

ജ്ഞാനാനന്ദപരാം ഗണേശജനനീം ഗന്ധർവസമ്പൂജിതാം

വന്ദേഽഹം കമലാംബികാമനുദിനം വാഞ്ഛാനുകൂലാം ശിവാം ॥ 5 ॥

ഷട്ചക്രോപരി നാദബിന്ദുനിലയാം സർവേശ്വരീം സർവഗാം

ഷട്ശാസ്ത്രാഗമവേദവേദിതഗുണാം ഷട്കോണസംവാസിനീം ।

ഷട്കാലേന സമർചിതാത്മവിഭവാം ഷഡ്വർഗസഞ്ഛേദിനീം

വന്ദേഽഹം കമലാംബികാമനുദിനം വാഞ്ഛാനുകൂലാം ശിവാം ॥ 6 ॥

യോഗാനന്ദകരീം ജഗത്സുഖകരീം യോഗീന്ദ്രചിത്താലയാം

ഏകാമീശസുഖപ്രദാം ദ്വിജനുതാമേകാന്തസഞ്ചാരിണീം ।

വാഗീശാം വിധിവിഷ്ണുശംഭുവരദാം വിശ്വേശ്വരീം വൈണികീം

വന്ദേഽഹം കമലാംബികാമനുദിനം വാഞ്ഛാനുകൂലാം ശിവാം ॥ 7 ॥

ബോധാനന്ദമയീം ബുധൈരഭിനുതാം മോദപ്രദാമംബികാം

ശ്രീമദ്വേദപുരീശദാസവിനുതാം ഹ്രീങ്കാരസന്ധാലയാം ।

ഭേദാഭേദവിവർജിതാം ബഹുവിധാം വേദാന്തചൂഡാമണിം

വന്ദേഽഹം കമലാംബികാമനുദിനം വാഞ്ഛാനുകൂലാം ശിവാം ॥ 8 ॥

ഇത്ഥം ശ്രീകമലാംബികാപ്രിയകരം സ്തോത്രം പഠേദ്യഃ സദാ

പുത്രശ്രീപ്രദമഷ്ടസിദ്ധിഫലദം ചിന്താവിനാശാസ്പദം ।

ഏതി ബ്രഹ്മപദം നിജം നിരുപമം നിഷ്കല്മഷം നിഷ്കലം

യോഗീന്ദ്രൈരപി ദുർലഭം പുനരയം ചിന്താവിനാശം പരം ॥ 9 ॥

ഇതി ശ്രീ കമലാംബികാ സ്തോത്രം ।

Recite with devotion and pure heart

Regular practice brings spiritual benefits