athānandamayīṃ sākṣācchabdabrahmasvarūpiṇīm । īḍe sakalasampattyai jagatkāraṇamambikām ॥ 1 ॥ ādyāmaśeṣajananīmaravindayone- -rviṣṇoḥ śivasya ca vapuḥ pratipādayitrīm । sṛṣṭisthitikṣayakarīṃ jagatāṃ trayāṇāṃ stutvā giraṃ vimalayāpyahamambike tvām ॥ 2 ॥ pṛthvyā jalena śikhinā marutāmbareṇa hotrendunā dinakareṇa ca mūrtibhājaḥ । devasya manmathariporapi śaktimattā- -hetustvameva khalu parvatarājaputri ॥ 3 ॥ trisrotasaḥ sakaladevasamarcitāyā vaiśiṣṭyakāraṇamavaimi tadeva mātaḥ । tvatpādapaṅkajaparāgapavitritāsu śambhorjaṭāsu satataṃ parivartanaṃ yat ॥ 4 ॥ ānandayetkumudinīmadhipaḥ kalānāṃ nānyāminaḥ kamalinīmatha netarāṃ vā । ekatra modanavidhau parame ka īṣṭe tvaṃ tu prapañcamabhinandayasi svadṛṣṭyā ॥ 5 ॥ ādyāpyaśeṣajagatāṃ navayauvanāsi śailādhirājatanayāpyatikomalāsi । trayyāḥ prasūrapi tathā na samīkṣitāsi dhyeyāsi gauri manaso na pathi sthitāsi ॥ 6 ॥ āsādya janma manujeṣu cirāddurāpaṃ tatrāpi pāṭavamavāpya nijendriyāṇām । nābhyarcayanti jagatāṃ janayitri ye tvāṃ niḥśreṇikāgramadhiruhya punaḥ patanti ॥ 7 ॥ karpūracūrṇahimavāriviloḍitena ye candanena kusumaiśca sujātagandhaiḥ । ārādhayanti hi bhavāni samutsukāstvāṃ te khalvakhaṇḍabhuvanādhibhuvaḥ prathante ॥ 8 ॥ āviśya madhyapadavīṃ prathame saroje suptā hi rājasadṛśī viracayyaviśvam । vidyullatāvalayavibhramamudvahantī padmāni pañca vidalayya samaśnuvānā ॥ 9 ॥ tannirgatāmṛtarasaiḥ pariṣiktagātra- -mārgeṇa tena vilayaṃ punarapyavāptā । yeṣāṃ hṛdi sphurasi jātu na te bhaveyu- -rmātarmaheśvarakuṭumbini garbhabhājaḥ ॥ 10 ॥ ālambikuṇḍalabharāmabhirāmavaktrā- -māpīvarastanataṭīṃ tanuvṛttamadhyām । cintākṣasūtrakalaśālikhitāḍhyahastā- -māvartayāmi manasā tava gauri mūrtim ॥ 11 ॥ āsthāya yogamavijitya ca vairiṣaṭka- -mābaddhyacendriyagaṇaṃ manasi prasanne । pāśāṅkuśābhayavarāḍhyakarāṃ suvaktrā- -mālokayanti bhuvaneśvari yoginastvām ॥ 12 ॥ uttaptahāṭakanibhā karibhiścaturbhi- -rāvartitāmṛtaghaṭairabhiṣicyamānā । hastadvayena naline rucire vahantī padmāpi sābhayavarā bhavasi tvameva ॥ 13 ॥ aṣṭābhirugravividhāyudhavāhinībhi- -rdorvallarībhiradhiruhya mṛgādhirājam । dūrvādaladyutiramārtyavipakṣapakṣān nyakkurvatī tvamasi devi bhavāni durgā ॥ 14 ॥ āvirnidāghajalaśīkaraśobhivaktrāṃ guñjāphalena parikalpitahārayaṣṭim । pītāṃśukāmasitakāntimanaṅgatandrā- -mādyāṃ pulindataruṇīmasakṛtsmarāmi ॥ 15 ॥ haṃsairgatikvaṇitanūpuradūradṛṣṭe mūrtairivārthavacanairanugamyamānau । padmāvivordhvamukharūḍhasujātanālau śrīkaṇṭhapatni śirasā vidadhe tavāṅghrī ॥ 16 ॥ dvābhyāṃ samīkṣitumatṛptimateva dṛgbhyā- -mutpāṭya bhālanayanaṃ vṛṣaketanena । sāndrānurāgataralena nirīkṣyamāṇe jaṅghe śubhe api bhavāni tavānato'smi ॥ 17 ॥ ūrū smarāmi jitahastikarāvalepau sthaulyena mārdavatayā paribhūtarambhau । śreṇībharasya sahanau parikalpya dattau stambhāvivāṅgavayasā tava madhyamena ॥ 18 ॥ śroṇyau stanau ca yugapatprathayiṣyatoccai- -rbālyātpareṇa vayasā parihṛṣṭasārau । romāvalīvilasitena vibhāvya mūrtiṃ madhyaṃ tava sphuratu me hṛdayasya madhye ॥ 19 ॥ sakhyaḥ smarasya haranetrahutāśaśāntyai lāvaṇyavāribharitaṃ navayauvanena । āpādya dattamiva pallavamapraviṣṭaṃ nābhiṃ kadāpi tava devi na vismareyam ॥ 20 ॥ īśe'pi gehapiśunaṃ bhasitaṃ dadhāne kāśmīrakardamamanustanapaṅkaje te । snātotthitasya kariṇaḥ kṣaṇalakṣyaphenau sindūritau smarayataḥ samadasya kumbhau ॥ 21 ॥ kaṇṭhātiriktagaladujjvalakāntidhārā- -śobhau bhujau nijaripormakaradhvajena । kaṇṭhagrahāya racitau kila dīrghapāśau mātarmama smṛtipathaṃ na vilaṅghayetām ॥ 22 ॥ nātyāyataṃ racitakambuvilāsacauryaṃ bhūṣābhareṇa vividhena virājamānam । kaṇṭhaṃ manoharaguṇaṃ girirājakanye sañcintya tṛptimupayāmi kadāpi nāham ॥ 23 ॥ atyāyatākṣamabhijātalalāṭapaṭṭaṃ mandasmitena daraphullakapolarekham । bimbādharaṃ vadanamunnatadīrghanāsaṃ yaste smaratyasakṛdamba sa eva jātaḥ ॥ 24 ॥ āvistuṣārakaralekhamanalpagandha- -puṣpoparibhramadalivrajanirviśeṣam । yaścetasā kalayate tava keśapāśaṃ tasya svayaṃ galati devi purāṇapāśaḥ ॥ 25 ॥ śrutisucaritapākaṃ śrīmatā stotrameta- -tpaṭhati ya iha martyo nityamārdrāntarātmā । sa bhavati padamuccaiḥ sampadāṃ pādanamra- -kṣitipamukuṭalakṣmīlakṣaṇānāṃ cirāya ॥ 26 ॥ iti śrī rudrayāmale tantre śrībhuvaneśvarī stotram ॥