śrī devyuvāca । sādhusādhu mahādeva kathayasva maheśvara । yena sampadvidhānena sādhakānāṃ jayapradam ॥ 1 ॥ vinā japaṃ vinā homaṃ vinā mantraṃ vinā nutim । yasya smaraṇamātreṇa sādhako dharaṇīpatiḥ ॥ 2 ॥ śrī bhairava uvāca । śṛṇu devi pravakṣyāmi mātaṅgīkavacaṃ param । gopanīyaṃ prayatnena maunena japamācaret ॥ 3 ॥ mātaṅgīkavacaṃ divyaṃ sarvarakṣākaraṃ nṛṇām । kavitvaṃ ca mahatvaṃ ca gajāvājisutādayaḥ ॥ 4 ॥ śubhadaṃ sukhadaṃ nityamaṇimādipradāyakam । brahmaviṣṇumaheśānāṃ teṣāmādyā maheśvarī ॥ 5 ॥ ślokārdhaṃ ślokamekaṃ vā yastu samyakpaṭhennaraḥ । tasya haste sadaivāste rājyalakṣmīrna saṃśayaḥ ॥ 6 ॥ sādhakaḥ śyāmalāṃ dhyāyan kamalāsanasaṃsthitaḥ । yonimudrāṃ kare badhvā śaktidhyānaparāyaṇaḥ ॥ 7 ॥ kavacaṃ tu paṭhedyastu tasya syuḥ sarvasampadaḥ । putrapautrādisampattirante muktiśca śāśvatī ॥ 8 ॥ brahmarandhraṃ sadā pāyācchyāmalā mantranāyikā । lalāṭaṃ rakṣatāṃ nityaṃ kadambeśī sadā mama ॥ 9 ॥ bhruvau pāyacca sumukhī avyānnetre ca vaiṇikī । vīṇāvatī nāsikāṃ ca mukhaṃ rakṣatu mantriṇī ॥ 10 ॥ saṅgītayoginī dantān avyādoṣṭhau śukapriyā । cubukaṃ pātu me śyāmā jihvāṃ pāyānmaheśvarī ॥ 11 ॥ karṇau devī stanau kālī pātu kātyāyanī mukham । nīpapriyā sadā rakṣedudaraṃ mama sarvadā ॥ 12 ॥ priyaṅkarī priyavyāpī nābhiṃ rakṣatu mudriṇī । skandhau rakṣatu śarvāṇī bhujau me pātu mohinī ॥ 13 ॥ kaṭiṃ pātu pradhāneśī pātu pādau ca puṣpiṇī । āpādamastakaṃ śyāmā pūrve rakṣatu puṣṭidā ॥ 14 ॥ uttare tripurā rakṣedvidyā rakṣatu paścime । vijayā dakṣiṇe pātu medhā rakṣatu cānale ॥ 15 ॥ prājñā rakṣatu nairṛtyāṃ vāyavyāṃ śubhalakṣaṇā । īśānyāṃ rakṣatāddevī mātaṅgī śubhakāriṇī ॥ 16 ॥ ūrdhvaṃ pātu sadā devī devānāṃ hitakāriṇī । pātale pātu māṃ nityā vāsukī viśvarūpiṇī ॥ 17 ॥ akārādikṣakārāntamātṛkārūpadhāriṇī । āpādamastakaṃ pāyādaṣṭamātṛsvarūpiṇī ॥ 18 ॥ avargasambhavā brāhmī mukhaṃ rakṣatu sarvadā । kavargasthā tu māheśī pātu dakṣabhujaṃ tathā ॥ 19 ॥ cavargasthā tu kaumārī pāyānme vāmakaṃ bhujam । dakṣapādaṃ samāśritya ṭavargaṃ pātu vaiṣṇavī ॥ 20 ॥ tavargajanmā vārāhī pāyānme vāmapādakam । tathā pavargajendrāṇī pārśvādīn pātu sarvadā ॥ 21 ॥ yavargasthā tu cāmuṇḍā hṛddormūle ca me tathā । hṛdādipāṇipādāntajaṭharānanasañjñikam ॥ 22 ॥ caṇḍikā ca śavargasthā rakṣatāṃ mama sarvadā । viśuddhaṃ kaṇṭhamūlaṃ tu rakṣatātṣoḍaśasvarāḥ ॥ 23 ॥ kakārādi ṭhakārānta dvādaśārṇaṃ hṛdambujam । maṇipūraṃ ḍādhiphānta daśavarṇasvarūpiṇī ॥ 24 ॥ svādhiṣṭhānaṃ tu ṣaṭpatraṃ bādilāntasvarūpiṇī । vādisāntasvarūpā'vyānmūlādhāraṃ caturdalam ॥ 25 ॥ haṅkṣārṇamājñā dvidalaṃ bhruvormadhyaṃ sadāvatu । akārādikṣakārāntamātṛkābījarūpiṇi ॥ 26 ॥ mātaṅgī māṃ sadā rakṣedāpādatalamastakam । imaṃ mantraṃ samuddhārya dhārayedvāmake bhuje ॥ 27 ॥ kaṇṭhe vā dhārayedyastu sa vai devo maheśvaraḥ । taṃ dṛṣṭvā devatāḥ sarvāḥ praṇamanti sudūrataḥ ॥ 28 ॥ tasya tejaḥ prabhāvena samyaggantuṃ na śakyate । indrādīnāṃ labhetsatyaṃ bhūpatirvaśago bhavet ॥ 29 ॥ vāksiddhirjāyate tasya aṇimādyaṣṭasiddhayaḥ । ajñātvā kavacaṃ devyāḥ śyāmalāṃ yo japennaraḥ ॥ 30 ॥ tasyāvaśyaṃ tu sā devī yoginī bhakṣayettanum । iha loke sadā duḥkhaṃ ato duḥkhī bhaviṣyati ॥ 31 ॥ janmakoṭi sadā mūko mantrasiddhirna vidyate । gurupādau namaskṛtya yathāmantraṃ bhavetsudhīḥ ॥ 32 ॥ tathā tu kavacaṃ devyāḥ saphalaṃ gurusevayā । iha loke nṛpo bhūtvā paṭhenmukto bhaviṣyati ॥ 33 ॥ bodhayetparaśiṣyāya durjanāya sureśvari । nindakāya kuśīlāya śaktihiṃsāparāya ca ॥ 34 ॥ yo dadāti na sidhyeta mātaṅgīkavacaṃ śubham । na deyaṃ sarvadā bhadre prāṇaiḥ kaṇṭhagatairapi ॥ 35 ॥ gopyādgopyataraṃ gopyaṃ guhyādguhyatamaṃ mahat । dadyādguruḥ suśiṣyāya gurubhaktiparāya ca । śive naṣṭe gurustrātā gurau naṣṭe na kaścana ॥ 36 ॥ iti śrī śaktitantramahārṇave śrī śyāmalā kavacam ।