śrī pārvatyuvāca – śrutaṃ pūjādikaṃ samyagbhavadvaktrābja nissṛtam । hṛdayaṃ chinnamastāyāḥ śrotumicchāmi sāmpratam ॥ 1 ॥ śrī mahādeva uvāca – nādyāvadhi mayā proktaṃ kasyāpi prāṇavallabhe । yattvayā paripṛṣṭo'haṃ vakṣye prītyai tava priye ॥ 2 ॥ oṃ asya śrīchinnamastāhṛdayastotramahāmantrasya – bhairava ṛṣiḥ – samrāṭ chandaḥ -chinnamastā devatā – hūṃ bījam – oṃ śaktiḥ – hrīṃ kīlakaṃ – śatrukṣayakaraṇārthe jape viniyogaḥ ॥ atha karanyāsaḥ – oṃ oṃ aṅguṣṭhābhyāṃ namaḥ । oṃ hūṃ tarjanībhyāṃ namaḥ । oṃ hrīṃ madhyamābhyāṃ namaḥ । oṃ klīṃ anāmikābhyāṃ namaḥ । oṃ aiṃ kaniṣṭhikābhyāṃ namaḥ । oṃ hūṃ karatalakarapṛṣṭhābhyāṃ namaḥ । atha karanyāsaḥ – oṃ oṃ hṛdayāya namaḥ । oṃ hūṃ śirase svāhā । oṃ hrīṃ śikhāyai vaṣaṭ । oṃ klīṃ netratrayāya vauṣaṭ । oṃ aiṃ kavacāya hum । oṃ hūṃ astrāya phaṭ । bhūrbhuvassuvaromiti digbandhaḥ । dhyānam – raktābhāṃ raktakeśīṃ karakamalalasatkartṛkāṃ kālakāntiṃ vicchinnātmīyamuṇḍāsṛgaruṇabahulāṃ cakradhārāṃ pibantīm । vighnābhraughapracaṇḍaśvasanasamanibhāṃ sevitāṃ siddhasaṅghaiḥ padmākṣīṃ chinnamastāṃ chalakaraditijacchedinīṃ saṃsmarāmi ॥ 1 ॥ vande'haṃ chinnamastāṃ tāṃ chinnamuṇḍadharāṃ parāṃ । chinnagrīvocchaṭācchannāṃ kṣaumavastraparicchadām ॥ 2 ॥ sarvadā surasaṅghena sevitāṅghrisaroruhāṃ । seve sakalasampatyai chinnamastāṃ śubhapradām ॥ 3 ॥ yajñānāṃ yogayajñāya yā tu jātā yuge yuge । dānavāntakarīṃ devīṃ chinnamastāṃ bhajāmi tām ॥ 4 ॥ vairocanīṃ varārohāṃ vāmademavivardhitāṃ । koṭisūryaprabhāṃ vande vidyudvarṇākṣimaṇḍitām ॥ 5 ॥ nijakaṇṭhocchaladraktadhārayā yā muhurmuhuḥ । yoginī gaṇasaṃstutyā tasyāścaraṇamāśraye ॥ 6 ॥ hūmityekākṣaraṃ mantraṃ yadīyaṃ yuktamānasaḥ । yo japettasya vidveṣī bhasmatāṃ yāti tāṃ bhaje ॥ 7 ॥ hūṃ svāheti manuṃ samyagyassmaratyārtimānnaraḥ । chinatti chinnamastāyā tasya bādhāṃ namāmi tām ॥ 8 ॥ yasyāḥ kaṭākṣamātreṇa krūrabhūtādayo drutam । dūre tasya palāyante chinnamastāṃ bhajāmi tām ॥ 9 ॥ kṣititalaparirakṣākṣāntaroṣā sudakṣā chalayutakalakakṣācchedane kṣāntilakṣyā । kṣitiditijasupakṣā kṣoṇipākṣayyaśikṣā jayatu jayatu cākṣā chinnamastāribhakṣā ॥ 10 ॥ kalikaluṣakalānāṃ kartane kartrihastā surakuvalayakāśā mandabhānuprakāśā । asurakulakalāpatrāsikākālamūrti- rjayatu jayatu kālī chinnamastā karālī ॥ 11 ॥ bhuvanabharaṇabhūrī bhrājamānānubhāvā bhava bhava vibhavānāṃ bhāraṇodbhātabhūtiḥ । dvijakulakamalānāṃ bhāsinī bhānumūrti- rbhavatu bhavatu vāṇī chinnamastā bhavānī ॥ 12 ॥ mama ripugaṇamāśu cchettumugraṃ kṛpāṇaṃ sapadi janani tīkṣṇaṃ chinnamuṇḍaṃ gṛhāṇa । bhavatu tava yaśo'laṃ chindhi śatrūnkalānme mama ca paridiśeṣṭaṃ chinnamaste kṣamasva ॥ 13 ॥ chinnagrīvā chinnamastā chinnamuṇḍadharā'kṣatā । kṣodakṣemakarī svakṣā kṣoṇīśācchādana kṣamā ॥ 14 ॥ vairocanī varārohā balidānapraharṣitā । baliyojitapādābjā vāsudeva prapūjitā ॥ 15 ॥ iti dvādaśanāmāni chinnamastā priyāṇi yaḥ । smaretprātassamutthāya tasya naśyanti śatravaḥ ॥ 16 ॥ yāṃ smṛtvā santi sadyaḥ sakalaḥ suragaṇāḥ sarvadā sampadāḍhyāḥ śatrūṇāṃ saṅghamāhatya viśadavadanāḥ svasthacittāḥ śrayanti । tasyāḥ saṅkalpavantaḥ sarasijacaraṇassantataṃ saṃśrayanti sā''dyā śrīśādisevyā suphalatu sutarāṃ chinnamastā praśastā ॥ 17 ॥ hṛdayamitimajñātvā hantumicchati yo dviṣam । kathaṃ tasyāciraṃ śatrurnāśameṣyati pārvati ॥ 18 ॥ yadīcchennāśanaṃ śatroḥ śīghrametatpaṭhennaraḥ । chinnamastā prasannāpi dadāti phalamīpsitam ॥ 19 ॥ śatrupraśamanaṃ puṇyaṃ samīpsitaphalapradam । āyurārogyadaṃ caiva paṭhatāṃ puṇyasādhanam ॥ 20 ॥ iti śrī nandyāvarte mahādevapārvatīsaṃvāde śrīchinnamastāhṛdayastotraṃ sampūrṇam ॥