śrī bhairava uvāca- brahmādayasstuti śatairapi sūkṣmarūpaṃ jānantinaiva jagadādimanādimūrtim । tasmādamūṃ kucanatāṃ navakuṅkumāsyāṃ sthūlāṃ stuve sakalavāṅmayamātṛbhūtām ॥ 1 ॥ sadyassamudyata sahasra divākarābhāṃ vidyākṣasūtravaradābhayacihnahastāṃ । netrotpalaistribhiralaṅkṛtavaktrapadmāṃ tvāṃ tārahārarucirāṃ tripurāṃ bhajāmaḥ ॥ 2 ॥ sindūrapūrarucirāṃ kucabhāranamrāṃ janmāntareṣu kṛtapuṇya phalaikagamyāṃ । anyonya bhedakalahākulamānabhedai- -rjānantikiñjaḍadhiya stavarūpamanye ॥ 3 ॥ sthūlāṃ vadanti munayaḥ śrutayo gṛṇanti sūkṣmāṃ vadanti vacasāmadhivāsamanye । tvāṃmūlamāhurapare jagatāmbhavāni manyāmahe vayamapārakṛpāmburāśim ॥ 4 ॥ candrāvataṃsa kalitāṃ śaradinduśubhrāṃ pañcāśadakṣaramayīṃ hṛdibhāvayantī । tvāṃ pustakañjapapaṭīmamṛtāḍhya kumbhāṃ vyākhyāñca hastakamalairdadhatīṃ trinetrām ॥ 5 ॥ śambhustvamadritanayā kalitārdhabhāgo viṣṇustvamamba kamalāpariṇaddhadehaḥ । padmodbhavastvamasi vāgadhivāsabhūmi- reṣāṃ kriyāśca jagati tripuretvameva ॥ 6 ॥ āśrityavāgbhava bhavāmścaturaḥ parādīn- bhāvānpadāttu vihitānsamudārayantīṃ । kālādibhiśca karaṇaiḥ paradevatāṃ tvāṃ saṃvinmayīṃhṛdikadāpi navismarāmi ॥ 7 ॥ ākuñcya vāyumabhijityaca vairiṣaṭkaṃ ālokyaniścaladhiyā nijanāsikāgrāṃ । dhyāyanti mūrdhni kalitendukalāvataṃsaṃ tvadrūpamamba kṛtinastaruṇārkamitram ॥ 8 ॥ tvaṃ prāpyamanmathariporvapurardhabhāgaṃ sṛṣṭiṅkaroṣi jagatāmiti vedavādaḥ । satyantadadritanaye jagadekamātaḥ noceda śeṣajagataḥ sthitirevanasyāt ॥ 9 ॥ pūjāṃvidhāyakusumaiḥ surapādapānāṃ pīṭhetavāmba kanakācala kandareṣu । gāyantisiddhavanitāssahakinnarībhi- rāsvāditāmṛtarasāruṇapadmanetrāḥ ॥ 10 ॥ vidyudvilāsa vapuṣaḥ śriyamāvahantīṃ yāntīmumāṃsvabhavanācchivarājadhānīṃ । saundaryamārgakamalānicakā sayantīṃ devīmbhajeta paramāmṛta siktagātrām ॥ 11 ॥ ānandajanmabhavanaṃ bhavanaṃ śrutīnāṃ caitanyamātra tanumambatavāśrayāmi । brahmeśaviṣṇubhirupāsitapādapadmaṃ saubhāgyajanmavasatiṃ tripureyathāvat ॥ 12 ॥ sarvārthabhāvibhuvanaṃ sṛjatīndurūpā yātadbibharti punararka tanussvaśaktyā । brahmātmikāharatitaṃ sakalamyugānte tāṃ śāradāṃ manasi jātu na vismarāmi ॥ 13 ॥ nārāyaṇīti narakārṇavatāriṇīti gaurīti khedaśamanīti sarasvatīti । jñānapradeti nayanatrayabhūṣiteti tvāmadrirājatanaye vibudhā padanti ॥ 14 ॥ yestuvantijaganmātaḥ ślokairdvādaśabhiḥkramāt । tvāmanu pāpryavāksiddhiṃ prāpnuyuste parāmśriyam ॥ 15 ॥ itite kathitaṃ devi pañcāṅgaṃ bhairavīmayaṃ । guhyādgopyatamaṅgopyaṃ gopanīyaṃ svayonivat ॥ 16 ॥ iti śrī rudrayāmale umāmaheśvara saṃvāde pañcāṅgakhaṇḍa nirūpaṇe śrībhairavīstotram ।