Taittiriya Upanishad - Ananda Valli

(tai. ā. 8-1-1) oṃ sa̱ha nā̍vavatu । sa̱ha nau̍ bhunaktu । sa̱ha vī̱rya̍-ṅkaravāvahai । te̱ja̱svinā̱vadhī̍tamastu̱ mā vi̍dviṣā̱vahai̎ । oṃ śānti̱-śśānti̱-śśānti̍ḥ ॥ bra̱hma̱vidā̎pnoti̱ param̎ । tade̱ṣā-'bhyu̍ktā । sa̱tya-ñjñā̱nama̍na̱nta-mbrahma̍ । yo veda̱ nihi̍ta̱-ṅguhā̍yā-mpara̱me vyo̍mann । so̎-'śnu̱te sarvā̱nkāmā̎nthsa̱ha । brahma̍ṇā vipa̱ściteti̍ ॥ tasmā̱dvā e̱tasmā̍dā̱tmana̍ ākā̱śassambhū̍taḥ । ā̱kā̱śādvā̱yuḥ । vā̱yora̱gniḥ । a̱gnerāpa̍ḥ । a̱dbhyaḥ pṛ̍thi̱vī । pṛ̱thi̱vyā oṣa̍dhayaḥ । oṣa̍dhī̱bhyo-'nnam̎ । annā̱tpuru̍ṣaḥ । sa vā eṣa puruṣo-'nna̍rasa̱mayaḥ । tasyeda̍meva̱ śiraḥ । aya-ndakṣi̍ṇaḥ pa̱kṣaḥ । ayamutta̍raḥ pa̱kṣaḥ । ayamātmā̎ । ida-mpuccha̍-mprati̱ṣṭhā । tadapyeṣa ślo̍ko bha̱vati ॥ 1 ॥ iti prathamo-'nuvākaḥ ॥ annā̱dvai pra̱jāḥ pra̱jāya̍nte । yāḥ kāśca̍ pṛthi̱vīg śri̱tāḥ । atho̱ anne̍nai̱va jī̍vanti । athai̍na̱dapi̍ yantyanta̱taḥ । anna̱g̱ṃ hi bhū̱tānā̱-ñjyeṣṭham̎ । tasmā̎thsarvauṣa̱dhamu̍cyate । sarva̱ṃ-vaim̐ te-'nna̍māpnuvanti । ye-'nna̱-mbrahmo̱pāsa̍te । anna̱g̱ṃ hi bhū̱tānā̱-ñjyeṣṭham̎ । tasmā̎thsarvauṣa̱dhamu̍cyate । annā̎dbhū̱tāni̱ jāya̍nte । jātā̱nyanne̍na vardhante । adyate-'tti ca̍ bhūtā̱ni । tasmādanna-ntaducya̍ta i̱ti । tasmādvā etasmādanna̍rasa̱mayāt । anyo-'ntara ātmā̎ prāṇa̱mayaḥ । tenai̍ṣa pū̱rṇaḥ । sa vā eṣa puruṣavi̍dha e̱va । tasya puru̍ṣavi̱dhatām । anvaya̍-mpuruṣa̱vidhaḥ । tasya prāṇa̍ eva̱ śiraḥ । vyāno dakṣi̍ṇaḥ pa̱kṣaḥ । apāna utta̍raḥ pa̱kṣaḥ । ākā̍śa ā̱tmā । pṛthivī puccha̍-mprati̱ṣṭhā । tadapyeṣa ślo̍ko bha̱vati ॥ 1 ॥ iti dvitīyo-'nuvākaḥ ॥ prā̱ṇa-nde̱vā anu̱prāṇa̍nti । ma̱nu̱ṣyā̎ḥ pa̱śava̍śca̱ ye । prā̱ṇo hi bhū̱tānā̱māyu̍ḥ । tasmā̎thsarvāyu̱ṣamu̍cyate । sarva̍me̱va ta̱ āyu̍ryanti । ye prā̱ṇa-mbrahmo̱pāsa̍te । prāṇo hi bhūtā̍nāmā̱yuḥ । tasmāthsarvāyuṣamucya̍ta i̱ti । tasyaiṣa eva śārī̍ra ā̱tmā । ya̍ḥ pūrva̱sya । tasmādvā etasmā̎tprāṇa̱mayāt । anyo-'ntara ātmā̍ mano̱mayaḥ । tenai̍ṣa pū̱rṇaḥ । sa vā eṣa puruṣavi̍dha e̱va । tasya puru̍ṣavi̱dhatām । anvaya̍-mpuruṣa̱vidhaḥ । tasya yaju̍reva̱ śiraḥ । ṛgdakṣi̍ṇaḥ pa̱kṣaḥ । sāmotta̍raḥ pa̱kṣaḥ । āde̍śa ā̱tmā । atharvāṅgirasaḥ puccha̍-mprati̱ṣṭhā । tadapyeṣa ślo̍ko bha̱vati ॥ 1 ॥ iti tṛtīyo-'nuvākaḥ ॥ yato̱ vāco̱ niva̍rtante । aprā̎pya̱ mana̍sā sa̱ha । ānanda-mbrahma̍ṇo vi̱dvān । na bibheti kadā̍cane̱ti । tasyaiṣa eva śārī̍ra ā̱tmā । ya̍ḥ pūrva̱sya । tasmādvā etasmā̎nmano̱mayāt । anyo-'ntara ātmā vi̍jñāna̱mayaḥ । tenai̍ṣa pū̱rṇaḥ । sa vā eṣa puruṣavi̍dha e̱va । tasya puru̍ṣavi̱dhatām । anvaya̍-mpuruṣa̱vidhaḥ । tasya śra̍ddhaiva̱ śiraḥ । ṛta-ndakṣi̍ṇaḥ pa̱kṣaḥ । satyamutta̍raḥ pa̱kṣaḥ । yo̍ga ā̱tmā । mahaḥ puccha̍-mprati̱ṣṭhā । tadapyeṣa ślo̍ko bha̱vati ॥ 1 ॥ iti caturtho-'nuvākaḥ ॥ vi̱jñāna̍ṃ-ya̱m̐jña-nta̍nute । karmā̍ṇi tanu̱te-'pi̍ ca । vi̱jñāna̍-nde̱vāssarve̎ । brahma̱ jyeṣṭha̱mupā̍sate । vi̱jñāna̱-mbrahma̱ cedveda̍ । tasmā̱ccenna pra̱mādya̍ti । śa̱rīre̍ pāpma̍no hi̱tvā । sarvānkāmānthsamaśnu̍ta i̱ti । tasyaiṣa eva śārī̍ra ā̱tmā । ya̍ḥ pūrva̱sya । tasmādvā etasmādvi̍jñāna̱mayāt । anyo-'ntara ātmā̍-''nanda̱mayaḥ । tenai̍ṣa pū̱rṇaḥ । sa vā eṣa puruṣavi̍dha e̱va । tasya puru̍ṣavi̱dhatām । anvaya̍-mpuruṣa̱vidhaḥ । tasya priya̍meva̱ śiraḥ । modo dakṣi̍ṇaḥ pa̱kṣaḥ । pramoda utta̍raḥ pa̱kṣaḥ । āna̍nda ā̱tmā । brahma puccha̍-mprati̱ṣṭhā । tadapyeṣa ślo̍ko bha̱vati ॥ 1 ॥ iti pañcamo-'nuvākaḥ ॥ asa̍nne̱va sa̍ bhavati । asa̱dbrahmeti̱ veda̱ cet । asti brahmeti̍ cedve̱da । santamena-ntato vi̍duri̱ti । tasyaiṣa eva śārī̍ra ā̱tmā । ya̍ḥ pūrva̱sya । athāto̍-'nupra̱śnāḥ । u̱tāvi̱dvāna̱muṃ-lo̱m̐ka-mpretya̍ । kaśca̱na ga̍ccha̱tī(3) । āho̍ vi̱dvāna̱muṃ-lo̱m̐ka-mpretya̍ । kaści̱thsama̍śnu̱tā(3) u̱ । so̍-'kāmayata । ba̱husyā̱-mprajā̍ye̱yeti̍ । sa tapo̍-'tapyata । sa tapa̍sta̱ptvā । i̱dagṃ sarva̍masṛjata । yadi̱da-ṅkiñca̍ । tathsṛ̱ṣṭvā । tade̱vānu̱prāvi̍śat । tada̍nu pra̱viśya̍ । sacca̱ tyaccā̍bhavat । ni̱rukta̱-ñcāni̍rukta-ñca । ni̱laya̍na̱-ñcāni̍layana-ñca । vi̱jñāna̱-ñcāvi̍jñāna-ñca । satya-ñcānṛta-ñca sa̍tyama̱bhavat । yadi̍da-ṅki̱ñca । tatsatyami̍tyāca̱kṣate । tadapyeṣa ślo̍ko bha̱vati ॥ 1 ॥ iti ṣaṣṭho-'nuvākaḥ ॥ asa̱dvā i̱damagra̍ āsīt । tato̱ vai sada̍jāyata । tadātmānagg svaya̍maku̱ruta । tasmāttathsukṛtamucya̍ta i̱ti । yadvai̍ tathsu̱kṛtam । ra̍so vai̱ saḥ । rasagg hyevāyaṃ-lam̐bdhvā-''na̍ndī bha̱vati । ko hyevānyā̎tkaḥ prā̱ṇyāt । yadeṣa ākāśa āna̍ndo na̱ syāt । eṣa hyevā-''na̍ndayā̱ti । ya̱dā hye̍vaiṣa̱ etasminnadṛśye-'nātmye-'nirukte-'nilayane-'bhayaṃ prati̍ṣṭhāṃ-vi̱m̐ndate । atha so-'bhaya-ṅga̍to bha̱vati । ya̱dā hye̍vaiṣa̱ etasminnudaramanta̍ra-ṅku̱rute । atha tasya bha̍ya-mbha̱vati । tattveva bhayaṃ-vim̐duṣo-'ma̍nvāna̱sya । tadapyeṣa ślo̍ko bha̱vati ॥ 1 ॥ iti saptamo-'nuvākaḥ ॥ bhī̱ṣā-'smā̱dvāta̍ḥ pavate । bhī̱ṣode̍ti̱ sūrya̍ḥ । bhīṣā-'smādagni̍ścendra̱śca । mṛtyurdhāvati pañca̍ma i̱ti । saiṣā-''nandasya mīmāg̍ṃsā bha̱vati । yuvā syāthsādhuyu̍vā-'dhyā̱yakaḥ । āśiṣṭho dṛḍhiṣṭho̍ bali̱ṣṭhaḥ । tasyeya-mpṛthivī sarvā vittasya̍ pūrṇā̱ syāt । sa eko mānuṣa̍ āna̱ndaḥ । te ye śata-mmānuṣā̍ āna̱ndāḥ ॥ 1 ॥ sa eko manuṣyagandharvāṇā̍māna̱ndaḥ । śrotriyasya cākāma̍hata̱sya । te ye śata-mmanuṣyagandharvāṇā̍māna̱ndāḥ । sa eko devagandharvāṇā̍māna̱ndaḥ । śrotriyasya cākāma̍hata̱sya । te ye śata-ndevagandharvāṇā̍māna̱ndāḥ । sa ekaḥ pitṛṇā-ñciralokalokānā̍māna̱ndaḥ । śrotriyasya cākāma̍hata̱sya । te ye śata-mpitṛṇā-ñciralokalokānā̍māna̱ndāḥ । sa eka ājānajānā-ndevānā̍māna̱ndaḥ ॥ 2 ॥ śrotriyasya cākāma̍hata̱sya । te ye śatamājānajānā-ndevānā̍māna̱ndāḥ । sa ekaḥ karmadevānā-ndevānā̍māna̱ndaḥ । ye karmaṇā devāna̍piya̱nti । śrotriyasya cākāma̍hata̱sya । te ye śata-ṅkarmadevānā-ndevānā̍māna̱ndāḥ । sa eko devānā̍māna̱ndaḥ । śrotriyasya cākāma̍hata̱sya । te ye śata-ndevānā̍māna̱ndāḥ । sa eka indra̍syā-''na̱ndaḥ ॥ 3 ॥ śrotriyasya cākāma̍hata̱sya । te ye śatamindra̍syā-''na̱ndāḥ । sa eko bṛhaspate̍rāna̱ndaḥ । śrotriyasya cākāma̍hata̱sya । te ye śata-mbṛhaspate̍rāna̱ndāḥ । sa ekaḥ prajāpate̍rāna̱ndaḥ । śrotriyasya cākāma̍hata̱sya । te ye śata-mprajāpate̍rāna̱ndāḥ । sa eko brahmaṇa̍ āna̱ndaḥ । śrotriyasya cākāma̍hata̱sya ॥ 4 ॥ sa yaścā̍ya-mpu̱ruṣe । yaścāsā̍vādi̱tye । sa eka̍ḥ । sa ya̍ eva̱ṃvim̐t । asmāllo̍kātpre̱tya । etamannamayamātmānamupa̍saṅkrā̱mati । eta-mprāṇamayamātmānamupa̍saṅkrā̱mati । eta-mmanomayamātmānamupa̍saṅkrā̱mati । etaṃ-vim̐jñānamayamātmānamupa̍saṅkrā̱mati । etamānandamayamātmānamupa̍saṅkrā̱mati । tadapyeṣa ślo̍ko bha̱vati ॥ 5 ॥ ityaṣṭamo-'nuvākaḥ ॥ yato̱ vāco̱ niva̍rtante । aprā̎pya̱ mana̍sā sa̱ha । ānanda-mbrahma̍ṇo vi̱dvān । na bibheti kuta̍ścane̱ti । etagṃ ha vāva̍ na ta̱pati । kimahagṃ sādhu̍ nāka̱ravam । kimaha-mpāpamakara̍vami̱ti । sa ya evaṃ-vim̐dvānete ātmā̍nagg spṛ̱ṇute । u̱bhe hye̍vaiṣa̱ ete ātmā̍nagg spṛ̱ṇute । ya e̱vaṃ-vem̐da̍ । ityu̍pa̱niṣa̍t ॥ 1 ॥ iti navamo-'nuvākaḥ ॥ oṃ sa̱ha nā̍vavatu । sa̱ha nau̍ bhunaktu । sa̱ha vī̱rya̍-ṅkaravāvahai । te̱ja̱svinā̱vadhī̍tamastu̱ mā vi̍dviṣā̱vahai̎ । oṃ śānti̱-śśānti̱-śśānti̍ḥ ॥ ॥ hari̍ḥ om ॥ ॥ śrī kṛṣṇārpaṇamastu ॥

Recite with devotion and pure heart

Regular practice brings spiritual benefits

More Vedic chants of Other: