ā gāvo̍ agmannu̱ta bha̱drama̍kra̱ṃtsīda̍ṃtu go̱ṣṭhe ra̱ṇaya̍ṃtva̱sme । pra̱jāva̍tīḥ puru̱rupā̍ i̱ha syu̱riṃdrā̍ya pū̱rvīru̱ṣaso̱ duhā̍nāḥ ॥ 1 iṃdro̱ yajva̍ne pṛṇa̱te ca̍ śikṣa̱tyupedda̍dāti̱ na svaṃ mā̍ṣuyati । bhūyo̍bhūyo ra̱yimida̍sya va̱rdhaya̱nnabhi̍nne khi̱lye ni da̍dhāti deva̱yum ॥ 2 na tā na̍śaṃti̱ na da̍bhāti̱ taska̍ro̱ nāsā̍māmi̱tro vyathi̱rā da̍dhar​ṣati । de̱vāṃśca̱ yābhi̱ryaja̍te̱ dadā̍ti ca̱ jyogittābhi̍ḥ sacate̱ gopa̍tiḥ sa̱ha ॥ 3 na tā arvā̍ re̱ṇuka̍kāṭo aśnute̱ na sa̍ṃskṛta̱tramupa̍ yaṃti̱ tā a̱bhi । u̱ru̱gā̱yamabha̍ya̱ṃ tasya̱ tā anu̱ gāvo̱ marta̍sya̱ vi ca̍raṃti̱ yajva̍naḥ ॥ 4 gāvo̱ bhago̱ gāva̱ iṃdro̍ ma acchā̱n gāva̱ḥ soma̍sya pratha̱masya̍ bha̱kṣaḥ । i̱mā yā gāva̱ḥ sa ja̍nāsa̱ iṃdra̍ i̱cchāmīddhṛ̱dā mana̍sā ci̱diṃdra̍m ॥ 5 yū̱yaṃ gā̍vo medayathā kṛ̱śaṃ ci̍daśrī̱raṃ ci̍tkṛṇuthā su̱pratī̍kam । bha̱draṃ gṛ̱haṃ kṛ̍ṇutha bhadravāco bṛ̱hadvo̱ vaya̍ ucyate sa̱bhāsu̍ ॥ 6 pra̱jāva̍tīḥ sū̱yava̍saṃ ri̱śaṃtī̍ḥ śu̱ddhā a̱paḥ su̍prapā̱ṇe piba̍ṃtīḥ । mā va̍ḥ ste̱na ī̍śata̱ māghaśa̍ṃsa̱ḥ pari̍ vo he̱ti ru̱drasya̍ vṛjyāḥ ॥ 7 upe̱damu̍pa̱parca̍namā̱su goṣūpa̍ pṛcyatām । upa̍ ṛṣa̱bhasya̱ reta̱syupe̍ṃdra̱ tava̍ vī̱rye̍ ॥ 8 oṃ śāṃti̱ḥ śāṃti̱ḥ śāṃti̍ḥ ॥