a̱hama̍smi pratha̱majā ṛ̱tasya̍ । pūrva̍ṃ de̱vebhyo̍ a̱mṛta̍sya̱ nābhi̍: । yo mā̱ dadā̍ti̱ sa ide̱va mā''vā̎: । a̱hamanna̱manna̍ma̱danta̍madmi । pūrva̍ma̱gnerapi̍ daha̱tyanna̎m । ya̱ttau hā̍​''sāte ahamutta̱reṣu̍ । vyātta̍masya pa̱śava̍: su̱jambha̎m । paśya̍nti̱ dhīrā̱: praca̍ranti̱ pākā̎: । jahā̎mya̱nyaṃ na ja̍hāmya̱nyam । a̱hamanna̱ṃ vaśa̱micca̍rāmi ॥ 1 sa̱mā̱namartha̱ṃ parye̍mi bhu̱ñjat । ko māmanna̍ṃ manu̱ṣyo̍ dayeta । parā̍ke̱ anna̱ṃ nihi̍taṃ lo̱ka e̱tat । viśvai̎rde̱vaiḥ pi̱tṛbhi̍rgu̱ptamanna̎m । yada̱dyate̍ lu̱pyate̱ yatpa̍ro̱pyate̎ । śa̱ta̱ta̱mī sā ta̱nūrme̍ babhūva । ma̱hāntau̍ ca̱rū sa̍kṛddu̱gdhena̍ paprau । diva̍ṃ ca̱ pṛśni̍ pṛthi̱vīṃ ca̍ sā̱kam । tatsa̱ṃpiba̍nto̱ na mi̍nanti ve̱dhasa̍: । naitadbhūyo̱ bhava̍ti̱ no kanī̍yaḥ ॥ 2 anna̍ṃ prā̱ṇamanna̍mapā̱namā̍huḥ । anna̍ṃ mṛ̱tyuṃ tamu̍ jī̱vātu̍māhuḥ । anna̍ṃ bra̱hmāṇo̍ ja̱rasa̍ṃ vadanti । anna̍māhuḥ pra̱jana̍naṃ pra̱jānā̎m । mogha̱manna̍ṃ vindate̱ apra̍cetāḥ । sa̱tyaṃ bra̍vīmi va̱dha itsa tasya̍ । nārya̱maṇa̱ṃ puṣya̍ti̱ no sakhā̍yam । keva̍lāgho bhavati kevalā̱dī । a̱haṃ me̱ghaḥ sta̱naya̱nvarṣa̍nnasmi । māma̍dantya̱hama̍dmya̱nyān ॥ 3 [ aha̱gṃ sada̱mṛto̍ bhavāmi । madā̍di̱tyā adhi̱ sarve̍ tapanti । ]