(tai.ā.9-1-1) oṃ sa̱ha nā̍vavatu । sa̱ha nau̍ bhunaktu । sa̱ha vī̱rya̍-ṅkaravāvahai । te̱ja̱svinā̱vadhī̍tamastu̱ mā vi̍dviṣā̱vahai̎ । oṃ śānti̱-śśānti̱-śśānti̍ḥ ॥ bhṛgu̱rvai vā̍ru̱ṇiḥ । varu̍ṇa̱-mpita̍ra̱mupa̍sasāra । adhī̍hi bhagavo̱ brahmeti̍ । tasmā̍ e̱tatpro̍vāca । anna̍-mprā̱ṇa-ñcakṣu̱śśrotra̱-mmano̱ vāca̱miti̍ । tagṃ ho̍vāca । yato̱ vā i̱māni̱ bhūtā̍ni̱ jāya̍nte । yena̱ jātā̍ni̱ jīva̍nti । yatpraya̍ntya̱bhisaṃ​vi̍m̐śanti । tadviji̍jñāsasva । tadbrahmeti̍ । sa tapo̍-'tapyata । sa tapa̍sta̱ptvā ॥ 1 ॥ iti prathamo-'nuvākaḥ ॥ anna̱-mbrahmeti̱ vya̍jānāt । a̱nnāddhye̍va khalvi̱māni̱ bhutā̍ni̱ jāya̍nte । anne̍na̱ jātā̍ni̱ jīva̍nti । anna̱-mpraya̍ntya̱bhisaṃ​vi̍m̐śa̱ntīti̍ । tadvi̱jñāya̍ । puna̍re̱va varu̍ṇa̱-mpita̍ra̱mupa̍sasāra । adhī̍hi bhagavo̱ brahmeti̍ । tagṃ ho̍vāca । tapa̍sā̱ brahma̱ viji̍jñāsasva । tapo̱ brahmeti̍ । sa tapo̍-'tapyata । sa tapa̍sta̱ptvā ॥ 1 ॥ iti dvitīyo-'nuvākaḥ ॥ prā̱ṇo bra̱hmeti̱ vya̍jānāt । prā̱ṇāddhye̍va khalvi̱māni̱ bhūtā̍ni̱ jāya̍nte । prā̱ṇena̱ jātā̍ni̱ jīva̍nti । prā̱ṇa-mpraya̍ntya̱bhisaṃ​vi̍m̐śa̱ntīti̍ । tadvi̱jñāya̍ । puna̍re̱va varu̍ṇa̱-mpita̍ra̱mupa̍sasāra । adhī̍hi bhagavo̱ brahmeti̍ । tagṃ ho̍vāca । tapa̍sā̱ brahma̱ viji̍jñāsasva । tapo̱ brahmeti̍ । sa tapo̍-'tapyata । sa tapa̍sta̱ptvā ॥ 1 ॥ iti tṛtīyo-'nuvākaḥ ॥ mano̱ brahmeti̱ vya̍jānāt । mana̍so̱ hye̍va khalvi̱māni̱ bhūtā̍ni̱ jāya̍nte । mana̍sā̱ jātā̍ni̱ jīva̍nti । mana̱ḥ praya̍ntya̱bhisaṃ​vi̍m̐śa̱ntīti̍ । tadvi̱jñāya̍ । puna̍re̱va varu̍ṇa̱-mpita̍ra̱mupa̍sasāra । adhī̍hi bhagavo̱ brahmeti̍ । tagṃ ho̍vāca । tapa̍sā̱ brahma̱ viji̍jñāsasva । tapo̱ brahmeti̍ । sa tapo̍-'tapyata । sa tapa̍sta̱ptvā ॥ 1 ॥ iti caturtho-'nuvākaḥ ॥ vi̱jñāna̱-mbrahmeti̱ vya̍jānāt । vi̱jñānā̱ddhye̍va khalvi̱māni̱ bhūtā̍ni̱ jāya̍nte । vi̱jñāne̍na̱ jātā̍ni̱ jīva̍nti । vi̱jñāna̱-mpraya̍ntya̱bhisaṃ​vi̍m̐śa̱ntīti̍ । tadvi̱jñāya̍ । puna̍re̱va varu̍ṇa̱-mpita̍ra̱mupa̍sasāra । adhī̍hi bhagavo̱ brahmeti̍ । tagṃ ho̍vāca । tapa̍sā̱ brahma̱ viji̍jñāsasva । tapo̱ brahmeti̍ । sa tapo̍-'tapyata । sa tapa̍sta̱ptvā ॥ 1 ॥ iti pañcamo-'nuvākaḥ ॥ ā̱na̱ndo bra̱hmeti̱ vya̍jānāt । ā̱nandā̱ddhye̍va khalvi̱māni̱ bhūtā̍ni̱ jāya̍nte । ā̱na̱ndena̱ jātā̍ni̱ jīva̍nti । ā̱na̱nda-mpraya̍ntya̱bhisaṃ​vi̍m̐śa̱ntīti̍ । saiṣā bhā̎rga̱vī vā̍ru̱ṇī vi̱dyā । pa̱ra̱me vyo̍ma̱nprati̍ṣṭhitā । sa ya e̱vaṃ-vem̐da̱ prati̍tiṣṭhati । anna̍vānannā̱do bha̍vati । ma̱hānbha̍vati pra̱jayā̍ pa̱śubhi̍rbrahmavarca̱sena̍ । ma̱hānkī̱rtyā ॥ 1 ॥ iti ṣaṣṭho-'nuvākaḥ ॥ anna̱-nna ni̍ndyāt । tadvra̱tam । prā̱ṇo vā annam̎ । śarī̍ramannā̱dam । prā̱ṇe śarī̍ra̱-mprati̍ṣṭhitam । śarī̍re prā̱ṇaḥ prati̍ṣṭhitaḥ । tade̱tadanna̱manne̱ prati̍ṣṭhitam । sa ya e̱tadanna̱manne̱ prati̍ṣṭhita̱ṃ-vem̐da̱ prati̍tiṣṭhati । anna̍vānannā̱do bha̍vati । ma̱hānbha̍vati pra̱jayā̍ pa̱śubhi̍rbrahmavarca̱sena̍ । ma̱hānkī̱rtyā ॥ 1 ॥ iti saptamo-'nuvākaḥ ॥ anna̱-nna pari̍cakṣīta । tadvra̱tam । āpo̱ vā annam̎ । jyoti̍rannā̱dam । a̱psu jyoti̱ḥ prati̍ṣṭhitam । jyoti̱ṣyāpa̱ḥ prati̍ṣṭhitāḥ । tade̱tadanna̱manne̱ prati̍ṣṭhitam । sa ya e̱tadanna̱manne̱ prati̍ṣṭhita̱ṃ-vem̐da̱ prati̍tiṣṭhati । anna̍vānannā̱do bha̍vati । mahā̱nbha̍vati pra̱jayā̍ pa̱śubhi̍rbrahmavarca̱sena̍ । ma̱hānkī̱rtyā ॥ 1 ॥ ityaṣṭamo-'nuvākaḥ ॥ anna̍-mba̱hu ku̍rvīta । tadvra̱tam । pṛ̱thi̱vī vā annam̎ । ā̱kā̱śo̎-'nnā̱daḥ । pṛ̱thi̱vyāmā̍kā̱śaḥ prati̍ṣṭhitaḥ । ā̱kā̱śe pṛ̍thi̱vī prati̍ṣṭhitā । tade̱tadanna̱manne̱ prati̍ṣṭhitam । sa ya e̱tadanna̱manne̱ prati̍ṣṭhita̱ṃ-vem̐da̱ prati̍tiṣṭhati । anna̍vānannā̱do bha̍vati । ma̱hānbha̍vati pra̱jayā̍ pa̱śubhi̍rbrahmavarca̱sena̍ । ma̱hānkī̱rtyā ॥ 1 ॥ iti navamo-'nuvākaḥ ॥ na kañcana vasatau pratyā̍cakṣī̱ta । tadvra̱tam । tasmādyayā kayā ca vidhayā bahva̍nna-mprā̱pnuyāt । arādhyasmā annami̍tyāca̱kṣate । etadvai mukhato̎-'nnagṃ rā̱ddham । mukhato-'smā a̍nnagṃ rā̱dhyate । etadvai madhyato̎-'nnagṃ rā̱ddham । madhyato-'smā a̍nnagṃ rā̱dhyate । etadvā antato̎-'nnagṃ rā̱ddham । antato-'smā a̍nnagṃ rā̱dhyate ॥ 1 ॥ ya e̍vaṃ-ve̱m̐da । kṣema i̍ti vā̱ci । yogakṣema iti prā̍ṇāpā̱nayoḥ । karme̍ti ha̱stayoḥ । gatiri̍ti pā̱dayoḥ । vimuktiri̍ti pā̱yau । iti mānuṣī̎ssamā̱jñāḥ । atha dai̱vīḥ । tṛptiri̍ti vṛ̱ṣṭau । balami̍ti vi̱dyuti ॥ 2 ॥ yaśa i̍ti pa̱śuṣu । jyotiriti na̍kṣatre̱ṣu । prajātiramṛtamānanda i̍tyupa̱sthe । sarvami̍tyākā̱śe । tatpratiṣṭhetyu̍pāsī̱ta । pratiṣṭhā̍vānbha̱vati । tanmaha ityu̍pāsī̱ta । ma̍hānbha̱vati । tanmana ityu̍pāsī̱ta । māna̍vānbha̱vati ॥ 3 ॥ tannama ityu̍pāsī̱ta । namyante̎-'smai kā̱māḥ । tadbrahmetyu̍pāsī̱ta । brahma̍vānbha̱vati । tadbrahmaṇaḥ parimara ityu̍pāsī̱ta । paryeṇa-mmriyante dviṣanta̍ssapa̱tnāḥ । pari ye̎-'priyā̎ bhrātṛ̱vyāḥ । sa yaścā̍ya-mpu̱ruṣe । yaścāsā̍vādi̱tye । sa eka̍ḥ ॥ 4 ॥ sa ya̍ eva̱ṃ-vim̐t । asmāṃ​llo̍m̐kātpre̱tya । etamannamaya-mātmānamupa̍saṅkra̱mya । eta-mprāṇamaya-mātmānamupa̍saṅkra̱mya । eta-mmanomaya-mātmānamupa̍saṅkra̱mya । etaṃ-vim̐jñānamaya-mātmānamupa̍saṅkra̱mya । etamānandamaya-mātmānamupa̍saṅkra̱mya । imāṃ​llom̐kānkāmānnī -kāmarūpya̍nu-sa̱ñcarann । etathsāma gā̍yannā̱ste । hā(3) vu̱ hā(3) vu̱ hā(3) vu̍ ॥ 5 ॥ a̱hamanna-ma̱hamanna-ma̱hamannam । a̱hamannā̱do(3)-'̱hamannā̱do(3)-'̱hamannā̱daḥ । a̱hagg śloka̱kṛda̱hagg śloka̱kṛda̱hagg śloka̱kṛt । a̱hamasmi prathamajā ṛtā(3) sya̱ । pūrva-ndevebhyo amṛtasya nā(3) bhā̱yi̱ । yo mā dadāti sa ideva mā(3) vā̱ḥ । a̱hamanna̱-manna̍-ma̱danta̱mā(3) dmi̱ । aha̱ṃ-vim̐śva̱-mbhuva̍na̱-mabhya̍bha̱vām । suva̱rna jyotī̎ḥ । ya e̱vaṃ-vem̐da̍ । ityu̍pa̱niṣa̍t ॥ 6 ॥ iti daśamo-'nuvākaḥ ॥ oṃ sa̱ha nā̍vavatu । sa̱ha nau̍ bhunaktu । sa̱ha vī̱rya̍-ṅkaravāvahai । te̱ja̱svinā̱vadhī̍tamastu̱ mā vi̍dviṣā̱vahai̎ । oṃ śānti̱-śśānti̱-śśānti̍ḥ ॥ ॥ hari̍ḥ om ॥ ॥ śrī kṛṣṇārpaṇamastu ॥