a̱gnimī̍le pu̱rohi̍taṃ-ya̱m̐jñasya̍ de̱vamṛ̱tvija̍m । hotā̍raṃ ratna̱dhāta̍mam ॥ 1 a̱gniḥ pūrve̍bhi̱r​ṛṣi̍bhi̱rīḍyo̱ nūta̍nairu̱ta । sa de̱vā।ṇ eha va̍kṣati ॥ 2 a̱gninā̍ ra̱yima̍śnava̱tpoṣa̍me̱va di̱vedi̍ve । ya̱śasa̍ṃ-vī̱m̐rava̍ttamam ॥ 3 agne̱ yaṃ-ya̱m̐jñama̍dhva̱raṃ-vi̱m̐śvata̍ḥ pari̱bhūrasi̍ । sa idde̱veṣu̍ gacchati ॥ 4 a̱gnir​hotā̍ ka̱vikra̍tuḥ sa̱tyaści̱traśra̍vastamaḥ । de̱vo de̱vebhi̱rā ga̍mat ॥ 5 yada̱ṅga dā̱śuṣe̱ tvamagne̍ bha̱draṃ ka̍ri̱ṣyasi̍ । tavettatsa̱tyama̍ṃgiraḥ ॥ 6 upa̍ tvāgne di̱vedi̍ve̱ doṣā̍vastardhi̱yā va̱yam । namo̱ bhara̍ṃta̱ ema̍si ॥ 7 rāja̍ṃtamadhva̱rāṇā̍ṃ go̱pāmṛ̱tasya̱ dīdi̍vim । vardha̍māna̱ṃ sve dame̍ ॥ 8 sa na̍ḥ pi̱teva̍ sū̱nave'gne̍ sūpāya̱no bha̍va । saca̍svā naḥ sva̱staye̍ ॥ 9