hira̍ṇyaśṛṃga̱ṃ-vam̐ru̍ṇa̱ṃ prapa̍dye tī̱rthaṃ me̍ dehi̱ yāci̍taḥ । ya̱nmayā̍ bhu̱ktama̱sādhū̍nāṃ pā̱pebhya̍śca pra̱tigra̍haḥ । yanme̱ mana̍sā vā̱cā̱ ka̱rma̱ṇā vā du̍ṣkṛta̱ṃ kṛtam । tanna̱ iṃdro̱ varu̍ṇo̱ bṛha̱spati̍ḥ savi̱tā ca̍ punaṃtu̱ puna̍ḥ punaḥ । namo̱'gnaye̎'psu̱mate̱ nama̱ iṃdrā̍ya̱ namo̱ varu̍ṇāya̱ namo vāruṇyai̍ namo̱'dbhyaḥ ॥ yada̱pāṃ krū̱raṃ-yam̐da̍me̱dhyaṃ-yam̐da̍śā̱ṃtaṃ tadapa̍gacchatāt । a̱tyā̱śa̱nāda̍tī-pā̱nā̱-dya̱cca u̱grātpra̍ti̱grahā̎t । tanno̱ varu̍ṇo rā̱jā̱ pā̱ṇinā̎ hyava̱mar​śatu । so̍​'hama̍pā̱po vi̱rajo̱ nirmu̱kto mu̍ktaki̱lbiṣa̍ḥ । nāka̍sya pṛ̱ṣṭha-māru̍hya̱ gacche̱d brahma̍salo̱katām । yaścā̱psu varu̍ṇa̱ssa pu̱nātva̍ghamar​ṣa̱ṇaḥ । i̱maṃ me̍ gaṃge yamune sarasvati̱ śutu̍dri̱-stomag̍ṃ sacatā̱ paru̱ṣṇiyā । a̱si̱kni̱yā ma̍rudvṛdhe vi̱tasta̱yā''rjī̍kīye śṛṇu̱hyā su̱ṣoma̍yā । ṛ̱taṃ ca̍ sa̱tyaṃ cā̱bhī̎ddhā̱-ttapa̱so'dhya̍jāyata । tato̱ rātri̍rajāyata̱ tata̍-ssamu̱dro a̍rṇa̱vaḥ ॥ sa̱mu̱drāda̍rṇa̱vā dadhi̍ saṃ​vam̐thsa̱ro a̍jāyata । a̱ho̱rā̱trāṇi̍ vi̱dadha̱dviśva̍sya miṣa̱to va̱śī । sū̱ryā̱ca̱ṃdra̱masau̍ dhā̱tā ya̍thā pū̱rvama̍kalpayat । diva̍ṃ ca pṛthi̱vīṃ cā̱ṃtari̍kṣa̱-matho̱ suva̍ḥ । yatpṛ̍thi̱vyāgṃ raja̍ḥ sva̱māṃtari̍kṣe vi̱roda̍sī । i̱māggṃ stadā̱po va̍ruṇaḥ pu̱nātva̍ghamar​ṣa̱ṇaḥ । pu̱naṃtu̱ vasa̍vaḥ pu̱nātu̱ varu̍ṇaḥ pu̱nātva̍ghamar​ṣa̱ṇaḥ । e̱ṣa bhū̱tasya̍ ma̱dhye bhuva̍nasya go̱ptā । e̱ṣa pu̱ṇyakṛ̍tāṃ-lo̱m̐kā̱ne̱ṣa mṛ̱tyor hi̍ra̱ṇmayam̎ । dyāvā̍pṛthi̱vyor hi̍ra̱ṇmaya̱g̱ṃ saggṃ śri̍ta̱g̱ṃ suva̍ḥ ॥ sana̱-ssuva̱-ssagṃśi̍śādhi । ārdra̱ṃ jvala̍ti̱ jyoti̍ra̱hama̍smi । jyoti̱rjvala̍ti̱ brahmā̱hama̍smi । yo̍​'hama̍smi̱ brahmā̱hama̍smi । a̱hama̍smi̱ brahmā̱hama̍smi । a̱hame̱vāhaṃ māṃ ju̍homi̱ svāhā̎ । a̱kā̱rya̱kā̱rya̍vakī̱rṇīste̱no bhrū̍ṇa̱hā gu̍ruta̱lpagaḥ । varu̍ṇo̱'pāma̍ghamar​ṣa̱ṇa-stasmā̎t pā̱pāt pramu̍cyate । ra̱jobhūmi̍-stva̱māgṃ roda̍yasva̱ prava̍daṃti̱ dhīrā̎ḥ । ākrā̎ṃth​samu̱draḥ pra̍tha̱me vidha̍rmaṃja̱naya̍n pra̱jā bhuva̍nasya̱ rājā̎ । vṛṣā̍ pa̱vitre̱ adhi̱sāno̱ avye̍ bṛ̱hatsomo̍ vāvṛdhe suvā̱na iṃdu̍ḥ ॥