సా బ్రహ్మేతి హోవాచ బ్రహ్మణో వా ఏతద్విజయే మహీయధ్వమితి తతో హైవ విదాంచకార బ్రహ్మేతి ॥ 1॥ తస్మాద్వా ఏతే దేవా అతితరామివాన్యాందేవాన్యదగ్నిర్వాయురింద్రస్తే హ్యేనన్నేదిష్ఠం పస్పర్​శుస్తే హ్యేనత్ప్రథమో విదాంచకార బ్రహ్మేతి ॥ 2॥ తస్మాద్వా ఇంద్రోఽతితరామివాన్యాందేవాన్స హ్యేనన్నేదిష్ఠం పస్పర్​శ స హ్యేనత్ప్రథమో విదాంచకార బ్రహ్మేతి ॥ 3॥ తస్యైష ఆదేశో యదేతద్విద్యుతో వ్యద్యుతదా(3) ఇతీన్ న్యమీమిషదా(3) ఇత్యధిదైవతం ॥ 4॥ అథాధ్యాత్మం-యఀద్దేతద్గచ్ఛతీవ చ మనోఽనేన చైతదుపస్మరత్యభీక్ష్ణం సంకల్పః ॥ 5॥ తద్ధ తద్వనం నామ తద్వనమిత్యుపాసితవ్యం స య ఏతదేవం-వేఀదాభి హైనగ్ం సర్వాణి భూతాని సం​వాంఀఛంతి ॥ 6॥ ఉపనిషదం భో బ్రూహీత్యుక్తా త ఉపనిషద్బ్రాహ్మీం-వాఀవ త ఉపనిషదమబ్రూమేతి ॥ 7॥ తసై తపో దమః కర్మేతి ప్రతిష్ఠా వేదాః సర్వాంగాని సత్యమాయతనం ॥ 8॥ యో వా ఏతామేవం-వేఀదాపహత్య పాప్మానమనంతే స్వర్గే లోకే జ్యేయే ప్రతితిష్ఠతి ప్రతితిష్ఠతి ॥ 9॥ ॥ ఇతి కేనోపనిషది చతుర్థః ఖండః ॥ ఓం ఆప్యాయంతు మమాంగాని వాక్ప్రాణశ్చక్షుః శ్రోత్రమథో బలమింద్రియాణి చ సర్వాణి । సర్వం బ్రహ్మౌపనిషదం మాఽహం బ్రహ్మ నిరాకుర్యాం మా మా బ్రహ్మ నిరాకరోదనిరాకరణమస్త్వనిరాకరణం మేఽస్తు । తదాత్మని నిరతే య ఉపనిషత్సు ధర్మాస్తే మయి సంతు తే మయి సంతు । ఓం శాంతిః॒ శాంతిః॒ శాంతిః॑ ॥ ॥ ఇతి కేనోపనిషత్ ॥