oṃ bha̱draṃ karṇe̍bhiḥ śṛṇu̱yāma̍ devāḥ । bha̱draṃ pa̍śyemā̱kṣabhi̱-ryaja̍trāḥ । sthi̱rairaṃgai̎stuṣṭu̱vāgṃ sa̍sta̱nūbhi̍ḥ । vyaśe̍ma de̱vahi̍ta̱ṃ-yam̐dāyu̍ḥ । sva̱sti na̱ iṃdro̍ vṛ̱ddhaśra̍vāḥ । sva̱sti na̍ḥ pū̱ṣā vi̱śvave̍dāḥ । sva̱sti na̱stārkṣyo̱ ari̍ṣṭanemiḥ । sva̱sti no̱ bṛha̱spati̍-rdadhātu ॥ oṃ śāṃti̱ḥ śāṃti̱ḥ śāṃti̍ḥ ॥ ॥ atha māṃḍūkyopaniṣat ॥ hariḥ om । omityetadakṣaramidagṃ sarvaṃ tasyopavyākhyānaṃ bhūtaṃ bhavad bhaviṣyaditi sarvamoṃkāra eva yaccānyat trikālātītaṃ tadapyoṃkāra eva ॥ 1 ॥ sarvagṃ hyetad brahmāyamātmā brahma so'yamātmā catuṣpāt ॥ 2 ॥ jāgaritasthāno bahiṣprajñaḥ saptāṃga ekonaviṃśatimukhaḥ sthūlabhugvaiśvānaraḥ prathamaḥ pādaḥ ॥ 3 ॥ svapnasthāno'ṃtaḥprajñaḥ saptāṃga ekonaviṃśatimukhaḥ praviviktabhuktaijaso dvitīyaḥ pādaḥ ॥ 4 ॥ yatra supto na kaṃcana kāmaṃ kāmayate na kaṃcana svapnaṃ paśyati tat suṣuptam । suṣuptasthāna ekībhūtaḥ prajñānaghana evānaṃdamayo hyānaṃdabhuk cetomukhaḥ prājñastṛtīyaḥ pādaḥ ॥ 5 ॥ eṣa sarveśvaraḥ eṣa sarvajña eṣo'ṃtaryāmyeṣa yoniḥ sarvasya prabhavāpyayau hi bhūtānām ॥ 6 ॥ nāṃtaḥprajñaṃ na bahiṣprajñaṃ nobhayataḥprajñaṃ na prajñānaghanaṃ na prajñaṃ nāprajñam । adṛṣṭamavyavahāryamagrāhyamalakṣaṇaṃ aciṃtyamavyapadeśyamekātmapratyayasāraṃ prapaṃcopaśamaṃ śāṃtaṃ śivamadvaitaṃ caturthaṃ manyaṃte sa ātmā sa vijñeyaḥ ॥ 7 ॥ so'yamātmādhyakṣaramoṃkāro'dhimātraṃ pādā mātrā mātrāśca pādā akāra ukāro makāra iti ॥ 8 ॥ jāgaritasthāno vaiśvānaro'kāraḥ prathamā mātrā''pterādimattvād vā''pnoti ha vai sarvān kāmānādiśca bhavati ya evaṃ-vem̐da ॥ 9 ॥ svapnasthānastaijasa ukāro dvitīyā mātrotkar​ṣāt ubhayatvādvotkar​ṣati ha vai jñānasaṃtatiṃ samānaśca bhavati nāsyābrahmavitkule bhavati ya evaṃ-vem̐da ॥ 10 ॥ suṣuptasthānaḥ prājño makārastṛtīyā mātrā miterapītervā minoti ha vā idaṃ sarvamapītiśca bhavati ya evaṃ-vem̐da ॥ 11 ॥ amātraścaturtho'vyavahāryaḥ prapaṃcopaśamaḥ śivo'dvaita evamoṃkāra ātmaiva saṃ​vim̐śatyātmanā''tmānaṃ-yam̐ evaṃ-vem̐da ॥ 12 ॥ ॥ iti māṃḍūkyopaniṣat samāptā ॥