oṃ prā̱tara̱gniṃ prā̱tariṃdrag̍ṃ havāmahe prā̱tarmi̱trā varu̍ṇā prā̱tara̱śvinā̎ । prā̱tarbhaga̍ṃ pū̱ṣaṇa̱ṃ brahma̍ṇa̱spati̍ṃ prā̱taḥ soma̍mu̱ta ru̱dragṃ hu̍vema ॥ 1 ॥ prā̱ta̱rjita̱ṃ bha̍gamu̱gragṃ hu̍vema va̱yaṃ pu̱tramadi̍te̱ryo vi̍dha̱rtā । ā̱ddhraści̱dyaṃ manya̍mānastu̱raści̱drājā̍ ci̱dyaṃ bhaga̍ṃ bha̱kṣītyāha̍ ॥ 2 ॥ bhaga̱ praṇe̍ta̱rbhaga̱ satya̍rādho̱ bhage̱māṃ dhiya̱muda̍va̱dada̍nnaḥ । bhaga̱praṇo̍ janaya̱ gobhi̱raśvai̱rbhaga̱pranṛbhi̍rnṛ̱vaṃta̍ssyāma ॥ 3 ॥ u̱tedānī̱ṃ bhaga̍vaṃtassyāmo̱ta prapi̱tva u̱ta madhye̱ ahnā̎m । u̱todi̍tā maghava̱ṃth​sūrya̍sya va̱yaṃ de̱vānāg̍ṃ suma̱tau syā̍ma ॥ 4 ॥ bhaga̍ e̱va bhaga̍vāgṃ astu devā̱stena̍ va̱yaṃ bhaga̍vaṃtassyāma । taṃ tvā̍ bhaga̱ sarva̱ ijjo̍havīmi̱ sano̍ bhaga pura e̱tā bha̍veha ॥ 5 ॥ sama̍dhva̱rāyo̱ṣaso̍​'namaṃta dadhi̱krāve̍va̱ śucaye̍ pa̱dāya̍ । a̱rvā̱cī̱naṃ-va̍m̐su̱vida̱ṃ bhaga̍nno̱ ratha̍mi̱vā'śvā̍vā̱jina̱ āva̍haṃtu ॥ 6 ॥ aśvā̍vatī̱rgoma̍tīrna u̱ṣāso̍ vī̱rava̍tī̱ssada̍mucchaṃtu bha̱drāḥ । ghṛ̱taṃ duhā̍nā vi̱śvata̱ḥ prapī̍nā yū̱yaṃ pā̍ta sva̱stibhi̱ssadā̍ naḥ ॥ 7 ॥ yo mā̎'gne bhā̱ginag̍ṃ sa̱ṃtamathā̍bhā̱ga̍ṃ cikī̍ṛṣati । abhā̱gama̍gne̱ taṃ ku̍ru̱ māma̍gne bhā̱gina̍ṃ kuru ॥ 8 ॥ oṃ śāṃti̱ḥ śāṃti̱ḥ śāṃti̍ḥ ॥