॥ പൂർവപീഠികാ ॥ മാർകണ്ഡേയ ഉവാച । ഏവം യുദ്ധമഭൂദ്ഘോരം രൗദ്രം ദൈത്യബലൈഃ സഹ । നൃസിംഹസ്യാംഗസംഭൂതൈർനാരസിംഹൈരനേകശഃ ॥ 1 ॥ ദൈത്യകോടിർഹതാസ്തത്ര കേചിദ്ഭീതാഃ പലായിതാഃ । തം ദൃഷ്ട്വാതീവ സങ്ക്രുദ്ധോ ഹിരണ്യകശിപുഃ സ്വയം ॥ 2 ॥ ഭൂതപൂർവൈരമൃത്യുർമേ ഇതി ബ്രഹ്മവരോദ്ധതഃ । വവർഷ ശരവർഷേണ നാരസിംഹോ ഭൃശം ബലീ ॥ 3 ॥ ദ്വന്ദ്വയുദ്ധമഭൂദുഗ്രം ദിവ്യവർഷസഹസ്രകം । ദൈത്യേന്ദ്രേ സാഹസം ദൃഷ്ട്വാ ദേവാശ്ചേന്ദ്രപുരോഗമാഃ ॥ 4 ॥ ശ്രേയഃ കസ്യ ഭവേദത്ര ഇതി ചിന്താപരാ ഭവൻ । തദാ ക്രുദ്ധോ നൃസിംഹസ്തു ദൈത്യേന്ദ്രപ്രഹിതാന്യപി ॥ 5 ॥ വിഷ്ണുചക്രം മഹാചക്രം കാലചക്രം തു വൈഷ്ണവം । രൗദ്രം പാശുപതം ബ്രാഹ്മം കൗബേരം കുലിശാസനം ॥ 6 ॥ ആഗ്നേയം വാരുണം സൗമ്യം മോഹനം സൗരപാർവതം । ഭാർഗവാദി ബഹൂന്യസ്ത്രാണ്യഭക്ഷയത കോപനഃ ॥ 7 ॥ സന്ധ്യാകാലേ സഭാദ്വാരേ സ്വാങ്കേ നിക്ഷിപ്യ ഭൈരവഃ । തതഃ ഖഡ്ഗധരം ദൈത്യം ജഗ്രാഹ നരകേസരീ ॥ 8 ॥ ഹിരണ്യകശിപോർവക്ഷോ വിദാര്യാതീവ രോഷിതഃ । ഉദ്ധൃത്യ ചാന്ത്രമാലാനി നഖൈർവജ്രസമപ്രഭൈഃ ॥ 9 ॥ മേനേ കൃതാർഥമാത്മാനം സർവതഃ പര്യവൈക്ഷത । ഹർഷിതാ ദേവതാഃ സർവാഃ പുഷ്പവൃഷ്ടിമവാകിരൻ ॥ 10 ॥ ദേവദുന്ദുഭയോ നേദുർവിമലാശ്ച ദിശോഽഭവൻ । നരസിംഹമതീവോഗ്രം വികീർണവദനം ഭൃശം ॥ 11 ॥ ലേലിഹാനം ച ഗർജന്തം കാലാനലസമപ്രഭം । അതിരൗദ്രം മഹാകായം മഹാദംഷ്ട്രം മഹാരുതം ॥ 12 ॥ മഹാസിംഹം മഹാരൂപം ദൃഷ്ട്വാ സങ്ക്ഷുഭിതം ജഗത് । സർവദേവഗണൈഃ സാർഥം തത്രാഗത്യ പിതാമഹഃ ॥ 13 ॥ ആഗന്തുകൈർഭൂതപൂർവൈർവർതമാനൈരനുത്തമൈഃ । ഗുണൈർനാമസഹസ്രേണ തുഷ്ടാവ ശ്രുതിസമ്മതൈഃ ॥ 14 ॥ ഓം നമഃ ശ്രീമദ്ദിവ്യലക്ഷ്മീനൃസിംഹ സഹസ്രനാമസ്തോത്രമഹാമന്ത്രസ്യ ബ്രഹ്മാ ഋഷിഃ, ശ്രീലക്ഷ്മീനൃസിംഹോ ദേവതാ, അനുഷ്ടുപ്ഛന്ദഃ, ശ്രീനൃസിംഹഃ പരമാത്മാ ബീജം, ലക്ഷ്മീർമായാ ശക്തിഃ, ജീവോ ബീജം, ബുദ്ധിഃ ശക്തിഃ, ഉദാനവായുഃ ബീജം, സരസ്വതീ ശക്തിഃ, വ്യഞ്ജനാനി ബീജാനി, സ്വരാഃ ശക്തയഃ, ഓം ക്ഷ്രൗം ഹ്രീം ഇതി ബീജാനി, ഓം ശ്രീം അം ആം ഇതി ശക്തയഃ, വികീർണനഖദംഷ്ട്രായുധായേതി കീലകം, അകാരാദിതി ബോധകം, ശ്രീലക്ഷ്മീനൃസിംഹ പ്രസാദസിദ്ധ്യർഥേ ശ്രീലക്ഷ്മീനൃസിംഹ സഹസ്രനാമസ്തോത്ര മന്ത്രജപേ വിനിയോഗഃ । ന്യാസഃ – ഓം ശ്രീലക്ഷ്മീനൃസിംഹായ നമഃ – അംഗുഷ്ഠാഭ്യാം നമഃ । ഓം വജ്രനഖായ നമഃ – തർജനീഭ്യാം നമഃ । ഓം മഹാരുദ്രായ നമഃ – മധ്യമാഭ്യാം നമഃ । ഓം സർവതോമുഖായ നമഃ – അനാമികാഭ്യാം നമഃ । ഓം വികടാസ്യായ നമഃ – കനിഷ്ഠികാഭ്യാം നമഃ । ഓം വീരായ നമഃ – കരതലകരപൃഷ്ഠാഭ്യാം നമഃ । ഏവം ഹൃദയാദിന്യാസഃ । ദിഗ്ബന്ധഃ – ഓം ഐന്ദ്രീം ദിശം സുദർശനേന ബധ്നാമി നമശ്ചക്രായ സ്വാഹാ । ഓം ആഗ്നേയീം ദിശം സുദർശനേന ബധ്നാമി നമശ്ചക്രായ സ്വാഹാ । ഓം യാമ്യാം ദിശം സുദർശനേന ബധ്നാമി നമശ്ചക്രായ സ്വാഹാ । ഓം നൈരൃതിം ദിശം സുദർശനേന ബധ്നാമി നമശ്ചക്രായ സ്വാഹാ । ഓം വാരുണീം ദിശം സുദർശനേന ബധ്നാമി നമശ്ചക്രായ സ്വാഹാ । ഓം വായവീം ദിശം സുദർശനേന ബധ്നാമി നമശ്ചക്രായ സ്വാഹാ । ഓം കൗബേരീം ദിശം സുദർശനേന ബധ്നാമി നമശ്ചക്രായ സ്വാഹാ । ഓം ഈശാനീം ദിശം സുദർശനേന ബധ്നാമി നമശ്ചക്രായ സ്വാഹാ । ഓം ഊർധ്വാം ദിശം സുദർശനേന ബധ്നാമി നമശ്ചക്രായ സ്വാഹാ । ഓം അധസ്താദ്ദിശം ദിശം സുദർശനേന ബധ്നാമി നമശ്ചക്രായ സ്വാഹാ । ഓം അന്തരിക്ഷാം ദിശം സുദർശനേന ബധ്നാമി നമശ്ചക്രായ സ്വാഹാ । അഥ ധ്യാനം । സത്യജ്ഞാനസുഖസ്വരൂപമമലം ക്ഷീരാബ്ധിമധ്യേ സ്ഥിതം യോഗാരൂഢമതിപ്രസന്നവദനം ഭൂഷാസഹസ്രോജ്വലം । ത്ര്യക്ഷം ചക്രപിനാകസാഭയകരാൻ ബിഭ്രാണമർകച്ഛവിം ഛത്രീഭൂതഫണീന്ദ്രമിന്ദുധവലം ലക്ഷ്മീനൃസിംഹം ഭജേ ॥ 1 ॥ ഉപാസ്മഹേ നൃസിംഹാഖ്യം ബ്രഹ്മ വേദാന്തഗോചരം । ഭൂയോലാലിതസംസാരച്ഛേദഹേതും ജഗദ്ഗുരും ॥ 2 ॥ അഥ സ്തോത്രം । ബ്രഹ്മോവാച । ഓം ഹ്രീം ശ്രീം ഐം ക്ഷ്രൗം ॥ ഓം നമോ നാരസിംഹായ വജ്രദംഷ്ട്രായ വജ്രിണേ । വജ്രദേഹായ വജ്രായ നമോ വജ്രനഖായ ച ॥ 1 ॥ വാസുദേവായ വന്ദ്യായ വരദായ വരാത്മനേ । വരദാഭയഹസ്തായ വരായ വരരൂപിണേ ॥ 2 ॥ വരേണ്യായ വരിഷ്ഠായ ശ്രീവരായ നമോ നമഃ । പ്രഹ്ലാദവരദായൈവ പ്രത്യക്ഷവരദായ ച ॥ 3 ॥ പരാത്പരപരേശായ പവിത്രായ പിനാകിനേ । പാവനായ പ്രസന്നായ പാശിനേ പാപഹാരിണേ ॥ 4 ॥ പുരുഷ്ടുതായ പുണ്യായ പുരുഹൂതായ തേ നമഃ । തത്പുരുഷായ തഥ്യായ പുരാണപുരുഷായ ച ॥ 5 ॥ പുരോധസേ പൂർവജായ പുഷ്കരാക്ഷായ തേ നമഃ । പുഷ്പഹാസായ ഹാസായ മഹാഹാസായ ശാർങ്ഗിണേ ॥ 6 ॥ സിംഹായ സിംഹരാജായ ജഗദ്വശ്യായ തേ നമഃ । അട്ടഹാസായ രോഷായ ജലവാസായ തേ നമഃ ॥ 7 ॥ ഭൂതാവാസായ ഭാസായ ശ്രീനിവാസായ ഖഡ്ഗിനേ । ഖഡ്ഗജിഹ്വായ സിംഹായ ഖഡ്ഗവാസായ തേ നമഃ ॥ 8 ॥ നമോ മൂലാധിവാസായ ധർമവാസായ ധന്വിനേ । ധനഞ്ജയായ ധന്യായ നമോ മൃത്യുഞ്ജയായ ച ॥ 9 ॥ ശുഭഞ്ജയായ സൂത്രായ നമഃ ശത്രുഞ്ജയായ ച । നിരഞ്ജനായ നീരായ നിർഗുണായ ഗുണായ ച ॥ 10 ॥ നിഷ്പ്രപഞ്ചായ നിർവാണപ്രദായ നിബിഡായ ച । നിരാലംബായ നീലായ നിഷ്കലായ കലായ ച ॥ 11 ॥ നിമേഷായ നിബന്ധായ നിമേഷഗമനായ ച । നിർദ്വന്ദ്വായ നിരാശായ നിശ്ചയായ നിരായ ച ॥ 12 ॥ നിർമലായ നിബന്ധായ നിർമോഹായ നിരാകൃതേ । നമോ നിത്യായ സത്യായ സത്കർമനിരതായ ച ॥ 13 ॥ സത്യധ്വജായ മുഞ്ജായ മുഞ്ജകേശായ കേശിനേ । ഹരീശായ ച ശേഷായ ഗുഡാകേശായ വൈ നമഃ ॥ 14 ॥ സുകേശായോർധ്വകേശായ കേശിസംഹാരകായ ച । ജലേശായ സ്ഥലേശായ പദ്മേശായോഗ്രരൂപിണേ ॥ 15 ॥ കുശേശയായ കൂലായ കേശവായ നമോ നമഃ । സൂക്തികർണായ സൂക്തായ രക്തജിഹ്വായ രാഗിണേ ॥ 16 ॥ ദീപ്തരൂപായ ദീപ്തായ പ്രദീപ്തായ പ്രലോഭിനേ । പ്രച്ഛിന്നായ പ്രബോധായ പ്രഭവേ വിഭവേ നമഃ ॥ 17 ॥ പ്രഭഞ്ജനായ പാന്ഥായ പ്രമായാപ്രമിതായ ച । പ്രകാശായ പ്രതാപായ പ്രജ്വലായോജ്ജ്വലായ ച ॥ 18 ॥ ജ്വാലാമാലാസ്വരൂപായ ജ്വലജ്ജിഹ്വായ ജ്വാലിനേ । മഹോജ്ജ്വലായ കാലായ കാലമൂർതിധരായ ച ॥ 19 ॥ കാലാന്തകായ കല്പായ കലനായ കൃതേ നമഃ । കാലചക്രായ ശക്രായ വഷട്ചക്രായ ചക്രിണേ ॥ 20 ॥ അക്രൂരായ കൃതാന്തായ വിക്രമായ ക്രമായ ച । കൃത്തിനേ കൃത്തിവാസായ കൃതഘ്നായ കൃതാത്മനേ ॥ 21 ॥ സങ്ക്രമായ ച ക്രുദ്ധായ ക്രാന്തലോകത്രയായ ച । അരൂപായ സ്വരൂപായ ഹരയേ പരമാത്മനേ ॥ 22 ॥ അജയായാദിദേവായ അക്ഷയായ ക്ഷയായ ച । അഘോരായ സുഘോരായ ഘോരഘോരതരായ ച ॥ 23 ॥ നമോഽസ്ത്വഘോരവീര്യായ ലസദ്ഘോരായ തേ നമഃ । ഘോരാധ്യക്ഷായ ദക്ഷായ ദക്ഷിണാഽഽര്യായ ശംഭവേ ॥ 24 ॥ അമോഘായ ഗുണൗഘായ അനഘായാഽഘഹാരിണേ । മേഘനാദായ നാദായ തുഭ്യം മേഘാത്മനേ നമഃ ॥ 25 ॥ മേഘവാഹനരൂപായ മേഘശ്യാമായ മാലിനേ । വ്യാലയജ്ഞോപവീതായ വ്യാഘ്രദേഹായ വൈ നമഃ ॥ 26 ॥ വ്യാഘ്രപാദായ ച വ്യാഘ്രകർമിണേ വ്യാപകായ ച । വികടാസ്യായ വീരായ വിഷ്ടരശ്രവസേ നമഃ ॥ 27 ॥ വികീർണനഖദംഷ്ട്രായ നഖദംഷ്ട്രായുധായ ച । വിഷ്വക്സേനായ സേനായ വിഹ്വലായ ബലായ ച ॥ 28 ॥ വിരൂപാക്ഷായ വീരായ വിശേഷാക്ഷായ സാക്ഷിണേ । വീതശോകായ വിസ്തീർണവദനായ നമോ നമഃ ॥ 29 ॥ വിധാനായ വിധേയായ വിജയായ ജയായ ച । വിബുധായ വിഭാവായ നമോ വിശ്വംഭരായ ച ॥ 30 ॥ വീതരാഗായ വിപ്രായ വിടങ്കനയനായ ച । വിപുലായ വിനീതായ വിശ്വയോനേ നമോ നമഃ ॥ 31 ॥ വിഡംബനായ വിത്തായ വിശ്രുതായ വിയോനയേ । [ചിദംബരായ] വിഹ്വലായ വിവാദായ നമോ വ്യാഹൃതയേ നമഃ ॥ 32 ॥ വിലാസായ വികല്പായ മഹാകല്പായ തേ നമഃ । ബഹുകല്പായ കല്പായ കല്പാതീതായ ശില്പിനേ ॥ 33 ॥ കല്പനായ സ്വരൂപായ ഫണിതല്പായ വൈ നമഃ । തടിത്പ്രഭായ താർക്ഷ്യായ തരുണായ തരസ്വിനേ ॥ 34 ॥ തപനായ തരക്ഷായ താപത്രയഹരായ ച । താരകായ തമോഘ്നായ തത്ത്വായ ച തപസ്വിനേ ॥ 35 ॥ തക്ഷകായ തനുത്രായ തടിനേ തരലായ ച । ശതരൂപായ ശാന്തായ ശതധാരായ തേ നമഃ ॥ 36 ॥ ശതപത്രായതാക്ഷായ സ്ഥിതയേ ശതമൂർതയേ । ശതക്രതുസ്വരൂപായ ശാശ്വതായ ശതാത്മനേ ॥ 37 ॥ നമഃ സഹസ്രശിരസേ സഹസ്രവദനായ ച । സഹസ്രാക്ഷായ ദേവായ ദിശശ്രോത്രായ തേ നമഃ ॥ 38 ॥ നമഃ സഹസ്രജിഹ്വായ മഹാജിഹ്വായ തേ നമഃ । സഹസ്രനാമധേയായ സഹസ്രാക്ഷിധരായ ച ॥ 39 ॥ സഹസ്രബാഹവേ തുഭ്യം സഹസ്രചരണായ ച । സഹസ്രാർകപ്രകാശായ സഹസ്രായുധധാരിണേ ॥ 40 ॥ നമഃ സ്ഥൂലായ സൂക്ഷ്മായ സുസൂക്ഷ്മായ നമോ നമഃ । സുക്ഷുണ്ണായ സുഭിക്ഷായ സുരാധ്യക്ഷായ ശൗരിണേ ॥ 41 ॥ ധർമാധ്യക്ഷായ ധർമായ ലോകാധ്യക്ഷായ വൈ നമഃ । പ്രജാധ്യക്ഷായ ശിക്ഷായ വിപക്ഷക്ഷയമൂർതയേ ॥ 42 ॥ കാലാധ്യക്ഷായ തീക്ഷ്ണായ മൂലാധ്യക്ഷായ തേ നമഃ । അധോക്ഷജായ മിത്രായ സുമിത്രവരുണായ ച ॥ 43 ॥ ശത്രുഘ്നായ അവിഘ്നായ വിഘ്നകോടിഹരായ ച । രക്ഷോഘ്നായ തമോഘ്നായ ഭൂതഘ്നായ നമോ നമഃ ॥ 44 ॥ ഭൂതപാലായ ഭൂതായ ഭൂതാവാസായ ഭൂതിനേ । ഭൂതവേതാലഘാതായ ഭൂതാധിപതയേ നമഃ ॥ 45 ॥ ഭൂതഗ്രഹവിനാശായ ഭൂതസമ്യമതേ നമഃ । മഹാഭൂതായ ഭൃഗവേ സർവഭൂതാത്മനേ നമഃ ॥ 46 ॥ സർവാരിഷ്ടവിനാശായ സർവസമ്പത്കരായ ച । സർവാധാരായ ശർവായ സർവാർതിഹരയേ നമഃ ॥ 47 ॥ സർവദുഃഖപ്രശാന്തായ സർവസൗഭാഗ്യദായിനേ । സർവജ്ഞായാപ്യനന്തായ സർവശക്തിധരായ ച ॥ 48 ॥ സർവൈശ്വര്യപ്രദാത്രേ ച സർവകാര്യവിധായിനേ । സർവജ്വരവിനാശായ സർവരോഗാപഹാരിണേ ॥ 49 ॥ സർവാഭിചാരഹന്ത്രേ ച സർവൈശ്വര്യവിധായിനേ । പിംഗാക്ഷായൈകശൃംഗായ ദ്വിശൃംഗായ മരീചയേ ॥ 50 ॥ ബഹുശൃംഗായ ലിംഗായ മഹാശൃംഗായ തേ നമഃ । മാംഗല്യായ മനോജ്ഞായ മന്തവ്യായ മഹാത്മനേ ॥ 51 ॥ മഹാദേവായ ദേവായ മാതുലിംഗധരായ ച । മഹാമായാപ്രസൂതായ പ്രസ്തുതായ ച മായിനേ ॥ 52 ॥ അനന്താനന്തരൂപായ മായിനേ ജലശായിനേ । മഹോദരായ മന്ദായ മദദായ മദായ ച ॥ 53 ॥ മധുകൈടഭഹന്ത്രേ ച മാധവായ മുരാരയേ । മഹാവീര്യായ ധൈര്യായ ചിത്രവീര്യായ തേ നമഃ ॥ 54 ॥ ചിത്രകൂർമായ ചിത്രായ നമസ്തേ ചിത്രഭാനവേ । മായാതീതായ മായായ മഹാവീരായ തേ നമഃ ॥ 55 ॥ മഹാതേജായ ബീജായ തേജോധാമ്നേ ച ബീജിനേ । തേജോമയനൃസിംഹായ നമസ്തേ ചിത്രഭാനവേ ॥ 56 ॥ മഹാദംഷ്ട്രായ തുഷ്ടായ നമഃ പുഷ്ടികരായ ച । ശിപിവിഷ്ടായ ഹൃഷ്ടായ പുഷ്ടായ പരമേഷ്ഠിനേ ॥ 57 ॥ വിശിഷ്ടായ ച ശിഷ്ടായ ഗരിഷ്ഠായേഷ്ടദായിനേ । നമോ ജ്യേഷ്ഠായ ശ്രേഷ്ഠായ തുഷ്ടായാമിതതേജസേ ॥ 58 ॥ അഷ്ടാംഗന്യസ്തരൂപായ സർവദുഷ്ടാന്തകായ ച । വൈകുണ്ഠായ വികുണ്ഠായ കേശികണ്ഠായ തേ നമഃ ॥ 59 ॥ കണ്ഠീരവായ ലുണ്ഠായ നിശ്ശഠായ ഹഠായ ച । സത്വോദ്രിക്തായ രുദ്രായ ഋഗ്യജുസ്സാമഗായ ച ॥ 60 ॥ ഋതുധ്വജായ വജ്രായ മന്ത്രരാജായ മന്ത്രിണേ । ത്രിനേത്രായ ത്രിവർഗായ ത്രിധാമ്നേ ച ത്രിശൂലിനേ ॥ 61 ॥ ത്രികാലജ്ഞാനരൂപായ ത്രിദേഹായ ത്രിധാത്മനേ । നമസ്ത്രിമൂർതിവിദ്യായ ത്രിതത്ത്വജ്ഞാനിനേ നമഃ ॥ 62 ॥ അക്ഷോഭ്യായാനിരുദ്ധായ അപ്രമേയായ ഭാനവേ । അമൃതായ അനന്തായ അമിതായാമിതൗജസേ ॥ 63 ॥ അപമൃത്യുവിനാശായ അപസ്മാരവിഘാതിനേ । അന്നദായാന്നരൂപായ അന്നായാന്നഭുജേ നമഃ ॥ 64 ॥ നാദ്യായ നിരവദ്യായ വിദ്യായാദ്ഭുതകർമണേ । സദ്യോജാതായ സംഘായ വൈദ്യുതായ നമോ നമഃ ॥ 65 ॥ അധ്വാതീതായ സത്ത്വായ വാഗതീതായ വാഗ്മിനേ । വാഗീശ്വരായ ഗോപായ ഗോഹിതായ ഗവാം പതേ ॥ 66 ॥ ഗന്ധർവായ ഗഭീരായ ഗർജിതായോർജിതായ ച । പർജന്യായ പ്രബുദ്ധായ പ്രധാനപുരുഷായ ച ॥ 67 ॥ പദ്മാഭായ സുനാഭായ പദ്മനാഭായ മാനിനേ । പദ്മനേത്രായ പദ്മായ പദ്മായാഃ പതയേ നമഃ ॥ 68 ॥ പദ്മോദരായ പൂതായ പദ്മകല്പോദ്ഭവായ ച । നമോ ഹൃത്പദ്മവാസായ ഭൂപദ്മോദ്ധരണായ ച ॥ 69 ॥ ശബ്ദബ്രഹ്മസ്വരൂപായ ബ്രഹ്മരൂപധരായ ച । ബ്രഹ്മണേ ബ്രഹ്മരൂപായ പദ്മനേത്രായ തേ നമഃ ॥ 70 ॥ ബ്രഹ്മദായ ബ്രാഹ്മണായ ബ്രഹ്മബ്രഹ്മാത്മനേ നമഃ । സുബ്രഹ്മണ്യായ ദേവായ ബ്രഹ്മണ്യായ ത്രിവേദിനേ ॥ 71 ॥ പരബ്രഹ്മസ്വരൂപായ പഞ്ചബ്രഹ്മാത്മനേ നമഃ । നമസ്തേ ബ്രഹ്മശിരസേ തഥാഽശ്വശിരസേ നമഃ ॥ 72 ॥ അഥർവശിരസേ നിത്യമശനിപ്രമിതായ ച । നമസ്തേ തീക്ഷ്ണദംഷ്ട്രായ ലോലായ ലലിതായ ച ॥ 73 ॥ ലാവണ്യായ ലവിത്രായ നമസ്തേ ഭാസകായ ച । ലക്ഷണജ്ഞായ ലക്ഷായ ലക്ഷണായ നമോ നമഃ ॥ 74 ॥ ലസദ്ദീപ്തായ ലിപ്തായ വിഷ്ണവേ പ്രഭവിഷ്ണവേ । വൃഷ്ണിമൂലായ കൃഷ്ണായ ശ്രീമഹാവിഷ്ണവേ നമഃ ॥ 75 ॥ പശ്യാമി ത്വാം മഹാസിംഹം ഹാരിണം വനമാലിനം । കിരീടിനം കുണ്ഡലിനം സർവാംഗം സർവതോമുഖം ॥ 76 ॥ സർവതഃ പാണിപാദോരഃ സർവതോഽക്ഷിശിരോമുഖം । സർവേശ്വരം സദാതുഷ്ടം സമർഥം സമരപ്രിയം ॥ 77 ॥ ബഹുയോജനവിസ്തീർണം ബഹുയോജനമായതം । ബഹുയോജനഹസ്താംഘ്രിം ബഹുയോജനനാസികം ॥ 78 ॥ മഹാരൂപം മഹാവക്ത്രം മഹാദംഷ്ട്രം മഹാഭുജം । മഹാനാദം മഹാരൗദ്രം മഹാകായം മഹാബലം ॥ 79 ॥ ആനാഭേർബ്രഹ്മണോ രൂപമാഗലാദ്വൈഷ്ണവം തഥാ । ആശീർഷാദ്രുദ്രമീശാനം തദഗ്രേ സർവതഃ ശിവം ॥ 80 ॥ നമോഽസ്തു നാരായണനാരസിംഹ നമോഽസ്തു നാരായണവീരസിംഹ । നമോഽസ്തു നാരായണക്രൂരസിംഹ നമോഽസ്തു നാരായണദിവ്യസിംഹ ॥ 81 ॥ നമോഽസ്തു നാരായണവ്യാഘ്രസിംഹ നമോഽസ്തു നാരായണപുച്ഛസിംഹ । നമോഽസ്തു നാരായണപൂർണസിംഹ നമോഽസ്തു നാരായണരൗദ്രസിംഹ ॥ 82 ॥ നമോ നമോ ഭീഷണഭദ്രസിംഹ നമോ നമോ വിഹ്വലനേത്രസിംഹ । നമോ നമോ ബൃംഹിതഭൂതസിംഹ നമോ നമോ നിർമലചിത്രസിംഹ ॥ 83 ॥ നമോ നമോ നിർജിതകാലസിംഹ നമോ നമഃ കല്പിതകല്പസിംഹ । നമോ നമോ കാമദകാമസിംഹ നമോ നമസ്തേ ഭുവനൈകസിംഹ ॥ 84 ॥ ദ്യാവാപൃഥിവ്യോരിദമന്തരം ഹി വ്യാപ്തം ത്വയൈകേന ദിശശ്ച സർവാഃ । ദൃഷ്ട്വാദ്ഭുതം രൂപമുഗ്രം തവേദം ലോകത്രയം പ്രവ്യഥിതം മഹാത്മൻ ॥ 85 ॥ അമീ ഹിത്വാ സുരസംഘാ വിശന്തി കേചിദ്ഭീതാഃ പ്രാഞ്ജലയോ ഗൃണന്തി । സ്വസ്തീത്യുക്ത്വാ മുനയഃ സിദ്ധസംഘാഃ സ്തുവന്തി ത്വാം സ്തുതിഭിഃ പുഷ്കലാഭിഃ ॥ 86 ॥ രുദ്രാദിത്യാവസവോ യേ ച സാധ്യാ വിശ്വേദേവാ മരുതശ്ചോഷ്മപാശ്ച । ഗന്ധർവയക്ഷാസുരസിദ്ധസംഘാ വീക്ഷന്തി ത്വാം വിസ്മിതാശ്ചൈവ സർവേ ॥ 87 ॥ ലേലിഹ്യസേ ഗ്രസമാനഃ സമന്താ- -ല്ലോകാൻ സമഗ്രാന്വദനൈർജ്വലദ്ഭിഃ । തേജോഭിരാപൂര്യ ജഗത്സമഗ്രം ഭാസസ്തവോഗ്രാഃ പ്രതപന്തി വിഷ്ണോ ॥ 88 ॥ ഭവിഷ്ണുസ്ത്വം സഹിഷ്ണുസ്ത്വം ഭ്രാജിഷ്ണുർജിഷ്ണുരേവ ച । പൃഥിവീമന്തരിക്ഷം ത്വം പർവതാരണ്യമേവ ച ॥ 89 ॥ കലാകാഷ്ഠാവിലിപ്തസ്ത്വം മുഹൂർതപ്രഹരാദികം । അഹോരാത്രം ത്രിസന്ധ്യാ ച പക്ഷമാസർതുവത്സരാഃ ॥ 90 ॥ യുഗാദിര്യുഗഭേദസ്ത്വം സമ്യുഗോ യുഗസന്ധയഃ । നിത്യം നൈമിത്തികം ദൈനം മഹാപ്രലയമേവ ച ॥ 91 ॥ കരണം കാരണം കർതാ ഭർതാ ഹർതാ ത്വമീശ്വരഃ । സത്കർതാ സത്കൃതിർഗോപ്താ സച്ചിദാനന്ദവിഗ്രഹഃ ॥ 92 ॥ പ്രാണസ്ത്വം പ്രാണിനാം പ്രത്യഗാത്മാ ത്വം സർവദേഹിനാം । സുജ്യോതിസ്ത്വം പരഞ്ജ്യോതിരാത്മജ്യോതിഃ സനാതനഃ ॥ 93 ॥ ജ്യോതിർലോകസ്വരൂപസ്ത്വം ജ്ഞോ ജ്യോതിർജ്യോതിഷാം പതിഃ । [ജ്യോതിർജ്ഞോ] സ്വാഹാകാരഃ സ്വധാകാരോ വഷട്കാരഃ കൃപാകരഃ ॥ 94 ॥ ഹന്തകാരോ നിരാകാരോ വേഗാകാരശ്ച ശങ്കരഃ । അകാരാദിഹകാരാന്ത ഓങ്കാരോ ലോകകാരകഃ ॥ 95 ॥ ഏകാത്മാ ത്വമനേകാത്മാ ചതുരാത്മാ ചതുർഭുജഃ । ചതുർമൂർതിശ്ചതുർദംഷ്ട്രശ്ചതുർവേദമയോത്തമഃ ॥ 96 ॥ ലോകപ്രിയോ ലോകഗുരുർലോകേശോ ലോകനായകഃ । ലോകസാക്ഷീ ലോകപതിർലോകാത്മാ ലോകലോചനഃ ॥ 97 ॥ ലോകാധാരോ ബൃഹല്ലോകോ ലോകാലോകമയോ വിഭുഃ । ലോകകർതാ വിശ്വകർതാ കൃതാവർതഃ കൃതാഗമഃ ॥ 98 ॥ അനാദിസ്ത്വമനന്തസ്ത്വമഭൂതോ ഭൂതവിഗ്രഹഃ । സ്തുതിഃ സ്തുത്യഃ സ്തവപ്രീതഃ സ്തോതാ നേതാ നിയാമകഃ ॥ 99 ॥ ത്വം ഗതിസ്ത്വം മതിർമഹ്യം പിതാ മാതാ ഗുരുഃ സഖാ । സുഹൃദശ്ചാത്മരൂപസ്ത്വം ത്വാം വിനാ നാസ്തി മേ ഗതിഃ ॥ 100 ॥ നമസ്തേ മന്ത്രരൂപായ അസ്ത്രരൂപായ തേ നമഃ । ബഹുരൂപായ രൂപായ പഞ്ചരൂപധരായ ച ॥ 101 ॥ ഭദ്രരൂപായ രൂഢായ യോഗരൂപായ യോഗിനേ । സമരൂപായ യോഗായ യോഗപീഠസ്ഥിതായ ച ॥ 102 ॥ യോഗഗമ്യായ സൗമ്യായ ധ്യാനഗമ്യായ ധ്യായിനേ । ധ്യേയഗമ്യായ ധാമ്നേ ച ധാമാധിപതയേ നമഃ ॥ 103 ॥ ധരാധരായ ധർമായ ധാരണാഭിരതായ ച । നമോ ധാത്രേ ച സന്ധാത്രേ വിധാത്രേ ച ധരായ ച ॥ 104 ॥ ദാമോദരായ ദാന്തായ ദാനവാന്തകരായ ച । നമഃ സംസാരവൈദ്യായ ഭേഷജായ നമോ നമഃ ॥ 105 ॥ സീരധ്വജായ ശീതായ വാതായാപ്രമിതായ ച । സാരസ്വതായ സംസാരനാശനായാക്ഷമാലിനേ ॥ 106 ॥ അസിചർമധരായൈവ ഷട്കർമനിരതായ ച । വികർമായ സുകർമായ പരകർമവിധായിനേ ॥ 107 ॥ സുശർമണേ മന്മഥായ നമോ വർമായ വർമിണേ । കരിചർമവസാനായ കരാലവദനായ ച ॥ 108 ॥ കവയേ പദ്മഗർഭായ ഭൂതഗർഭ ഘൃണാനിധേ । ബ്രഹ്മഗർഭായ ഗർഭായ ബൃഹദ്ഗർഭായ ധൂർജടേ ॥ 109 ॥ നമസ്തേ വിശ്വഗർഭായ ശ്രീഗർഭായ ജിതാരയേ । നമോ ഹിരണ്യഗർഭായ ഹിരണ്യകവചായ ച ॥ 110 ॥ ഹിരണ്യവർണദേഹായ ഹിരണ്യാക്ഷവിനാശിനേ । ഹിരണ്യകശിപോർഹന്ത്രേ ഹിരണ്യനയനായ ച ॥ 111 ॥ ഹിരണ്യരേതസേ തുഭ്യം ഹിരണ്യവദനായ ച । നമോ ഹിരണ്യശൃംഗായ നിഃശൃംഗായ ച ശൃംഗിണേ ॥ 112 ॥ ഭൈരവായ സുകേശായ ഭീഷണായാന്ത്രമാലിനേ । ചണ്ഡായ രുണ്ഡമാലായ നമോ ദണ്ഡധരായ ച ॥ 113 ॥ അഖണ്ഡതത്ത്വരൂപായ കമണ്ഡലുധരായ ച । നമസ്തേ ഖണ്ഡസിംഹായ സത്യസിംഹായ തേ നമഃ ॥ 114 ॥ നമസ്തേ ശ്വേതസിംഹായ പീതസിംഹായ തേ നമഃ । നീലസിംഹായ നീലായ രക്തസിംഹായ തേ നമഃ ॥ 115 ॥ നമോ ഹാരിദ്രസിംഹായ ധൂമ്രസിംഹായ തേ നമഃ । മൂലസിംഹായ മൂലായ ബൃഹത്സിംഹായ തേ നമഃ ॥ 116 ॥ പാതാലസ്ഥിതസിംഹായ നമഃ പർവതവാസിനേ । നമോ ജലസ്ഥസിംഹായ അന്തരിക്ഷസ്ഥിതായ ച ॥ 117 ॥ കാലാഗ്നിരുദ്രസിംഹായ ചണ്ഡസിംഹായ തേ നമഃ । അനന്തസിംഹസിംഹായ അനന്തഗതയേ നമഃ ॥ 118 ॥ നമോ വിചിത്രസിംഹായ ബഹുസിംഹസ്വരൂപിണേ । അഭയങ്കരസിംഹായ നരസിംഹായ തേ നമഃ ॥ 119 ॥ നമോഽസ്തു സിംഹരാജായ നാരസിംഹായ തേ നമഃ । സപ്താബ്ധിമേഖലായൈവ സത്യസത്യസ്വരൂപിണേ ॥ 120 ॥ സപ്തലോകാന്തരസ്ഥായ സപ്തസ്വരമയായ ച । സപ്താർചീരൂപദംഷ്ട്രായ സപ്താശ്വരഥരൂപിണേ ॥ 121 ॥ സപ്തവായുസ്വരൂപായ സപ്തച്ഛന്ദോമയായ ച । സ്വച്ഛായ സ്വച്ഛരൂപായ സ്വച്ഛന്ദായ ച തേ നമഃ ॥ 122 ॥ ശ്രീവത്സായ സുവേഷായ ശ്രുതയേ ശ്രുതിമൂർതയേ । ശുചിശ്രവായ ശൂരായ സുപ്രഭായ സുധന്വിനേ ॥ 123 ॥ ശുഭ്രായ സുരനാഥായ സുപ്രഭായ ശുഭായ ച । സുദർശനായ സൂക്ഷ്മായ നിരുക്തായ നമോ നമഃ ॥ 124 ॥ സുപ്രഭായ സ്വഭാവായ ഭവായ വിഭവായ ച । സുശാഖായ വിശാഖായ സുമുഖായ മുഖായ ച ॥ 125 ॥ സുനഖായ സുദംഷ്ട്രായ സുരഥായ സുധായ ച । സാംഖ്യായ സുരമുഖ്യായ പ്രഖ്യാതായ പ്രഭായ ച ॥ 126 ॥ നമഃ ഖട്വാംഗഹസ്തായ ഖേടമുദ്ഗരപാണയേ । ഖഗേന്ദ്രായ മൃഗേന്ദ്രായ നാഗേന്ദ്രായ ദൃഢായ ച ॥ 127 ॥ നാഗകേയൂരഹാരായ നാഗേന്ദ്രായാഘമർദിനേ । നദീവാസായ നഗ്നായ നാനാരൂപധരായ ച ॥ 128 ॥ നാഗേശ്വരായ നാഗായ നമിതായ നരായ ച । നാഗാന്തകരഥായൈവ നരനാരായണായ ച ॥ 129 ॥ നമോ മത്സ്യസ്വരൂപായ കച്ഛപായ നമോ നമഃ । നമോ യജ്ഞവരാഹായ നരസിംഹായ തേ നമഃ ॥ 130 ॥ വിക്രമാക്രാന്തലോകായ വാമനായ മഹൗജസേ । നമോ ഭാർഗവരാമായ രാവണാന്തകരായ ച ॥ 131 ॥ നമസ്തേ ബലരാമായ കംസപ്രധ്വംസകാരിണേ । ബുദ്ധായ ബുദ്ധരൂപായ തീക്ഷ്ണരൂപായ കൽകിനേ ॥ 132 ॥ ആത്രേയായാഗ്നിനേത്രായ കപിലായ ദ്വിജായ ച । ക്ഷേത്രായ പശുപാലായ പശുവക്ത്രായ തേ നമഃ ॥ 133 ॥ ഗൃഹസ്ഥായ വനസ്ഥായ യതയേ ബ്രഹ്മചാരിണേ । സ്വർഗാപവർഗദാത്രേ ച തദ്ഭോക്ത്രേ ച മുമുക്ഷവേ ॥ 134 ॥ ശാലഗ്രാമനിവാസായ ക്ഷീരാബ്ധിശയനായ ച । ശ്രീശൈലാദ്രിനിവാസായ ശിലാവാസായ തേ നമഃ ॥ 135 ॥ യോഗിഹൃത്പദ്മവാസായ മഹാഹാസായ തേ നമഃ । ഗുഹാവാസായ ഗുഹ്യായ ഗുപ്തായ ഗുരവേ നമഃ ॥ 136 ॥ നമോ മൂലാധിവാസായ നീലവസ്ത്രധരായ ച । പീതവസ്ത്രായ ശസ്ത്രായ രക്തവസ്ത്രധരായ ച ॥ 137 ॥ രക്തമാലാവിഭൂഷായ രക്തഗന്ധാനുലേപിനേ । ധുരന്ധരായ ധൂർതായ ദുർധരായ ധരായ ച ॥ 138 ॥ ദുർമദായ ദുരന്തായ ദുർധരായ നമോ നമഃ । ദുർനിരീക്ഷ്യായ നിഷ്ഠായ ദുർദർശായ ദ്രുമായ ച ॥ 139 ॥ ദുർഭേദായ ദുരാശായ ദുർലഭായ നമോ നമഃ । ദൃപ്തായ ദൃപ്തവക്ത്രായ അദൃപ്തനയനായ ച ॥ 140 ॥ ഉന്മത്തായ പ്രമത്തായ നമോ ദൈത്യാരയേ നമഃ । രസജ്ഞായ രസേശായ ആരക്തരസനായ ച ॥ 141 ॥ പഥ്യായ പരിതോഷായ രഥ്യായ രസികായ ച । ഊർധ്വകേശോർധ്വരൂപായ നമസ്തേ ചോർധ്വരേതസേ ॥ 142 ॥ ഊർധ്വസിംഹായ സിംഹായ നമസ്തേ ചോർധ്വബാഹവേ । പരപ്രധ്വംസകായൈവ ശംഖചക്രധരായ ച ॥ 143 ॥ ഗദാപദ്മധരായൈവ പഞ്ചബാണധരായ ച । കാമേശ്വരായ കാമായ കാമപാലായ കാമിനേ ॥ 144 ॥ നമഃ കാമവിഹാരായ കാമരൂപധരായ ച । സോമസൂര്യാഗ്നിനേത്രായ സോമപായ നമോ നമഃ ॥ 145 ॥ നമഃ സോമായ വാമായ വാമദേവായ തേ നമഃ । സാമസ്വനായ സൗമ്യായ ഭക്തിഗമ്യായ വൈ നമഃ ॥ 146 ॥ കൂഷ്മാണ്ഡഗണനാഥായ സർവശ്രേയസ്കരായ ച । ഭീഷ്മായ ഭീഷദായൈവ ഭീമവിക്രമണായ ച ॥ 147 ॥ മൃഗഗ്രീവായ ജീവായ ജിതായാജിതകാരിണേ । ജടിനേ ജാമദഗ്ന്യായ നമസ്തേ ജാതവേദസേ ॥ 148 ॥ ജപാകുസുമവർണായ ജപ്യായ ജപിതായ ച । ജരായുജായാണ്ഡജായ സ്വേദജായോദ്ഭിജായ ച ॥ 149 ॥ ജനാർദനായ രാമായ ജാഹ്നവീജനകായ ച । ജരാജന്മാദിദൂരായ പ്രദ്യുമ്നായ പ്രമോദിനേ ॥ 150 ॥ ജിഹ്വാരൗദ്രായ രുദ്രായ വീരഭദ്രായ തേ നമഃ । ചിദ്രൂപായ സമുദ്രായ കദ്രുദ്രായ പ്രചേതസേ ॥ 151 ॥ ഇന്ദ്രിയായേന്ദ്രിയജ്ഞായ നമോഽസ്ത്വിന്ദ്രാനുജായ ച । അതീന്ദ്രിയായ സാരായ ഇന്ദിരാപതയേ നമഃ ॥ 152 ॥ ഈശാനായ ച ഈഡ്യായ ഈശിതായ ഇനായ ച । വ്യോമാത്മനേ ച വ്യോമ്നേ ച നമസ്തേ വ്യോമകേശിനേ ॥ 153 ॥ വ്യോമാധാരായ ച വ്യോമവക്ത്രായാസുരഘാതിനേ । നമസ്തേ വ്യോമദംഷ്ട്രായ വ്യോമവാസായ തേ നമഃ ॥ 154 ॥ സുകുമാരായ രാമായ ശുഭാചാരായ വൈ നമഃ । വിശ്വായ വിശ്വരൂപായ നമോ വിശ്വാത്മകായ ച ॥ 155 ॥ ജ്ഞാനാത്മകായ ജ്ഞാനായ വിശ്വേശായ പരാത്മനേ । ഏകാത്മനേ നമസ്തുഭ്യം നമസ്തേ ദ്വാദശാത്മനേ ॥ 156 ॥ ചതുർവിംശതിരൂപായ പഞ്ചവിംശതിമൂർതയേ । ഷഡ്വിംശകാത്മനേ നിത്യം സപ്തവിംശതികാത്മനേ ॥ 157 ॥ ധർമാർഥകാമമോക്ഷായ വിരക്തായ നമോ നമഃ । ഭാവശുദ്ധായ സിദ്ധായ സാധ്യായ ശരഭായ ച ॥ 158 ॥ പ്രബോധായ സുബോധായ നമോ ബുദ്ധിപ്രിയായ ച । സ്നിഗ്ധായ ച വിദഗ്ധായ മുഗ്ധായ മുനയേ നമഃ ॥ 159 ॥ പ്രിയംവദായ ശ്രവ്യായ സ്രുക്സ്രുവായ ശ്രിതായ ച । ഗൃഹേശായ മഹേശായ ബ്രഹ്മേശായ നമോ നമഃ ॥ 160 ॥ ശ്രീധരായ സുതീർഥായ ഹയഗ്രീവായ തേ നമഃ । ഉഗ്രായ ഉഗ്രവേഗായ ഉഗ്രകർമരതായ ച ॥ 161 ॥ ഉഗ്രനേത്രായ വ്യഗ്രായ സമഗ്രഗുണശാലിനേ । ബാലഗ്രഹവിനാശായ പിശാചഗ്രഹഘാതിനേ ॥ 162 ॥ ദുഷ്ടഗ്രഹനിഹന്ത്രേ ച നിഗ്രഹാനുഗ്രഹായ ച । വൃഷധ്വജായ വൃഷ്ണ്യായ വൃഷായ വൃഷഭായ ച ॥ 163 ॥ ഉഗ്രശ്രവായ ശാന്തായ നമഃ ശ്രുതിധരായ ച । നമസ്തേ ദേവദേവേശ നമസ്തേ മധുസൂദന ॥ 164 ॥ നമസ്തേ പുണ്ഡരീകാക്ഷ നമസ്തേ ദുരിതക്ഷയ । നമസ്തേ കരുണാസിന്ധോ നമസ്തേ സമിതിഞ്ജയ ॥ 165 ॥ നമസ്തേ നരസിംഹായ നമസ്തേ ഗരുഡധ്വജ । യജ്ഞനേത്ര നമസ്തേഽസ്തു കാലധ്വജ ജയധ്വജ ॥ 166 ॥ അഗ്നിനേത്ര നമസ്തേഽസ്തു നമസ്തേ ഹ്യമരപ്രിയ । മഹാനേത്ര നമസ്തേഽസ്തു നമസ്തേ ഭക്തവത്സല ॥ 167 ॥ ധർമനേത്ര നമസ്തേഽസ്തു നമസ്തേ കരുണാകര । പുണ്യനേത്ര നമസ്തേഽസ്തു നമസ്തേഽഭീഷ്ടദായക ॥ 168 ॥ നമോ നമസ്തേ ജയസിംഹരൂപ നമോ നമസ്തേ നരസിംഹരൂപ । നമോ നമസ്തേ രണസിംഹരൂപ നമോ നമസ്തേ നരസിംഹരൂപ ॥ 169 ॥ ഉദ്ധൃത്യ ഗർവിതം ദൈത്യം നിഹത്യാജൗ സുരദ്വിഷം । ദേവകാര്യം മഹത്കൃത്വാ ഗർജസേ സ്വാത്മതേജസാ ॥ 170 ॥ അതിരൗദ്രമിദം രൂപം ദുസ്സഹം ദുരതിക്രമം । ദൃഷ്ട്വാ തു ശങ്കിതാഃ സർവാ ദേവതാസ്ത്വാമുപാഗതാഃ ॥ 171 ॥ ഏതാൻപശ്യ മഹേശാനം ബ്രഹ്മാണം മാം ശചീപതിം । ദിക്പാലാൻ ദ്വാദശാദിത്യാൻ രുദ്രാനുരഗരാക്ഷസാൻ ॥ 172 ॥ സർവാൻ ഋഷിഗണാൻ സപ്തമാതൃർഗൗരീം സരസ്വതീം । ലക്ഷ്മീം നദീശ്ച തീർഥാനി രതിം ഭൂതഗണാന്യപി ॥ 173 ॥ പ്രസീദ ത്വം മഹാസിംഹ ഉഗ്രഭാവമിമം ത്യജ । പ്രകൃതിസ്ഥോ ഭവ ത്വം ഹി ശാന്തിഭാവം ച ധാരയ ॥ 174 ॥ ഇത്യുക്ത്വാ ദണ്ഡവദ്ഭൂമൗ പപാത സ പിതാമഹഃ । പ്രസീദ ത്വം പ്രസീദ ത്വം പ്രസീദേതി പുനഃ പുനഃ ॥ 175 ॥ മാർകണ്ഡേയ ഉവാച । ദൃഷ്ട്വാ തു ദേവതാഃ സർവാഃ ശ്രുത്വാ താം ബ്രഹ്മണോ ഗിരം । സ്തോത്രേണാപി ച സംഹൃഷ്ടഃ സൗമ്യഭാവമധാരയത് ॥ 176 ॥ അബ്രവീന്നാരസിംഹസ്തു വീക്ഷ്യ സർവാൻ സുരോത്തമാൻ । സന്ത്രസ്താൻ ഭയസംവിഗ്നാൻ ശരണം സമുപാഗതാൻ ॥ 177 ॥ ശ്രീനൃസിംഹ ഉവാച । ഭോ ഭോ ദേവവരാഃ സർവേ പിതാമഹപുരോഗമാഃ । ശൃണുധ്വം മമ വാക്യം ച ഭവന്തു വിഗതജ്വരാഃ ॥ 178 ॥ യദ്ധിതം ഭവതാം നൂനം തത്കരിഷ്യാമി സാമ്പ്രതം । ഏവം നാമസഹസ്രം മേ ത്രിസന്ധ്യം യഃ പഠേത് ശുചിഃ ॥ 179 ॥ ശൃണോതി വാ ശ്രാവയതി പൂജാന്തേ ഭക്തിസമ്യുതഃ । സർവാൻ കാമാനവാപ്നോതി ജീവേച്ച ശരദാം ശതം ॥ 180 ॥ യോ നാമഭിർനൃസിംഹാദ്യൈരർചയേത്ക്രമശോ മമ । സർവതീർഥേഷു യത്പുണ്യം സർവതീർഥേഷു യത്ഫലം ॥ 181 ॥ സർവപൂജാസു യത്പ്രോക്തം തത്സർവം ലഭതേ ഭൃശം । ജാതിസ്മരത്വം ലഭതേ ബ്രഹ്മജ്ഞാനം സനാതനം ॥ 182 ॥ സർവപാപവിനിർമുക്തഃ തദ്വിഷ്ണോഃ പരമം പദം । മന്നാമകവചം ബധ്വാ വിചരേദ്വിഗതജ്വരഃ ॥ 183 ॥ ഭൂതഭേതാലകൂഷ്മാണ്ഡ പിശാചബ്രഹ്മരാക്ഷസാഃ । ശാകിനീഡാകിനീജ്യേഷ്ഠാ നീലീ ബാലഗ്രഹാദികാഃ ॥ 184 ॥ ദുഷ്ടഗ്രഹാശ്ച നശ്യന്തി യക്ഷരാക്ഷസപന്നഗാഃ । യേ ച സന്ധ്യാഗ്രഹാഃ സർവേ ചാണ്ഡാലഗ്രഹസഞ്ജ്ഞികാഃ ॥ 185 ॥ നിശാചരഗ്രഹാഃ സർവേ പ്രണശ്യന്തി ച ദൂരതഃ । കുക്ഷിരോഗം ച ഹൃദ്രോഗം ശൂലാപസ്മാരമേവ ച ॥ 186 ॥ ഐകാഹികം ദ്വ്യാഹികം ച ചാതുർഥികമഥ ജ്വരം । ആധയോ വ്യാധയഃ സർവേ രോഗാ രോഗാധിദേവതാഃ ॥ 187 ॥ ശീഘ്രം നശ്യന്തി തേ സർവേ നൃസിംഹസ്മരണാത് സുരാഃ । രാജാനോ ദാസതാം യാന്തി ശത്രവോ യാന്തി മിത്രതാം ॥ 188 ॥ ജലാനി സ്ഥലതാം യാന്തി വഹ്നയോ യാന്തി ശീതതാം । വിഷാണ്യപ്യമൃതാ യാന്തി നൃസിംഹസ്മരണാത്സുരാഃ ॥ 189 ॥ രാജ്യകാമോ ലഭേദ്രാജ്യം ധനകാമോ ലഭേദ്ധനം । വിദ്യാകാമോ ലഭേദ്വിദ്യാം ബദ്ധോ മുച്യേത ബന്ധനാത് ॥ 190 ॥ വ്യാലവ്യാഘ്രഭയം നാസ്തി ചോരസർപാദികം തഥാ । അനുകൂലാ ഭവേദ്ഭാര്യാ ലോകൈശ്ച പ്രതിപൂജ്യതേ ॥ 191 ॥ സുപുത്രം ധനധാന്യം ച ഭവന്തി വിഗതജ്വരാഃ । ഏതത്സർവം സമാപ്നോതി നൃസിംഹസ്യ പ്രസാദതഃ ॥ 192 ॥ ജലസന്തരണേ ചൈവ പർവതാരണ്യമേവ ച । വനേഽപി വിചിരന്മർത്യോ ദുർഗമേ വിഷമേ പഥി ॥ 193 ॥ ബിലപ്രവേശനേ ചാപി നാരസിംഹം ന വിസ്മരേത് । ബ്രഹ്മഘ്നശ്ച പശുഘ്നശ്ച ഭ്രൂണഹാ ഗുരുതല്പഗഃ ॥ 194 ॥ മുച്യതേ സർവപാപേഭ്യഃ കൃതഘ്നഃ സ്ത്രീവിഘാതകഃ । വേദാനാം ദൂഷകശ്ചാപി മാതാപിതൃവിനിന്ദകഃ ॥ 195 ॥ അസത്യസ്തു തേഥാ യജ്ഞനിന്ദകോ ലോകനിന്ദകഃ । സ്മൃത്വാ സകൃന്നൃസിംഹം തു മുച്യതേ സർവകിൽബിഷൈഃ ॥ 196 ॥ ബഹുനാത്ര കിമുക്തേന സ്മൃത്വാ മാം ശുദ്ധമാനസഃ । യത്ര യത്ര ചരേന്മർത്യോ നൃസിംഹസ്തത്ര രക്ഷതി ॥ 197 ॥ ഗച്ഛൻ തിഷ്ഠൻ സ്വപൻ ഭുഞ്ജൻ ജാഗ്രന്നപി ഹസന്നപി । നൃസിംഹേതി നൃസിംഹേതി നൃസിംഹേതി സദാ സ്മരൻ ॥ 198 ॥ പുമാന്ന ലിപ്യതേ പാപൈർഭുക്തിം മുക്തിം ച വിന്ദതി । നാരീ സുഭഗതാമേതി സൗഭാഗ്യം ച സ്വരൂപതാം ॥ 199 ॥ ഭർതുഃ പ്രിയത്വം ലഭതേ ന വൈധവ്യം ച വിന്ദതി । ന സപത്നീം ച ജന്മാന്തേ സമ്യക് ജ്ഞാനീ ഭവേദ്വിജഃ ॥ 200 ॥ ഭൂമിപ്രദക്ഷിണാന്മർത്യോ യത്ഫലം ലഭതേ ചിരാത് । തത്ഫലം ലഭതേ നാരസിംഹമൂർതിപ്രദക്ഷിണാത് ॥ 201 ॥ മാർകണ്ഡേയ ഉവാച । ഇത്യുക്ത്വാ ദേവദേവേശോ ലക്ഷ്മീമാലിംഗ്യ ലീലയാ । പ്രഹ്ലാദസ്യാഭിഷേകം തു ബ്രഹ്മണേ ചോപദിഷ്ടവാൻ ॥ 202 ॥ ശ്രീശൈലസ്യ പ്രസാദേ തു ലോകാനാം ച ഹിതായ വൈ । സ്വരൂപം സ്ഥാപയാമാസ പ്രകൃതിസ്ഥോഽഭവത്തദാ ॥ 203 ॥ ബ്രഹ്മാപി ദൈത്യരാജാനം പ്രഹ്ലാദമഭ്യഷേചയത് । ദൈവതൈഃ സഹ സുപ്രീതോ ഹ്യാത്മലോകം യയൗ സ്വയം ॥ 204 ॥ ഹിരണ്യകശിപോർഭീത്യാ പ്രപലായ്യ ശചീപതിഃ । സ്വർഗരാജ്യപരിഭ്രഷ്ടോ യുഗാനാമേകവിംശതിം ॥ 205 ॥ നൃസിംഹേന ഹതേ ദൈത്യേ സ്വർഗലോകമവാപ സഃ । ദിക്പാലാശ്ച സുസമ്പ്രാപ്തഃ സ്വസ്വസ്ഥാനമനുത്തമം ॥ 206 ॥ ധർമേ മതിഃ സമസ്താനാം പ്രജാനാമഭവത്തദാ । ഏവം നാമസഹസ്രം മേ ബ്രഹ്മണാ നിർമിതം പുരാ ॥ 207 ॥ പുത്രാനധ്യാപയാമാസ സനകാദീന്മഹാമതിഃ । ഊചുസ്തേ ച തതഃ സർവലോകാനാം ഹിതകാമ്യയാ ॥ 208 ॥ ദേവതാ ഋഷയഃ സിദ്ധാ യക്ഷവിദ്യാധരോരഗാഃ । ഗന്ധർവാശ്ച മനുഷ്യാശ്ച ഇഹാമുത്രഫലൈഷിണഃ ॥ 209 ॥ യസ്യ സ്തോത്രസ്യ പാഠാദ്ധി വിശുദ്ധമനസോഽഭവൻ । സനത്കുമാരഃ സമ്പ്രാപ്തോ ഭാരദ്വാജോ മഹാമതിഃ ॥ 210 ॥ തസ്മാദാംഗിരസഃ പ്രാപ്തസ്തസ്മാത്പ്രാപ്തോ മഹാക്രതുഃ । ജഗ്രാഹ ഭാർഗവസ്തസ്മാദഗ്നിമിത്രായ സോഽബ്രവീത് ॥ 211। ജൈഗീഷവ്യായ സ പ്രാഹ സോഽബ്രവീച്ച്യവനായ ച । തസ്മാ ഉവാച ശാണ്ഡില്യോ ഗർഗായ പ്രാഹ വൈ മുനിഃ ॥ 212 ॥ ക്രതുഞ്ജയായ സ പ്രാഹ ജതുകർണ്യായ സമ്യമീ । വിഷ്ണുവൃദ്ധായ സോഽപ്യാഹ സോഽപി ബോധായനായ ച ॥ 213 ॥ ക്രമാത്സ വിഷ്ണവേ പ്രാഹ സ പ്രാഹോദ്ധാമകുക്ഷയേ । സിംഹതേജാശ്ച തസ്മാച്ച ശ്രീപ്രിയായ ദദൗ ച നഃ ॥ 214 ॥ [സഃ] ഉപദിഷ്ടോഽസ്മി തേനാഹമിദം നാമസഹസ്രകം । തത്പ്രസാദാദമൃത്യുർമേ യസ്മാത്കസ്മാദ്ഭയം ന ഹി ॥ 215 ॥ മയാ ച കഥിതം നാരസിംഹസ്തോത്രമിദം തവ । ത്വം ഹി നിത്യം ശുചിർഭൂത്വാ തമാരാധയ ശാശ്വതം ॥ 216 ॥ സർവഭൂതാശ്രയം ദേവം നൃസിംഹം ഭക്തവത്സലം । പൂജയിത്വാ സ്തവം ജപ്ത്വാ ഹുത്വാ നിശ്ചലമാനസഃ ॥ 217 ॥ പ്രാപ്യസേ മഹതീം സിദ്ധിം സർവാൻ കാമാന്വരോത്തമാൻ । അയമേവ പരോധർമസ്ത്വിദമേവ പരം തപഃ ॥ 218 ॥ ഇദമേവ പരം ജ്ഞാനമിദമേവ മഹദ്വ്രതം । അയമേവ സദാചാരസ്ത്വയമേവ സദാ മഖഃ ॥ 219 ॥ ഇദമേവ ത്രയോ വേദാഃ സച്ഛാസ്ത്രാണ്യാഗമാനി ച । നൃസിംഹമന്ത്രാദന്യച്ച വൈദികം തു ന വിദ്യതേ ॥ 220 ॥ യദിഹാസ്തി തദന്യത്ര യന്നേഹാസ്തി ന തത്ക്വചിത് । കഥിതം തേ നൃസിംഹസ്യ ചരിതം പാപനാശനം ॥ 221 ॥ സർവമന്ത്രമയം താപത്രയോപശമനം പരം । സർവാർഥസാധനം ദിവ്യം കിം ഭൂയഃ ശ്രോതുമിച്ഛസി ॥ 222 ॥ ഇതി ശ്രീനൃസിംഹപുരാണേ നൃസിംഹപ്രാദുർഭാവേ ശ്രീമദ്ദിവ്യ ലക്ഷ്മീനൃസിംഹ സഹസ്രനാമ സ്തോത്രം ॥