ṛtaṃ kartumevāśu namrasya vākyaṃ sabhāstambhamadhyādya āvirbabhūva । tamānamralokeṣṭadānapracaṇḍaṃ namaskurmahe śailavāsaṃ nṛsiṃham ॥ 1 ॥ ināntardṛgantaśca gāṅgeyadehaṃ sadopāsate yaṃ narāḥ śuddhacittāḥ । tamastāghamenonivṛttyai nitāntaṃ namaskurmahe śailavāsaṃ nṛsiṃham ॥ 2 ॥ śivaṃ śaivavaryā hariṃ vaiṣṇavāgryāḥ parāśaktimāhustathā śaktibhaktāḥ । yamevābhidhābhiḥ paraṃ taṃ vibhinnaṃ namaskurmahe śailavāsaṃ nṛsiṃham ॥ 3 ॥ kṛpāsāgaraṃ kliṣṭarakṣādhurīṇaṃ kṛpāṇaṃ mahāpāpavṛkṣaughabhede । natālīṣṭavārāśirākāśaśāṅkaṃ namaskurmahe śailavāsaṃ nṛsiṃham ॥ 4 ॥ jaganneti netīti vākyairniṣiddhyā- -vaśiṣṭaṃ parabrahmarūpaṃ mahāntaḥ । svarūpeṇa vijñāya muktā hi yaṃ taṃ namaskurmahe śailavāsaṃ nṛsiṃham ॥ 5 ॥ natānbhogasaktānapīhāśu bhaktiṃ viraktiṃ ca datvā dṛḍhāṃ muktikāmān । vidhātuṃ kare kaṅkaṇaṃ dhārayantaṃ namaskurmahe śailavāsaṃ nṛsiṃham ॥ 6 ॥ naro yanmanorjāpato bhaktibhāvā- -ccharīreṇa tenaiva paśyatyamoghām । tanuṃ nārasiṃhasya vaktīti vedo namaskurmahe śailavāsaṃ nṛsiṃham ॥ 7 ॥ yadaṅghryabjasevāparāṇāṃ narāṇāṃ viraktirdṛḍhā jāyate'rtheṣu śīghram । tamaṅgaprabhādhūtapūrṇendukoṭiṃ namaskurmahe śailavāsaṃ nṛsiṃham ॥ 8 ॥ rathāṅgaṃ pinākaṃ varaṃ cābhayaṃ yo vidhatte karābjaiḥ kṛpāvārirāśiḥ । tamindvacchadehaṃ prasannāsyapadmaṃ namaskurmahe śailavāsaṃ nṛsiṃham ॥ 9 ॥ pinākaṃ rathāṅgaṃ varaṃ cābhayaṃ ca praphullāmbujākārahastairdadhānam । phaṇīndrātapatraṃ śucīnendunetraṃ namaskurmahe śailavāsaṃ nṛsiṃham ॥ 10 ॥ vivekaṃ viraktiṃ śamādeśca ṣaṭkaṃ mumukṣāṃ ca samprāpya vedāntajālaiḥ । yatante vibodhāya yasyāniśaṃ taṃ namaskurmahe śailavāsaṃ nṛsiṃham ॥ 11 ॥ sadā nandinītīravāsaikalolaṃ mudā bhaktalokaṃ dṛśā pālayantam । vidāmagragaṇyā natāḥ syuryadaṅghrau namaskurmahe śailavāsaṃ nṛsiṃham ॥ 12 ॥ yadīyasvarūpaṃ śikhā vedarāśe- -rajasraṃ mudā samyagudghoṣayanti । nalinyāstaṭe svairasañcāraśīlaṃ cidānandarūpaṃ tamīḍe nṛsiṃham ॥ 13 ॥ yamāhurhi dehaṃ hṛṣīkāṇi keci- -tpare'sūṃstathā buddhiśūnye tathānye । yadajñānamugdhā janā nāstikāgryāḥ sadānandarūpaṃ tamīḍe nṛsiṃham ॥ 14 ॥ sadānandacidrūpamāmnāyaśīrṣai- -rvicāryāryavaktrādyatīndrā yadīyam । sukhenāsate cittakañje dadhānāḥ sadānandacidrūpamīḍe nṛsiṃham ॥ 15 ॥ purā stambhamadhyādya āvirbabhūva svabhaktasya kartuṃ vacastathyamāśu । tamānandakāruṇyapūrṇāntaraṅgaṃ budhā bhāvayuktā bhajadhvaṃ nṛsiṃham ॥ 16 ॥ purā śaṅkarāryā dharādhīśabhṛtyai- -rvinikṣiptavahniprataptasvadehāḥ । stuvanti sma yaṃ dāhaśāntyai javāttaṃ budhā bhāvayuktā bhajadhvaṃ nṛsiṃham ॥ 17 ॥ sademāni bhaktyākhyasūtreṇa dṛbdhā- -nyamoghāni ratnāni kaṇṭhe janā ye । dhariṣyanti tānmuktikāntā vṛṇīte sakhībhirvṛtā śāntidāntyadimābhiḥ ॥