Lakshmi Nrusimha Karavalamba Stotram

śrīmatpayonidhiniketanacakrapāṇe bhogīndrabhogamaṇirājitapuṇyamūrte । yogīśa śāśvata śaraṇya bhavābdhipota lakṣmīnṛsiṃha mama dehi karāvalambam ॥ 1 ॥ brahmendrarudramarudarkakirīṭakoṭi- -saṅghaṭṭitāṅghrikamalāmalakāntikānta । lakṣmīlasatkucasaroruharājahaṃsa lakṣmīnṛsiṃha mama dehi karāvalambam ॥ 2 ॥ saṃsāradāvadahanākarabhīkaroru- -jvālāvalībhiratidagdhatanūruhasya । tvatpādapadmasarasīruhamāgatasya lakṣmīnṛsiṃha mama dehi karāvalambam ॥ 3 ॥ saṃsārajālapatitasya jagannivāsa sarvendriyārthabaḍiśāgrajhaṣopamasya । protkampitapracuratālukamastakasya lakṣmīnṛsiṃha mama dehi karāvalambam ॥ 4 ॥ saṃsārakūpamatighoramagādhamūlaṃ samprāpya duḥkhaśatasarpasamākulasya । dīnasya deva kṛpayā padamāgatasya lakṣmīnṛsiṃha mama dehi karāvalambam ॥ 5 ॥ saṃsārabhīkarakarīndrakarābhighāta- -niṣpīḍyamānavapuṣaḥ sakalārtināśa । prāṇaprayāṇabhavabhītisamākulasya lakṣmīnṛsiṃha mama dehi karāvalambam ॥ 6 ॥ saṃsārasarpaviṣadagdhamahogratīvra- -daṃṣṭrāgrakoṭiparidaṣṭavinaṣṭamūrteḥ । nāgārivāhana sudhābdhinivāsa śaure lakṣmīnṛsiṃha mama dehi karāvalambam ॥ 7 ॥ saṃsāravṛkṣamaghabījamanantakarma- -śākhāyutaṃ karaṇapatramanaṅgapuṣpam । āruhya duḥkhaphalitaṃ patato dayālo [cakitaṃ] lakṣmīnṛsiṃha mama dehi karāvalambam ॥ 8 ॥ saṃsārasāgaraviśālakarālakāla- -nakragrahagrasitanigrahavigrahasya । vyagrasya rāganicayorminipīḍitasya lakṣmīnṛsiṃha mama dehi karāvalambam ॥ 9 ॥ saṃsārasāgaranimajjanamuhyamānaṃ dīnaṃ vilokaya vibho karuṇānidhe mām । prahlādakhedaparihāraparāvatāra lakṣmīnṛsiṃha mama dehi karāvalambam ॥ 10 ॥ saṃsāraghoragahane carato murāre mārograbhīkaramṛgapracurārditasya । ārtasya matsaranidāghasuduḥkhitasya lakṣmīnṛsiṃha mama dehi karāvalambam ॥ 11 ॥ baddhvā gale yamabhaṭā bahutarjayantaḥ karṣanti yatra bhavapāśaśatairyutaṃ mām । ekākinaṃ paravaśaṃ cakitaṃ dayālo lakṣmīnṛsiṃha mama dehi karāvalambam ॥ 12 ॥ lakṣmīpate kamalanābha sureśa viṣṇo yajñeśa yajña madhusūdana viśvarūpa । brahmaṇya keśava janārdana vāsudeva lakṣmīnṛsiṃha mama dehi karāvalambam ॥ 13 ॥ ekena cakramapareṇa kareṇa śaṅkha- -manyena sindhutanayāmavalambya tiṣṭhan । vāmetareṇa varadābhayapadmacihnaṃ lakṣmīnṛsiṃha mama dehi karāvalambam ॥ 14 ॥ andhasya me hṛtavivekamahādhanasya corairmahābalibhirindriyanāmadheyaiḥ । mohāndhakārakuhare vinipātitasya lakṣmīnṛsiṃha mama dehi karāvalambam ॥ 15 ॥ prahlādanāradaparāśarapuṇḍarīka- -vyāsādibhāgavatapuṅgavahṛnnivāsa । bhaktānuraktaparipālanapārijāta lakṣmīnṛsiṃha mama dehi karāvalambam ॥ 16 ॥ lakṣmīnṛsiṃhacaraṇābjamadhuvratena stotraṃ kṛtaṃ śubhakaraṃ bhuvi śaṅkareṇa । ye tatpaṭhanti manujā haribhaktiyuktā- -ste yānti tatpadasarojamakhaṇḍarūpam ॥ 17 ॥ iti śrīmatparamahaṃsaparivrājakācārya śrīmacchaṅkarācārya viracitaṃ śrīlakṣmīnṛsiṃha karāvalamba stotram । — adhikaślokāḥ — saṃsārayoga sakalepsitanityakarma samprāpyaduḥkha sakalendriyamṛtyunāśa । saṅkalpa sindhutanayākuca kuṅkumāṅka lakṣmīnṛsiṃha mama dehi karāvalambam ॥ 18 ॥ ādyantaśūnyamajamavyayamaprameyaṃ ādityarudranigamādinutaprabhāvam । ambhodhijāsya madhulolupa mattabhṛṅga lakṣmīnṛsiṃha mama dehi karāvalambam ॥ 19 ॥ vārāha rāma narasiṃha ramādikāntā krīḍāvilola vidhiśūli surapravandya । haṃsātmakaṃ paramahaṃsa vihāralīlaṃ lakṣmīnṛsiṃha mama dehi karāvalambam ॥ 20 ॥ mātā nṛsiṃhaśca pitā nṛsiṃhaḥ bhrātā nṛsiṃhaśca sakhā nṛsiṃhaḥ । vidyā nṛsiṃho draviṇaṃ nṛsiṃhaḥ lakṣmīnṛsiṃha mama dehi karāvalambam ॥ 21 ॥ prahlāda mānasa saroja vihārabhṛṅga gaṅgātaraṅga dhavalāṅga ramāsthitāṅka । śṛṅgāra sundara kirīṭa lasadvarāṅga lakṣmīnṛsiṃha mama dehi karāvalambam ॥ 22 ॥ śrīśaṅkarārya racitaṃ satataṃ manuṣyaḥ stotraṃ paṭhedihatu satvaguṇaprasannam । sadyovimukta kaluṣo munivarya gaṇyo lakṣmī padamupaiti sanirmalātmā ॥ 23 ॥ yanmāyayorjitaḥ vapuḥ pracura pravāha magnārtha matranivahoru karāvalambam । lakṣmīnṛsiṃha caraṇābja madhuvratena stotraṃ kṛtaṃ śubhakaraṃ bhuvi śaṅkareṇa ॥ 24 ॥ śrīmannṛsiṃha vibhave garuḍadhvajāya tāpatrayopaśamanāya bhavauṣadhāya । tṛṣṇādi vṛścika jalāgni bhujaṅga roga kleśāpahāya haraye gurave namaste ॥ 25 ॥ iti śrīlakṣmīnṛsiṃha karāvalamba stotram ।

Recite with devotion and pure heart

Regular practice brings spiritual benefits

More stotras of Narasimha: