tvatprabhujīvapriyamicchasi cennaraharipūjāṃ kuru satataṃ pratibimbālaṅkṛtidhṛtikuśalo bimbālaṅkṛtimātanute । cetobhṛṅga bhramasi vṛthā bhavamarubhūmau virasāyāṃ bhaja bhaja lakṣmīnarasiṃhānaghapadasarasijamakarandam ॥ 1 ॥ śuktau rajatapratibhā jātā kaṭakādyarthasamarthā ce- -dduḥkhamayī te saṃsṛtireṣā nirvṛtidāne nipuṇā syāt । cetobhṛṅga bhramasi vṛthā bhavamarubhūmau virasāyāṃ bhaja bhaja lakṣmīnarasiṃhānaghapadasarasijamakarandam ॥ 2 ॥ ākṛtisāmyācchālmalikusume sthalanalinatvabhramamakaroḥ gandharasāviha kimu vidyete viphalaṃ bhrāmyasi bhṛśavirase'smin । cetobhṛṅga bhramasi vṛthā bhavamarubhūmau virasāyāṃ bhaja bhaja lakṣmīnarasiṃhānaghapadasarasijamakarandam ॥ 3 ॥ srakcandanavanitādīnviṣayānsukhadānmatvā tatra viharase gandhaphalīsadṛśā nanu te'mī bhogānantaraduḥkhakṛtaḥ syuḥ । cetobhṛṅga bhramasi vṛthā bhavamarubhūmau virasāyāṃ bhaja bhaja lakṣmīnarasiṃhānaghapadasarasijamakarandam ॥ 4 ॥ tava hitamekaṃ vacanaṃ vakṣye śṛṇu sukhakāmo yadi satataṃ svapne dṛṣṭaṃ sakalaṃ hi mṛṣā jāgrati ca smara tadvaditi । cetobhṛṅga bhramasi vṛthā bhavamarubhūmau virasāyāṃ bhaja bhaja lakṣmīnarasiṃhānaghapadasarasijamakarandam ॥ 5 ॥ iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau śrīlakṣmīnarasiṃha pañcaratnam ।