हैंహైHaindavamஹிહિં
📍
Font Size:
ശ്രീ ഗായത്രീ സ്തോത്രം - ദേവീഭാഗവതേ
നാരദ ഉവാച ।
ഭക്താനുകമ്പിൻ സർവജ്ഞ ഹൃദയം പാപനാശനം ।
ഗായത്ര്യാഃ കഥിതം തസ്മാദ്ഗായത്ര്യാഃ സ്തോത്രമീരയ ॥ 1 ॥
ശ്രീനാരായണ ഉവാച ।
ആദിശക്തേ ജഗന്മാതർഭക്താനുഗ്രഹകാരിണി ।
സർവത്ര വ്യാപികേഽനന്തേ ശ്രീസന്ധ്യേ തേ നാമോഽസ്തു തേ ॥ 2 ॥
ത്വമേവ സന്ധ്യാ ഗായത്രീ സാവിത്രീ ച സരസ്വതീ ।
ബ്രാഹ്മീ ച വൈഷ്ണവീ രൗദ്രീ രക്താ ശ്വേതാ സിതേതരാ ॥ 3 ॥
പ്രാതർബാലാ ച മധ്യാഹ്നേ യൗവനസ്ഥാ ഭവേത്പുനഃ ।
വൃദ്ധാ സായം ഭഗവതീ ചിന്ത്യതേ മുനിഭിഃ സദാ ॥ 4 ॥
ഹംസസ്ഥാ ഗരുഡാരൂഢാ തഥാ വൃഷഭവാഹനീ ।
ഋഗ്വേദാധ്യായിനീ ഭൂമൗ ദൃശ്യതേ യാ തപസ്വിഭിഃ ॥ 5 ॥
യജുർവേദം പഠന്തീ ച അന്തരിക്ഷേ വിരാജതേ ।
സാ സാമഗാപി സർവേഷു ഭ്രാമ്യമാണാ തഥാ ഭുവി ॥ 6 ॥
രുദ്രലോകം ഗതാ ത്വം ഹി വിഷ്ണുലോകനിവാസിനീ ।
ത്വമേവ ബ്രഹ്മണോ ലോകേഽമർത്യാനുഗ്രഹകാരിണീ ॥ 7 ॥
സപ്തർഷിപ്രീതിജനനീ മായാ ബഹുവരപ്രദാ ।
ശിവയോഃ കരനേത്രോത്ഥാ ഹ്യശ്രുസ്വേദസമുദ്ഭവാ ॥ 8 ॥
ആനന്ദജനനീ ദുർഗാ ദശധാ പരിപഠ്യതേ ।
വരേണ്യാ വരദാ ചൈവ വരിഷ്ഠാ വരവർണിനീ ॥ 9 ॥
ഗരിഷ്ഠാ ച വരാർഹാ ച വരാരോഹാ ച സപ്തമീ ।
നീലഗംഗാ തഥാ സന്ധ്യാ സർവദാ ഭോഗമോക്ഷദാ ॥ 10 ॥
ഭാഗീരഥീ മർത്യലോകേ പാതാലേ ഭോഗവത്യപി ।
ത്രിലോകവാഹിനീ ദേവീ സ്ഥാനത്രയനിവാസിനീ ॥ 11 ॥
ഭൂർലോകസ്ഥാ ത്വമേവാഽസി ധരിത്രീ ലോകധാരിണീ ।
ഭുവോ ലോകേ വായുശക്തിഃ സ്വർലോകേ തേജസാം നിധിഃ ॥ 12 ॥
മഹർലോകേ മഹാസിദ്ധിർജനലോകേ ജനേത്യപി ।
തപസ്വിനീ തപോലോകേ സത്യലോകേ തു സത്യവാക് ॥ 13 ॥
കമലാ വിഷ്ണുലോകേ ച ഗായത്രീ ബ്രഹ്മലോകദാ ।
രുദ്രലോകേ സ്ഥിതാ ഗൗരീ ഹരാർധാംഗനിവാസിനീ ॥ 14 ॥
അഹമോ മഹതശ്ചൈവ പ്രകൃതിസ്ത്വം ഹി ഗീയസേ ।
സാമ്യവസ്ഥാത്മികാ ത്വം ഹി ശബലബ്രഹ്മരൂപിണീ ॥ 15 ॥
തതഃ പരാഽപരാശക്തിഃ പരമാ ത്വം ഹി ഗീയസേ ।
ഇച്ഛാശക്തിഃ ക്രിയാശക്തിർജ്ഞാനശക്തിസ്ത്രിശക്തിദാ ॥ 16 ॥
ഗംഗാ ച യമുനാ ചൈവ വിപാശാ ച സരസ്വതീ ।
സരയൂർദേവികാ സിന്ധുർനർമദൈരാവതീ തഥാ ॥ 17 ॥
ഗോദാവരീ ശതദ്രൂശ്ച കാവേരീ ദേവലോകഗാ ।
കൗശികീ ചന്ദ്രഭാഗാ ച വിതസ്താ ച സരസ്വതീ ॥ 18 ॥
ഗണ്ഡകീ താപിനീ തോയാ ഗോമതീ വേത്രവത്യപി ।
ഇഡാ ച പിംഗലാ ചൈവ സുഷുമ്ണാ ച തൃതീയകാ ॥ 19 ॥
ഗാന്ധാരീ ഹസ്തിജിഹ്വാ ച പൂഷാപൂഷാ തഥൈവ ച ।
അലംബുസാ കുഹൂശ്ചൈവ ശംഖിനീ പ്രാണവാഹിനീ ॥ 20 ॥
നാഡീ ച ത്വം ശരീരസ്ഥാ ഗീയസേ പ്രാക്തനൈർബുധൈഃ ।
ഹൃത്പദ്മസ്ഥാ പ്രാണശക്തിഃ കണ്ഠസ്ഥാ സ്വപ്നനായികാ ॥ 21 ॥
താലുസ്ഥാ ത്വം സദാധാരാ ബിന്ദുസ്ഥാ ബിന്ദുമാലിനീ ।
മൂലേ തു കുണ്ഡലീശക്തിർവ്യാപിനീ കേശമൂലഗാ ॥ 22 ॥
ശിഖാമധ്യാസനാ ത്വം ഹി ശിഖാഗ്രേ തു മനോന്മനീ ।
കിമന്യദ്ബഹുനോക്തേന യത്കിഞ്ചിജ്ജഗതീത്രയേ ॥ 23 ॥
തത്സർവം ത്വം മഹാദേവി ശ്രിയേ സന്ധ്യേ നമോഽസ്തു തേ ।
ഇതീദം കീർതിതം സ്തോത്രം സന്ധ്യായാം ബഹുപുണ്യദം ॥ 24 ॥
മഹാപാപപ്രശമനം മഹാസിദ്ധിവിധായകം ।
യ ഇദം കീർതയേത് സ്തോത്രം സന്ധ്യാകാലേ സമാഹിതഃ ॥ 25 ॥
അപുത്രഃ പ്രാപ്നുയാത് പുത്രം ധനാർഥീ ധനമാപ്നുയാത് ।
സർവതീർഥതപോദാനയജ്ഞയോഗഫലം ലഭേത് ॥ 26 ॥
ഭോഗാൻ ഭുങ്ക്ത്വാ ചിരം കാലമന്തേ മോക്ഷമവാപ്നുയാത് ।
തപസ്വിഭിഃ കൃതം സ്തോത്രം സ്നാനകാലേ തു യഃ പഠേത് ॥ 27 ॥
യത്ര കുത്ര ജലേ മഗ്നഃ സന്ധ്യാമജ്ജനജം ഫലം ।
ലഭതേ നാത്ര സന്ദേഹഃ സത്യം സത്യം ച നാരദ ॥ 28 ॥
ശൃണുയാദ്യോഽപി തദ്ഭക്ത്യാ സ തു പാപാത്പ്രമുച്യതേ ।
പീയൂഷസദൃശം വാക്യം സന്ധ്യോക്തം നാരദേരിതം ॥ 29 ॥
ഇതി ശ്രീമദ്ദേവീഭാഗവതേ മഹാപുരാണേ ദ്വാദശസ്കന്ധേ ശ്രീ ഗായത്രീ സ്തോത്രം നാമ പഞ്ചമോഽധ്യായഃ ॥
Recite with devotion and pure heart
Regular practice brings spiritual benefits