namaste devi gāyatrī sāvitrī tripade'kṣarī । ajare amare mātā trāhi māṃ bhavasāgarāt ॥ 1 ॥ namaste sūryasaṅkāśe sūryasāvitrike'male । brahmavidye mahāvidye vedamātarnamo'stu te ॥ 2 ॥ anantakoṭibrahmāṇḍavyāpinī brahmacāriṇī । nityānande mahāmāye pareśānī namo'stu te ॥ 3 ॥ tvaṃ brahmā tvaṃ hariḥ sākṣādrudrastvamindradevatā । mitrastvaṃ varuṇastvaṃ ca tvamagniraśvinau bhagaḥ ॥ 4 ॥ pūṣā'ryamā marutvāṃśca ṛṣayo'pi munīśvarāḥ । pitaro nāgayakṣāṃśca gandharvā'psarasāṃ gaṇāḥ ॥ 5 ॥ rakṣobhūtapiśācāśca tvameva parameśvarī । ṛgyajussāmavidyāśca atharvāṅgirasāni ca ॥ 6 ॥ tvameva sarvaśāstrāṇi tvameva sarvasaṃhitāḥ । purāṇāni ca tantrāṇi mahāgamamatāni ca ॥ 7 ॥ tvameva pañcabhūtāni tattvāni jagadīśvarī । brāhmī sarasvatī sandhyā turīyā tvaṃ maheśvarī ॥ 8 ॥ tatsadbrahmasvarūpā tvaṃ kiñcit sadasadātmikā । parātpareśī gāyatrī namaste mātarambike ॥ 9 ॥ candrakalātmike nitye kālarātri svadhe svare । svāhākāre'gnivaktre tvāṃ namāmi jagadīśvarī ॥ 10 ॥ namo namaste gāyatrī sāvitrī tvaṃ namāmyaham । sarasvatī namastubhyaṃ turīye brahmarūpiṇī ॥ 11 ॥ aparādha sahasrāṇi tvasatkarmaśatāni ca । matto jātāni deveśī tvaṃ kṣamasva dine dine ॥ 12 ॥ iti śrīmadvasiṣṭhasaṃhitāyāṃ śrī gāyatrī stotram ।