हैंహైHaindavamஹிહિં
📍
Font Size:
ಶ್ರೀ ಗಾಯತ್ರೀ ಪಂಜರ ಸ್ತೋತ್ರಂ
ಭಗವಂತಂ ದೇವದೇವಂ ಬ್ರಹ್ಮಾಣಂ ಪರಮೇಷ್ಠಿನಂ ।
ವಿಧಾತಾರಂ ವಿಶ್ವಸೃಜಂ ಪದ್ಮಯೋನಿಂ ಪ್ರಜಾಪತಿಂ ॥ 1 ॥
ಶುದ್ಧಸ್ಫಟಿಕಸಂಕಾಶಂ ಮಹೇಂದ್ರಶಿಖರೋಪಮಂ ।
ಬದ್ಧಪಿಂಗಜಟಾಜೂಟಂ ತಡಿತ್ಕನಕಕುಂಡಲಂ ॥ 2 ॥
ಶರಚ್ಚಂದ್ರಾಭವದನಂ ಸ್ಫುರದಿಂದೀವರೇಕ್ಷಣಂ ।
ಹಿರಣ್ಮಯಂ ವಿಶ್ವರೂಪಮುಪವೀತಾಜಿನಾವೃತಂ ॥ 3 ॥
ಮೌಕ್ತಿಕಾಭಾಕ್ಷವಲಯಸ್ತಂತ್ರೀಲಯಸಮನ್ವಿತಃ ।
ಕರ್ಪೂರೋದ್ಧೂಲಿತತನುಂ ಸ್ರಷ್ಟಾರಂ ನೇತ್ರಗೋಚರಂ ॥ 4 ॥
ವಿನಯೇನೋಪಸಂಗಮ್ಯ ಶಿರಸಾ ಪ್ರಣಿಪತ್ಯ ಚ ।
ನಾರದಃ ಪರಿಪಪ್ರಚ್ಛ ದೇವರ್ಷಿಗಣಮಧ್ಯಗಃ ॥ 5 ॥
ನಾರದ ಉವಾಚ ।
ಭಗವನ್ ದೇವದೇವೇಶ ಸರ್ವಜ್ಞ ಕರುಣಾನಿಧೇ ।
ಶ್ರೋತುಮಿಚ್ಛಾಮಿ ತತ್ತತ್ವಂ ಭೋಗಮೋಕ್ಷೈಕಸಾಧನಂ ॥ 6 ॥
ಐಶ್ವರ್ಯಸ್ಯ ಸಮಗ್ರಸ್ಯ ಫಲದಂ ದ್ವಂದ್ವವರ್ಜಿತಂ ।
ಬ್ರಹ್ಮಹತ್ಯಾದಿಪಾಪಘ್ನಂ ಪಾಪಾದ್ಯರಿಭಯಾಪಹಂ ॥ 7 ॥
ಯದೇಕಂ ನಿಷ್ಕಲಂ ಸೂಕ್ಷ್ಮಂ ನಿರಂಜನಮನಾಮಯಂ ।
ಯತ್ತೇ ಪ್ರಿಯತಮಂ ಲೋಕೇ ತನ್ಮೇ ಬ್ರೂಹಿ ಪಿತರ್ಮಮ ॥ 8 ॥
ಬ್ರಹ್ಮೋವಾಚ ।
ಶೃಣು ನಾರದ ವಕ್ಷ್ಯಾಮಿ ಬ್ರಹ್ಮಮೂಲಂ ಸನಾತನಂ ।
ಸೃಷ್ಟ್ಯಾದೌ ಮನ್ಮುಖೇ ಕ್ಷಿಪ್ತಂ ದೇವದೇವೇನ ವಿಷ್ಣುನಾ ॥ 9 ॥
ಪ್ರಪಂಚಬೀಜಮಿತ್ಯಾಹುರುತ್ಪತ್ತಿಸ್ಥಿತಿಹೇತುಕಂ ।
ಪುರಾ ಮಯಾ ತು ಕಥಿತಂ ಕಶ್ಯಪಾಯ ಸುಧೀಮತೇ ॥ 10 ॥
ಸಾವಿತ್ರೀಪಂಜರಂ ನಾಮ ರಹಸ್ಯಂ ನಿಗಮತ್ರಯೇ ।
ಋಷ್ಯಾದಿಕಂ ಚ ದಿಗ್ವರ್ಣಂ ಸಾಂಗಾವರಣಕಂ ಕ್ರಮಾತ್ ॥ 11 ॥
ವಾಹನಾಯುಧಮಂತ್ರಾಸ್ತ್ರಮೂರ್ತಿಧ್ಯಾನಸಮನ್ವಿತಂ ।
ಸ್ತೋತ್ರಂ ಶೃಣು ಪ್ರವಕ್ಷ್ಯಾಮಿ ತವ ಸ್ನೇಹಾಚ್ಚ ನಾರದ ॥ 12 ॥
ಬ್ರಹ್ಮನಿಷ್ಠಾಯ ದೇಯಂ ಸ್ಯಾದದೇಯಂ ಯಸ್ಯ ಕಸ್ಯಚಿತ್ ।
ಆಚಮ್ಯ ನಿಯತಃ ಪಶ್ಚಾದಾತ್ಮಧ್ಯಾನಪುರಃಸರಂ ॥ 13 ॥
ಓಮಿತ್ಯಾದೌ ವಿಚಿಂತ್ಯಾಥ ವ್ಯೋಮಹೇಮಾಬ್ಜಸಂಸ್ಥಿತಂ ।
ಧರ್ಮಕಂದಗತಜ್ಞಾನಾದೈಶ್ವರ್ಯಾಷ್ಟದಲಾನ್ವಿತಂ ॥ 14 ॥
ವೈರಾಗ್ಯಕರ್ಣಿಕಾಧೀನಾಂ ಪ್ರಣವಗ್ರಹಮಧ್ಯಗಾಂ ।
ಬ್ರಹ್ಮವೇದಿಸಮಾಯುಕ್ತಾಂ ಚೈತನ್ಯಪುರಮಧ್ಯಗಾಂ ॥ 15 ॥
ತತ್ತ್ವಹಂಸಸಮಾಕೀರ್ಣಾಂ ಶಬ್ದಪೀಠೇ ಸುಸಂಸ್ಥಿತಾಂ ।
ನಾದಬಿಂದುಕಲಾತೀತಾಂ ಗೋಪುರೈರಪಿ ಸಂವೃತಾಂ ॥ 16 ॥
ವಿದ್ಯಾಽವಿದ್ಯಾಽಮೃತತ್ವಾದಿ ಪ್ರಕಾರೈರಪಿಸಂವೃತಾಂ ।
ನಿಗಮಾರ್ಗಲಸಂಛನ್ನಾಂ ನಿರ್ಗುಣದ್ವಾರವಾಟಿಕಾಂ ॥ 17 ॥
ಚತುರ್ವರ್ಗಫಲೋಪೇತಾಂ ಮಹಾಕಲ್ಪವನೈರ್ವೃತಾಂ ।
ಸಾಂದ್ರಾನಂದಸುಧಾಸಿಂಧುನಿಗಮದ್ವಾರವಾಟಿಕಾಂ ॥ 18 ॥
ಧ್ಯಾನಧಾರಣಯೋಗಾದಿ ತೃಣಗುಲ್ಮಲತಾವೃತಾಂ ।
ಸದಸಚ್ಚಿತ್ಸ್ವರೂಪಾಖ್ಯ ಮೃಗಪಕ್ಷಿಸಮಾಕುಲಾಂ ॥ 19 ॥
ವಿದ್ಯಾಽವಿದ್ಯಾವಿಚಾರಾಖ್ಯಲೋಕಾಲೋಕಾಚಲಾವೃತಾಂ ।
ಪಂಚೀಕರಣಪಂಚೋತ್ಥಭೂತತತ್ತ್ವನಿವೇದಿತಾಂ ॥ 20 ॥
ಅವಿಕಾರಸಮಾಶ್ಲಿಷ್ಟನಿಜಧ್ಯಾನಗುಣಾವೃತಾಂ ।
ವೇದೋಪನಿಷದರ್ಥಾಖ್ಯ ದೇವರ್ಷಿಗಣಸೇವಿತಾಂ ॥ 21 ॥
ಇತಿಹಾಸಗ್ರಹಗಣೈಃ ಸದಾರೈರಭಿವಂದಿತಾಂ ।
ಗಾಥಾಪ್ಸರೋಭಿರ್ಯಕ್ಷೈಶ್ಚ ಗಣಕಿನ್ನರಸೇವಿತಾಂ ॥ 22 ॥
ನಾರಸಿಂಹಮುಖೈಶ್ಚಾಪಿ ಪುರುಷೈಃ ಕಲ್ಪಚಾರಣೈಃ ।
ಕೃತಗಾನವಿನೋದಾದಿಕಥಾಲಾಪನತತ್ಪರಾಂ ॥ 23 ॥
ತದಿತ್ಯವಾಙ್ಮನೋಗಮ್ಯತೇಜೋರೂಪಧರಾಂ ಪರಾಂ ।
ಜಗತಃ ಪ್ರಸವಿತ್ರೀಂ ತಾಂ ಸವಿತುಃ ಸೃಷ್ಟಿಕಾರಿಣೀಂ ॥ 24 ॥
ವರೇಣ್ಯಮಿತ್ಯನ್ನಮಯೀಂ ಪುರುಷಾರ್ಥಫಲಪ್ರದಾಂ ।
ಅವಿದ್ಯಾವರ್ಣವರ್ಜ್ಯಾಂ ಚ ತೇಜೋವದ್ಭರ್ಗಸಂಜ್ಞಿಕಾಂ ॥ 25 ॥
ದೇವಸ್ಯ ಸಚ್ಚಿದಾನಂದ ಪರಬ್ರಹ್ಮರಸಾತ್ಮಿಕಾಂ ।
ಧೀಮಹ್ಯಹಂ ಸ ವೈ ತದ್ವದ್ಬ್ರಹ್ಮಾದ್ವೈತಸ್ವರೂಪಿಣೀಂ ॥ 26 ॥
ಧಿಯೋ ಯೋ ನಸ್ತು ಸವಿತಾ ಪ್ರಚೋದಯಾದುಪಾಸಿತಾಂ ।
ಪರೋಽಸೌ ಸವಿತಾ ಸಾಕ್ಷಾದ್ದೇವೋನಿರ್ಹರಣಾಯ ಚ ॥ 27 ॥
ಪರೋರಜಸ ಇತ್ಯಾದಿ ಪರಬ್ರಹ್ಮಾತ್ಮಸಾವದೋಂ ।
ಆಪೋ ಜ್ಯೋತಿರಿತಿ ದ್ವಾಭ್ಯಾಂ ಪಾಂಚಭೌತಿಕಸಂಜ್ಞಿಕಾಂ ॥ 28 ॥
ರಸೋಽಮೃತಂ ಬ್ರಹ್ಮಪದೈಸ್ತಾಂ ನಿತ್ಯಾಂ ತಾಪಿನೀಂ ಪರಾಂ ।
ಭೂರ್ಭುವಃಸುವರಿತ್ಯೇತೈರ್ನಿಗಮತ್ವಪ್ರಕಾಶಿಕಾಂ ॥ 29 ॥
ಮಹರ್ಜನಸ್ತಪಃಸತ್ಯಲೋಕೋಪರಿಸುಸಂಸ್ಥಿತಾಂ ।
ತಾದೃಗಸ್ಯಾ ವಿರಾಡ್ರೂಪಂ ರಹಸ್ಯಂ ಪ್ರವದಾಮ್ಯಹಂ ॥ 30 ॥
ವ್ಯೋಮಕೇಶಾಕುಲಾಕಾಶ ದ್ಯೋಕಿರೀಟವಿರಾಜಿತಾಂ ।
ತಟಿದ್ಭ್ರುಕುಟಿನಾಕ್ರಾಂತವಿಧಿವಿಷ್ಣುಶಿವಾರ್ಚಿತಾಂ ॥ 31 ॥
ಗುರುಭಾರ್ಗವಕರ್ಣಾಂತಾಂ ಸೋಮಸೂರ್ಯಾಗ್ನಿಲೋಚನಾಂ ।
ಇಡಾಪಿಂಗಲಸೌಷುಮ್ಣ ವಾಮನಾಸಾಪುಟಾನ್ವಿತಾಂ ॥ 32 ॥
ಸಂಧ್ಯಾದ್ವಿರೋಷ್ಠಪುಟಿತಾಂ ಲಸದ್ವಾಗ್ಭವಜಿಹ್ವಿಕಾಂ ।
ಸಂಧ್ಯಾಸೌ ದ್ಯುಮಣೇಃ ಕಂಠಲಸದ್ಬಾಹುಸಮನ್ವಿತಾಂ ॥ 33 ॥
ಪರ್ಜನ್ಯಹೃದಯಾಸಕ್ತವಸುಸುಸ್ತನಮಂಡಲಾಂ ।
ಆಕಾಶೋದರವಿತ್ರಸ್ತನಾಭ್ಯವಾಂತರದೇಶಿಕಾಂ ॥ 34 ॥
ಪ್ರಾಜಾಪತ್ಯಾಖ್ಯಜಘನಾಮಿಂದ್ರಾಣೀಕಟಿಸಂಜ್ಞಿಕಾಂ ।
ಊರೂ ಮಲಯಮೇರುಭ್ಯಾಂ ಶೋಭಮಾನಾಂ ಸುರದ್ವಿಷಂ ॥ 35 ॥
ಜಾನುನೀ ಜಹ್ನುಕುಶಿಕೌ ವೈಶ್ವದೇವಲಸದ್ಭುಜಾಂ ।
ಅಯನದ್ವಯಜಂಘಾದ್ಯಸುರಾದ್ಯಪಿತೃಸಂಜ್ಞಿಕಾಂ ॥ 36 ॥
ಪದಾಂಘ್ರಿನಖರೋಮಾಲಿಭೂತಲದ್ರುಮಲಾಂಛಿತಾಂ ।
ಗ್ರಹರಾಶ್ಯರ್ಕ್ಷದೇವರ್ಷಿಮೂರ್ತಿಂ ಚ ಪರಸಂಜ್ಞಿಕಾಂ ॥ 37 ॥
ತಿಥಿಮಾಸರ್ತುವರ್ಷಾಖ್ಯಸುಕೇತುನಿಮಿಷಾತ್ಮಿಕಾಂ ।
ಅಹೋರಾತ್ರಾರ್ಧಮಾಸಾಖ್ಯಾಮಾರ್ಯಾಂ ಚಂದ್ರಮಸಾತ್ಮಿಕಾಂ ॥ 38 ॥
ಮಾಯಾಕಲ್ಪಿತವೈಚಿತ್ರ್ಯಸಂಧ್ಯಾಚ್ಛಾದನಸಂವೃತಾಂ ।
ಜ್ವಲತ್ಕಾಲಾನಲಪ್ರಖ್ಯಾಂ ತಡಿತ್ಕೋಟಿಸಮಪ್ರಭಾಂ ॥ 39 ॥
ಕೋಟಿಸೂರ್ಯಪ್ರತೀಕಾಶಾಂ ಚಂದ್ರಕೋಟಿಸುಶೀತಲಾಂ ।
ಸುಧಾಮಂಡಲಮಧ್ಯಸ್ಥಾಂ ಸಾಂದ್ರಾನಂದಾಮೃತಾತ್ಮಿಕಾಂ ॥ 40 ॥
ವಾಗತೀತಾಂ ಮನೋರಮ್ಯಾಂ ವರದಾಂ ವೇದಮಾತರಂ ।
ಚರಾಚರಮಯೀಂ ನಿತ್ಯಾಂ ಬ್ರಹ್ಮಾಕ್ಷರಸಮನ್ವಿತಾಂ ॥ 41 ॥
ಧ್ಯಾತ್ವಾ ಸ್ವಾತ್ಮನ್ಯಭೇದೇನ ಬ್ರಹ್ಮಪಂಜರಮಾರಭೇತ್ ।
ಪಂಜರಸ್ಯ ಋಷಿಶ್ಚಾಹಂ ಛಂದೋ ವಿಕೃತಿರುಚ್ಯತೇ ॥ 42 ॥
ದೇವತಾ ಚ ಪರೋ ಹಂಸಃ ಪರಬ್ರಹ್ಮಾಧಿದೇವತಾ ।
ಪ್ರಣವೋ ಬೀಜಶಕ್ತಿಃ ಸ್ಯಾದೋಂ ಕೀಲಕಮುದಾಹೃತಂ ॥ 43 ॥
ತತ್ತತ್ತ್ವಂ ಧೀಮಹಿ ಕ್ಷೇತ್ರಂ ಧಿಯೋಽಸ್ತ್ರಂ ಯಃ ಪರಂ ಪದಂ ।
ಮಂತ್ರಮಾಪೋ ಜ್ಯೋತಿರಿತಿ ಯೋನಿರ್ಹಂಸಃ ಸವೇಧಕಂ ॥ 44 ॥
ವಿನಿಯೋಗಸ್ತು ಸಿದ್ಧ್ಯರ್ಥಂ ಪುರುಷಾರ್ಥಚತುಷ್ಟಯೇ ।
ತತಸ್ತೈರಂಗಷಟ್ಕಂ ಸ್ಯಾತ್ತೈರೇವ ವ್ಯಾಪಕತ್ರಯಂ ॥ 45 ॥
ಪೂರ್ವೋಕ್ತದೇವತಾಂ ಧ್ಯಾಯೇತ್ಸಾಕಾರಗುಣಸಮ್ಯುತಾಂ ।
ಪಂಚವಕ್ತ್ರಾಂ ದಶಭುಜಾಂ ತ್ರಿಪಂಚನಯನೈರ್ಯುತಾಂ ॥ 46 ॥
ಮುಕ್ತಾವಿದ್ರುಮಸೌವರ್ಣಾಮೋಷಧೀಶಸಮಾನನಾಂ ।
ವಾಣೀಂ ಪರಾಂ ರಮಾಂ ಮಾಯಾಂ ಚಾಮರೈರ್ದರ್ಪಣೈರ್ಯುತಾಂ ॥ 47 ॥
ಷಡಂಗದೇವತಾಮಂತ್ರೈ ರೂಪಾದ್ಯವಯವಾತ್ಮಿಕಾಂ ।
ಮೃಗೇಂದ್ರವೃಷಪಕ್ಷೀಂದ್ರಮೃಗಹಂಸಾಸನಸ್ಥಿತಾಂ ॥ 48 ॥
ಅರ್ಧೇಂದುಬದ್ಧಮುಕುಟಕಿರೀಟಮಣಿಕುಂಡಲಾಂ ।
ರತ್ನತಾಟಂಕಮಾಂಗಲ್ಯಪರಗ್ರೈವೇಯನೂಪುರಾಂ ॥ 49 ॥
ಅಂಗುಲೀಯಕಕೇಯೂರಕಂಕಣಾದ್ಯೈರಲಂಕೃತಾಂ ।
ದಿವ್ಯಸ್ರಗ್ವಸ್ತ್ರಸಂಛನ್ನರವಿಮಂಡಲಮಧ್ಯಗಾಂ ॥ 50 ॥
ವರಾಽಭಯಾಬ್ಜಯುಗಲಾಂ ಶಂಖಚಕ್ರಗದಾಂಕುಶಾಂ ।
ಶುಭ್ರಂ ಕಪಾಲಂ ದಧತೀಂ ವಹಂತೀಮಕ್ಷಮಾಲಿಕಾಂ ॥ 51 ॥
ಗಾಯತ್ರೀಂ ವರದಾಂ ದೇವೀಂ ಸಾವಿತ್ರೀಂ ವೇದಮಾತರಂ ।
ಆದಿತ್ಯಪಥಗಾಂ ದೇವೀಂ ಸ್ಮರೇದ್ಬ್ರಹ್ಮಸ್ವರೂಪಿಣೀಂ ॥ 52 ॥
ವಿಚಿತ್ರಮಂತ್ರಜನನೀಂ ಸ್ಮರೇದ್ವಿದ್ಯಾಂ ಸರಸ್ವತೀಂ ।
ತ್ರಿಪದಾ ಋಙ್ಮಯೀ ಪೂರ್ವಾ ಮುಖೀ ಬ್ರಹ್ಮಾಸ್ತ್ರಸಂಜ್ಞಿಕಾ ॥ 53 ॥
ಚತುರ್ವಿಂಶತಿತತ್ತ್ವಾಖ್ಯಾ ಪಾತು ಪ್ರಾಚೀಂ ದಿಶಂ ಮಮ ।
ಚತುಷ್ಪಾದಾ ಯಜುರ್ಬ್ರಹ್ಮದಂಡಾಖ್ಯಾ ಪಾತು ದಕ್ಷಿಣಾ ॥ 54 ॥
ಷಟ್ತ್ರಿಂಶತ್ತತ್ತ್ವಯುಕ್ತಾ ಸಾ ಪಾತು ಮೇ ದಕ್ಷಿಣಾಂ ದಿಶಂ ।
ಪ್ರತ್ಯಙ್ಮುಖೀ ಪಂಚಪದೀ ಪಂಚಾಶತ್ತತ್ತ್ವರೂಪಿಣೀ ॥ 55 ॥
ಪಾತು ಪ್ರತೀಚೀಮನಿಶಂ ಸಾಮಬ್ರಹ್ಮಶಿರೋಂಕಿತಾ ।
ಸೌಮ್ಯಾ ಬ್ರಹ್ಮಸ್ವರೂಪಾಖ್ಯಾ ಸಾಥರ್ವಾಂಗಿರಸಾತ್ಮಿಕಾ ॥ 56 ॥
ಉದೀಚೀಂ ಷಟ್ಪದಾ ಪಾತು ಚತುಃಷಷ್ಟಿಕಲಾತ್ಮಿಕಾ ।
ಪಂಚಾಶತ್ತತ್ತ್ವರಚಿತಾ ಭವಪಾದಾ ಶತಾಕ್ಷರೀ ॥ 57 ॥
ವ್ಯೋಮಾಖ್ಯಾ ಪಾತು ಮೇ ಚೋರ್ಧ್ವಂ ದಿಶಂ ವೇದಾಂಗಸಂಸ್ಥಿತಾ ।
ವಿದ್ಯುನ್ನಿಭಾ ಬ್ರಹ್ಮಸಂಜ್ಞಾ ಮೃಗಾರೂಢಾ ಚತುರ್ಭುಜಾ ॥ 58 ॥
ಚಾಪೇಷುಚರ್ಮಾಸಿಧರಾ ಪಾತು ಮೇ ಪಾವಕೀಂ ದಿಶಂ ।
ಬ್ರಾಹ್ಮೀ ಕುಮಾರೀ ಗಾಯತ್ರೀ ರಕ್ತಾಂಗೀ ಹಂಸವಾಹಿನೀ ॥ 59 ॥
ಬಿಭ್ರತ್ಕಮಂಡಲ್ವಕ್ಷಸ್ರಕ್ಸ್ರುವಾನ್ಮೇ ಪಾತು ನೈರೃತೀಂ ।
ಚತುರ್ಭುಜಾ ವೇದಮಾತಾ ಶುಕ್ಲಾಂಗೀ ವೃಷವಾಹಿನೀ ॥ 60 ॥
ವರಾಽಭಯಕಪಾಲಾಕ್ಷಸ್ರಗ್ವಿಣೀ ಪಾತು ಮಾರುತೀಂ ।
ಶ್ಯಾಮಾ ಸರಸ್ವತೀ ವೃದ್ಧಾ ವೈಷ್ಣವೀ ಗರುಡಾಸನಾ ॥ 61 ॥
ಶಂಖಾರಾಬ್ಜಾಭಯಕರಾ ಪಾತು ಶೈವೀಂ ದಿಶಂ ಮಮ ।
ಚತುರ್ಭುಜಾ ವೇದಮಾತಾ ಗೌರಾಂಗೀ ಸಿಂಹವಾಹನಾ ॥ 62 ॥
ವರಾಭಯಾಬ್ಜಯುಗಲೈರ್ಭುಜೈಃ ಪಾತ್ವಧರಾಂ ದಿಶಂ ।
ತತ್ತತ್ಪಾರ್ಶ್ವಸ್ಥಿತಾಃ ಸ್ವಸ್ವವಾಹನಾಯುಧಭೂಷಣಾಃ ॥ 63 ॥
ಸ್ವಸ್ವದಿಕ್ಷು ಸ್ಥಿತಾಃ ಪಾಂತು ಗ್ರಹಶಕ್ತ್ಯಂಗದೇವತಾಃ ।
ಮಂತ್ರಾಧಿದೇವತಾರೂಪಾ ಮುದ್ರಾಧಿಷ್ಠಾನದೇವತಾಃ ॥ 64 ॥
ವ್ಯಾಪಕತ್ವೇನ ಪಾತ್ವಸ್ಮಾನಾಪಹೃತ್ತಲಮಸ್ತಕೀ ।
ತತ್ಪದಂ ಮೇ ಶಿರಃ ಪಾತು ಫಾಲಂ ಮೇ ಸವಿತುಃಪದಂ ॥ 65 ॥
ವರೇಣ್ಯಂ ಮೇ ದೃಶೌ ಪಾತು ಶ್ರುತಿಂ ಭರ್ಗಃ ಸದಾ ಮಮ ।
ಘ್ರಾಣಂ ದೇವಸ್ಯ ಮೇ ಪಾತು ಪಾತು ಧೀಮಹಿ ಮೇ ಮುಖಂ ॥ 66 ॥
ಜಿಹ್ವಾಂ ಮಮ ಧಿಯಃ ಪಾತು ಕಂಠಂ ಮೇ ಪಾತು ಯಃಪದಂ ।
ನಃ ಪದಂ ಪಾತು ಮೇ ಸ್ಕಂಧೌ ಭುಜೌ ಪಾತು ಪ್ರಚೋದಯಾತ್ ॥ 67 ॥
ಕರೌ ಮೇ ಚ ಪರಃ ಪಾತು ಪಾದೌ ಮೇ ರಜಸೋಽವತು ।
ಸಾ ಮೇ ನಾಭಿಂ ಸದಾ ಪಾತು ಕಟಿಂ ವೈ ಪಾತುಮೇವದೋಂ ॥ 68 ॥
ಓಮಾಪಃ ಸಕ್ಥಿನೀ ಪಾತು ಗುಹ್ಯಂ ಜ್ಯೋತಿಃ ಸದಾ ಮಮ ।
ಊರೂ ಮಮ ರಸಃ ಪಾತು ಜಾನುನೀ ಅಮೃತಂ ಮಮ ॥ 69 ॥
ಜಂಘೇ ಬ್ರಹ್ಮಪದಂ ಪಾತು ಗುಲ್ಫೌ ಭೂಃ ಪಾತು ಮೇ ಸದಾ ।
ಪಾದೌ ಮಮ ಭುವಃ ಪಾತು ಸುವಃ ಪಾತ್ವಖಿಲಂ ವಪುಃ ॥ 70 ॥
ರೋಮಾಣಿ ಮೇ ಮಹಃ ಪಾತು ಲೋಮಕಂ ಪಾತು ಮೇ ಜನಃ ।
ಪ್ರಾಣಾಂಶ್ಚ ಧಾತುತತ್ತ್ವಾನಿ ತದೀಶಃ ಪಾತು ಮೇ ತಪಃ ॥ 71 ॥
ಸತ್ಯಂ ಪಾತು ಮಮಾಯೂಂಷಿ ಹಂಸೋ ವೃದ್ಧಿಂ ಚ ಪಾತು ಮೇ ।
ಶುಚಿಷತ್ಪಾತು ಮೇ ಶುಕ್ರಂ ವಸುಃ ಪಾತು ಶ್ರಿಯಂ ಮಮ ॥ 72 ॥
ಮತಿಂ ಪಾತ್ವಂತರಿಕ್ಷಸದ್ಧೋತಾ ದಾನಂ ಚ ಪಾತು ಮೇ ।
ವೇದಿಷತ್ಪಾತು ಮೇ ವಿದ್ಯಾಮತಿಥಿಃ ಪಾತು ಮೇ ಗೃಹಂ ॥ 73 ॥
ಧರ್ಮಂ ದುರೋಣಸತ್ಪಾತು ನೃಷತ್ಪಾತು ವಧೂಂ ಮಮ ।
ವರಸತ್ಪಾತು ಮೇ ಮಾಯಾಽಮೃತಸತ್ಪಾತು ಮೇ ಸುತಾನ್ ॥ 74 ॥
ವ್ಯೋಮಸತ್ಪಾತು ಮೇ ಬಂಧೂನ್ ಭ್ರಾತೄನಬ್ಜಶ್ಚ ಪಾತು ಮೇ ।
ಪಶೂನ್ಮೇ ಪಾತು ಗೋಜಾಶ್ಚ ಋತಜಾಃ ಪಾತು ಮೇ ಭುವಂ ॥ 75 ॥
ಸರ್ವಂ ಮೇ ಅದ್ರಿಜಾ ಪಾತು ಯಾನಂ ಮೇ ಪಾತ್ವೃತಂ ಸದಾ ।
ಮಮ ಸರ್ವಂ ಬೃಹತ್ಪಾತು ವಿಭುರೋಂ ಪಾತು ಸರ್ವದಾ ॥ 76 ॥
ಅನುಕ್ತಮಥ ಯತ್ಸ್ಥಾನಂ ಶರೀರಾಂತರ್ಬಹಿಶ್ಚ ಯತ್ ।
ತತ್ಸರ್ವಂ ಪಾತು ಮೇ ನಿತ್ಯಂ ಹಂಸಃ ಸೋಽಹಮಹರ್ನಿಶಂ ॥ 77 ॥
ಇದಂ ತು ಕಥಿತಂ ಸಮ್ಯಙ್ಮಯಾ ತೇ ಬ್ರಹ್ಮಪಂಜರಂ ।
ಸಂಧ್ಯಯೋಃ ಪ್ರತ್ಯಹಂ ಭಕ್ತ್ಯಾ ಜಪಕಾಲೇ ವಿಶೇಷತಃ ॥ 78 ॥
ಧಾರಯೇದ್ದ್ವಿಜವರ್ಯೋ ಯಃ ಶ್ರಾವಯೇದ್ವಾ ಸಮಾಹಿತಃ ।
ಸ ವಿಷ್ಣುಃ ಸ ಶಿವಃ ಸೋಽಹಂ ಸೋಽಕ್ಷರಃ ಸ ವಿರಾಟ್ ಸ್ವರಾಟ್ ॥ 79 ॥
ಶತಾಕ್ಷರಾತ್ಮಕಂ ದೇವ್ಯಾ ನಾಮಾಷ್ಟಾವಿಂಶತಿಃ ಶತಂ ।
ಶೃಣು ವಕ್ಷ್ಯಾಮಿ ತತ್ಸರ್ವಮತಿ ಗುಹ್ಯಂ ಸನಾತನಂ ॥ 80 ॥
ಭೂತಿದಾ ಭುವನಾ ವಾಣೀ ವಸುಧಾ ಸುಮನಾ ಮಹೀ ।
ತುರ್ಯಾ ಶೋಭಾ ದ್ವಿಜಪ್ರೀತಾ ಕಾಮಧುಕ್ ಭಕ್ತಸಿದ್ಧಿದಾ ॥ 81 ॥
ವಿಶ್ವಾ ಚ ವಿಜಯಾ ವೇದ್ಯಾ ಸಂಧ್ಯಾ ಬ್ರಾಹ್ಮೀ ಸರಸ್ವತೀ ।
ಹರಿಣೀ ಜನನೀ ನಂದಾ ಸವಿಸರ್ಗಾ ತಪಸ್ವಿನೀ ॥ 82 ॥
ಪಯಸ್ವಿನೀ ಸತೀ ತ್ಯಾಗಾ ಚೈಂದವೀ ಸತ್ಯವೀ ರಸಾ ।
ಶೈವೀ ಲಾಸ್ಯಪ್ರಿಯಾ ತುಷ್ಟಾ ಜಪ್ಯಾ ಸತ್ಯಾ ಸತೀ ಧ್ರುವಾ ॥ 83 ॥
ಭಕ್ತವಶ್ಯಾ ಚ ಗಾಯತ್ರೀ ಭೀಮಾ ವಿಷ್ಣುಪ್ರಿಯಾ ಜಯಾ ।
ವಿಶ್ವಾ ತುರ್ಯಾ ಪರಾ ರೇಚ್ಯಾ ನಿರ್ಘೃಣೀ ಯಮಿನೀ ಭವಾ ॥ 84 ॥
ಗೋವೇದ್ಯಾ ಚ ಜರಿಷ್ಠಾ ಚ ಸ್ಕಂದಿನೀ ಧೀರ್ಮತಿರ್ಹಿಮಾ ।
ಅನಂತಾ ರವಿಮಧ್ಯಸ್ಥಾ ಸಾವಿತ್ರೀ ಬ್ರಾಹ್ಮಣೀ ತ್ರಯೀ ॥ 85 ॥
ಅಪರ್ಣಾ ಚಂಡಿಕಾ ಧ್ಯೇಯಾ ಮನುಶ್ರೇಷ್ಠಾ ಚ ಸಾತ್ವಿಕೀ ।
ಭೀಷಣಾ ಯೋಗಿನೀ ಪಕ್ಷೀ ನದೀ ಪ್ರಜ್ಞಾ ಚ ಚೋದಿನೀ ॥ 86 ॥
ಧನಿನೀ ಯಾಮಿನೀ ಪದ್ಮಾ ರೋಹಿಣೀ ರಮಣೀ ಋಷಿಃ ।
ಬ್ರಹ್ಮಿಷ್ಠಾ ಭಕ್ತಿಗಮ್ಯಾ ಚ ಕಾಮದಾ ಬಲದಾ ವಸುಃ ॥ 87 ॥
ಆದ್ಯಾ ವರ್ಣಮಯೀ ಹೃದ್ಯಾ ಲಕ್ಷ್ಮೀಃ ಶಾಂತಾ ರಮಾಽಚ್ಯುತಾ ।
ಸೇನಾಮುಖೀ ಸಾಮಮಯೀ ಬಹುಲಾ ದೋಷವರ್ಜಿತಾ ॥ 88 ॥
ಸರ್ವಕಾಮದುಘಾ ಸೋಮೋದ್ಭವಾಽಹಂಕಾರವರ್ಜಿತಾ ।
ತತ್ಪರಾ ಸುಖದಾ ಸಿದ್ಧಿಃ ವೇದ್ಯಾ ಪೂಜ್ಯಾ ಪ್ರಸಾದಿನೀ ॥ 89 ॥
ವಿಪ್ರಪ್ರಸಾದಿನೀ ಪೂಜ್ಯಾ ವಿಶ್ವವಂದ್ಯಾ ವಿನೋದಿನೀ ।
ದ್ವಿಪದಾ ಚ ಚತುಷ್ಪಾದಾ ತ್ರಿಪದಾ ಚೈವ ಷಟ್ಪದಾ ॥ 90 ॥
ಅಷ್ಟಾಪದೀ ನವಪದೀ ಸಾ ಸಹಸ್ರಾಕ್ಷರಾತ್ಮಿಕಾ ।
ಅಮೋಘಫಲದಾಽನಾದಿಃ ಸರ್ವಾ ಸರ್ವಾಂಗಸುಂದರೀ ॥ 91 ॥
ಶರ್ವಾಣೀ ವೈಷ್ಣವೀ ಚಂದ್ರಚೂಡಾ ತ್ರಿಣಯನಾ ಕ್ಷಮಾ ।
ವಿಶ್ವಮಾತಾ ತ್ರಯೀಸಾರಾ ತ್ರಿಕಾಲಜ್ಞಾನರೂಪಿಣೀ ॥ 92 ॥
ಚಂದ್ರಮಂಡಲಮಧ್ಯಸ್ಥಾ ಭಕ್ತಪಾಪವಿನಾಶಿನೀ ।
ವರದಾ ಛಂದಸಾಂ ಮಾತಾ ಬ್ರಾಹ್ಮಣ್ಯಪದದಾಯಿನೀ ॥ 93 ॥
ಯ ಇದಂ ಪರಮಂ ಗುಹ್ಯಂ ಸಾವಿತ್ರೀಮಂತ್ರಪಂಜರಂ ।
ನಾಮಾಷ್ಟವಿಂಶತಿಶತಂ ಶೃಣುಯಾಚ್ಛ್ರಾವಯೇತ್ಪಠೇತ್ ॥ 94 ॥
ಮರ್ತ್ಯಾನಾಮಮೃತತ್ತ್ವಾಯ ಭೀತಾನಾಮಭಯಾಯ ಚ ।
ಮೋಕ್ಷಾಯ ಚ ಮುಮುಕ್ಷೂಣಾಂ ಶ್ರೀಕಾಮಾನಾಂ ಶ್ರಿಯೇ ಸದಾ ॥ 95 ॥
ವಿಜಯಾಯ ಯುಯುತ್ಸೂನಾಂ ವ್ಯಾಧಿತಾನಾಮರೋಗಕೃತ್ ।
ವಶ್ಯಾಯ ವಶ್ಯಕಾಮಾನಾಂ ವಿದ್ಯಾಯೈ ವೇದಕಾಮಿನಾಂ ॥ 96 ॥
ದ್ರವಿಣಾಯ ದರಿದ್ರಾಣಾಂ ಪಾಪಿನಾಂ ಪಾಪಶಾಂತಯೇ ।
ವಾದಿನಾಂ ವಾದವಿಜಯೇ ಕವೀನಾಂ ಕವಿತಾಪ್ರದಂ ॥ 97 ॥
ಅನ್ನಾಯ ಕ್ಷುಧಿತಾನಾಂ ಚ ಸ್ವರ್ಗಾಯ ಸ್ವರ್ಗಮಿಚ್ಛತಾಂ ।
ಪಶುಭ್ಯಃ ಪಶುಕಾಮಾನಾಂ ಪುತ್ರೇಭ್ಯಃ ಪುತ್ರಕಾಂಕ್ಷಿಣಾಂ ॥ 98 ॥
ಕ್ಲೇಶಿನಾಂ ಶೋಕಶಾಂತ್ಯರ್ಥಂ ನೃಣಾಂ ಶತ್ರುಭಯಾಯ ಚ ।
ರಾಜವಶ್ಯಾಯ ದ್ರಷ್ಟವ್ಯಂ ಪಂಜರಂ ನೃಪಸೇವಿನಾಂ ॥ 99 ॥
ಭಕ್ತ್ಯರ್ಥಂ ವಿಷ್ಣುಭಕ್ತಾನಾಂ ವಿಷ್ಣೋಃ ಸರ್ವಾಂತರಾತ್ಮನಿ ।
ನಾಯಕಂ ವಿಧಿಸೃಷ್ಟಾನಾಂ ಶಾಂತಯೇ ಭವತಿ ಧ್ರುವಂ ॥ 100 ॥
ನಿಃಸ್ಪೃಹಾಣಾಂ ನೃಣಾಂ ಮುಕ್ತಿಃ ಶಾಶ್ವತೀ ಭವತೀ ಧ್ರುವಂ ।
ಜಪ್ಯಂ ತ್ರಿವರ್ಗಸಮ್ಯುಕ್ತಂ ಗೃಹಸ್ಥೇನ ವಿಶೇಷತಃ ॥ 101 ॥
ಮುನೀನಾಂ ಜ್ಞಾನಸಿದ್ಧ್ಯರ್ಥಂ ಯತೀನಾಂ ಮೋಕ್ಷಸಿದ್ಧಯೇ ।
ಉದ್ಯಂತಂ ಚಂದ್ರಕಿರಣಮುಪಸ್ಥಾಯ ಕೃತಾಂಜಲಿಃ ॥ 102 ॥
ಕಾನನೇ ವಾ ಸ್ವಭವನೇ ತಿಷ್ಠಂಛುದ್ಧೋ ಜಪೇದಿದಂ ।
ಸರ್ವಾನ್ಕಾಮಾನವಾಪ್ನೋತಿ ತಥೈವ ಶಿವಸನ್ನಿಧೌ ॥ 103 ॥
ಮಮ ಪ್ರೀತಿಕರಂ ದಿವ್ಯಂ ವಿಷ್ಣುಭಕ್ತಿವಿವರ್ಧನಂ ।
ಜ್ವರಾರ್ತಾನಾಂ ಕುಶಾಗ್ರೇಣ ಮಾರ್ಜಯೇತ್ಕುಷ್ಠರೋಗಿಣಾಂ ॥ 104 ॥
ಮೃಗಮಂಗಂ ಯಥಾಲಿಂಗಂ ಕವಚೇನ ತು ಸಾಧಕಃ ।
ಮಂಡಲೇನ ವಿಶುದ್ಧ್ಯೇತ ಸರ್ವರೋಗೈರ್ನ ಸಂಶಯಃ ॥ 105 ॥
ಮೃತಪ್ರಜಾ ಚ ಯಾ ನಾರೀ ಜನ್ಮವಂಧ್ಯಾ ತಥೈವ ಚ ।
ಕನ್ಯಾದಿವಂಧ್ಯಾ ಯಾ ನಾರೀ ತಾಸಾಮಂಗಂ ಪ್ರಮಾರ್ಜಯೇತ್ ॥ 106 ॥
ತಾಸ್ತಾಃ ಸಂವತ್ಸರಾದರ್ವಾಗ್ಧ್ರಿಯೇಯುರ್ಗರ್ಭಮುತ್ತಮಂ ।
ಪತಿವಿದ್ವೇಷಿಣೀ ಯಾ ಸ್ತ್ರೀ ಅಂಗಂ ತಸ್ಯಾಃ ಪ್ರಮಾರ್ಜಯೇತ್ ॥ 107 ॥
ತಮೇವ ಭಜತೇ ಸಾ ಸ್ತ್ರೀ ಪತಿಂ ಕಾಮವಶಂ ನಯೇತ್ ।
ಅಶ್ವತ್ಥೇ ರಾಜವಶ್ಯಾರ್ಥಂ ಬಿಲ್ವಮೂಲೇ ಸುರೂಪಭಾಕ್ ॥ 108 ॥
ಪಾಲಾಶಮೂಲೇ ವಿದ್ಯಾರ್ಥೀ ತೇಜಸ್ವ್ಯಭಿಮುಖೋ ರವೇಃ ।
ಕನ್ಯಾರ್ಥೀ ಚಂಡಿಕಾಗೇಹೇ ಜಪೇಚ್ಛತ್ರುಭಯಾಯ ಚ ॥ 109 ॥
ಶ್ರೀಕಾಮೋ ವಿಷ್ಣುಗೇಹೇ ಚ ಉದ್ಯಾನೇ ಸ್ತ್ರೀರ್ವಶೀ ಭವೇತ್ ।
ಆರೋಗ್ಯಾರ್ಥೇ ಸ್ವಗೇಹೇ ಚ ಮೋಕ್ಷಾರ್ಥೀ ಶೈಲಮಸ್ತಕೇ ॥ 110 ॥
ಸರ್ವಕಾಮೋ ವಿಷ್ಣುಗೇಹೇ ಮೋಕ್ಷಾರ್ಥೀ ಯತ್ರ ಕುತ್ರಚಿತ್ ।
ಜಪಾರಂಭೇ ತು ಹೃದಯಂ ಜಪಾಂತೇ ಕವಚಂ ಪಠೇತ್ ॥ 111 ॥
ಕಿಮತ್ರ ಬಹುನೋಕ್ತೇನ ಶೃಣು ನಾರದ ತತ್ತ್ವತಃ ।
ಯಂ ಯಂ ಚಿಂತಯತೇ ನಿತ್ಯಂ ತಂ ತಂ ಪ್ರಾಪ್ನೋತಿ ನಿಶ್ಚಿತಂ ॥ 112 ॥
ಇತಿ ಶ್ರೀಮದ್ವಸಿಷ್ಠಸಂಹಿತಾಯಾಂ ಬ್ರಹ್ಮನಾರದಸಂವಾದೇ ಶ್ರೀ ಗಾಯತ್ರೀ ಪಂಜರ ಸ್ತೋತ್ರಂ ।
Recite with devotion and pure heart
Regular practice brings spiritual benefits