നാരദ ഉവാച । സ്വാമിൻ സർവജഗന്നാഥ സംശയോഽസ്തി മമ പ്രഭോ । ചതുഃഷഷ്ടികലാഭിജ്ഞ പാതകാദ്യോഗവിദ്വര ॥ 1 ॥ മുച്യതേ കേന പുണ്യേന ബ്രഹ്മരൂപഃ കഥം ഭവേത് । ദേഹശ്ച ദേവതാരൂപോ മന്ത്രരൂപോ വിശേഷതഃ ॥ 2 ॥ കർമ തച്ഛ്രോതുമിച്ഛാമി ന്യാസം ച വിധിപൂർവകം । ഋഷിശ്ഛന്ദോഽധിദൈവം ച ധ്യാനം ച വിധിവദ്വിഭോ ॥ 3 ॥ ശ്രീനാരായണ ഉവാച । അസ്ത്യേകം പരമം ഗുഹ്യം ഗായത്രീകവചം തഥാ । പഠനാദ്ധാരണാന്മർത്യഃ സർവപാപൈഃ പ്രമുച്യതേ ॥ 4 ॥ സർവാൻകാമാനവാപ്നോതി ദേവീരൂപശ്ച ജായതേ । ഗായത്രീകവചസ്യാസ്യ ബ്രഹ്മവിഷ്ണുമഹേശ്വരാഃ ॥ 5 ॥ ഋഷയോ ഋഗ്യജുഃസാമാഥർവശ്ഛന്ദാംസി നാരദ । ബ്രഹ്മരൂപാ ദേവതോക്താ ഗായത്രീ പരമാ കലാ ॥ 6 ॥ തദ്ബീജം ഭർഗ ഇത്യേഷാ ശക്തിരുക്താ മനീഷിഭിഃ । കീലകം ച ധിയഃ പ്രോക്തം മോക്ഷാർഥേ വിനിയോജനം ॥ 7 ॥ ചതുർഭിർഹൃദയം പ്രോക്തം ത്രിഭിർവർണൈഃ ശിരഃ സ്മൃതം । ചതുർഭിഃ സ്യാച്ഛിഖാ പശ്ചാത് ത്രിഭിസ്തു കവചം സ്മൃതം ॥ 8 ॥ ചതുർഭിർനേത്രമുദ്ദിഷ്ടം ചതുർഭിഃ സ്യാത്തദസ്ത്രകം । അഥ ധ്യാനം പ്രവക്ഷ്യാമി സാധകാഭീഷ്ടദായകം ॥ 9 ॥ മുക്താവിദ്രുമഹേമനീലധവലച്ഛായൈർമുഖൈസ്ത്രീക്ഷണൈ- -ര്യുക്താമിന്ദുനിബദ്ധരത്നമുകുടാം തത്ത്വാർഥവർണാത്മികാം । ഗായത്രീം വരദാഽഭയാങ്കുശകശാഃ ശുഭ്രം കപാലം ഗുണം ശംഖം ചക്രമഥാരവിന്ദയുഗലം ഹസ്തൈർവഹന്തീം ഭജേ ॥ 10 ॥ ഗായത്രീ പൂർവതഃ പാതു സാവിത്രീ പാതു ദക്ഷിണേ । ബ്രഹ്മസന്ധ്യാ തു മേ പശ്ചാദുത്തരായാം സരസ്വതീ ॥ 11 ॥ പാർവതീ മേ ദിശം രക്ഷേത്പാവകീം ജലശായിനീ । യാതുധാനീ ദിശം രക്ഷേദ്യാതുധാനഭയങ്കരീ ॥ 12 ॥ പാവമാനീ ദിശം രക്ഷേത്പവമാനവിലാസിനീ । ദിശം രൗദ്രീം ച മേ പാതു രുദ്രാണീ രുദ്രരൂപിണീ ॥ 13 ॥ ഊർധ്വം ബ്രഹ്മാണി മേ രക്ഷേദധസ്താദ്വൈഷ്ണവീ തഥാ । ഏവം ദശ ദിശോ രക്ഷേത്സർവാംഗം ഭുവനേശ്വരീ ॥ 14 ॥ തത്പദം പാതു മേ പാദൗ ജംഘേ മേ സവിതുഃ പദം । വരേണ്യം കടിദേശേ തു നാഭിം ഭർഗസ്തഥൈവ ച ॥ 15 ॥ ദേവസ്യ മേ തദ്ധൃദയം ധീമഹീതി ച ഗല്ലയോഃ । ധിയഃ പദം ച മേ നേത്രേ യഃ പദം മേ ലലാടകം ॥ 16 ॥ നഃ പാതു മേ പദം മൂർധ്നി ശിഖായാം മേ പ്രചോദയാത് । തത്പദം പാതു മൂർധാനം സകാരഃ പാതു ഭാലകം ॥ 17 ॥ ചക്ഷുഷീ തു വികാരാർണസ്തുകാരസ്തു കപോലയോഃ । നാസാപുടം വകാരാർണോ രേകാരസ്തു മുഖേ തഥാ ॥ 18 ॥ ണികാര ഊർധ്വമോഷ്ഠം തു യകാരസ്ത്വധരോഷ്ഠകം । ആസ്യമധ്യേ ഭകാരാർണോ ര്ഗോകാരശ്ചുബുകേ തഥാ ॥ 19 ॥ ദേകാരഃ കണ്ഠദേശേ തു വകാരഃ സ്കന്ധദേശകം । സ്യകാരോ ദക്ഷിണം ഹസ്തം ധീകാരോ വാമഹസ്തകം ॥ 20 ॥ മകാരോ ഹൃദയം രക്ഷേദ്ധികാര ഉദരേ തഥാ । ധികാരോ നാഭിദേശേ തു യോകാരസ്തു കടിം തഥാ ॥ 21 ॥ ഗുഹ്യം രക്ഷതു യോകാര ഊരൂ ദ്വൗ നഃ പദാക്ഷരം । പ്രകാരോ ജാനുനീ രക്ഷേച്ചോകാരോ ജംഘദേശകം ॥ 22 ॥ ദകാരം ഗുൽഫദേശേ തു യകാരഃ പദയുഗ്മകം । തകാരവ്യഞ്ജനം ചൈവ സർവാംഗം മേ സദാഽവതു ॥ 23 ॥ ഇദം തു കവചം ദിവ്യം ബാധാശതവിനാശനം । ചതുഃഷഷ്ടികലാവിദ്യാദായകം മോക്ഷകാരകം ॥ 24 ॥ മുച്യതേ സർവപാപേഭ്യഃ പരം ബ്രഹ്മാധിഗച്ഛതി । പഠനാച്ഛ്രവണാദ്വാപി ഗോസഹസ്രഫലം ലഭേത് ॥ 25 ॥ ഇതി ശ്രീദേവീഭാഗവതേ മഹാപുരാണേ ദ്വാദശസ്കന്ധേ ശ്രീ ഗായത്രീ മന്ത്രകവചം നാമ തൃതീയോഽധ്യായഃ ॥