हैंహైHaindavamஹிહિં
📍
Font Size:
ಶ್ರೀ ಗಾಯತ್ರೀ ಮಂತ್ರ ಕವಚಂ
ನಾರದ ಉವಾಚ ।
ಸ್ವಾಮಿನ್ ಸರ್ವಜಗನ್ನಾಥ ಸಂಶಯೋಽಸ್ತಿ ಮಮ ಪ್ರಭೋ ।
ಚತುಃಷಷ್ಟಿಕಲಾಭಿಜ್ಞ ಪಾತಕಾದ್ಯೋಗವಿದ್ವರ ॥ 1 ॥
ಮುಚ್ಯತೇ ಕೇನ ಪುಣ್ಯೇನ ಬ್ರಹ್ಮರೂಪಃ ಕಥಂ ಭವೇತ್ ।
ದೇಹಶ್ಚ ದೇವತಾರೂಪೋ ಮಂತ್ರರೂಪೋ ವಿಶೇಷತಃ ॥ 2 ॥
ಕರ್ಮ ತಚ್ಛ್ರೋತುಮಿಚ್ಛಾಮಿ ನ್ಯಾಸಂ ಚ ವಿಧಿಪೂರ್ವಕಂ ।
ಋಷಿಶ್ಛಂದೋಽಧಿದೈವಂ ಚ ಧ್ಯಾನಂ ಚ ವಿಧಿವದ್ವಿಭೋ ॥ 3 ॥
ಶ್ರೀನಾರಾಯಣ ಉವಾಚ ।
ಅಸ್ತ್ಯೇಕಂ ಪರಮಂ ಗುಹ್ಯಂ ಗಾಯತ್ರೀಕವಚಂ ತಥಾ ।
ಪಠನಾದ್ಧಾರಣಾನ್ಮರ್ತ್ಯಃ ಸರ್ವಪಾಪೈಃ ಪ್ರಮುಚ್ಯತೇ ॥ 4 ॥
ಸರ್ವಾನ್ಕಾಮಾನವಾಪ್ನೋತಿ ದೇವೀರೂಪಶ್ಚ ಜಾಯತೇ ।
ಗಾಯತ್ರೀಕವಚಸ್ಯಾಸ್ಯ ಬ್ರಹ್ಮವಿಷ್ಣುಮಹೇಶ್ವರಾಃ ॥ 5 ॥
ಋಷಯೋ ಋಗ್ಯಜುಃಸಾಮಾಥರ್ವಶ್ಛಂದಾಂಸಿ ನಾರದ ।
ಬ್ರಹ್ಮರೂಪಾ ದೇವತೋಕ್ತಾ ಗಾಯತ್ರೀ ಪರಮಾ ಕಲಾ ॥ 6 ॥
ತದ್ಬೀಜಂ ಭರ್ಗ ಇತ್ಯೇಷಾ ಶಕ್ತಿರುಕ್ತಾ ಮನೀಷಿಭಿಃ ।
ಕೀಲಕಂ ಚ ಧಿಯಃ ಪ್ರೋಕ್ತಂ ಮೋಕ್ಷಾರ್ಥೇ ವಿನಿಯೋಜನಂ ॥ 7 ॥
ಚತುರ್ಭಿರ್ಹೃದಯಂ ಪ್ರೋಕ್ತಂ ತ್ರಿಭಿರ್ವರ್ಣೈಃ ಶಿರಃ ಸ್ಮೃತಂ ।
ಚತುರ್ಭಿಃ ಸ್ಯಾಚ್ಛಿಖಾ ಪಶ್ಚಾತ್ ತ್ರಿಭಿಸ್ತು ಕವಚಂ ಸ್ಮೃತಂ ॥ 8 ॥
ಚತುರ್ಭಿರ್ನೇತ್ರಮುದ್ದಿಷ್ಟಂ ಚತುರ್ಭಿಃ ಸ್ಯಾತ್ತದಸ್ತ್ರಕಂ ।
ಅಥ ಧ್ಯಾನಂ ಪ್ರವಕ್ಷ್ಯಾಮಿ ಸಾಧಕಾಭೀಷ್ಟದಾಯಕಂ ॥ 9 ॥
ಮುಕ್ತಾವಿದ್ರುಮಹೇಮನೀಲಧವಲಚ್ಛಾಯೈರ್ಮುಖೈಸ್ತ್ರೀಕ್ಷಣೈ-
-ರ್ಯುಕ್ತಾಮಿಂದುನಿಬದ್ಧರತ್ನಮುಕುಟಾಂ ತತ್ತ್ವಾರ್ಥವರ್ಣಾತ್ಮಿಕಾಂ ।
ಗಾಯತ್ರೀಂ ವರದಾಽಭಯಾಂಕುಶಕಶಾಃ ಶುಭ್ರಂ ಕಪಾಲಂ ಗುಣಂ
ಶಂಖಂ ಚಕ್ರಮಥಾರವಿಂದಯುಗಲಂ ಹಸ್ತೈರ್ವಹಂತೀಂ ಭಜೇ ॥ 10 ॥
ಗಾಯತ್ರೀ ಪೂರ್ವತಃ ಪಾತು ಸಾವಿತ್ರೀ ಪಾತು ದಕ್ಷಿಣೇ ।
ಬ್ರಹ್ಮಸಂಧ್ಯಾ ತು ಮೇ ಪಶ್ಚಾದುತ್ತರಾಯಾಂ ಸರಸ್ವತೀ ॥ 11 ॥
ಪಾರ್ವತೀ ಮೇ ದಿಶಂ ರಕ್ಷೇತ್ಪಾವಕೀಂ ಜಲಶಾಯಿನೀ ।
ಯಾತುಧಾನೀ ದಿಶಂ ರಕ್ಷೇದ್ಯಾತುಧಾನಭಯಂಕರೀ ॥ 12 ॥
ಪಾವಮಾನೀ ದಿಶಂ ರಕ್ಷೇತ್ಪವಮಾನವಿಲಾಸಿನೀ ।
ದಿಶಂ ರೌದ್ರೀಂ ಚ ಮೇ ಪಾತು ರುದ್ರಾಣೀ ರುದ್ರರೂಪಿಣೀ ॥ 13 ॥
ಊರ್ಧ್ವಂ ಬ್ರಹ್ಮಾಣಿ ಮೇ ರಕ್ಷೇದಧಸ್ತಾದ್ವೈಷ್ಣವೀ ತಥಾ ।
ಏವಂ ದಶ ದಿಶೋ ರಕ್ಷೇತ್ಸರ್ವಾಂಗಂ ಭುವನೇಶ್ವರೀ ॥ 14 ॥
ತತ್ಪದಂ ಪಾತು ಮೇ ಪಾದೌ ಜಂಘೇ ಮೇ ಸವಿತುಃ ಪದಂ ।
ವರೇಣ್ಯಂ ಕಟಿದೇಶೇ ತು ನಾಭಿಂ ಭರ್ಗಸ್ತಥೈವ ಚ ॥ 15 ॥
ದೇವಸ್ಯ ಮೇ ತದ್ಧೃದಯಂ ಧೀಮಹೀತಿ ಚ ಗಲ್ಲಯೋಃ ।
ಧಿಯಃ ಪದಂ ಚ ಮೇ ನೇತ್ರೇ ಯಃ ಪದಂ ಮೇ ಲಲಾಟಕಂ ॥ 16 ॥
ನಃ ಪಾತು ಮೇ ಪದಂ ಮೂರ್ಧ್ನಿ ಶಿಖಾಯಾಂ ಮೇ ಪ್ರಚೋದಯಾತ್ ।
ತತ್ಪದಂ ಪಾತು ಮೂರ್ಧಾನಂ ಸಕಾರಃ ಪಾತು ಭಾಲಕಂ ॥ 17 ॥
ಚಕ್ಷುಷೀ ತು ವಿಕಾರಾರ್ಣಸ್ತುಕಾರಸ್ತು ಕಪೋಲಯೋಃ ।
ನಾಸಾಪುಟಂ ವಕಾರಾರ್ಣೋ ರೇಕಾರಸ್ತು ಮುಖೇ ತಥಾ ॥ 18 ॥
ಣಿಕಾರ ಊರ್ಧ್ವಮೋಷ್ಠಂ ತು ಯಕಾರಸ್ತ್ವಧರೋಷ್ಠಕಂ ।
ಆಸ್ಯಮಧ್ಯೇ ಭಕಾರಾರ್ಣೋ ರ್ಗೋಕಾರಶ್ಚುಬುಕೇ ತಥಾ ॥ 19 ॥
ದೇಕಾರಃ ಕಂಠದೇಶೇ ತು ವಕಾರಃ ಸ್ಕಂಧದೇಶಕಂ ।
ಸ್ಯಕಾರೋ ದಕ್ಷಿಣಂ ಹಸ್ತಂ ಧೀಕಾರೋ ವಾಮಹಸ್ತಕಂ ॥ 20 ॥
ಮಕಾರೋ ಹೃದಯಂ ರಕ್ಷೇದ್ಧಿಕಾರ ಉದರೇ ತಥಾ ।
ಧಿಕಾರೋ ನಾಭಿದೇಶೇ ತು ಯೋಕಾರಸ್ತು ಕಟಿಂ ತಥಾ ॥ 21 ॥
ಗುಹ್ಯಂ ರಕ್ಷತು ಯೋಕಾರ ಊರೂ ದ್ವೌ ನಃ ಪದಾಕ್ಷರಂ ।
ಪ್ರಕಾರೋ ಜಾನುನೀ ರಕ್ಷೇಚ್ಚೋಕಾರೋ ಜಂಘದೇಶಕಂ ॥ 22 ॥
ದಕಾರಂ ಗುಲ್ಫದೇಶೇ ತು ಯಕಾರಃ ಪದಯುಗ್ಮಕಂ ।
ತಕಾರವ್ಯಂಜನಂ ಚೈವ ಸರ್ವಾಂಗಂ ಮೇ ಸದಾಽವತು ॥ 23 ॥
ಇದಂ ತು ಕವಚಂ ದಿವ್ಯಂ ಬಾಧಾಶತವಿನಾಶನಂ ।
ಚತುಃಷಷ್ಟಿಕಲಾವಿದ್ಯಾದಾಯಕಂ ಮೋಕ್ಷಕಾರಕಂ ॥ 24 ॥
ಮುಚ್ಯತೇ ಸರ್ವಪಾಪೇಭ್ಯಃ ಪರಂ ಬ್ರಹ್ಮಾಧಿಗಚ್ಛತಿ ।
ಪಠನಾಚ್ಛ್ರವಣಾದ್ವಾಪಿ ಗೋಸಹಸ್ರಫಲಂ ಲಭೇತ್ ॥ 25 ॥
ಇತಿ ಶ್ರೀದೇವೀಭಾಗವತೇ ಮಹಾಪುರಾಣೇ ದ್ವಾದಶಸ್ಕಂಧೇ ಶ್ರೀ ಗಾಯತ್ರೀ ಮಂತ್ರಕವಚಂ ನಾಮ ತೃತೀಯೋಽಧ್ಯಾಯಃ ॥
Recite with devotion and pure heart
Regular practice brings spiritual benefits