നാരദ ഉവാച । ഭഗവൻ ദേവദേവേശ ഭൂതഭവ്യജഗത്പ്രഭോ । കവചം ച ശ്രുതം ദിവ്യം ഗായത്രീമന്ത്രവിഗ്രഹം ॥ 1 ॥ അധുനാ ശ്രോതുമിച്ഛാമി ഗായത്രീഹൃദയം പരം । യദ്ധാരണാദ്ഭവേത്പുണ്യം ഗായത്രീജപതോഽഖിലം ॥ 2 ॥ ശ്രീനാരായണ ഉവാച । ദേവ്യാശ്ച ഹൃദയം പ്രോക്തം നാരദാഥർവണേ സ്ഫുടം । തദേവാഹം പ്രവക്ഷ്യാമി രഹസ്യാതിരഹസ്യകം ॥ 3 ॥ വിരാഡ്രൂപാം മഹാദേവീം ഗായത്രീം വേദമാതരം । ധ്യാത്വാ തസ്യാസ്ത്വഥാംഗേഷു ധ്യായേദേതാശ്ച ദേവതാഃ ॥ 4 ॥ പിണ്ഡബ്രഹ്മണ്ഡയോരൈക്യാദ്ഭാവയേത്സ്വതനൗ തഥാ । ദേവീരൂപേ നിജേ ദേഹേ തന്മയത്വായ സാധകഃ ॥ 5 ॥ നാദേവോഽഭ്യർചയേദ്ദേവമിതി വേദവിദോ വിദുഃ । തതോഽഭേദായ കായേ സ്വേ ഭാവയേദ്ദേവതാ ഇമാഃ ॥ 6 ॥ അഥ തത്സമ്പ്രവക്ഷ്യാമി തന്മയത്വമഥോ ഭവേത് । ഗായത്രീഹൃദയസ്യാഽസ്യാഽപ്യഹമേവ ഋഷിഃ സ്മൃതഃ ॥ 7 ॥ ഗായത്രീഛന്ദ ഉദ്ദിഷ്ടം ദേവതാ പരമേശ്വരീ । പൂർവോക്തേന പ്രകാരേണ കുര്യാദംഗാനി ഷട്ക്രമാത് । ആസനേ വിജനേ ദേശേ ധ്യായേദേകാഗ്രമാനസഃ ॥ 8 ॥ അഥാർഥന്യാസഃ । ദ്യൗമൂർധ്നി ദൈവതം । ദന്തപങ്ക്താവശ്വിനൗ । ഉഭേ സന്ധ്യേ ചൗഷ്ഠൗ । മുഖമഗ്നിഃ । ജിഹ്വാ സരസ്വതീ । ഗ്രീവായാം തു ബൃഹസ്പതിഃ । സ്തനയോർവസവോഽഷ്ടൗ । ബാഹ്വോർമരുതഃ । ഹൃദയേ പർജന്യഃ । ആകാശമുദരം । നാഭാവന്തരിക്ഷം । കട്യോരിന്ദ്രാഗ്നീ । ജഘനേ വിജ്ഞാനഘനഃ പ്രജാപതിഃ । കൈലാസമലയേ ഊരൂ । വിശ്വേദേവാ ജാന്വോഃ । ജംഘായാം കൗശികഃ । ഗുഹ്യമയനേ । ഊരൂ പിതരഃ । പാദൗ പൃഥിവീ । വനസ്പതയോഽങ്ഗുലീഷു । ഋഷയോ രോമാണി । നഖാനി മുഹൂർതാനി । അസ്ഥിഷു ഗ്രഹാഃ । അസൃങ്മാംസമൃതവഃ ॥ സംവത്സരാ വൈ നിമിഷം । അഹോരാത്രാവാദിത്യശ്ചന്ദ്രമാഃ । പ്രവരാം ദിവ്യാം ഗായത്രീം സഹസ്രനേത്രാം ശരണമഹം പ്രപദ്യേ ॥ ഓം തത്സവിതുർവരേണ്യായ നമഃ । ഓം തത്പൂർവാജയായ നമഃ । തത്പ്രാതരാദിത്യായ നമഃ । തത്പ്രാതരാദിത്യപ്രതിഷ്ഠായൈ നമഃ ॥ പ്രാതരധീയാനോ രാത്രികൃതം പാപം നാശയതി । സായമധീയാനോ ദിവസകൃതം പാപം നാശയതി । സായം പ്രാതരധീയാനോ അപാപോ ഭവതി । സർവതീർഥേഷു സ്നാതോ ഭവതി । സർവൈർദേവൈർജ്ഞാതോ ഭവതി । അവാച്യവചനാത്പൂതോ ഭവതി । അഭക്ഷ്യഭക്ഷണാത്പൂതോ ഭവതി । അഭോജ്യഭോജനാത്പൂതോ ഭവതി । അചോഷ്യചോഷണാത്പൂതോ ഭവതി । അസാധ്യസാധനാത്പൂതോ ഭവതി । ദുഷ്പ്രതിഗ്രഹശതസഹസ്രാത്പൂതോ ഭവതി । സർവപ്രതിഗ്രഹാത്പൂതോ ഭവതി । പങ്ക്തിദൂഷണാത്പൂതോ ഭവതി । അനൃതവചനാത്പൂതോ ഭവതി । അഥാഽബ്രഹ്മചാരീ ബ്രഹ്മചാരീ ഭവതീ । അനേന ഹൃദയേനാധീതേന ക്രതുസഹസ്രേണേഷ്ടം ഭവതി । ഷഷ്ടിശതസഹസ്രഗായത്ര്യാ ജപ്യാനി ഫലാനി ഭവന്തി । അഷ്ടൗ ബ്രാഹ്മണാൻ സമ്യഗ്ഗ്രാഹയേത് । തസ്യ സിദ്ധിർഭവതി । യ ഇദം നിത്യമധീയാനോ ബ്രാഹ്മണഃ പ്രാതഃ ശുചിഃ സർവപാപൈഃ പ്രമുച്യത ഇതി । ബ്രഹ്മലോകേ മഹീയതേ ॥ ഇത്യാഹ ഭഗവാൻ ശ്രീനാരായണഃ ॥ ഇതി ശ്രീദേവീഭാഗവതേ മഹാപുരാണേ ദ്വാദശസ്കന്ധേ ശ്രീ ഗായത്രീ ഹൃദയം നാമ ചതുർഥോഽധ്യായഃ ॥