ശ്രീ ഗായത്രീ അഷ്ടകം

വിശ്വാമിത്രതപഃഫലാം പ്രിയതരാം വിപ്രാലിസംസേവിതാം

നിത്യാനിത്യവിവേകദാം സ്മിതമുഖീം ഖണ്ഡേന്ദുഭൂഷോജ്ജ്വലാം ।

താംബൂലാരുണഭാസമാനവദനാം മാർതാണ്ഡമധ്യസ്ഥിതാം

ഗായത്രീം ഹരിവല്ലഭാം ത്രിണയനാം ധ്യായാമി പഞ്ചാനനാം ॥ 1 ॥

ജാതീപങ്കജകേതകീകുവലയൈഃ സമ്പൂജിതാംഘ്രിദ്വയാം

തത്ത്വാർഥാത്മികവർണപങ്ക്തിസഹിതാം തത്ത്വാർഥബുദ്ധിപ്രദാം ।

പ്രാണായാമപരായണൈർബുധജനൈഃ സംസേവ്യമാനാം ശിവാം

ഗായത്രീം ഹരിവല്ലഭാം ത്രിണയനാം ധ്യായാമി പഞ്ചാനനാം ॥ 2 ॥

മഞ്ജീരധ്വനിഭിഃ സമസ്തജഗതാം മഞ്ജുത്വസംവർധനീം

വിപ്രപ്രേംഖിതവാരിവാരിതമഹാരക്ഷോഗണാം മൃണ്മയീം ।

ജപ്തുഃ പാപഹരാം ജപാസുമനിഭാം ഹംസേന സംശോഭിതാം

ഗായത്രീം ഹരിവല്ലഭാം ത്രിണയനാം ധ്യായാമി പഞ്ചാനനാം ॥ 3 ॥

കാഞ്ചീചേലവിഭൂഷിതാം ശിവമയീം മാലാർധമാലാദികാ-

-ന്ബിഭ്രാണാം പരമേശ്വരീം ശരണദാം മോഹാന്ധബുദ്ധിച്ഛിദാം ।

ഭൂരാദിത്രിപുരാം ത്രിലോകജനനീമധ്യാത്മശാഖാനുതാം

ഗായത്രീം ഹരിവല്ലഭാം ത്രിണയനാം ധ്യായാമി പഞ്ചാനനാം ॥ 4 ॥

ധ്യാതുർഗർഭകൃശാനുതാപഹരണാം സാമാത്മികാം സാമഗാം

സായങ്കാലസുസേവിതാം സ്വരമയീം ദൂർവാദലശ്യാമലാം ।

മാതുർദാസ്യവിലോചനൈകമതിമത്ഖേടീന്ദ്രസംരാജിതാം

ഗായത്രീം ഹരിവല്ലഭാം ത്രിണയനാം ധ്യായാമി പഞ്ചാനനാം ॥ 5 ॥

സന്ധ്യാരാഗവിചിത്രവസ്ത്രവിലസദ്വിപ്രോത്തമൈഃ സേവിതാം

താരാഹാരസുമാലികാം സുവിലസദ്രത്നേന്ദുകുംഭാന്തരാം ।

രാകാചന്ദ്രമുഖീം രമാപതിനുതാം ശംഖാദിഭാസ്വത്കരാം

ഗായത്രീം ഹരിവല്ലഭാം ത്രിണയനാം ധ്യായാമി പഞ്ചാനനാം ॥ 6 ॥

വേണീഭൂഷിതമാലകധ്വനികരൈർഭൃംഗൈഃ സദാ ശോഭിതാം

തത്ത്വജ്ഞാനരസായനജ്ഞരസനാസൗധഭ്രമദ്ഭ്രാമരീം ।

നാസാലങ്കൃതമൗക്തികേന്ദുകിരണൈഃ സായന്തമശ്ഛേദിനീം

ഗായത്രീം ഹരിവല്ലഭാം ത്രിണയനാം ധ്യായാമി പഞ്ചാനനാം ॥ 7 ॥

പാദാബ്ജാന്തരരേണുകുങ്കുമലസത്ഫാലദ്യുരാമാവൃതാം

രംഭാനാട്യവിലോകനൈകരസികാം വേദാന്തബുദ്ധിപ്രദാം ।

വീണാവേണുമൃദംഗകാഹലരവാൻ ദേവൈഃ കൃതാഞ്ഛൃണ്വതീം

ഗായത്രീം ഹരിവല്ലഭാം ത്രിണയനാം ധ്യായാമി പഞ്ചാനനാം ॥ 8 ॥

ഹത്യാപാനസുവർണതസ്കരമഹാഗുർവംഗനാസംഗമാ-

-ന്ദോഷാഞ്ഛൈലസമാൻ പുരന്ദരസമാഃ സഞ്ച്ഛിദ്യ സൂര്യോപമാഃ ।

ഗായത്രീം ശ്രുതിമാതുരേകമനസാ സന്ധ്യാസു യേ ഭൂസുരാ

ജപ്ത്വാ യാന്തി പരാം ഗതിം മനുമിമം ദേവ്യാഃ പരം വൈദികാഃ ॥ 9 ॥

ഇതി ശ്രീമച്ഛങ്കരാചാര്യ വിരചിതം ശ്രീ ഗായത്ര്യഷ്ടകം ।

Recite with devotion and pure heart

Regular practice brings spiritual benefits