हैंహైHaindavamஹிહિં
📍
Font Size:
ಶ್ರೀ ಗಾಯತ್ರ್ಯಕ್ಷರವಲ್ಲೀ ಸ್ತೋತ್ರಂ
ತತ್ಕಾರಂ ಚಂಪಕಂ ಪೀತಂ ಬ್ರಹ್ಮವಿಷ್ಣುಶಿವಾತ್ಮಕಂ ।
ಶಾಂತಂ ಪದ್ಮಾಸನಾರೂಢಂ ಧ್ಯಾಯೇತ್ ಸ್ವಸ್ಥಾನ ಸಂಸ್ಥಿತಂ ॥ 1 ॥
ಸಕಾರಂ ಚಿಂತಯೇಚ್ಛಾಂತಂ ಅತಸೀಪುಷ್ಪಸನ್ನಿಭಂ ।
ಪದ್ಮಮಧ್ಯಸ್ಥಿತಂ ಕಾಮ್ಯಮುಪಪಾತಕನಾಶನಂ ॥ 2 ॥
ವಿಕಾರಂ ಕಪಿಲಂ ಚಿಂತ್ಯಂ ಕಮಲಾಸನಸಂಸ್ಥಿತಂ ।
ಧ್ಯಾಯೇಚ್ಛಾಂತಂ ದ್ವಿಜಶ್ರೇಷ್ಠೋ ಮಹಾಪಾತಕನಾಶನಂ ॥ 3 ॥
ತುಕಾರಂ ಚಿಂತಯೇತ್ಪ್ರಾಜ್ಞ ಇಂದ್ರನೀಲಸಮಪ್ರಭಂ ।
ನಿರ್ದಹೇತ್ಸರ್ವದುಃಖಸ್ತು ಗ್ರಹರೋಗಸಮುದ್ಭವಂ ॥ 4 ॥
ವಕಾರಂ ವಹ್ನಿದೀಪ್ತಾಭಂ ಚಿಂತಯಿತ್ವಾ ವಿಚಕ್ಷಣಃ ।
ಭ್ರೂಣಹತ್ಯಾಕೃತಂ ಪಾಪಂ ತಕ್ಷಣಾದೇವ ನಾಶಯೇತ್ ॥ 5 ॥
ರೇಕಾರಂ ವಿಮಲಂ ಧ್ಯಾಯೇಚ್ಛುದ್ಧಸ್ಫಟಿಕಸನ್ನಿಭಂ ।
ಪಾಪಂ ನಶ್ಯತಿ ತತ್ ಕ್ಷಿಪ್ರಮಗಮ್ಯಾಗಮನೋದ್ಭವಂ ॥ 6 ॥
ಣಿಕಾರಂ ಚಿಂತಯೇದ್ಯೋಗೀ ವಿದ್ಯುದ್ವಲ್ಲೀಸಮಪ್ರಭಂ ।
ಅಭಕ್ಷ್ಯಭಕ್ಷಜಂ ಪಾಪಂ ತತ್ಕ್ಷಣಾದೇವ ನಶ್ಯತಿ ॥ 7 ॥
ಯಂಕಾರಂ ತಾರಕಾವರ್ಣಮಿಂದುಶೇಖರಭೂಷಿತಂ ।
ಯೋಗಿನಾಂ ವರದಂ ಧ್ಯಾಯೇದ್ಬ್ರಹ್ಮಹತ್ಯಾಘನಾಶನಂ ॥ 8 ॥
ಭಕಾರಂ ಕೃಷ್ಣವರ್ಣಂ ತು ನೀಲಮೇಘಸಮಪ್ರಭಂ ।
ಧ್ಯಾತ್ವಾ ಪುರುಷಹತ್ಯಾದಿ ಪಾಪಂ ನಾಶಯತಿ ದ್ವಿಜಃ ॥ 9 ॥
ರ್ಗೋಕಾರಂ ರಕ್ತವರ್ಣಂ ತು ಕಮಲಾಸನ ಸಂಸ್ಥಿತಂ ।
ತಂ ಗೋಹತ್ಯಾಕೃತಂ ಪಾಪಂ ನಾಶಯೇಚ್ಚ ವಿಚಿಂತಯನ್ ॥ 10 ॥
ದೇಕಾರಂ ಮಕರಶ್ಯಾಮಂ ಕಮಲಾಸನಸಂಸ್ಥಿತಂ ।
ಚಿಂತಯೇತ್ಸತತಂ ಯೋಗೀ ಸ್ತ್ರೀಹತ್ಯಾದಹನಂ ಪರಂ ॥ 11 ॥
ವಕಾರಂ ಶುಕ್ಲವರ್ಣಂ ತು ಜಾಜೀಪುಷ್ಪಸಮಪ್ರಭಂ ।
ಗುರುಹತ್ಯಾ ಕೃತಂ ಪಾಪಂ ಧ್ಯಾತ್ವಾ ದಹತಿ ತತ್ಕ್ಷಣಾತ್ ॥ 12 ॥
ಸ್ಯಕಾರಂ ಚ ತದಾ ಪೀತಂ ಸುವರ್ಣ ಸದೃಶಪ್ರಭಂ ।
ಮನಸಾ ಚಿಂತಿತಂ ಪಾಪಂ ಧ್ಯಾತ್ವಾ ದಹತಿ ನಿಶ್ಚಯಂ ॥ 13 ॥
ಧೀಕಾರಂ ಚಿಂತಯೇಚ್ಛುಭ್ರಂ ಕುಂದಪುಷ್ಪಸಮಪ್ರಭಂ ।
ಪಿತೃಮಾತೃವಧಾತ್ಪಾಪಾನ್ಮುಚ್ಯತೇ ನಾತ್ರ ಸಂಶಯಃ ॥ 14 ॥
ಮಕಾರಂ ಪದ್ಮರಾಗಾಭಾಂ ಚಿಂತಯೇದ್ದೀಪ್ತತೇಜಸಂ ।
ಪೂರ್ವಜನ್ಮಾರ್ಜಿತಂ ಪಾಪಂ ತತ್ಕ್ಷಣಾದೇವ ನಶ್ಯತಿ ॥ 15 ॥
ಹಿಕಾರಂ ಶಂಖವರ್ಣಂ ಚ ಪೂರ್ಣಚಂದ್ರಸಮಪ್ರಭಂ ।
ಅಶೇಷಪಾಪದಹನಂ ಧ್ಯಾಯೇನ್ನಿತ್ಯಂ ವಿಚಕ್ಷಣಃ ॥ 16 ॥
ಧಿಕಾರಂ ಪಾಂಡುರಂ ಧ್ಯಾಯೇತ್ಪದ್ಮಸ್ಯೋಪರಿಸಂಸ್ಥಿತಂ ।
ಪ್ರತಿಗ್ರಹಕೃತಂ ಪಾಪಂ ತತ್ಕ್ಷಣಾದೇವ ನಶ್ಯತಿ ॥ 17 ॥
ಯೋಕಾರಂ ರಕ್ತವರ್ಣಂ ತು ಇಂದ್ರಗೋಪಸಮಪ್ರಭಂ ।
ಧ್ಯಾತ್ವಾ ಪ್ರಾಣಿವಧಂ ಪಾಪಂ ದಹತ್ಯಗ್ನಿರಿವೇಂಧನಂ ॥ 18 ॥
ದ್ವಿತೀಯಚ್ಚೈವ ಯಃ ಪ್ರಾಕ್ತೋ ಯೋಕಾರೋ ರಕ್ತಸನ್ನಿಭಃ ।
ನಿರ್ದಹೇತ್ಸರ್ವಪಾಪಾನಿ ನಾನ್ಯೈಃ ಪಾಪೈಶ್ಚ ಲಿಪ್ಯತೇ ॥ 19 ॥
ನಕಾರಂ ತು ಮುಖಂ ಪೂರ್ವಮಾದಿತ್ಯೋದಯಸನ್ನಿಭಂ ।
ಸಕೃದ್ಧ್ಯಾತ್ವಾ ದ್ವಿಜಶ್ರೇಷ್ಠ ಸಗಚ್ಛೇದೈಶ್ವರಂ ಪರಂ ॥ 20 ॥
ನೀಲೋತ್ಪಲದಲಶ್ಯಾಮಂ ಪ್ರಕಾರಂ ದಕ್ಷಿಣಾನನಂ ।
ಸಕೃದ್ಧ್ಯಾತ್ವಾ ದ್ವಿಜಶ್ರೇಷ್ಠ ಸಗಚ್ಛೇದ್ವೈಷ್ಣವಂ ಪದಂ ॥ 21 ॥
ಶ್ವೇತವರ್ಣಂ ತು ತತ್ಪೀತಂ ಚೋಕಾರಂ ಪಶ್ಚಿಮಾನನಂ ।
ಸಕೃದ್ಧ್ಯಾತ್ವಾ ದ್ವಿಜಶ್ರೇಷ್ಠ ರುದ್ರೇಣ ಸಹಮೋದತೇ ॥ 22 ॥
ಶುಕ್ಲವರ್ಣೇಂದುಸಂಕಾಶಂ ದಕಾರಂ ಚೋತ್ತರಾನನಂ ।
ಸಕೃದ್ಧ್ಯಾತ್ವಾ ದ್ವಿಜಶ್ರೇಷ್ಠ ಸಗಚ್ಛೇದ್ಬ್ರಹ್ಮಣಃಪದಂ ॥ 23 ॥
ಯಾತ್ಕಾರಸ್ತು ಶಿರಃ ಪ್ರೋಕ್ತಶ್ಚತುರ್ಥವದನಪ್ರಭಃ ।
ಪ್ರತ್ಯಕ್ಷ ಫಲದೋ ಬ್ರಹ್ಮಾ ವಿಷ್ಣು ರುದ್ರಾತ್ಮಕಃ ಸ್ಮೃತಃ ॥ 24 ॥
ಏವಂ ಧ್ಯಾತ್ವಾ ತು ಮೇಧಾವೀ ಜಪಂ ಹೋಮಂ ಕರೋತಿ ಯಃ ।
ನ ಭವೇತ್ಪಾತಕಂ ತಸ್ಯ ಅಮೃತಂ ಕಿಂ ನ ವಿದ್ಯತೇ ।
ಸಾಕ್ಷಾದ್ಭವತ್ಯಸೌ ಬ್ರಹ್ಮಾ ಸ್ವಯಂಭೂಃ ಪರಮೇಶ್ವರಃ ॥ 25 ॥
ಇತಿ ಶ್ರೀ ಗಾಯತ್ರ್ಯಕ್ಷರವಲ್ಲೀ ಸ್ತೋತ್ರಂ ।
Recite with devotion and pure heart
Regular practice brings spiritual benefits