త్రిపుర సుందరీ పంచరత్న స్తోత్రం

నీలాలకాం శశిముఖీం నవపల్లవోష్ఠీం

చాంపేయపుష్పసుషమోజ్జ్వలదివ్యనాసాం ।

పద్మేక్షణాం ముకురసుందరగండభాగాం

త్వాం సాంప్రతం త్రిపురసుందరి దేవి వందే ॥ 1 ॥

శ్రీకుందకుడ్మలశిఖోజ్జ్వలదంతబృంద-

-మందస్మితద్యుతితిరోహితచారువాణీం ।

నానామణిస్థగితహారసుచారుకంఠీం

త్వాం సాంప్రతం త్రిపురసుందరి దేవి వందే ॥ 2 ॥

పీనస్తనీం ఘనభుజాం విపులాబ్జహస్తాం

భృంగావలీజితసుశోభితరోమరాజిం ।

మత్తేభకుంభకుచభారసునమ్రమధ్యాం

త్వాం సాంప్రతం త్రిపురసుందరి దేవి వందే ॥ 3 ॥

రంభోజ్జ్వలోరుయుగలాం మృగరాజపత్రా-

-మింద్రాదిదేవమకుటోజ్జ్వలపాదపద్మాం ।

హేమాంబరాం ఘనఘృతాంచితఖడ్గవల్లీం

త్వాం సాంప్రతం త్రిపురసుందరి దేవి వందే ॥ 4 ॥

మత్తేభవక్త్రజననీం మృడదేహయుక్తాం

శైలాగ్రమధ్యనిలయాం వరసుందరాంగీం ।

కోటీశ్వరాఖ్యహృదిసంస్థితపాదపద్మాం

త్వాం సాంప్రతం త్రిపురసుందరి దేవి వందే ॥ 5 ॥

బాలే త్వత్పాదయుగలం ధ్యాత్వా సంప్రతి నిర్మితం ।

నవీనం పంచరత్నం చ ధార్యతాం చరణద్వయే ॥ 6 ॥

ఇతి శ్రీ త్రిపురసుందరీ పంచరత్న స్తోత్రం ।

Recite with devotion and pure heart

Regular practice brings spiritual benefits