śrīkālī bagalāmukhī ca lalitā dhūmāvatī bhairavī mātaṅgī bhuvaneśvarī ca kamalā śrīrvajravairocanī । tārā pūrvamahāpadena kathitā vidyā svayaṃ śambhunā līlārūpamayī ca deśadaśadhā bālā tu māṃ pātu sā ॥ 1 ॥ śyāmāṃ śyāmaghanāvabhāsarucirāṃ nīlālakālaṅkṛtāṃ bimboṣṭhīṃ baliśatruvanditapadāṃ bālārkakoṭiprabhām । trāsatrāsakṛpāṇamuṇḍadadhatīṃ bhaktāya dānodyatāṃ vande saṅkaṭanāśinīṃ bhagavatīṃ bālāṃ svayaṃ kālikām ॥ 2 ॥ brahmāstrāṃ sumukhīṃ bakāravibhavāṃ bālāṃ balākīnibhāṃ hastanyastasamastavairirasanāmanye dadhānāṃ gadām । pītāṃ bhūṣaṇagandhamālyarucirāṃ pītāmbarāṅgāṃ varāṃ vande saṅkaṭanāśinīṃ bhagavatīṃ bālāṃ bagalāmukhīm ॥ 3 ॥ bālārkadyutibhaskarāṃ trinayanāṃ mandasmitāṃ sanmukhīṃ vāme pāśadhanurdharāṃ suvibhavāṃ bāṇaṃ tathā dakṣiṇe । pārāvāravihāriṇīṃ paramayīṃ padmāsane saṃsthitāṃ vande saṅkaṭanāśinīṃ bhagavatīṃ bālāṃ svayaṃ ṣoḍaśīm ॥ 4 ॥ dīrghāṃ dīrghakucāmudagradaśanāṃ duṣṭacchidāṃ devatāṃ kravyādāṃ kuṭilekṣaṇāṃ ca kuṭilāṃ kākadhvajāṃ kṣutkṛśām । devīṃ śūrpakarāṃ malīnavasanāṃ tāṃ pippalādārcitām । bālāṃ saṅkaṭanāśinīṃ bhagavatīṃ dhyāyāmi dhūmāvatīm ॥ 5 ॥ udyatkoṭidivākarapratibhaṭāṃ bālārkabhākarpaṭāṃ mālāpustakapāśamaṅkuśavarān daityendramuṇḍasrajām । pīnottuṅgapayodharāṃ trinayanāṃ brahmādibhiḥ saṃstutāṃ bālāṃ saṅkaṭanāśinīṃ bhagavatīṃ śrībhairavīṃ dhīmahi ॥ 6 ॥ vīṇāvādanatatparāṃ trinayanāṃ mandasmitāṃ sanmukhīṃ vāme pāśadhanurdharāṃ tu nikare bāṇaṃ tathā dakṣiṇe । pārāvāravihāriṇīṃ paramayīṃ brahmāsane saṃsthitāṃ vande saṅkaṭanāśinīṃ bhagavatīṃ mātaṅginīṃ bālikām ॥ 7 ॥ udyatsūryanibhāṃ ca indumukuṭāmindīvare saṃsthitāṃ haste cāruvarābhayaṃ ca dadhatīṃ pāśaṃ tathā cāṅkuśam । citrālaṅkṛtamastakāṃ trinayanāṃ brahmādibhiḥ sevitāṃ vande saṅkaṭanāśinīṃ ca bhuvaneśīmādibālāṃ bhaje ॥ 8 ॥ devīṃ kāñcanasannibhāṃ trinayanāṃ phullāravindasthitāṃ bibhrāṇāṃ varamabjayugmamabhayaṃ hastaiḥ kirīṭojjvalām । prāleyācalasannibhaiśca karibhirāsiñcyamānāṃ sadā bālāṃ saṅkaṭanāśinīṃ bhagavatīṃ lakṣmīṃ bhaje cendirām ॥ 9 ॥ sañchinnaṃ svaśiro vikīrṇakuṭilaṃ vāme kare bibhratīṃ tṛptāsyāṃ svaśarīrajaiśca rudhiraiḥ santarpayantīṃ sakhīm । sadbhaktāya varapradānaniratāṃ pretāsanādhyāsinīṃ bālāṃ saṅkaṭanāśinīṃ bhagavatīṃ śrīchinnamastāṃ bhaje ॥ 10 ॥ ugrāmekajaṭāmanantasukhadāṃ dūrvādalābhāmajāṃ kartrīkhaḍgakapālanīlakamalān hastairvahantīṃ śivām । kaṇṭhe muṇḍasrajāṃ karālavadanāṃ kañjāsane saṃsthitāṃ vande saṅkaṭanāśinīṃ bhagavatīṃ bālāṃ svayaṃ tāriṇīm ॥ 11 ॥ mukhe śrī mātaṅgī tadanu kila tārā ca nayane tadantaṅgā kālī bhṛkuṭisadane bhairavi parā । kaṭau chinnā dhūmāvatī jaya kuce śrīkamalajā padāṃśe brahmāstrā jayati kila bālā daśamayī ॥ 12 ॥ virājanmandāradrumakusumahārastanataṭī paritrāsatrāṇa sphaṭikaguṭikā pustakavarā । gale rekhāstisro gamakagatigītaikanipuṇā sadā pītā hālā jayati kila bālā daśamayī ॥ 13 ॥ iti śrīmerutantre śrī daśavidyāmayī bālā stotram ।