śrīdevyuvāca । sādhu sādhu mahādeva kathayasva sureśvara । mātaṅgīkavacaṃ divyaṃ sarvasiddhikaraṃ nṛṇām ॥ 1 ॥ śrī īśvara uvāca । śṛṇu devi pravakṣyāmi mātaṅgīkavacaṃ śubham । gopanīyaṃ mahādevi maunī jāpaṃ samācaret ॥ 2 ॥ asya śrīmātaṅgīkavacasya dakṣiṇāmūrtirṛṣiḥ virāṭ chandaḥ mātaṅgī devatā caturvargasiddhyarthe viniyogaḥ ॥ oṃ śiro mātaṅginī pātu bhuvaneśī tu cakṣuṣī । toḍalā karṇayugalaṃ tripurā vadanaṃ mama ॥ 3 ॥ pātu kaṇṭhe mahāmāyā hṛdi māheśvarī tathā । tripuṣpā pārśvayoḥ pātu gude kāmeśvarī mama ॥ 4 ॥ ūrudvaye tathā caṇḍī jaṅghayośca harapriyā । mahāmāyā pādayugme sarvāṅgeṣu kuleśvarī ॥ 5 ॥ aṅgaṃ pratyaṅgakaṃ caiva sadā rakṣatu vaiṣṇavī । brahmarandhre sadā rakṣenmātaṅgī nāma saṃsthitā ॥ 6 ॥ rakṣennityaṃ lalāṭe sā mahāpiśācinīti ca । netrāyoḥ sumukhī rakṣeddevī rakṣatu nāsikām ॥ 7 ॥ mahāpiśācinī pāyānmukhe rakṣatu sarvadā । lajjā rakṣatu māṃ dantān coṣṭhau sammārjanīkarī ॥ 8 ॥ cibuke kaṇṭhadeśe tu ṭhakāratritayaṃ punaḥ । savisargaṃ mahādevi hṛdayaṃ pātu sarvadā ॥ 9 ॥ nābhiṃ rakṣatu māṃ lolā kālikāvatu locane । udare pātu cāmuṇḍā liṅge kātyāyanī tathā ॥ 10 ॥ ugratārā gude pātu pādau rakṣatu cāmbikā । bhujau rakṣatu śarvāṇī hṛdayaṃ caṇḍabhūṣaṇā ॥ 11 ॥ jihvāyāṃ mātṛkā rakṣetpūrve rakṣatu puṣṭikā । vijayā dakṣiṇe pātu medhā rakṣatu vāruṇe ॥ 12 ॥ nairṛtyāṃ sudayā rakṣedvāyavyāṃ pātu lakṣmaṇā । aiśānyāṃ rakṣenmāṃ devī mātaṅgī śubhakāriṇī ॥ 13 ॥ rakṣetsureśī cāgneyyāṃ bagalā pātu cottare । ūrdhvaṃ pātu mahādevī devānāṃ hitakāriṇī ॥ 14 ॥ pātāle pātu mā nityaṃ vaśinī viśvarūpiṇī । praṇavaṃ ca tamomāyā kāmabījaṃ ca kūrcakam ॥ 15 ॥ mātaṅginī ṅeyutāstraṃ vahnijāyāvadhirmanuḥ । sārdhaikādaśavarṇā sā sarvatra pātu māṃ sadā ॥ 16 ॥ iti te kathitaṃ devi guhyādguhyataraṃ param । trailokyamaṅgalaṃ nāma kavacaṃ devadurlabham ॥ 17 ॥ ya idaṃ prapaṭhennityaṃ jāyate sampadālayam । paramaiśvaryamatulaṃ prāpnuyānnātra saṃśayaḥ ॥ 18 ॥ gurumabhyarcya vidhivatkavacaṃ prapaṭhedyadi । aiśvaryaṃ sukavitvaṃ ca vāksiddhiṃ labhate dhruvam ॥ 19 ॥ nityaṃ tasya tu mātaṅgī mahilā maṅgalaṃ caret । brahmā viṣṇuśca rudraśca ye devāḥ surasattamāḥ ॥ 20 ॥ brahmarākṣasavetālā grahādyā bhūtajātayaḥ । taṃ dṛṣṭvā sādhakaṃ devi lajjāyuktā bhavanti te ॥ 21 ॥ kavacaṃ dhārayedyastu sarvasiddhiṃ labheddhruvam । rājāno'pi ca dāsāḥ syuḥ ṣaṭkarmāṇi ca sādhayet ॥ 22 ॥ siddho bhavati sarvatra kimanyairbahubhāṣitaiḥ । idaṃ kavacamajñātvā mātaṅgīṃ yo bhajennaraḥ ॥ 23 ॥ alpāyurnirdhano mūrkho bhavatyeva na saṃśayaḥ । gurau bhaktiḥ sadā kāryā kavace ca dṛḍhā matiḥ ॥ 24 ॥ tasmai mātaṅginī devī sarvasiddhiṃ prayacchati ॥ 25 ॥ iti nandyāvarte uttarakhaṇḍe mātaṅginī kavacam ॥