bandhūkadyutimindubimbavadanāṃ bṛndārakairvanditāṃ mandārādi samarcitāṃ madhumatīṃ mandasmitāṃ sundarīm । bandhacchedanakāriṇīṃ trinayanāṃ bhogāpavargapradāṃ vande'haṃ kamalāmbikāmanudinaṃ vāñchānukūlāṃ śivām ॥ 1 ॥ śrīkāmeśvarapīṭhamadhyanilayāṃ śrīrājarājeśvarīṃ śrīvāṇīparisevitāṅghriyugalāṃ śrīmatkṛpāsāgarām । śokāpadbhayamocinīṃ sukavitānandaikasandāyinīṃ vande'haṃ kamalāmbikāmanudinaṃ vāñchānukūlāṃ śivām ॥ 2 ॥ māyā mohavināśinīṃ munigaṇairārādhitāṃ tanmayīṃ śreyaḥsañcayadāyinīṃ guṇamayīṃ vāyvādi bhūtāṃ satām । prātaḥkālasamānaśobhamakuṭāṃ sāmādi vedaistutāṃ vande'haṃ kamalāmbikāmanudinaṃ vāñchānukūlāṃ śivām ॥ 3 ॥ bālāṃ bhaktajanaughacittanilayāṃ bālenducūḍāmbarāṃ sālokyādi caturvidhārthaphaladāṃ nīlotpalākṣīmajām । kālāripriyanāyikāṃ kalimalapradhvaṃsinīṃ kaulinīṃ vande'haṃ kamalāmbikāmanudinaṃ vāñchānukūlāṃ śivām ॥ 4 ॥ ānandāmṛtasindhumadhyanilayāmajñānamūlāpahāṃ jñānānandavivardhinīṃ vijayadāṃ mīnekṣaṇāṃ mohinīm । jñānānandaparāṃ gaṇeśajananīṃ gandharvasampūjitāṃ vande'haṃ kamalāmbikāmanudinaṃ vāñchānukūlāṃ śivām ॥ 5 ॥ ṣaṭcakropari nādabindunilayāṃ sarveśvarīṃ sarvagāṃ ṣaṭśāstrāgamavedaveditaguṇāṃ ṣaṭkoṇasaṃvāsinīm । ṣaṭkālena samarcitātmavibhavāṃ ṣaḍvargasañchedinīṃ vande'haṃ kamalāmbikāmanudinaṃ vāñchānukūlāṃ śivām ॥ 6 ॥ yogānandakarīṃ jagatsukhakarīṃ yogīndracittālayāṃ ekāmīśasukhapradāṃ dvijanutāmekāntasañcāriṇīm । vāgīśāṃ vidhiviṣṇuśambhuvaradāṃ viśveśvarīṃ vaiṇikīṃ vande'haṃ kamalāmbikāmanudinaṃ vāñchānukūlāṃ śivām ॥ 7 ॥ bodhānandamayīṃ budhairabhinutāṃ modapradāmambikāṃ śrīmadvedapurīśadāsavinutāṃ hrīṅkārasandhālayām । bhedābhedavivarjitāṃ bahuvidhāṃ vedāntacūḍāmaṇiṃ vande'haṃ kamalāmbikāmanudinaṃ vāñchānukūlāṃ śivām ॥ 8 ॥ itthaṃ śrīkamalāmbikāpriyakaraṃ stotraṃ paṭhedyaḥ sadā putraśrīpradamaṣṭasiddhiphaladaṃ cintāvināśāspadam । eti brahmapadaṃ nijaṃ nirupamaṃ niṣkalmaṣaṃ niṣkalaṃ yogīndrairapi durlabhaṃ punarayaṃ cintāvināśaṃ param ॥ 9 ॥ iti śrī kamalāmbikā stotram ।