śrīdevyuvāca – bhagavan brūhi tat stotraṃ sarvakāmaprasādhanaṃ । yasya śravaṇamātreṇa nānyacchrotavyamiṣyate ॥ 1 ॥ yadi me'nugrahaḥ kāryaḥ prītiścāpi mamopari । tadidaṃ kathaya brahman vimalaṃ yanmahītale ॥ 2 ॥ īśvara uvāca – śṛṇu devi pravakṣyāmi sarvakāmaprasādhanaṃ । hṛdayaṃ bhuvaneśvaryāḥ stotramasti yaśodayam ॥ 3 ॥ oṃ asya śrībhuvaneśvavarīhṛdayastotramantrasya śaktiḥ ṛṣiḥ – gāyatrī chandaḥ – śrībhuvaneśvarī devatā – hakāro bījaṃ – īkāraśśaktiḥ – rephaḥ kīlakaṃ – sakala manovāñchitasiddhyarthe jape viniyogaḥ ॥ karanyāsaḥ – oṃ hrīṃ aṅguṣṭhābhyāṃ namaḥ । oṃ śrīṃ tarjanībhyāṃ namaḥ । oṃ aiṃ madhyamābhyāṃ namaḥ । oṃ hrīṃ anāmikābhyāṃ namaḥ । oṃ śrīṃ kaniṣṭhikābhyāṃ namaḥ । oṃ aiṃ karatalakarapṛṣṭhābhyāṃ namaḥ । aṅganyāsaḥ – oṃ hrīṃ hṛdayāya namaḥ । oṃ śrīṃ śirase svāhā । oṃ aiṃ śikhāyai vaṣaṭ । oṃ hrīṃ kavacāya huṃ । oṃ śrīṃ netratrayāya vauṣaṭ । oṃ aiṃ astrāya phaṭ । dhyānam – dhyāyedbrahmādikānāṃ kṛtajanijananīṃ yoginīṃ yogayoniṃ devānāṃ jīvanāyojjvalitajayaparajyotirugrāṅgadhātrīṃ । śaṅkhaṃ cakraṃ ca bāṇaṃ dhanurapi dadhatīṃ doścatuṣkāmbujātau māyāmādyāṃ viśiṣṭāṃ bhava bhava bhuvanāṃ bhūbhavā bhārabhūmim ॥ 4 ॥ yadājñayā yo jagadādyaśeṣaṃ sṛjatyajaḥ śrīpatiraurasaṃ vā । bibharti saṃhanti bhavastadante bhajāmahe śrībhuvaneśvarīṃ tām ॥ 5 ॥ jagajjanānandakarīṃ jayākhyāṃ yaśasvinīṃ yantrasuyajñayonim । jitāmitāmitrakṛtaprapañcāṃ bhajāmahe śrībhuvaneśvarīṃ tām ॥ 6 ॥ harau prasupte bhuvanatrayānte- pyanāratannābhijapadmajanmā । vidhistato'ndhe vidadhāra yatpadaṃ bhajāmahe śrībhuvaneśvarīṃ tām ॥ 7 ॥ na vidyate kvāpi tu janma yasyā na vā sthitiḥ sāntatikīha yasyāḥ । na vā nirodhe'khilakarma yasyā bhajāmahe śrībhuvaneśvarīṃ tām ॥ 8 ॥ kaṭākṣamokṣācaraṇogravittā niveśitārṇā karuṇārdracittā । subhaktayerāti samīpsitaṃ yā bhajāmahe śrībhuvaneśvarīṃ tām ॥ 9 ॥ yato jagajjanma babhūva yone- stadeva madhye pratipāti yāṃ vā । tadatti yānte'khilamugrakāli bhajāmahe śrībhuvaneśvarīṃ tām ॥ 10 ॥ suṣuptikāle janamadhyayantyā yayā janaḥ svapnamavaiti kiñcit । prabudhyate jāgrati jīva eṣa bhajāmahe śrībhuvaneśvarīṃ tām ॥ 11 ॥ dayāsphuratkorakaṭākṣalābhā- nnaketra yasyāḥ prabhavanti siddhāḥ । kavitvamīśitvamapi svatantrā bhajāmahe śrībhuvaneśvarīṃ tām ॥ 12 ॥ lasanmukhāmbhoruhamutsphurantaṃ hṛdi praṇidhyāya diśi sphurantaḥ । yasyāḥ kṛpārdraṃ pravikāsayanti bhajāmahe śrībhuvaneśvarīṃ tām ॥ 13 ॥ yadānurāgānugatālicitrā- ścirantanapremapariplutāṅgāḥ । sunirbhayāssanti pramudya yasyāḥ bhajāmahe śrībhuvaneśvarīṃ tām ॥ 14 ॥ harirvirañcirhara īśitāraḥ puro'vatiṣṭhanti paraṃnatāṅgāḥ । yasyāssamicchanti sadānukūlyaṃ bhajāmahe śrībhuvaneśvarīṃ tām ॥ 15 ॥ manuṃ yadīyaṃ haramagnisaṃsthaṃ tataśca vāmaśruticandrasaktam । japanti ye syussuravanditāste bhajāmahe śrībhuvaneśvarīṃ tām ॥ 16 ॥ prasīdatu premarasārdracittā sadā hi sā śrībhuvaneśvarī me । kṛpākaṭākṣeṇa kuberakalpā bhavanti yasyāḥ padabhaktibhājaḥ ॥ 17 ॥ mudā supāṭhyaṃ bhuvaneśvarīyaṃ sadā satāṃ stotramidaṃ susevyam । sukhapradaṃ syātkalikalmaṣaghnaṃ suśṛṇvatāṃ sampaṭhatāṃ praśasyam ॥ 18 ॥ etattu hṛdayaṃ stotraṃ paṭhedyastu samāhitaḥ । bhavettasyeṣṭadā devī prasannā bhuvaneśvarī ॥ 19 ॥ dadāti dhanamāyuṣyaṃ puṇyaṃ puṇyamatiṃ tathā । naiṣṭhikīṃ devabhaktiṃ ca gurubhaktiṃ viśeṣataḥ ॥ 20 ॥ pūrṇimāyāṃ caturdaśyāṃ kujavāre viśeṣataḥ । paṭhanīyamidaṃ stotraṃ devasadmani yatnataḥ ॥ 21 ॥ yatrakutrāpi pāṭhena stotrasyāsya phalaṃ bhavet । sarvasthāneṣu deveśyāḥ pūtadehaḥ sadā paṭhet ॥ 22 ॥ iti nīlasarasvatītantre śrī bhuvaneśvarīpaṭale śrīdevīśvarasaṃvāde śrībhuvaneśvarī hṛdayastotraṃ sampūrṇam ॥