devyuvāca । deveśa bhuvaneśvaryā yā yā vidyāḥ prakāśitāḥ । śrutāścādhigatāḥ sarvāḥ śrotumicchāmi sāmpratam ॥ 1 ॥ trailokyamaṅgalaṃ nāma kavacaṃ yatpuroditam । kathayasva mahādeva mama prītikaraṃ param ॥ 2 ॥ īśvara uvāca । śṛṇu pārvati vakṣyāmi sāvadhānāvadhāraya । trailokyamaṅgalaṃ nāma kavacaṃ mantravigraham ॥ 3 ॥ siddhavidyāmayaṃ devi sarvaiśvaryapradāyakam । paṭhanāddhāraṇānmartyastrailokyaiśvaryabhāgbhavet ॥ 4 ॥ [ trailokyamaṅgalasyāsya kavacasya ṛṣiśśivaḥ । chando virāṭ jagaddhātrī devatā bhuvaneśvarī । dharmārthakāmamokṣeṣu viniyogaḥ prakīrtitaḥ ॥ ] hrīṃ bījaṃ me śiraḥ pātu bhuvaneśī lalāṭakam । aiṃ pātu dakṣanetraṃ me hrīṃ pātu vāmalocanam ॥ 1 ॥ śrīṃ pātu dakṣakarṇaṃ me trivarṇākhyā maheśvarī । [trivarṇātmā] vāmakarṇaṃ sadā pātu aiṃ ghrāṇaṃ pātu me sadā ॥ 2 ॥ hrīṃ pātu vadanaṃ devi aiṃ pātu rasanāṃ mama । vākpuṭaṃ ca trivarṇātmā kaṇṭhaṃ pātu parāmbikā ॥ 3 ॥ śrīṃ skandhau pātu niyataṃ hrīṃ bhujau pātu sarvadā । klīṃ karau tripuṭā pātu tripuraiśvaryadāyinī ॥ 4 ॥ [tripuṭeśāni] oṃ pātu hṛdayaṃ hrīṃ me madhyadeśaṃ sadā'vatu । krauṃ pātu nābhideśaṃ me tryakṣarī bhuvaneśvarī ॥ 5 ॥ sarvabījapradā pṛṣṭhaṃ pātu sarvavaśaṅkarī । hrīṃ pātu guhyadeśaṃ me namo bhagavatī kaṭim ॥ 6 ॥ māheśvarī sadā pātu sakthinī jānuyugmakam । annapūrṇā sadā pātu svāhā pātu padadvayam ॥ 7 ॥ saptadaśākṣarī pāyādannapūrṇātmikā parā । tāraṃ māyā ramākāmaḥ ṣoḍaśārṇā tataḥ param ॥ 8 ॥ śiraḥsthā sarvadā pātu viṃśatyarṇātmikā parā । tāraṃ durgeyugaṃ rakṣet svāheti ca daśākṣarī ॥ 9 ॥ jayadurgā ghanaśyāmā pātu māṃ sarvato mudā । māyābījādikā caiṣā daśārṇā ca parā tathā ॥ 10 ॥ uttaptakāñcanābhāsā jayadurgā''nane'vatu । tāraṃ hrīṃ duṃ ca durgāyai namo'ṣṭārṇātmikā parā ॥ 11 ॥ śaṅkhacakradhanurbāṇadharā māṃ dakṣiṇe'vatu । mahiṣāmardinī svāhā vasuvarṇātmikā parā ॥ 12 ॥ nairṛtyāṃ sarvadā pātu mahiṣāsuranāśinī । māyā padmāvatī svāhā saptārṇā parikīrtitā ॥ 13 ॥ padmāvatī padmasaṃsthā paścime māṃ sadā'vatu । pāśāṅkuśapuṭe māye hrīṃ parameśvari svāhā ॥ 14 ॥ trayodaśārṇā tārādyā aśvāruḍhā'nale'vatu । sarasvatī pañcaśare nityaklinne madadrave ॥ 15 ॥ svāhāravyakṣarī vidyā māmuttare sadā'vatu । tāraṃ māyā tu kavacaṃ khe rakṣetsatataṃ vadhūḥ ॥ 16 ॥ hrūṃ kṣaṃ hrīṃ phaṭ mahāvidyā dvādaśārṇākhilapradā । tvaritāṣṭāhibhiḥ pāyācchivakoṇe sadā ca mām ॥ 17 ॥ aiṃ klīṃ sauḥ satataṃ bālā mūrdhadeśe tato'vatu । bindvantā bhairavī bālā bhūmau ca māṃ sadā'vatu ॥ 18 ॥ iti te kathitaṃ puṇyaṃ trailokyamaṅgalaṃ param । sāraṃ sārataraṃ puṇyaṃ mahāvidyaughavigraham ॥ 19 ॥ asyāpi paṭhanātsadyaḥ kubero'pi dhaneśvaraḥ । indrādyāḥ sakalā devāḥ paṭhanāddhāraṇādyataḥ ॥ 20 ॥ sarvasiddhīśvarāḥ santaḥ sarvaiśvaryamavāpnuyuḥ । puṣpāñjalyaṣṭakaṃ datvā mūlenaiva paṭhetsakṛt ॥ 21 ॥ saṃvatsarakṛtāyāstu pūjāyāḥ phalamāpnuyāt । prītimanyo'nyataḥ kṛtvā kamalā niścalā gṛhe ॥ 22 ॥ vāṇī ca nivasedvaktre satyaṃ satyaṃ na saṃśayaḥ । yo dhārayati puṇyātmā trailokyamaṅgalābhidham ॥ 23 ॥ kavacaṃ paramaṃ puṇyaṃ so'pi puṇyavatāṃ varaḥ । sarvaiśvaryayuto bhūtvā trailokyavijayī bhavet ॥ 24 ॥ puruṣo dakṣiṇe bāhau nārī vāmabhuje tathā । bahuputravatī bhūtvā vandhyāpi labhate sutam ॥ 25 ॥ brahmāstrādīni śastrāṇi naiva kṛntanti taṃ janam । etatkavacamajñātvā yo japedbhuvaneśvarīm । dāridryaṃ paramaṃ prāpya so'cirānmṛtyumāpnuyāt ॥ 26 ॥ iti śrī rudrayāmale tantre devīśvara saṃvāde trailokyamaṅgalaṃ nāma bhuvaneśvarīkavacaṃ samāptam ।