īśvara uvāca । atha vakṣye maheśāni kavacaṃ sarvakāmadam । yasya vijñānamātreṇa bhavetsākṣātsadāśivaḥ ॥ 1 ॥ nārcanaṃ tasya deveśi mantramātraṃ japennaraḥ । sa bhavetpārvatīputraḥ sarvaśāstreṣu pāragaḥ । vidyārthinā sadā sevyā viśeṣe viṣṇuvallabhā ॥ 2 ॥ asyāścaturakṣariviṣṇuvanitārūpāyāḥ kavacasya śrībhagavān śiva ṛṣiranuṣṭupchando, vāgbhavī devatā, vāgbhavaṃ bījaṃ, lajjā śaktiḥ, ramā kīlakaṃ, kāmabījātmakaṃ kavacaṃ, mama supāṇḍitya kavitva sarvasiddhisamṛddhaye jape viniyogaḥ ॥ atha kavacam । aiṅkārī mastake pātu vāgbhavī sarvasiddhidā । hrīṃ pātu cakṣuṣormadhye cakṣuryugme ca śāṅkarī ॥ 1 ॥ jihvāyāṃ mukhavṛtte ca karṇayorgaṇḍayornasi । oṣṭhādhare dantapaṅktau tālumūle hanau punaḥ ॥ 2 ॥ pātu māṃ viṣṇuvanitā lakṣmīḥ śrīvarṇarūpiṇī । karṇayugme bhujadvandve stanadvandve ca pārvatī ॥ 3 ॥ hṛdaye maṇibandhe ca grīvāyāṃ pārśvayoḥ punaḥ । sarvāṅge pātu kāmeśī mahādevī samunnatiḥ ॥ 4 ॥ vyuṣṭiḥ pātu mahāmāyā utkṛṣṭiḥ sarvadā'vatu । sandhiṃ pātu sadā devī sarvatra śambhuvallabhā ॥ 5 ॥ vāgbhavī sarvadā pātu pātu māṃ harigehinī । ramā pātu sadā devī pātu māyā svarāṭ svayam ॥ 6 ॥ sarvāṅge pātu māṃ lakṣmīrviṣṇumāyā sureśvarī । vijayā pātu bhavane jayā pātu sadā mama ॥ 7 ॥ śivadūtī sadā pātu sundarī pātu sarvadā । bhairavī pātu sarvatra bhairuṇḍā sarvadā'vatu ॥ 8 ॥ tvaritā pātu māṃ nityamugratārā sadā'vatu । pātu māṃ kālikā nityaṃ kālarātriḥ sadā'vatu ॥ 9 ॥ navadurgā sadā pātu kāmākhyā sarvadā'vatu । yoginyaḥ sarvadā pāntu mudrāḥ pāntu sadā mama ॥ 10 ॥ mātaraḥ pāntu devyaśca cakrasthā yoginīgaṇāḥ । sarvatra sarvakāryeṣu sarvakarmasu sarvadā ॥ 11 ॥ pātu māṃ devadevī ca lakṣmīḥ sarvasamṛddhidā । iti te kathitaṃ divyaṃ kavacaṃ sarvasiddhaye ॥ 12 ॥ yatra tatra na vaktavyaṃ yadīcchedātmano hitam । śaṭhāya bhaktihīnāya nindakāya maheśvari ॥ 13 ॥ nyūnāṅge atiriktāṅge darśayenna kadācana । na stavaṃ darśayeddivyaṃ sandarśya śivahā bhavet ॥ 14 ॥ kulīnāya mahocchrāya durgābhaktiparāya ca । vaiṣṇavāya viśuddhāya dadyātkavacamuttamam ॥ 15 ॥ nijaśiṣyāya śāntāya dhanine jñānine tathā । dadyātkavacamityuktaṃ sarvatantrasamanvitam ॥ 16 ॥ vilikhya kavacaṃ divyaṃ svayambhukusumaiḥ śubhaiḥ । svaśukraiḥ paraśukraiśca nānāgandhasamanvitaiḥ ॥ 17 ॥ gorocanākuṅkumena raktacandanakena vā । sutithau śubhayoge vā śravaṇāyāṃ raverdine ॥ 18 ॥ aśvinyāṃ kṛttikāyāṃ vā phalgunyāṃ vā maghāsu ca । pūrvabhādrapadāyoge svātyāṃ maṅgalavāsare ॥ 19 ॥ vilikhet prapaṭhet stotraṃ śubhayoge surālaye । āyuṣmatprītiyoge ca brahmayoge viśeṣataḥ ॥ 20 ॥ indrayoge śubhayoge śukrayoge tathaiva ca । kaulave bālave caiva vaṇije caiva sattamaḥ ॥ 21 ॥ śūnyāgāre śmaśāne vā vijane ca viśeṣataḥ । kumārīṃ pūjayitvādau yajeddevīṃ sanātanīm ॥ 22 ॥ matsyamāṃsaiḥ śākasūpaiḥ pūjayetparadevatām । ghṛtādyaiḥ sopakaraṇaiḥ pūpasūpairviśeṣataḥ ॥ 23 ॥ brāhmaṇānbhojāyitvādau prīṇayetparameśvarīm । bahunā kimihoktena kṛte tvevaṃ dinatrayam ॥ 24 ॥ tadādharenmahārakṣāṃ śaṅkareṇābhibhāṣitam । māraṇadveṣaṇādīni labhate nātra saṃśayaḥ ॥ 25 ॥ sa bhavetpārvatīputraḥ sarvaśāstraviśāradaḥ । gururdevo haraḥ sākṣātpatnī tasya harapriyā ॥ 26 ॥ abhedena bhajedyastu tasya siddhiradūrataḥ । sarvadevamayīṃ devīṃ sarvamantramayīṃ tathā ॥ 27 ॥ subhaktyā pūjayedyastu sa bhavetkamalāpriyaḥ । raktapuṣpaistathā gandhairvastrālaṅkaraṇaistathā ॥ 28 ॥ bhaktyā yaḥ pūjayeddevīṃ labhate paramāṃ gatim । nārī vā puruṣo vāpi yaḥ paṭhetkavacaṃ śubham । mantrasiddhiḥ kāryasiddhirlabhate nātra saṃśayaḥ ॥ 29 ॥ paṭhati ya iha martyo nityamārdrāntarātmā japaphalamanumeyaṃ lapsyate yadvidheyam । sa bhavati padamuccaiḥ sampadāṃ pādanamraḥ kṣitipamukuṭalakṣmīrlakṣaṇānāṃ cirāya ॥ 30 ॥ iti śrī viśvasāratantroktaṃ caturakṣarī viṣṇuvanitā kavacaṃ nāma śrī kamalā kavacam ।