śrīpārvatyuvāca । devadeva mahādeva śaṅkara prāṇavallabha । kavacaṃ śrotumicchāmi bālāyā vada me prabho ॥ 1 ॥ śrīmaheśvara uvāca । śrībālākavacaṃ devi mahāprāṇādhikaṃ param । vakṣyāmi sāvadhānā tvaṃ śṛṇuṣvāvahitā priye ॥ 2 ॥ atha dhyānam । aruṇakiraṇajālaiḥ rañjitāśāvakāśā vidhṛtajapavaṭīkā pustakābhītihastā । itarakaravarāḍhyā phullakahlārasaṃsthā nivasatu hṛdi bālā nityakalyāṇaśīlā ॥ atha kavacam । vāgbhavaḥ pātu śirasi kāmarājastathā hṛdi । śaktibījaṃ sadā pātu nābhau guhye ca pādayoḥ ॥ 1 ॥ aiṃ klīṃ sauḥ vadane pātu bālā māṃ sarvasiddhaye । hasakalahrīṃ sauḥ pātu skandhe bhairavī kaṇṭhadeśataḥ ॥ 2 ॥ sundarī nābhideśe'vyāccarce kāmakalā sadā । bhrūnāsayorantarāle mahātripurasundarī ॥ 3 ॥ lalāṭe subhagā pātu bhagā māṃ kaṇṭhadeśataḥ । bhagodayā tu hṛdaye udare bhagasarpiṇī ॥ 4 ॥ bhagamālā nābhideśe liṅge pātu manobhavā । guhye pātu mahāvīrā rājarājeśvarī śivā ॥ 5 ॥ caitanyarūpiṇī pātu pādayorjagadambikā । nārāyaṇī sarvagātre sarvakārya śubhaṅkarī ॥ 6 ॥ brahmāṇī pātu māṃ pūrve dakṣiṇe vaiṣṇavī tathā । paścime pātu vārāhī hyuttare tu maheśvarī ॥ 7 ॥ āgneyyāṃ pātu kaumārī mahālakṣmīśca nirṛtau । vāyavyāṃ pātu cāmuṇḍā cendrāṇī pātu caiśake ॥ 8 ॥ jale pātu mahāmāyā pṛthivyāṃ sarvamaṅgalā । ākāśe pātu varadā sarvato bhuvaneśvarī ॥ 9 ॥ idaṃ tu kavacaṃ nāma devānāmapi durlabham । paṭhetprātaḥ samutthāya śuciḥ prayatamānasaḥ ॥ 10 ॥ nāmayo vyādhayastasya na bhayaṃ ca kvacidbhavet । na ca mārībhayaṃ tasya pātakānāṃ bhayaṃ tathā ॥ 11 ॥ na dāridryavaśaṃ gacchettiṣṭhenmṛtyuvaśe na ca । gacchecchivapuraṃ devi satyaṃ satyaṃ vadāmyaham ॥ 12 ॥ yadidaṃ kavacaṃ jñātvā śrībālāṃ yo japecchive । sa prāpnoti phalaṃ sarvaṃ śivasāyujyasambhavam ॥ 13 ॥ iti śrīrudrayāmale śrī bālā kavacam ।