ya i̱mā viśvā̱ bhuva̍nāni̱ juhva̱dṛṣi̱r​hotā̍ niṣa̱sādā̍ pi̱tā na̍ḥ । sa ā̱śiṣā̱ dravi̍ṇami̱cchamā̍naḥ parama̱cchado̱ vara̱ ā vi̍veśa ॥ 1 vi̱śvaka̍rmā̱ mana̍sā̱ yadvihā̍yā dhā̱tā vi̍dhā̱tā pa̍ra̱mota sa̱ṃdṛk । teṣā̍mi̱ṣṭāni̱ sami̱ṣā ma̍daṃti̱ yatra̍ sapta̱r​ṣīnpa̱ra eka̍mā̱huḥ ॥ 2 yo na̍ḥ pi̱tā ja̍ni̱tā yo vi̍dhā̱tā yo na̍ḥ sa̱to a̱bhyā sajja̱jāna̍ । yo de̱vānā̍ṃ nāma̱dhā eka̍ e̱va tagṃ sa̍ṃpra̱śnaṃbhuva̍nā yaṃtya̱nyā ॥ 3 ta āya̍jaṃta̱ dravi̍ṇa̱gṃ sama̍smā̱ ṛṣa̍ya̱ḥ pūrve̍ jari̱tāro̱ na bhū̱nā । a̱sūrtā̱ sūrtā̱ raja̍so vi̱māne̱ ye bhū̱tāni̍ sa̱makṛ̍ṇvanni̱māni̍ ॥ 4 na taṃ-vi̍m̐dātha̱ ya i̱daṃ ja̱jānā̱nyadyu̱ṣmāka̱maṃta̍raṃbhavāti । nī̱hā̱reṇa̱ prāvṛ̍tā jalpyā̍ cāsu̱tṛpa̍ uktha̱śāsa̍ścaraṃti ॥ 5 pa̱ro di̱vā pa̱ra e̱nā pṛ̍thi̱vyā pa̱ro de̱vebhi̱rasu̍rai̱rguhā̱ yat । kagṃ svi̱dgarbha̍ṃ pratha̱maṃ da̍dhra̱ āpo̱ yatra̍ de̱vāḥ sa̱maga̍cchaṃta̱ viśve ॥ 6 tamidgarbha̍ṃpratha̱maṃ da̍dhra̱ āpo̱ yatra̍ de̱vāḥ sa̱maga̍cchaṃta̱ viśve̍ । a̱jasya̱ nābhā̱vadhyeka̱marpi̍ta̱ṃ-yam̐smi̍nni̱daṃ-vim̐śva̱ṃbhuvana̱madhi̍ śri̱tam ॥ 7 vi̱śvaka̍rmā̱ hyaja̍niṣṭa de̱va ādidga̍ṃdha̱rvo a̍bhavaddvi̱tīya̍ḥ । tṛ̱tīya̍ḥ pi̱tā ja̍ni̱tauṣa̍dhīnāma̱pāṃ garbha̱ṃ-vya̍m̐dadhātpuru̱trā ॥ 8 cakṣu̍ṣaḥ pi̱tā mana̍sā̱ hi dhīro̍ ghṛ̱tame̍ne ajana̱nnanna̍māne । ya̱dedaṃtā̱ ada̍dṛgṃhaṃta̱ pūrva̱ ādiddyāvā̍pṛthi̱vī a̍prathetām ॥ 9 vi̱śvata̍ścakṣuru̱ta vi̱śvato̍mukho vi̱śvato̍hasta u̱ta vi̱śvata̍spāt । saṃbā̱hubhyā̱ṃ nama̍ti̱ saṃpata̍trai̱rdyāvā̍pṛthi̱vī ja̱naya̍ṃde̱va eka̍ḥ ॥ 10 kigṃ svi̍dāsīdadhi̱ṣṭhāna̍mā̱raṃbha̍ṇaṃ kata̱matsvi̱tkimā̍sīt । yadī̱ bhūmi̍ṃ ja̱naya̍nvi̱śvaka̍rmā̱ vi dyāmaurṇo̍nmahi̱nā vi̱śvaca̍kṣāḥ ॥ 11 kigṃ svi̱dvana̱ṃ ka u̱ sa vṛ̱kṣa ā̍sī̱dyato̱ dyāvā̍pṛthi̱vī ni̍ṣṭata̱kṣuḥ । manī̍ṣiṇo̱ mana̍sā pṛ̱cchatedu̱ tadyada̱dhyati̍ṣṭha̱dbhuva̍nāni dhā̱rayan̍ ॥ 12 yā te̱ dhāmā̍ni para̱māṇi̱ yāva̱mā yā ma̍dhya̱mā vi̍śvakarmannu̱temā । śikṣā̱ sakhi̍bhyo ha̱viṣi̍ svadhāvaḥ sva̱yaṃ-ya̍m̐jasva ta̱nuva̍ṃ juṣā̱ṇaḥ ॥ 13 vā̱caspati̍ṃ-vi̱m̐śvaka̍rmāṇamū̱taye̍ mano̱yuja̱ṃ-vām̐je̍ a̱dyā hu̍vema । sa no̱ nedi̍ṣṭhā̱ hava̍nāni joṣate vi̱śvaśa̍ṃbhū̱rava̍se sā̱dhuka̍rmā ॥ 14 viśva̍karmanha̱viṣā̍ vāvṛdhā̱naḥ sva̱yaṃ-ya̍m̐jasva ta̱nuva̍ṃ juṣā̱ṇaḥ । muhya̍ṃtva̱nye a̱bhita̍ḥ sa̱patnā̍ i̱hāsmāka̍mma̱ghavā̍ sū̱rira̍stu ॥ 15 viśva̍karmanha̱viṣā vardha̍nena trā̱tāra̱miṃdra̍makṛṇorava̱dhyam । tasmai̱ viśa̱ḥ sama̍namaṃta pū̱rvīra̱yamu̱gro vi̍ha̱vyo̍ yathāsa̍t ॥ 16 sa̱mu̱drāya̍ va̱yunā̍ya̱ siṃdhū̍nā̱ṃpata̍ye̱ nama̍ḥ । na̱dīnā̱gṃ sarvā̍sāṃpi̱tre ju̍hu̱tā vi̱śvaka̍rmaṇe̱ viśvāhāma̍rtyagṃ ha̱viḥ ।