oṃ śaṃ no̍ mi̱traśśaṃ-vam̐ru̍ṇaḥ । śaṃ no̍ bhavatvarya̱mā । śaṃ na̱ iṃdro̱ bṛha̱spati̍ḥ । śaṃ no̱ viṣṇu̍rurukra̱maḥ । namo̱ brahma̍ṇe । nama̍ste vāyo । tvame̱va pra̱tyakṣa̱ṃ brahmā̍si । tvame̱va pra̱tyakṣa̱ṃ brahma̍ vadiṣyāmi । ṛ̱taṃ-va̍m̐diṣyāmi । sa̱tyaṃ-va̍m̐diṣyāmi । tanmāma̍vatu । tadva̱ktāra̍mavatu । ava̍tu̱ mām । ava̍tu va̱ktāram̎ । oṃ śāṃti̱ḥ śāṃti̱ḥ śāṃti̍ḥ ॥ 1 ॥ śaṃ no̍ mi̱traśśaṃ-vam̐ru̍ṇaḥ । śaṃ no̍ bhavatvarya̱mā । śaṃ na̱ iṃdro̱ bṛha̱spati̍ḥ । śaṃ no̱ viṣṇu̍rurukra̱maḥ । namo̱ brahma̍ṇe । nama̍ste vāyo । tvame̱va pra̱tyakṣa̱ṃ brahmā̍si । tvāme̱va pra̱tyakṣa̱ṃ brahmāvā̍diṣam । ṛ̱tama̍vādiṣam । sa̱tyama̍vādiṣam । tanmāmā̍vīt । tadva̱ktāra̍māvīt । āvī̱nmām । āvī̎dva̱ktāram̎ । oṃ śāṃti̱ḥ śāṃti̱ḥ śāṃti̍ḥ ॥ 2 ॥ oṃ sa̱ha nā̍vavatu । sa̱ha nau̍ bhunaktu । sa̱ha vī̱rya̍ṃ karavāvahai । te̱ja̱svinā̱vadhī̍tamastu̱ mā vi̍dviṣā̱vahai̎ । oṃ śāṃti̱ḥ śāṃti̱ḥ śāṃti̍ḥ ॥ 3 ॥ namo̍ vā̱ce yā co̍di̱tā yā cānu̍ditā̱ tasyai̍ vā̱ce namo̱ namo̍ vā̱ce namo̍ vā̱caspata̍ye̱ nama̱ ṛṣi̍bhyo maṃtra̱kṛdbhyo̱ maṃtra̍patibhyo̱ mā māmṛṣa̍yo maṃtra̱kṛto̍ maṃtra̱pata̍ya̱ḥ parā̍du̱rmā-'hamṛṣī̎n maṃtra̱kṛto̍ maṃtra̱patī̱n parā̍dāṃ-vaim̐śvade̱vīṃ-vām̐ca̍mudyāsagṃ śi̱vā mada̍stā̱ṃjuṣṭā̎ṃ de̱vebhya̱ḥ śarma̍ me̱ dyauḥ śarma̍ pṛthi̱vī śarma̱ viśva̍mi̱daṃ jaga̍t । śarma̍ ca̱ṃdraśca̱ sūrya̍śca̱ śarma̍ brahma prajāpa̱tī । bhū̱taṃ-va̍m̐diṣye̱ bhuva̍naṃ-vam̐diṣye̱ tejo̍ vadiṣye̱ yaśo̍ vadiṣye̱ tapo̍ vadiṣye̱ brahma̍ vadiṣye sa̱tyaṃ-va̍m̐diṣye̱ tasmā̍ a̱hami̱da-mu̍pa̱stara̍ṇa̱-mupa̍stṛṇa upa̱stara̍ṇaṃ me pra̱jāyai̍ paśū̱nāṃ bhū̍yādupa̱stara̍ṇama̱haṃ pra̱jāyai̍ paśū̱nāṃ bhū̍yāsa̱ṃ prāṇā̍pānau mṛ̱tyormā̍pāta̱ṃ prāṇā̍pānau̱ mā mā̍ hāsiṣṭa̱ṃ madhu̍ maniṣye̱ madhu̍ janiṣye̱ madhu̍ vakṣyāmi̱ madhu̍ vadiṣyāmi̱ madhu̍matīṃ de̱vebhyo̱ vāca̍mudyāsagṃ śuśrū̱ṣeṇyā̎ṃ manu̱ṣye̎bhya̱staṃ mā̍ de̱vā a̍vaṃtu śo̱bhāyai̍ pi̱taro'nu̍madaṃtu ॥ oṃ śāṃti̱ḥ śāṃti̱ḥ śāṃti̍ḥ ॥ 4 ॥ śanno̱ vāta̍ḥ pavatāṃ māta̱riśvā̱ śanna̍ stapatu̱ sūrya̍ḥ । ahā̍ni̱ śaṃ bha̍vaṃtu na̱ śśagṃ rātri̱ḥ prati̍dhīyatām ॥ śamu̱ṣā no̱ vyu̍cchatu̱ śamā̍di̱tya ude̍tu naḥ । śi̱vā na̱ śśaṃta̍mābhava sumṛḍī̱kā sara̍svati । māte̱ vyo̍ma sa̱ṃdṛśi̍ ॥ 1 iḍā̍yai̱ vāstva̍si vāstu̱madvā̎stu̱maṃto̍ bhūyāsma̱ mā vāsto̎śchiths mahyavā̱stu ssa bhū̍yā̱d yo̎'smān dveṣṭi̱ yaṃ ca̍ va̱yaṃ dvi̱ṣmaḥ ॥ pra̱ti̱ṣṭhā'si̍ prati̱ṣṭhāva̍ṃto bhūyāsma̱ mā pra̍ti̱ṣṭhāyā̎chiths mahya prati̱ṣṭhassa bhū̍yā̱d yo̎'smān dveṣṭi̱ yaṃ ca̍ va̱yaṃ dvi̱ṣmaḥ ॥ 2 āvā̍ta vāhi bheṣa̱jaṃ-vim̐vā̍ta-vāhi̱ yadrapa̍ḥ । tvagṃhi vi̱śvabhe̍ṣajo de̱vānā̎ṃ dū̱ta īya̍se ॥ dvāvi̱mau vātau̍ vāta̱ āsiṃdho̱rā pa̍rā̱vata̍ḥ । dakṣa̍ṃ me a̱nya ā̱vātu̱ parā̱'nyo vā̍tu̱ yadrapa̍ḥ ॥ yada̱do vā̍ta te gṛ̱he̍​'mṛta̍sya ni̱dhir​hi̱taḥ । tato̍ no dehi jī̱vase̱ tato̍ no dhehi bheṣa̱jam । tato̍ no̱ maha̱ āva̍ha̱ vāta̱ āvā̍tu bheṣa̱jam ॥ śa̱ṃbhūr-ma̍yo̱bhūr-no̍ hṛ̱de praṇa̱ āyug̍ṃṣi tāriṣat । iṃdra̍sya gṛ̱ho̍​'si̱ taṃ tvā̱ pra̍padye̱ sagu̱ssāśva̍ḥ । sa̱ha yanme̱ asti̱ tena̍ ॥ 3 bhūḥ prapa̍dye̱ bhuva̱ḥ prapa̍dye̱ suva̱ḥ prapa̍dye̱ bhūrbhuva̱ssuva̱ḥ prapa̍dye vā̱yuṃ prapa̱dye'nā̎rtāṃ de̱vatā̱ṃ prapa̱dye-'śmā̍namākha̱ṇaṃ prapa̍dye pra̱jāpa̍ter brahmako̱śaṃ brahma̱ prapa̍dya̱ oṃ prapa̍dye ॥ a̱ṃtari̍kṣaṃ ma u̱rva̍ṃtara̍ṃ bṛ̱hada̱gnaya̱ḥ parva̍tāśca̱ yayā̱ vāta̍ḥ sva̱styā sva̍sti̱māṃtayā̎ sva̱styā sva̍sti̱ māna̍sāni ॥ prāṇā̍pānau mṛ̱tyor mā̍ pāta̱ṃ prāṇā̍pānau̱ mā mā̍ hāsiṣṭa̱ṃ mayi̍ me̱dhāṃ mayi̍ pra̱jāṃ mayya̱gni stejo̍ dadhātu̱ mayi̍ me̱dhāṃ mayi̍ pra̱jāṃ mayīṃdra̍ iṃdri̱yaṃ da̍dhātu̱ mayi̍ me̱dhāṃ mayi̍ pra̱jāṃ mayi̱ sūryo̱ bhrājo̍ dadhātu ॥ 4 dyu̱bhira̱ktubhi̱ḥ pari̍pāta-ma̱smā-nari̍ṣṭebhiraśvinā̱ saubha̍gebhiḥ । tanno̍ mi̱tro varu̍ṇo māmahaṃtā̱-madi̍ti̱ḥ-siṃdhu̍ḥ pṛthi̱vī u̱tadyauḥ ॥ kayā̍naści̱tra ābhu̍va dū̱tī sa̱dāvṛ̍dha̱ ssakhā̎ । kayā̱śaci̍ṣṭhayā vṛ̱tā ॥ kastvā̍ sa̱tyo madā̍nā̱ṃ magṃhi̍ṣṭho mathsa̱daṃdha̍saḥ । dṛ̱ḍhā-ci̍dā̱-ruje̱-vasu̍ ॥ a̱bhīṣuṇa̱ ssakhī̍nā-mavi̱tā-ja̍rit-ṝ̱ṇām । śa̱taṃ bha̍vāsyū̱tibhi̍ḥ ॥ vaya̍ssupa̱rṇā upa̍sedu̱riṃdra̍ṃ pri̱yame̍dhā̱ ṛṣa̍yo̱ nādha̍mānāḥ । apa̍ddhvā̱ṃtamū̎rṇu̱hi pū̱rdhicakṣu̍r mumu̱gdhya̍smā-nni̱dhaye̍va ba̱ddhān ॥ śanno̍ de̱vīra̱bhiṣṭa̍ya̱ āpo̍ bhavaṃtu pī̱taye̎ । śaṃ​yom̐-ra̱bhisra̍vaṃtunaḥ ॥ īśā̍nā̱ vāryā̍ṇā̱ṃ kṣaya̍ṃtī ścar​ṣaṇī̱nām । a̱po yā̍cāmi bheṣa̱jam ॥ su̱mi̱trāna̱ āpa̱ oṣa̍dhaya ssaṃtu durmi̱trāstasmai̍ bhūyā-su̱ryo̎'smān dveṣṭi̱ yaṃ ca̍ va̱yaṃ dvi̱ṣmaḥ ॥ 5 āpo̱hiṣṭhā ma̍yo̱bhuva̱-stāna̍ ū̱rje da̍dhātana । ma̱he raṇā̍ya̱ cakṣa̍se । yo va̍ḥ śi̱vata̍mo̱ rasa̱stasya̍ bhājayate̱ha na̍ḥ । u̱śa̱tīri̍va mā̱tara̍ḥ । tasmā̱ ara̍ṃ gamāmavo̱ yasya̱ kṣayā̍ya̱ jinva̍tha । āpo̍ ja̱naya̍thā canaḥ ॥ pṛ̱thi̱vī śā̱ṃtā sā'gninā̍ śā̱ṃtā sā me̍ śā̱ṃtā śucag̍ṃ śamayatu । a̱ṃtari̍kṣagṃ śā̱ṃtaṃ tad vā̱yunā̍ śā̱ṃtaṃ tanme̍ śā̱ṃtagṃ śucag̍ṃ śamayatu । dyauḥ śā̱ṃtā sā''di̱tyena̍ śā̱ṃtā sā me̍ śā̱ṃtā śucag̍ṃ śamayatu ॥ 6 pṛ̱thi̱vī śāṃti̍ra̱ṃtari̍kṣa̱g̱ṃ śāṃti̱r dyau śśāṃti̱r diśa̱ḥ śāṃti̍-ravāṃtaradi̱śāḥ-śāṃti̍-ra̱gniśśāṃti̍r-vā̱yuśśāṃti̍-rādi̱tya śśāṃti̍- śca̱ṃdramā̱ śśāṃti̱r-nakṣa̍trāṇi̱ śāṃti̱-rāpa̱śśāṃti̱-roṣa̍dhaya̱ śśāṃti̱r- vana̱spata̍ya̱ śśāṃti̱r-gau śśāṃti̍-ra̱jā śāṃti̱-raśva̱ śśāṃti̱ḥ puru̍ṣa̱ śśāṃti̱r brahma̱ śāṃti̍r brāhma̱ṇa śśāṃti̱-śśāṃti̍-re̱va śāṃti̱ śśāṃti̍r me astu śāṃti̍ḥ ॥ tayā̱'hagṃ śā̱ṃtyā sa̍rva śā̱ṃtyā mahya̍ṃ dvi̱pade̱ catu̍ṣpade ca̱ śāṃti̍ṃ karomi̱ śāṃti̍r me astu̱ śāṃti̍ḥ ॥ 7 eha̱ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ dharma̍ścai̱tāni̱ motti̍ṣṭhaṃta̱-manūtti̍ṣṭhaṃtu̱ māmā̱gg̱​ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ dharma̍ścai̱tāni̍ mā̱ mā hā̍siṣuḥ ॥ udāyu̍ṣā svā̱yuṣo-doṣa̍dhīnā̱g̱ṃ rase̱not pa̱rjanya̍sya̱ śuṣme̱ṇoda̍sthā- ma̱mṛtā̱g̱ṃ anu̍ ॥ taccakṣu̍r de̱vahi̍taṃ pu̱rastā̎-cchu̱kramu̱ccara̍t ॥ 8 paśye̍ma śa̱rada̍śśa̱taṃ jīve̍ma śa̱rada̍śśa̱taṃ naṃdā̍ma śa̱rada̍śśa̱taṃ modā̍ma śa̱rada̍śśa̱taṃ bhavā̍ma śa̱rada̍śśa̱tagṃ śṛ̱ṇavā̍ma śa̱rada̍śśa̱taṃ prabra̍vāma śa̱rada̍śśa̱ta-majī̍tāsyāma śa̱rada̍śśa̱taṃ jokca̱ sūrya̍ṃ dṛ̱śe ॥ ya uda̍gān maha̱to'rṇavā̎n vi̱brāja̍māna-ssari̱rasya̱ maddhyā̱thsa mā̍ vṛṣa̱bho lo̍hitā̱kṣa ssūryo̍ vipa̱ścin mana̍sā punātu ॥ 9 brahma̍ṇa̱ścota̍nyasi̱ brahma̍ṇa ā̱ṇīstho̱ brahma̍ṇa ā̱vapa̍namasi dhāri̱teyaṃ pṛ̍thi̱vī brahma̍ṇā ma̱hī dhā̍ri̱ta-me̍nena ma̱hada̱ṃtari̍kṣa̱ṃ diva̍ṃ dādhāra pṛthi̱vīgṃ sade̍vā̱ṃ​yam̐da̱haṃ​vem̐da̱ tada̱haṃ dhā̍rayāṇi̱ māmadvedo'dhi̱ visra̍sat । me̱dhā̱ma̱nī̱ṣe māvi̍śatāgṃ sa̱mīcī̍ bhū̱tasya̱ bhavya̱syāva̍ruddhyai̱ sarva̱māyu̍rayāṇi̱ sarva̱māyu̍rayāṇi ॥ 10 ā̱bhir gī̱rbhir yadato̍na ū̱namāpyā̍yaya harivo̱ vardha̍mānaḥ । ya̱dā sto̱tṛbhyo̱ mahi̍ go̱trā ru̱jāsi̍ bhūyiṣṭha̱bhājo̱ adha̍te śyāma । brahma̱ prāvā̍diṣma̱ tanno̱ māhā̍sīt ॥ oṃ śāṃti̱ḥ śāṃti̱ḥ śāṃti̍ḥ ॥ 5 ॥