ā no̎ bha̱drāḥ krata̍vo yantu vi̱śvato'da̍bdhāso̱ apa̍rītāsa u̱dbhida̍ḥ । de̱vā no̱ yathā̱ sada̱mid vṛ̱dhe asa̱nnaprā̎yuvo rakṣi̱tāro̎ di̱vedi̍ve ॥ de̱vānā̎ṃ bha̱drā su̍ma̱tirṛ̍jūya̱tāṃ de̱vānā̎ṃ rā̱tira̱bhi no̱ ni va̍rtatām । de̱vānā̎ṃ sa̱khyamupa̍ sedimā va̱yaṃ de̱vā na̱ āyu̱ḥ prati̍rantu jī̱vase̍ ॥ tānpūrva̍yā ni̱vidā̎ hūmahe va̱yaṃ bhaga̎ṃ mi̱tramadi̍ti̱ṃ dakṣa̍ma̱sridha̎m । a̱rya̱maṇa̱ṃ varu̍ṇa̱ṃ soma̍ma̱śvinā̱ sara̍svatī naḥ su̱bhagā̱ maya̍skarat ॥ tanno̱ vāto̎ mayo̱bhuvā̎tu bheṣa̱jaṃ tanmā̱tā pṛ̍thi̱vī tatpi̱tā dyauḥ । tad grāvā̎ṇaḥ soma̱suto̎ mayo̱bhuva̱stada̍śvinā śṛṇutaṃ dhiṣṇyā yu̱vam ॥ tamīśā̎na̱ṃ jaga̍tasta̱sthuṣa̱spati̎ṃ dhiyaṃji̱nvamava̍se hūmahe va̱yam । pū̱ṣā no̱ yathā̱ veda̍sā̱masa̍dvṛ̱dhe ra̍kṣi̱tā pā̱yurada̍bdhaḥ sva̱staye̎ ॥ sva̱sti na̱ indro̎ vṛ̱ddhaśra̍vāḥ sva̱sti na̍ḥ pū̱ṣā vi̱śvave̎dāḥ । sva̱sti na̱stārkṣyo̱ ari̍ṣṭanemiḥ sva̱sti no̱ bṛha̱spati̍rdadhātu ॥ pṛṣa̍daśvā ma̱ruta̱ḥ pṛśni̍mātaraḥ śubha̱ṃyāvā̎no vi̱dathe̎ṣu̱ jagma̍yaḥ । a̱gni̱ji̱hvā mana̍va̱ḥ sūra̍cakṣaso̱ viśve̎ no de̱vā ava̱sā ga̍manni̱ha ॥ bha̱draṃ karṇe̎bhiḥ śṛṇuyāma devā bha̱draṃ pa̍śyemā̱kṣabhi̍ryajatrāḥ । sthi̱rairaṅgai̎stuṣṭu̱vāṃsa̍sta̱nūbhi̱rvya̍śema de̱vahi̍ta̱ṃ yadāyu̍ḥ ॥ śa̱taminnu śa̱rado̱ anti̍ devā̱ yatrā̎ naśca̱krā ja̱rasa̎ṃ ta̱nūnā̎m । pu̱trāso̱ yatra̍ pi̱taro̱ bhava̎nti̱ mā no̎ ma̱dhyā rī̎riṣa̱tāyu̱rganto̎ḥ ॥ adi̍ti̱rdyauradi̍tira̱ntari̍kṣa̱madi̍tirmā̱tā sa pi̱tā sa pu̱traḥ । viśve̎ de̱vā adi̍ti̱ḥ pañca̱ janā̱ adi̍tirjā̱tamadi̍ti̱rjani̍tvam ॥ (śukla yajurveda 25 । 14-23) dyauḥ śānti̍ra̱ntari̍kṣa̱gͫ śānti̍ḥ pṛthi̱vī śānti̱rāpa̱ḥ śānti̱roṣa̍dhaya̱ḥ śānti̍ḥ । vana̱spata̍ya̱ḥ śānti̱rviśve̎de̱vāḥ śānti̱rbrahma̱ śānti̱ḥ sarva̱gͫ śānti̱ḥ śānti̍re̱va śānti̱ḥ sā mā̱ śānti̍redhi ॥ (śukla yajurveda 36 । 17) yato̎yataḥ sa̱mīha̍se̱ tato̎ no̱'bha̍yaṅkuru । śanna̍ḥ kurupra̱jābhyo'bha̍yannaḥ pa̱śubhya̍ḥ ॥ suśāntirbhavatu ॥ (śukla yajurveda 36 । 22) gaṇānā̎ṃ tvā ga̱ṇapa̍tigͫ havāmahe pri̱yāṇā̎ṃ tvā pri̱yapa̍tigͫ havāmahe nidhi̱nāntavā̎nidhi̱pati̍gͫ havāmahe vasomama । āhama̍jānigarbha̱dhamātvama̍jāsigarbha̱dham ॥ ambe̱'mbi̱ke'mbā̎like̱namā̎nayati̱kaśca̱na । sasa̍styaśva̱kaḥ subha̍drikāṅkāmpīlavā̱sinī̎m ॥