శ్ర॒ద్ధయా॒గ్నిః సమి॑ధ్యతే శ్ర॒ద్ధయా॑ హూయతే హ॒విః । శ్ర॒ద్ధాం భగ॑స్య మూ॒ర్ధని॒ వచ॒సా వే॑దయామసి ॥ 1 ప్రి॒యం శ్ర॑ద్ధే॒ దద॑తః ప్రి॒యం శ్ర॑ద్ధే॒ దిదా॑సతః । ప్రి॒యం భో॒జేషు॒ యజ్వ॑స్వి॒దం మ॑ ఉది॒తం కృ॑ధి ॥ 2 యథా॑ దే॒వా అసు॑రేషు శ్ర॒ద్ధాము॒గ్రేషు॑ చక్రి॒రే । ఏ॒వం భో॒జేషు॒ యజ్వ॑స్వ॒స్మాక॑ముది॒తం కృ॑ధి ॥ 3 శ్ర॒ద్ధాం దే॒వా యజ॑మానా వా॒యుగో॑పా॒ ఉపా॑సతే । శ్ర॒ద్ధాం హృ॑ద॒య్య॑యా॒ఽఽకూ॑త్యా శ్ర॒ద్ధయా॑ విందతే॒ వసు॑ ॥ 4 శ్ర॒ద్ధాం ప్రా॒తర్హ॑వామహే శ్ర॒ద్ధాం మ॒ధ్యంది॑నం॒ పరి॑ । శ్ర॒ద్ధాం సూర్య॑స్య ని॒మ్రుచి॒ శ్రద్ధే॒ శ్రద్ధా॑పయే॒హ న॑: ॥ 5