हैंహైHaindavamஹிહિં
📍
Font Size:
Nakshatra Suktam
nakṣatraṃ - kṛttikā, devatā - agniḥ
oṃ a̱gnirna̍ḥ pātu̱ kṛtti̍kāḥ । nakṣa̍traṃ de̱vami̍ṃdri̱yam ।
i̱damā̍sāṃ-vim̐cakṣa̱ṇam । ha̱virā̱saṃ ju̍hotana ।
yasya̱ bhāṃti̍ ra̱śmayo̱ yasya̍ ke̱tava̍ḥ । yasye̱mā viśvā̱ bhuva̍nāni̱ sarvā̎ ।
sa kṛtti̍kābhi-ra̱bhisa̱ṃvam̐sā̍naḥ । a̱gnirno̍ de̱vassu̍vi̱te da̍dhātu ॥ 1
nakṣatraṃ - rohiṇī, devatā - prajāpatiḥ
pra̱jāpa̍te rohi̱ṇīve̍tu̱ patnī̎ । vi̱śvarū̍pā bṛha̱tī ci̱trabhā̍nuḥ ।
sā no̍ ya̱jñasya̍ suvi̱te da̍dhātu । yathā̱ jīve̍ma śa̱rada̱ssavī̍rāḥ ।
ro̱hi̱ṇī de̱vyuda̍gātpu̱rastā̎t । viśvā̍ rū̱pāṇi̍ prati̱moda̍mānā ।
pra̱jāpa̍tigṃ ha̱viṣā̍ va̱rdhaya̍ṃtī । pri̱yā de̱vānā̱-mupa̍yātu ya̱jñam ॥ 2
nakṣatraṃ - mṛgaśīrṣaḥ, devatā - somaḥ
somo̱ rājā̍ mṛgaśī̱ṟṣeṇa̱ āgann̍ । śi̱vaṃ nakṣa̍traṃ pri̱yama̍sya̱ dhāma̍ ।
ā̱pyāya̍māno bahu̱dhā jane̍ṣu । reta̍ḥ pra̱jāṃ-yam̐ja̍māne dadhātu ।
yatte̱ nakṣa̍traṃ mṛgaśī̱ṟṣamasti̍ । pri̱yagṃ rā̍jan pri̱yata̍maṃ pri̱yāṇā̎m ।
tasmai̍ te soma ha̱viṣā̍ vidhema । śanna̍ edhi dvi̱pade̱ śaṃcatu̍ṣpade ॥ 3
nakṣatraṃ - ārdrā, devatā - rudraḥ
ā̱rdrayā̍ ru̱draḥ pratha̍mā na eti । śreṣṭho̍ de̱vānā̱ṃ pati̍raghni̱yānā̎m ।
nakṣa̍tramasya ha̱viṣā̍ vidhema । mā na̍ḥ pra̱jāgṃ rī̍riṣa̱nmota vī̱rān ।
he̱tī ru̱drasya̱ pari̍ṇo vṛṇaktu । ā̱rdrā nakṣa̍traṃ juṣatāgṃ ha̱virna̍ḥ ।
pra̱mu̱ṃcamā̍nau duri̱tāni̱ viśvā̎ । apā̱ghaśag̍ṃ sannu-datā̱marā̍tim ॥ 4
nakṣatraṃ - punarvasu, devatā - aditiḥ
puna̍rno de̱vyadi̍ti-spṛṇotu । puna̍rvasū na̱ḥ puna̱retā̎ṃ-ya̱m̐jñam ।
puna̍rno de̱vā a̱bhiya̍ṃtu̱ sarve̎ । puna̍ḥ punarvo ha̱viṣā̍ yajāmaḥ ।
e̱vā na de̱vya-di̍tirana̱rvā । viśva̍sya bha̱rtrī jaga̍taḥ prati̱ṣṭhā ।
puna̍rvasū ha̱viṣā̍ va̱rdhaya̍ṃtī । pri̱yaṃ de̱vānā̱-mapye̍tu̱ pātha̍ḥ ॥ 5
nakṣatraṃ - puṣyaḥ, devatā - bṛhaspatiḥ
bṛha̱spati̍ḥ pratha̱maṃjāya̍mānaḥ । ti̱ṣya̍ṃ nakṣa̍trama̱bhi saṃba̍bhūva ।
śreṣṭho̍ de̱vānā̱ṃ pṛta̍nāsu ji̱ṣṇuḥ । di̱śo'nu̱ sarvā̱ abha̍yanno astu ।
ti̱ṣya̍ḥ pu̱rastā̍du̱ta ma̍dhya̱to na̍ḥ । bṛha̱spati̍rna̱ḥ pari̍pātu pa̱ścāt ।
bādhe̍ tā̱ṃdveṣo̱ abha̍yaṃ kṛṇutām । su̱vīrya̍sya̱ pata̍yasyāma ॥ 6
nakṣatraṃ -āśreṣaṃ, devatā - sarpāḥ
i̱dagṃ sa̱rpebhyo̍ ha̱vira̍stu̱ juṣṭa̎m । ā̱śre̱ṣā yeṣā̍manu̱yaṃti̱ ceta̍ḥ ।
ye a̱ṃtari̍kṣaṃ pṛthi̱vīṃ-kṣi̱yaṃti̍ । tena̍ ssa̱rpāso̱ hava̱māga̍miṣṭhāḥ ।
ye ro̍ca̱ne sūrya̱syāpi̍ sa̱rpāḥ । ye diva̍ṃ de̱vī-manu̍sa̱ṃcara̍ṃti ।
yeṣā̍māśre̱ṣā a̍nu̱yaṃti̱ kāma̎m । tebhya̍-ssa̱rpebhyo̱ madhu̍-majjuhomi ॥ 7
nakṣatraṃ - maghā, devatā - pitaraḥ
upa̍hūtāḥ pi̱taro̱ ye ma̱ghāsu̍ । mano̍javasa-ssu̱kṛta̍-ssukṛ̱tyāḥ ।
te no̱ nakṣa̍tre̱ hava̱māga̍miṣṭhāḥ । sva̱dhābhi̍rya̱jñaṃ praya̍taṃ juṣaṃtām ।
ye a̍gnida̱gdhā ye'na̍gni-dagdhāḥ । ye̍'mullo̱kaṃ pi̱tara̍ḥ, kṣi̱yaṃti̍ ।
yāggśca̍ vi̱dmayāgṃ u̍ ca̱ na pra̍vi̱dma । ma̱ghāsu̍ ya̱jñagṃ sukṛ̍taṃ juṣaṃtām ॥ 8
nakṣatraṃ - pūrvaphalgunī, devatā - aryamā
gavā̱ṃ pati̱ḥ phalgu̍nī-nāmasi̱ tvam । tada̍ryamanvaruṇa mitra̱ cāru̍ ।
taṃ tvā̍ va̱yagṃ sa̍ni̱tārag̍ṃ sanī̱nām । jī̱vā jīva̍ṃta̱mupa̱ saṃvi̍m̐śema ।
yene̱mā viśvā̱ bhuva̍nāni̱ saṃji̍tā । yasya̍ de̱vā a̍nusa̱ṃyaṃm̐ti̱ ceta̍ḥ ।
a̱rya̱mā rājā̱'jara̱stu vi̍ṣmān । phalgu̍nīnā-mṛṣa̱bho ro̍ravīti ॥ 9
nakṣatraṃ - uttara phalgunī, devatā - bhagaḥ
śreṣṭho̍ de̱vānā̎ṃ bhagavo bhagāsi । tattvā̍ vidu̱ḥ phalgu̍nī̱-stasya̍ vittāt ।
a̱smabhya̍ṃ-kṣa̱trama̱jarag̍ṃ su̱vīrya̎m । goma̱daśva̍-va̱dupa̱sannu̍-de̱ha ।
bhago̍ha dā̱tā bhaga̱ itpra̍dā̱tā । bhago̍ de̱vīḥ phalgu̍nī̱-rāvi̍veśa ।
bhaga̱syettaṃ pra̍sa̱vaṃ ga̍mema । yatra̍ de̱vai-ssa̍dha̱māda̍ṃ madema ॥ 10
nakṣatraṃ - hastaḥ, devatā - savitā
āyā̍tu de̱va-ssa̍vi̱to pa̍yātu । hi̱ra̱ṇyaye̍na su̱vṛtā̱ rathe̍na ।
vaha̱na̱, hastag̍ṃ su̱bhaga̍ṃ-vim̐dma̱nāpa̍sam । pra̱yaccha̍ṃta̱ṃ papu̍ri̱ṃ puṇya̱maccha̍ ।
hasta̱ḥ praya̍ccha tva̱mṛta̱ṃ-vam̐sī̍yaḥ । dakṣi̍ṇena̱ prati̍gṛbhṇīma enat ।
dā̱tāra̍-ma̱dya sa̍vi̱tā vi̍deya । yo no̱ hastā̍ya prasu̱vāti̍ ya̱jñam ॥ 11
nakṣatraṃ - citrā, devatā - tvaṣṭā
tvaṣṭā̱ nakṣa̍tra-ma̱bhye̍ti ci̱trām । su̱bhagṃ sa̍saṃyum̐va̱tigṃ roca̍mānām ।
ni̱ve̱śaya̍-nna̱mṛtā̱-nmartyāgg̍śca । rū̱pāṇi̍ pi̱g̱ṃśan bhuva̍nāni̱ viśvā̎ ।
tanna̱stvaṣṭā̱ tadu̍ ci̱trā vica̍ṣṭām । tannakṣa̍traṃ bhūri̱dā a̍stu̱ mahya̎m ।
tanna̍ḥ pra̱jāṃ-vī̱m̐rava̍tīgṃ sanotu । gobhi̍rno̱ aśvai̱-ssama̍naktu ya̱jñam ॥ 12
nakṣatraṃ - svātī, devatā - vāyuḥ
vā̱yu-rnakṣa̍tra-ma̱bhye̍ti̱ niṣṭyā̎m । ti̱gmaśṛ̍ṃgo vṛṣa̱bho roru̍vāṇaḥ ।
sa̱mī̱raya̱n bhuva̍nā māta̱riśvā̎ । apa̱ dveṣāg̍ṃsi nudatā̱marā̍tīḥ ।
tanno̍ vā̱yastadu̱ niṣṭyā̍ śṛṇotu । tannakṣa̍traṃ bhūri̱dā a̍stu̱ mahya̎m ।
tanno̍ de̱vāso̱ anu̍ jānaṃtu̱ kāma̎m । yathā̱ tare̍ma duri̱tāni̱ viśvā̎ ॥ 13
nakṣatraṃ - viśākhā, devatā - iṃdrāgnī
dū̱rama̱smacchatra̍vo yaṃtu bhī̱tāḥ । tadi̍ṃdrā̱gnī kṛ̍ṇutā̱ṃ tadviśā̍khe ।
tanno̍ de̱vā anu̍madaṃtu ya̱jñam । pa̱ścāt pu̱rastā̱-dabha̍yanno astu ।
nakṣa̍trāṇā̱-madhi̍patnī̱ viśā̍khe । śreṣṭhā̍-viṃdrā̱gnī bhuva̍nasya go̱pau ।
viṣū̍ca̱-śśatrū̍napa̱bādha̍mānau । apa̱kṣudha̍-nnudatā̱marā̍tim ॥ 14
paurṇamāsi
pū̱rṇā pa̱ścādu̱ta pū̱rṇā pu̱rastā̎t । unma̍dhya̱taḥ pau̎rṇamā̱sī ji̍gāya ।
tasyā̎ṃ de̱vā adhi̍ sa̱ṃ-vam̐sa̍ṃtaḥ । u̱tta̱me nāka̍ i̱ha mā̍dayaṃtām ।
pṛ̱thvī su̱varcā̍ yuva̱ti-ssa̱joṣā̎ḥ । pau̱rṇa̱mā̱syuda̍gā̱-cchobha̍mānā ।
ā̱pyā̱yaya̍ṃtī duri̱tāni̱ viśvā̎ । u̱ruṃ duhā̱ṃ-yam̐ja̍mānāya ya̱jñam ॥ 15
nakṣatraṃ - anūrādhā, devatā - mitraḥ
ṛ̱ddhyāsma̍ ha̱vyai-rnama̍sopa̱-sadya̍ । mi̱traṃ de̱vaṃ mi̍tra̱dheya̍nno astu ।
a̱nū̱rā̱dhān, ha̱viṣā̍ va̱rdhaya̍ṃtaḥ । śa̱taṃ jī̍vema śa̱rada̱-ssavī̍rāḥ ।
ci̱traṃ-nakṣa̍tra̱-muda̍gā-tpu̱rastā̎t । a̱nū̱rā̱dhā sa̱ iti̱ yadvada̍ṃti ।
tanmi̱tra e̍ti pa̱thibhi̍-rdeva̱yānai̎ḥ । hi̱ra̱ṇyayai̱-rvita̍tai-ra̱ṃtari̍kṣe ॥ 16
nakṣatraṃ - jyeṣṭhā, devatā - iṃdraḥ
iṃdro̎ jye̱ṣṭhā manu̱ nakṣa̍trameti । yasmi̍n vṛ̱traṃ-vṛ̍m̐tra̱ tūrye̍ ta̱tāra̍ ।
tasmi̍nva̱ya-ma̱mṛta̱ṃ duhā̍nāḥ । kṣudha̍ṃtarema̱ duri̍ti̱ṃ duri̍ṣṭim ।
pu̱ra̱ṃda̱rāya̍ vṛṣa̱bhāya̍ dhṛ̱ṣṇave̎ । aṣā̍ḍhāya̱ saha̍mānāya mī̱ḍhuṣe̎ ।
iṃdrā̍ya jye̱ṣṭhā madhu̍ma̱dduhā̍nā । u̱ruṃ kṛ̍ṇotu̱ yaja̍mānāya lo̱kam ॥ 17
nakṣatraṃ - mūlaṃ, devatā - prajāpatiḥ
mūla̍ṃ pra̱jāṃ-vī̱m̐rava̍tīṃ-vim̐deya । parā̎cyetu̱ nirṛ̍tiḥ parā̱cā ।
gobhi̱-rnakṣa̍traṃ pa̱śubhi̱-ssama̍ktam । aha̍-rbhūyā̱-dyaja̍mānāya̱ mahya̎m ।
aha̍rno a̱dya su̍vi̱te da̍dhātu । mūla̱ṃ nakṣa̍tra̱miti̱ yadvada̍ṃti ।
parā̍cīṃ-vā̱m̐cā nirṛ̍tiṃ nudāmi । śi̱vaṃ pra̱jāyai̍ śi̱vama̍stu̱ mahya̎m ॥ 18
nakṣatraṃ - pūrvāṣāḍhā, devatā - āpaḥ
yā di̱vyā āpa̱ḥ paya̍sā saṃbabhū̱vuḥ । yā a̱ṃtari̍kṣa u̱ta pārthi̍vī̱ryāḥ ।
yāsā̍maṣā̱ḍhā a̍nu̱yaṃti̱ kāma̎m । tā na̱ āpa̱ḥ śagg syo̱nā bha̍vaṃtu ।
yāśca̱ kūpyā̱ yāśca̍ nā̱dyā̎-ssamu̱driyā̎ḥ । yāśca̍ vaiśa̱ṃtīru̱ta prā̍sa̱cīryāḥ ।
yāsā̍maṣā̱ḍhā madhu̍ bha̱kṣaya̍ṃti । tā na̱ āpa̱ḥ śagg syo̱nā bha̍vaṃtu ॥ 19
nakṣatraṃ - uttarāṣāḍhā, devatā - viśvedevaḥ
tanno̱ viśve̱ upa̍ śṛṇvaṃtu de̱vāḥ । tada̍ṣā̱ḍhā a̱bhisaṃyam̐̍ṃtu ya̱jñam ।
tannakṣa̍traṃ prathatāṃ pa̱śubhya̍ḥ । kṛ̱ṣi-rvṛ̱ṣṭi-ryaja̍mānāya kalpatām ।
śu̱bhrāḥ ka̱nyā̍ yuva̱taya̍-ssu̱peśa̍saḥ । ka̱rma̱kṛta̍-ssu̱kṛto̍ vī̱ryā̍vatīḥ ।
viśvā̎n de̱vān, ha̱viṣā̍ va̱rdhaya̍ṃtīḥ ।
a̱ṣā̱ḍhāḥ kāma̱ mupa̍yāṃtu ya̱jñam ॥ 20
nakṣatraṃ - abhijit, devatā - brahmā
yasmi̱n brahmā̱bhyaja̍ya̱th sarva̍me̱tat । a̱muṃca̍ lo̱ka mi̱damū̍ca̱ sarva̎m ।
tanno̱ nakṣa̍tra-mabhi̱ji-dvi̱jitya̍ । śriya̍ṃ dadhā̱tva-hṛ̍ṇīyamānam ।
u̱bhau lo̱kau brahma̍ṇā̱ saṃji̍te̱mau । tanno̱ nakṣa̍tra-mabhi̱ji-dvica̍ṣṭām ।
tasmi̍n va̱yaṃ pṛta̍nā̱ ssaṃja̍yema । tanno̍ de̱vāso̱ anu̍jānaṃtu̱ kāma̎m ॥ 21
nakṣatraṃ - śravaṇaṃ, devatā - viṣṇuḥ
śṛ̱ṇvaṃti̍ śro̱ṇā-ma̱mṛta̍sya go̱pām । puṇyā̍masyā̱ upa̍śṛṇomi̱ vāca̎m ।
ma̱hīṃ de̱vīṃ-vim̐ṣṇu̍patnī majū̱ryām । pra̱tīcī̍ menāgṃ ha̱viṣā̍ yajāmaḥ ।
tre̱dhā viṣṇu̍-rurugā̱yo vica̍krame । ma̱hīṃ diva̍ṃ pṛthi̱vī-ma̱ṃtari̍kṣam ।
tacchro̱ṇaiti̱ śrava̍-i̱cchamā̍nā । puṇya̱gg̱ śloka̱ṃ-yam̐ja̍mānāya kṛṇva̱tī ॥ 22
nakṣatraṃ - śraviṣṭā, devatā - vasavaḥ
a̱ṣṭau de̱vā vasa̍vasso̱myāsa̍ḥ । cata̍sro de̱vī ra̱jarā̱ḥ śravi̍ṣṭhāḥ ।
te ya̱jñaṃ pā̎ṃtu̱ raja̍saḥ pa̱rastā̎t । sa̱ṃva̱m̐thsa̱rīṇa̍-ma̱mṛtagg̍ sva̱sti ।
ya̱jñaṃ na̍ḥ pāṃtu̱ vasa̍vaḥ pu̱rastā̎t । da̱kṣi̱ṇa̱to̍-'bhiya̍ṃtu̱ śravi̍ṣṭhāḥ ।
puṇya̱nnakṣa̍trama̱bhi saṃvi̍m̐śāma । mā no̱ arā̍ti-ra̱ghaśa̱g̱ṃ sāgann̍ ॥ 23
nakṣatraṃ - śatabhiṣak, devatā - varuṇaḥ
kṣa̱trasya̱ rājā̱ varu̍ṇo'dhirā̱jaḥ । nakṣa̍trāṇāgṃ śa̱tabhi̍ṣa̱g vasi̍ṣṭhaḥ ।
tau de̱vebhya̍ḥ kṛṇuto dī̱rghamāya̍ḥ । śa̱tagṃ sa̱hasrā̍ bheṣa̱jāni̍ dhattaḥ ।
ya̱jñanno̱ rājā̱ varu̍ṇa̱ upa̍yātu । tanno̱ viśve̍ a̱bhisaṃyam̐̍ṃtu de̱vāḥ ।
tanno̱ nakṣa̍tragṃ śa̱tabhi̍ṣag juṣā̱ṇam । dī̱rghamāyu̱ḥ prati̍ra-dbheṣa̱jāni̍ ॥ 24
nakṣatraṃ - pūrvaproṣṭhapadā, devatā - ajayekapādaḥ
a̱ja eka̍pā̱- duda̍gāt pu̱rastā̎t । viśvā̍ bhū̱tāni̍ prati̱ moda̍mānaḥ ।
tasya̍ de̱vāḥ pra̍sa̱vaṃ-yam̐̍ṃti̱ sarve̎ । pro̱ṣṭha̱pa̱dāso̍ a̱mṛta̍sya go̱pāḥ ।
vi̱bhrāja̍māna-ssamidhā̱na u̱graḥ । ā'ṃtari̍kṣa-maruha̱da-dga̱ṃdyām ।
tagṃ sūrya̍ṃ de̱va-ma̱jameka̍pādam । pro̱ṣṭha̱pa̱dāso̱ anu̍yaṃti̱ sarve̎ ॥ 25
nakṣatraṃ - uttaraproṣṭhapadā, devatā - ahirbuddhniyaḥ
ahi̍-rbu̱ddhniya̱ḥ pratha̍māna eti । śreṣṭho̍ de̱vānā̍mu̱ta mānu̍ṣāṇām ।
taṃ brā̎hma̱ṇā-sso̍ma̱pā-sso̱myāsa̍ḥ । pro̱ṣṭha̱pa̱dāso̍ a̱bhira̍kṣaṃti̱ sarve̎ ।
ca̱tvāra̱ eka̍ma̱bhi karma̍ de̱vāḥ । pro̱ṣṭha̱pa̱dāsa̱ iti̱ yān, vada̍ṃti ।
te bu̱ddhaniya̍ṃ pari̱ṣadyagg̍ stu̱vaṃta̍ḥ । ahig̍ṃ rakṣaṃti̱ nama̍sopa̱ sadya̍ ॥ 26
nakṣatraṃ - revatī, devatā - pūṣā
pū̱ṣā re̱vatyanve̍ti̱ paṃthā̎m । pu̱ṣṭi̱patī̍ paśu̱pā vāja̍bastyau ।
i̱māni̍ ha̱vyā praya̍tā juṣā̱ṇā । su̱gairno̱ yānai̱rupa̍yātāṃ-ya̱m̐jñam ।
kṣu̱drān pa̱śūn ra̍kṣatu re̱vatī̍ naḥ । gāvo̍ no̱ aśvā̱g̱ṃ anve̍tu pū̱ṣā ।
anna̱g̱ṃ rakṣa̍ṃtau bahu̱dhā virū̍pam । vājag̍ṃ sanutā̱ṃ-yam̐ja̍mānāya ya̱jñam ॥ 27
nakṣatraṃ - aśvinī, devatā - aśvinī deva
tada̱śvinā̍-vaśva̱yujo-pa̍yātām । śubha̱ṃgami̍ṣṭhau su̱yame̍bhi̱raśvai̎ḥ ।
svannakṣa̍tragṃ ha̱viṣā̱ yaja̍ṃtau । maddhvā̱-saṃpṛ̍ktau̱ yaju̍ṣā̱ sama̍ktau ।
yau de̱vānā̎ṃ bhi̱ṣajau̍ havyavā̱hau । viśva̍sya dū̱tā-va̱mṛta̍sya go̱pau ।
tau nakṣa̍traṃ-jujuṣā̱ṇo-pa̍yātām । namo̱'śvibhyā̎ṃ kṛṇumo-'śva̱gyubhyā̎m ॥ 28
nakṣatraṃ - apabharaṇī, devatā - yamaḥ
apa̍ pā̱pmāna̱ṃ bhara̍ṇī-rbharaṃtu । tadya̱mo rājā̱ bhaga̍vā̱ṉ, vica̍ṣṭām ।
lo̱kasya̱ rājā̍ maha̱to ma̱hān, hi । su̱ganna̱ḥ paṃthā̱mabha̍yaṃ kṛṇotu ।
yasmi̱-nnakṣa̍tre ya̱ma eti̱ rājā̎ । yasmi̍nnena-ma̱bhyaṣi̍ṃcaṃta de̱vāḥ ।
tada̍sya ci̱tragṃ ha̱viṣā̍ yajāma । apa̍ pā̱pmāna̱ṃ bhara̍ṇī-rbharaṃtu ॥ 29
amāvāsi
ni̱veśa̍nī sa̱ṃgama̍nī̱ vasū̍nā̱ṃ-vim̐śvā̍ rū̱pāṇi̱ vasū̎nyā-ve̱śaya̍ṃtī ।
sa̱ha̱sra̱-po̱ṣagṃ su̱bhagā̱ rarā̍ṇā̱ sā na̱ āga̱n varca̍sā saṃvim̐dā̱nā ।
yatte̍ de̱vā ada̍dhu-rbhāga̱dheya̱-mamā̍vāsye sa̱ṃvam̐sa̍ṃto mahi̱tvā ।
sā no̍ ya̱jñaṃ pi̍pṛhi viśvavāre ra̱yinno̍ dhehi subhage su̱vīra̎m ॥ 30
oṃ śāṃti̱ḥ śāṃti̱ḥ śāṃti̍ḥ ॥
Recite with devotion and pure heart
Regular practice brings spiritual benefits