Haindavam

📍

Font Size:

Trisuparna Suktam

oṃ brahma̍metu̱ mām । madhu̍metu̱ mām । brahma̍me̱va madhu̍metu̱ mām । yāste̍ soma pra̱jā va̱thso'bhi̱ so a̱ham । duṣṣva̍pna̱haṃdu̍ruṣva̱ha । yāste̍ soma prā̱ṇāgṃstāṃju̍homi । trisu̍parṇa̱mayā̍citaṃ brāhma̱ṇāya̍ dadyāt । bra̱hma̱ha̱tyāṃ-vām̐ e̱te ghna̍ṃti । ye brā̎hma̱ṇāstrisu̍parṇa̱ṃ paṭha̍ṃti । te soma̱ṃ prāpnu̍vaṃti । ā̱sa̱ha̱srātpa̱ṃktiṃ puna̍ṃti । om ॥ 1 brahma̍ me̱dhayā̎ । madhu̍ me̱dhayā̎ । brahma̍me̱va madhu̍ me̱dhayā̎ । a̱dyā no̍ deva savitaḥ pra̱jāva̍tsāvī̱ssaubha̍gam । parā̍ du̱ṣvapni̍yagṃ suva । viśvā̍ni deva savitarduri̱tāni̱ parā̍suva । yadbha̱draṃ tanma̱ āsu̍va । madhu̱ vātā̍ ṛtāya̱te madhu̍ kṣaraṃti̱ siṃdha̍vaḥ । mādhvī̎rnassa̱ṃtvoṣa̍dhīḥ । madhu̱ nakta̍mu̱toṣasi̱ madhu̍ma̱tpārthi̍va̱g̱ṃ raja̍ḥ । madhu̱ dyaura̍stu naḥ pi̱tā । madhu̍ mānno̱ vana̱spati̱rmadhu̍māgṃ astu̱ sūrya̍ḥ । mādhvī̱rgāvo̍ bhavaṃtu naḥ । ya i̱maṃ trisu̍parṇa̱mayā̍citaṃ brāhma̱ṇāya̍ dadyāt । bhrū̱ṇa̱ha̱tyāṃ-vām̐ e̱te ghna̍ṃti । ye brā̎hma̱ṇāstrisu̍parṇa̱ṃ paṭha̍ṃti । te soma̱ṃ prāpnu̍vaṃti । ā̱sa̱ha̱srātpa̱ṃktiṃ puna̍ṃti । om ॥ 2 brahma̍ me̱dhavā̎ । madhu̍ me̱dhavā̎ । brahma̍me̱va madhu̍ me̱dhavā̎ । bra̱hmā de̱vānā̎ṃ pada̱vīḥ ka̍vī̱nāmṛṣi̱rviprā̍ṇāṃ mahi̱ṣo mṛ̱gāṇā̎m । śye̱no gṛddhrā̍ṇā̱g̱ṃ svadhi̍ti̱rvanā̍nā̱g̱ṃ soma̍ḥ pa̱vitra̱matye̍ti̱ rebhann̍ । ha̱g̱ṃsaśśu̍ci̱ṣadvasu̍raṃtarikṣa̱saddhotā̍ vedi̱ṣadati̍thirduroṇa̱sat । nṛ̱ṣadva̍ra̱sadṛ̍ta̱sadvyo̍ma̱sada̱bjā go̱jā ṛ̍ta̱jā a̍dri̱jā ṛ̱taṃ bṛ̱hat । ṛ̱ce tvā̍ ru̱ce tvā̱ samitsra̍vaṃti sa̱rito̱ na dhenā̎ḥ । a̱ṃtarhṛ̱dā mana̍sā pū̱yamā̍nāḥ । ghṛ̱tasya̱ dhārā̍ a̱bhicā̍kaśīmi । hi̱ra̱ṇyayo̍ veta̱so maddhya̍ āsām । tasmi̎ṃthsupa̱rṇo ma̍dhu̱kṛt ku̍lā̱yī bhaja̍nnāste̱ madhu̍ de̱vatā̎bhyaḥ । tasyā̍sate̱ hara̍yassa̱pta tīre̎ sva̱dhāṃ duhā̍nā a̱mṛta̍sya̱ dhārā̎m । ya i̱daṃ trisu̍parṇa̱mayā̍citaṃ brāhma̱ṇāya̍ dadyāt । vī̱ra̱ha̱tyāṃ-vām̐ e̱te ghnaṃti । ye brā̎hma̱ṇāstrisu̍parṇa̱ṃ paṭha̍ṃti । te soma̱ṃ prāpnu̍vaṃti । ā̱sa̱ha̱srātpa̱ṃktiṃ puna̍ṃti । om ॥ 3 oṃ śāṃti̱ḥ śāṃti̱ḥ śāṃti̍ḥ ॥