ആ ഗാവോ॑ അഗ്മന്നു॒ത ഭ॒ദ്രമ॑ക്രം॒ത്സീദം॑തു ഗോ॒ഷ്ഠേ ര॒ണയം॑ത്വ॒സ്മേ । പ്ര॒ജാവ॑തീഃ പുരു॒രുപാ॑ ഇ॒ഹ സ്യു॒രിന്ദ്രാ॑യ പൂ॒ർവീരു॒ഷസോ॒ ദുഹാ॑നാഃ ॥ 1 ഇന്ദ്രോ॒ യജ്വ॑നേ പൃണ॒തേ ച॑ ശിക്ഷ॒ത്യുപേദ്ദ॑ദാതി॒ ന സ്വം മാ॑ഷുയതി । ഭൂയോ॑ഭൂയോ ര॒യിമിദ॑സ്യ വ॒ർധയ॒ന്നഭി॑ന്നേ ഖി॒ല്യേ നി ദ॑ധാതി ദേവ॒യും ॥ 2 ന താ ന॑ശന്തി॒ ന ദ॑ഭാതി॒ തസ്ക॑രോ॒ നാസാ॑മാമി॒ത്രോ വ്യഥി॒രാ ദ॑ധർ​ഷതി । ദേ॒വാംശ്ച॒ യാഭി॒ര്യജ॑തേ॒ ദദാ॑തി ച॒ ജ്യോഗിത്താഭിഃ॑ സചതേ॒ ഗോപ॑തിഃ സ॒ഹ ॥ 3 ന താ അർവാ॑ രേ॒ണുക॑കാടോ അശ്നുതേ॒ ന സം॑സ്കൃത॒ത്രമുപ॑ യന്തി॒ താ അ॒ഭി । ഉ॒രു॒ഗാ॒യമഭ॑യം॒ തസ്യ॒ താ അനു॒ ഗാവോ॒ മർത॑സ്യ॒ വി ച॑രന്തി॒ യജ്വ॑നഃ ॥ 4 ഗാവോ॒ ഭഗോ॒ ഗാവ॒ ഇന്ദ്രോ॑ മ അച്ഛാ॒ൻ ഗാവഃ॒ സോമ॑സ്യ പ്രഥ॒മസ്യ॑ ഭ॒ക്ഷഃ । ഇ॒മാ യാ ഗാവഃ॒ സ ജ॑നാസ॒ ഇന്ദ്ര॑ ഇ॒ച്ഛാമീദ്ധൃ॒ദാ മന॑സാ ചി॒ദിന്ദ്രം॑ ॥ 5 യൂ॒യം ഗാ॑വോ മേദയഥാ കൃ॒ശം ചി॑ദശ്രീ॒രം ചി॑ത്കൃണുഥാ സു॒പ്രതീ॑കം । ഭ॒ദ്രം ഗൃ॒ഹം കൃ॑ണുഥ ഭദ്രവാചോ ബൃ॒ഹദ്വോ॒ വയ॑ ഉച്യതേ സ॒ഭാസു॑ ॥ 6 പ്ര॒ജാവ॑തീഃ സൂ॒യവ॑സം രി॒ശന്തീഃ॑ ശു॒ദ്ധാ അ॒പഃ സു॑പ്രപാ॒ണേ പിബം॑തീഃ । മാ വഃ॑ സ്തേ॒ന ഈ॑ശത॒ മാഘശം॑സഃ॒ പരി॑ വോ ഹേ॒തി രു॒ദ്രസ്യ॑ വൃജ്യാഃ ॥ 7 ഉപേ॒ദമു॑പ॒പർച॑നമാ॒സു ഗോഷൂപ॑ പൃച്യതാം । ഉപ॑ ഋഷ॒ഭസ്യ॒ രേത॒സ്യുപേം॑ദ്ര॒ തവ॑ വീ॒ര്യേ॑ ॥ 8 ഓം ശാന്തിഃ॒ ശാന്തിഃ॒ ശാന്തിഃ॑ ॥