oṃ śuklāṃbaradharaṃ viṣṇuṃ śaśivarṇaṃ caturbhujam । prasannavadanaṃ dhyāyet sarvavighnopaśāṃtaye ॥ 1 ॥ yasyadviradavaktrādyāḥ pāriṣadyāḥ paraḥ śatam । vighnaṃ nighnaṃti satataṃ viṣvaksenaṃ tamāśraye ॥ 2 ॥ pūrva pīṭhikā ॥ vyāsaṃ vasiṣṭha naptāraṃ śakteḥ pautramakalmaṣam । parāśarātmajaṃ vaṃde śukatātaṃ taponidhim ॥ 3 ॥ vyāsāya viṣṇu rūpāya vyāsarūpāya viṣṇave । namo vai brahmanidhaye vāsiṣṭhāya namo namaḥ ॥ 4 ॥ avikārāya śuddhāya nityāya paramātmane । sadaika rūpa rūpāya viṣṇave sarvajiṣṇave ॥ 5 ॥ yasya smaraṇamātreṇa janmasaṃsārabaṃdhanāt । vimucyate namastasmai viṣṇave prabhaviṣṇave ॥ 6 ॥ oṃ namo viṣṇave prabhaviṣṇave । śrī vaiśaṃpāyana uvāca – śrutvā dharmā naśeṣeṇa pāvanāni ca sarvaśaḥ । yudhiṣṭhiraḥ śāṃtanavaṃ punarevābhya bhāṣata ॥ 7 ॥ yudhiṣṭhira uvāca – kimekaṃ daivataṃ loke kiṃ vā'pyekaṃ parāyaṇaṃ stuvaṃtaḥ kaṃ kamarcaṃtaḥ prāpnuyurmānavāḥ śubham ॥ 8 ॥ ko dharmaḥ sarvadharmāṇāṃ bhavataḥ paramo mataḥ । kiṃ japanmucyate jaṃturjanmasaṃsāra baṃdhanāt ॥ 9 ॥ śrī bhīṣma uvāca – jagatprabhuṃ devadeva manaṃtaṃ puruṣottamam । stuvannāma sahasreṇa puruṣaḥ satatotthitaḥ ॥ 10 ॥ tameva cārcayannityaṃ bhaktyā puruṣamavyayam । dhyāyan stuvannamasyaṃśca yajamānastameva ca ॥ 11 ॥ anādi nidhanaṃ viṣṇuṃ sarvaloka maheśvaram । lokādhyakṣaṃ stuvannityaṃ sarva duḥkhātigo bhavet ॥ 12 ॥ brahmaṇyaṃ sarva dharmajñaṃ lokānāṃ kīrti vardhanam । lokanāthaṃ mahadbhūtaṃ sarvabhūta bhavodbhavam॥ 13 ॥ eṣa me sarva dharmāṇāṃ dharmo'dhika tamomataḥ । yadbhaktyā puṃḍarīkākṣaṃ stavairarcennaraḥ sadā ॥ 14 ॥ paramaṃ yo mahattejaḥ paramaṃ yo mahattapaḥ । paramaṃ yo mahadbrahma paramaṃ yaḥ parāyaṇam । 15 ॥ pavitrāṇāṃ pavitraṃ yo maṃgalānāṃ ca maṃgalam । daivataṃ devatānāṃ ca bhūtānāṃ yo'vyayaḥ pitā ॥ 16 ॥ yataḥ sarvāṇi bhūtāni bhavaṃtyādi yugāgame । yasmiṃśca pralayaṃ yāṃti punareva yugakṣaye ॥ 17 ॥ tasya loka pradhānasya jagannāthasya bhūpate । viṣṇornāma sahasraṃ me śruṇu pāpa bhayāpaham ॥ 18 ॥ yāni nāmāni gauṇāni vikhyātāni mahātmanaḥ । ṛṣibhiḥ parigītāni tāni vakṣyāmi bhūtaye ॥ 19 ॥ ṛṣirnāmnāṃ sahasrasya vedavyāso mahāmuniḥ ॥ chaṃdo'nuṣṭup tathā devo bhagavān devakīsutaḥ ॥ 20 ॥ amṛtāṃ śūdbhavo bījaṃ śaktirdevakinaṃdanaḥ । trisāmā hṛdayaṃ tasya śāṃtyarthe viniyujyate ॥ 21 ॥ viṣṇuṃ jiṣṇuṃ mahāviṣṇuṃ prabhaviṣṇuṃ maheśvaram ॥ anekarūpa daityāṃtaṃ namāmi puruṣottamam ॥ 22 ॥ pūrvanyāsaḥ – asya śrī viṣṇordivya sahasranāma stotra mahāmaṃtrasya ॥ śrī vedavyāso bhagavān ṛṣiḥ । anuṣṭup chaṃdaḥ । śrīmahāviṣṇuḥ paramātmā śrīmannārāyaṇo devatā । amṛtāṃśūdbhavo bhānuriti bījam । devakīnaṃdanaḥ sraṣṭeti śaktiḥ । udbhavaḥ, kṣobhaṇo deva iti paramomaṃtraḥ । śaṃkhabhṛnnaṃdakī cakrīti kīlakam । śār​ṅgadhanvā gadādhara ityastram । rathāṃgapāṇi rakṣobhya iti netram । trisāmāsāmagaḥ sāmeti kavacam । ānaṃdaṃ parabrahmeti yoniḥ । ṛtussudarśanaḥ kāla iti digbaṃdhaḥ ॥ śrīviśvarūpa iti dhyānam । śrī mahāviṣṇu prītyarthe sahasranāma jape pārāyaṇe viniyogaḥ । karanyāsaḥ – viśvaṃ viṣṇurvaṣaṭkāra ityaṃguṣṭhābhyāṃ namaḥ amṛtāṃ śūdbhavo bhānuriti tarjanībhyāṃ namaḥ brahmaṇyo brahmakṛt brahmeti madhyamābhyāṃ namaḥ suvarṇabiṃdu rakṣobhya iti anāmikābhyāṃ namaḥ nimiṣo'nimiṣaḥ sragvīti kaniṣṭhikābhyāṃ namaḥ rathāṃgapāṇi rakṣobhya iti karatala karapṛṣṭhābhyāṃ namaḥ aṃganyāsaḥ – suvrataḥ sumukhaḥ sūkṣma iti jñānāya hṛdayāya namaḥ sahasramūrtiḥ viśvātmā iti aiśvaryāya śirase svāhā sahasrārciḥ saptajihva iti śaktyai śikhāyai vaṣaṭ trisāmā sāmagassāmeti balāya kavacāya huṃ rathāṃgapāṇi rakṣobhya iti netrābhyāṃ vauṣaṭ śāṃgadhanvā gadādhara iti vīryāya astrāyaphaṭ ṛtuḥ sudarśanaḥ kāla iti digbhaṃdhaḥ dhyānam – kṣīrodhanvatpradeśe śucimaṇi-vilasa-tsaikate-mauktikānāṃ mālā-kḷptāsanasthaḥ sphaṭika-maṇinibhai-rmauktikai-rmaṃḍitāṃgaḥ । śubhrai-rabhrai-radabhrai-rupariviracitai-rmukta pīyūṣa varṣaiḥ ānaṃdī naḥ punīyā-darinalinagadā śaṃkhapāṇi-rmukuṃdaḥ ॥ 1 ॥ bhūḥ pādau yasya nābhirviya-dasura nilaścaṃdra sūryau ca netre karṇāvāśāḥ śirodyaurmukhamapi dahano yasya vāsteyamabdhiḥ । aṃtaḥsthaṃ yasya viśvaṃ sura narakhagagobhogi gaṃdharvadaityaiḥ citraṃ raṃ ramyate taṃ tribhuvana vapuśaṃ viṣṇumīśaṃ namāmi ॥ 2 ॥ oṃ namo bhagavate vāsudevāya ! śāṃtākāraṃ bhujagaśayanaṃ padmanābhaṃ sureśaṃ viśvādhāraṃ gaganasadṛśaṃ meghavarṇaṃ śubhāṃgam । lakṣmīkāṃtaṃ kamalanayanaṃ yogihṛrdhyānagamyam vaṃde viṣṇuṃ bhavabhayaharaṃ sarvalokaikanātham ॥ 3 ॥ meghaśyāmaṃ pītakauśeyavāsaṃ śrīvatsākaṃ kaustubhodbhāsitāṃgam । puṇyopetaṃ puṃḍarīkāyatākṣaṃ viṣṇuṃ vaṃde sarvalokaikanātham ॥ 4 ॥ namaḥ samasta bhūtānāṃ ādi bhūtāya bhūbhṛte । anekarūpa rūpāya viṣṇave prabhaviṣṇave ॥ 5॥ saśaṃkhacakraṃ sakirīṭakuṃḍalaṃ sapītavastraṃ sarasīruhekṣaṇam । sahāra vakṣaḥsthala śobhi kaustubhaṃ namāmi viṣṇuṃ śirasā caturbhujam । 6॥ chāyāyāṃ pārijātasya hemasiṃhāsanopari āsīnamaṃbudaśyāmamāyatākṣamalaṃkṛtam ॥ 7 ॥ caṃdrānanaṃ caturbāhuṃ śrīvatsāṃkita vakṣasam rukmiṇī satyabhāmābhyāṃ sahitaṃ kṛṣṇamāśraye ॥ 8 ॥ paṃcapūja – laṃ - pṛthivyātmane gaṃthaṃ samarpayāmi haṃ - ākāśātmane puṣpaiḥ pūjayāmi yaṃ - vāyvātmane dhūpamāghrāpayāmi raṃ - agnyātmane dīpaṃ darśayāmi vaṃ - amṛtātmane naivedyaṃ nivedayāmi saṃ - sarvātmane sarvopacāra pūjā namaskārān samarpayāmi stotram ॥ hariḥ om viśvaṃ viṣṇurvaṣaṭkāro bhūtabhavyabhavatprabhuḥ । bhūtakṛdbhūtabhṛdbhāvo bhūtātmā bhūtabhāvanaḥ ॥ 1 ॥ pūtātmā paramātmā ca muktānāṃ paramāgatiḥ । avyayaḥ puruṣaḥ sākṣī kṣetrajño'kṣara eva ca ॥ 2 ॥ yogo yogavidāṃ netā pradhāna puruṣeśvaraḥ । nārasiṃhavapuḥ śrīmān keśavaḥ puruṣottamaḥ ॥ 3 ॥ sarvaḥ śarvaḥ śivaḥ sthāṇurbhūtādirnidhiravyayaḥ । saṃbhavo bhāvano bhartā prabhavaḥ prabhurīśvaraḥ ॥ 4 ॥ svayaṃbhūḥ śaṃbhurādityaḥ puṣkarākṣo mahāsvanaḥ । anādinidhano dhātā vidhātā dhāturuttamaḥ ॥ 5 ॥ aprameyo hṛṣīkeśaḥ padmanābho'maraprabhuḥ । viśvakarmā manustvaṣṭā sthaviṣṭhaḥ sthaviro dhruvaḥ ॥ 6 ॥ agrāhyaḥ śāśvato kṛṣṇo lohitākṣaḥ pratardanaḥ । prabhūtastrikakubdhāma pavitraṃ maṃgalaṃ param ॥ 7 ॥ īśānaḥ prāṇadaḥ prāṇo jyeṣṭhaḥ śreṣṭhaḥ prajāpatiḥ । hiraṇyagarbho bhūgarbho mādhavo madhusūdanaḥ ॥ 8 ॥ īśvaro vikramīdhanvī medhāvī vikramaḥ kramaḥ । anuttamo durādharṣaḥ kṛtajñaḥ kṛtirātmavān॥ 9 ॥ sureśaḥ śaraṇaṃ śarma viśvaretāḥ prajābhavaḥ । ahassaṃvatsaro vyālaḥ pratyayaḥ sarvadarśanaḥ ॥ 10 ॥ ajassarveśvaraḥ siddhaḥ siddhiḥ sarvādiracyutaḥ । vṛṣākapirameyātmā sarvayogavinissṛtaḥ ॥ 11 ॥ vasurvasumanāḥ satyaḥ samātmā sammitassamaḥ । amoghaḥ puṃḍarīkākṣo vṛṣakarmā vṛṣākṛtiḥ ॥ 12 ॥ rudro bahuśirā babhrurviśvayoniḥ śuciśravāḥ । amṛtaḥ śāśvatasthāṇurvarāroho mahātapāḥ ॥ 13 ॥ sarvagaḥ sarva vidbhānurviṣvakseno janārdanaḥ । vedo vedavidavyaṃgo vedāṃgo vedavitkaviḥ ॥ 14 ॥ lokādhyakṣaḥ surādhyakṣo dharmādhyakṣaḥ kṛtākṛtaḥ । caturātmā caturvyūhaścaturdaṃṣṭraścaturbhujaḥ ॥ 15 ॥ bhrājiṣṇurbhojanaṃ bhoktā sahiṣṇurjagadādijaḥ । anagho vijayo jetā viśvayoniḥ punarvasuḥ ॥ 16 ॥ upeṃdro vāmanaḥ prāṃśuramoghaḥ śucirūrjitaḥ । atīṃdraḥ saṃgrahaḥ sargo dhṛtātmā niyamo yamaḥ ॥ 17 ॥ vedyo vaidyaḥ sadāyogī vīrahā mādhavo madhuḥ । atīṃdriyo mahāmāyo mahotsāho mahābalaḥ ॥ 18 ॥ mahābuddhirmahāvīryo mahāśaktirmahādyutiḥ । anirdeśyavapuḥ śrīmānameyātmā mahādridhṛk ॥ 19 ॥ maheśvāso mahībhartā śrīnivāsaḥ satāṃgatiḥ । aniruddhaḥ surānaṃdo goviṃdo govidāṃ patiḥ ॥ 20 ॥ marīcirdamano haṃsaḥ suparṇo bhujagottamaḥ । hiraṇyanābhaḥ sutapāḥ padmanābhaḥ prajāpatiḥ ॥ 21 ॥ amṛtyuḥ sarvadṛk siṃhaḥ saṃdhātā saṃdhimān sthiraḥ । ajo durmarṣaṇaḥ śāstā viśrutātmā surārihā ॥ 22 ॥ gururgurutamo dhāma satyaḥ satyaparākramaḥ । nimiṣo'nimiṣaḥ sragvī vācaspatirudāradhīḥ ॥ 23 ॥ agraṇīgrāmaṇīḥ śrīmān nyāyo netā samīraṇaḥ sahasramūrdhā viśvātmā sahasrākṣaḥ sahasrapāt ॥ 24 ॥ āvartano nivṛttātmā saṃvṛtaḥ saṃpramardanaḥ । ahaḥ saṃvartako vahniranilo dharaṇīdharaḥ ॥ 25 ॥ suprasādaḥ prasannātmā viśvadhṛgviśvabhugvibhuḥ । satkartā satkṛtaḥ sādhurjahnurnārāyaṇo naraḥ ॥ 26 ॥ asaṃkhyeyo'prameyātmā viśiṣṭaḥ śiṣṭakṛcchuciḥ । siddhārthaḥ siddhasaṃkalpaḥ siddhidaḥ siddhi sādhanaḥ ॥ 27 ॥ vṛṣāhī vṛṣabho viṣṇurvṛṣaparvā vṛṣodaraḥ । vardhano vardhamānaśca viviktaḥ śrutisāgaraḥ ॥ 28 ॥ subhujo durdharo vāgmī maheṃdro vasudo vasuḥ । naikarūpo bṛhadrūpaḥ śipiviṣṭaḥ prakāśanaḥ ॥ 29 ॥ ojastejodyutidharaḥ prakāśātmā pratāpanaḥ । ṛddaḥ spaṣṭākṣaro maṃtraścaṃdrāṃśurbhāskaradyutiḥ ॥ 30 ॥ amṛtāṃśūdbhavo bhānuḥ śaśabiṃduḥ sureśvaraḥ । auṣadhaṃ jagataḥ setuḥ satyadharmaparākramaḥ ॥ 31 ॥ bhūtabhavyabhavannāthaḥ pavanaḥ pāvano'nalaḥ । kāmahā kāmakṛtkāṃtaḥ kāmaḥ kāmapradaḥ prabhuḥ ॥ 32 ॥ yugādi kṛdyugāvarto naikamāyo mahāśanaḥ । adṛśyo vyaktarūpaśca sahasrajidanaṃtajit ॥ 33 ॥ iṣṭo'viśiṣṭaḥ śiṣṭeṣṭaḥ śikhaṃḍī nahuṣo vṛṣaḥ । krodhahā krodhakṛtkartā viśvabāhurmahīdharaḥ ॥ 34 ॥ acyutaḥ prathitaḥ prāṇaḥ prāṇado vāsavānujaḥ । apāṃnidhiradhiṣṭhānamapramattaḥ pratiṣṭhitaḥ ॥ 35 ॥ skaṃdaḥ skaṃdadharo dhuryo varado vāyuvāhanaḥ । vāsudevo bṛhadbhānurādidevaḥ puraṃdharaḥ ॥ 36 ॥ aśokastāraṇastāraḥ śūraḥ śaurirjaneśvaraḥ । anukūlaḥ śatāvartaḥ padmī padmanibhekṣaṇaḥ ॥ 37 ॥ padmanābho'raviṃdākṣaḥ padmagarbhaḥ śarīrabhṛt । mahardhirṛddho vṛddhātmā mahākṣo garuḍadhvajaḥ ॥ 38 ॥ atulaḥ śarabho bhīmaḥ samayajño havirhariḥ । sarvalakṣaṇalakṣaṇyo lakṣmīvān samitiṃjayaḥ ॥ 39 ॥ vikṣaro rohito mārgo heturdāmodaraḥ sahaḥ । mahīdharo mahābhāgo vegavānamitāśanaḥ ॥ 40 ॥ udbhavaḥ, kṣobhaṇo devaḥ śrīgarbhaḥ parameśvaraḥ । karaṇaṃ kāraṇaṃ kartā vikartā gahano guhaḥ ॥ 41 ॥ vyavasāyo vyavasthānaḥ saṃsthānaḥ sthānado dhruvaḥ । parardhiḥ paramaspaṣṭaḥ tuṣṭaḥ puṣṭaḥ śubhekṣaṇaḥ ॥ 42 ॥ rāmo virāmo virajo mārgoneyo nayo'nayaḥ । vīraḥ śaktimatāṃ śreṣṭho dharmodharma viduttamaḥ ॥ 43 ॥ vaikuṃṭhaḥ puruṣaḥ prāṇaḥ prāṇadaḥ praṇavaḥ pṛthuḥ । hiraṇyagarbhaḥ śatrughno vyāpto vāyuradhokṣajaḥ ॥ 44 ॥ ṛtuḥ sudarśanaḥ kālaḥ parameṣṭhī parigrahaḥ । ugraḥ saṃvatsaro dakṣo viśrāmo viśvadakṣiṇaḥ ॥ 45 ॥ vistāraḥ sthāvara sthāṇuḥ pramāṇaṃ bījamavyayam । artho'nartho mahākośo mahābhogo mahādhanaḥ ॥ 46 ॥ anirviṇṇaḥ sthaviṣṭho bhūrdharmayūpo mahāmakhaḥ । nakṣatranemirnakṣatrī kṣamaḥ, kṣāmaḥ samīhanaḥ ॥ 47 ॥ yajña ijyo mahejyaśca kratuḥ satraṃ satāṃgatiḥ । sarvadarśī vimuktātmā sarvajño jñānamuttamam ॥ 48 ॥ suvrataḥ sumukhaḥ sūkṣmaḥ sughoṣaḥ sukhadaḥ suhṛt । manoharo jitakrodho vīra bāhurvidāraṇaḥ ॥ 49 ॥ svāpanaḥ svavaśo vyāpī naikātmā naikakarmakṛt। । vatsaro vatsalo vatsī ratnagarbho dhaneśvaraḥ ॥ 50 ॥ dharmagubdharmakṛddharmī sadasatkṣaramakṣaram॥ avijñātā sahastrāṃśurvidhātā kṛtalakṣaṇaḥ ॥ 51 ॥ gabhastinemiḥ sattvasthaḥ siṃho bhūta maheśvaraḥ । ādidevo mahādevo deveśo devabhṛdguruḥ ॥ 52 ॥ uttaro gopatirgoptā jñānagamyaḥ purātanaḥ । śarīra bhūtabhṛd bhoktā kapīṃdro bhūridakṣiṇaḥ ॥ 53 ॥ somapo'mṛtapaḥ somaḥ purujit purusattamaḥ । vinayo jayaḥ satyasaṃdho dāśārhaḥ sātvatāṃ patiḥ ॥ 54 ॥ jīvo vinayitā sākṣī mukuṃdo'mita vikramaḥ । aṃbhonidhiranaṃtātmā mahodadhi śayoṃtakaḥ ॥ 55 ॥ ajo mahārhaḥ svābhāvyo jitāmitraḥ pramodanaḥ । ānaṃdo'naṃdanonaṃdaḥ satyadharmā trivikramaḥ ॥ 56 ॥ maharṣiḥ kapilācāryaḥ kṛtajño medinīpatiḥ । tripadastridaśādhyakṣo mahāśṛṃgaḥ kṛtāṃtakṛt ॥ 57 ॥ mahāvarāho goviṃdaḥ suṣeṇaḥ kanakāṃgadī । guhyo gabhīro gahano guptaścakra gadādharaḥ ॥ 58 ॥ vedhāḥ svāṃgo'jitaḥ kṛṣṇo dṛḍhaḥ saṃkarṣaṇo'cyutaḥ । varuṇo vāruṇo vṛkṣaḥ puṣkarākṣo mahāmanāḥ ॥ 59 ॥ bhagavān bhagahā''naṃdī vanamālī halāyudhaḥ । ādityo jyotirādityaḥ sahiṣṇurgatisattamaḥ ॥ 60 ॥ sudhanvā khaṃḍaparaśurdāruṇo draviṇapradaḥ । divaḥspṛk sarvadṛgvyāso vācaspatirayonijaḥ ॥ 61 ॥ trisāmā sāmagaḥ sāma nirvāṇaṃ bheṣajaṃ bhiṣak । sanyāsakṛcchamaḥ śāṃto niṣṭhā śāṃtiḥ parāyaṇam। 62 ॥ śubhāṃgaḥ śāṃtidaḥ sraṣṭā kumudaḥ kuvaleśayaḥ । gohito gopatirgoptā vṛṣabhākṣo vṛṣapriyaḥ ॥ 63 ॥ anivartī nivṛttātmā saṃkṣeptā kṣemakṛcchivaḥ । śrīvatsavakṣāḥ śrīvāsaḥ śrīpatiḥ śrīmatāṃvaraḥ ॥ 64 ॥ śrīdaḥ śrīśaḥ śrīnivāsaḥ śrīnidhiḥ śrīvibhāvanaḥ । śrīdharaḥ śrīkaraḥ śreyaḥ śrīmām̐llokatrayāśrayaḥ ॥ 65 ॥ svakṣaḥ svaṃgaḥ śatānaṃdo naṃdirjyotirgaṇeśvaraḥ । vijitātmā'vidheyātmā satkīrticchinnasaṃśayaḥ ॥ 66 ॥ udīrṇaḥ sarvataścakṣuranīśaḥ śāśvatasthiraḥ । bhūśayo bhūṣaṇo bhūtirviśokaḥ śokanāśanaḥ ॥ 67 ॥ arciṣmānarcitaḥ kuṃbho viśuddhātmā viśodhanaḥ । aniruddho'pratirathaḥ pradyumno'mitavikramaḥ ॥ 68 ॥ kālaneminihā vīraḥ śauriḥ śūrajaneśvaraḥ । trilokātmā trilokeśaḥ keśavaḥ keśihā hariḥ ॥ 69 ॥ kāmadevaḥ kāmapālaḥ kāmī kāṃtaḥ kṛtāgamaḥ । anirdeśyavapurviṣṇurvīro'naṃto dhanaṃjayaḥ ॥ 70 ॥ brahmaṇyo brahmakṛd brahmā brahma brahmavivardhanaḥ । brahmavid brāhmaṇo brahmī brahmajño brāhmaṇapriyaḥ ॥ 71 ॥ mahākramo mahākarmā mahātejā mahoragaḥ । mahākraturmahāyajvā mahāyajño mahāhaviḥ ॥ 72 ॥ stavyaḥ stavapriyaḥ stotraṃ stutiḥ stotā raṇapriyaḥ । pūrṇaḥ pūrayitā puṇyaḥ puṇyakīrtiranāmayaḥ ॥ 73 ॥ manojavastīrthakaro vasuretā vasupradaḥ । vasuprado vāsudevo vasurvasumanā haviḥ ॥ 74 ॥ sadgatiḥ satkṛtiḥ sattā sadbhūtiḥ satparāyaṇaḥ । śūraseno yaduśreṣṭhaḥ sannivāsaḥ suyāmunaḥ ॥ 75 ॥ bhūtāvāso vāsudevaḥ sarvāsunilayo'nalaḥ । darpahā darpado dṛpto durdharo'thāparājitaḥ ॥ 76 ॥ viśvamūrtirmahāmūrtirdīptamūrtiramūrtimān । anekamūrtiravyaktaḥ śatamūrtiḥ śatānanaḥ ॥ 77 ॥ eko naikaḥ stavaḥ kaḥ kiṃ yattat padamanuttamam । lokabaṃdhurlokanātho mādhavo bhaktavatsalaḥ ॥ 78 ॥ suvarṇavarṇo hemāṃgo varāṃgaścaṃdanāṃgadī । vīrahā viṣamaḥ śūnyo ghṛtāśīracalaścalaḥ ॥ 79 ॥ amānī mānado mānyo lokasvāmī trilokadhṛt । sumedhā medhajo dhanyaḥ satyamedhā dharādharaḥ ॥ 80 ॥ tejo'vṛṣo dyutidharaḥ sarvaśastrabhṛtāṃvaraḥ । pragraho nigraho vyagro naikaśṛṃgo gadāgrajaḥ ॥ 81 ॥ caturmūrti ścaturbāhu ścaturvyūha ścaturgatiḥ । caturātmā caturbhāvaścaturvedavidekapāt ॥ 82 ॥ samāvarto'nivṛttātmā durjayo duratikramaḥ । durlabho durgamo durgo durāvāso durārihā ॥ 83 ॥ śubhāṃgo lokasāraṃgaḥ sutaṃtustaṃtuvardhanaḥ । iṃdrakarmā mahākarmā kṛtakarmā kṛtāgamaḥ ॥ 84 ॥ udbhavaḥ suṃdaraḥ suṃdo ratnanābhaḥ sulocanaḥ । arko vājasanaḥ śṛṃgī jayaṃtaḥ sarvavijjayī ॥ 85 ॥ suvarṇabiṃdurakṣobhyaḥ sarvavāgīśvareśvaraḥ । mahāhṛdo mahāgarto mahābhūto mahānidhiḥ ॥ 86 ॥ kumudaḥ kuṃdaraḥ kuṃdaḥ parjanyaḥ pāvano'nilaḥ । amṛtāśo'mṛtavapuḥ sarvajñaḥ sarvatomukhaḥ ॥ 87 ॥ sulabhaḥ suvrataḥ siddhaḥ śatrujicchatrutāpanaḥ । nyagrodho'duṃbaro'śvatthaścāṇūrāṃdhra niṣūdanaḥ ॥ 88 ॥ sahasrārciḥ saptajihvaḥ saptaidhāḥ saptavāhanaḥ । amūrtiranagho'ciṃtyo bhayakṛdbhayanāśanaḥ ॥ 89 ॥ aṇurbṛhatkṛśaḥ sthūlo guṇabhṛnnirguṇo mahān । adhṛtaḥ svadhṛtaḥ svāsyaḥ prāgvaṃśo vaṃśavardhanaḥ ॥ 90 ॥ bhārabhṛt kathito yogī yogīśaḥ sarvakāmadaḥ । āśramaḥ śramaṇaḥ, kṣāmaḥ suparṇo vāyuvāhanaḥ ॥ 91 ॥ dhanurdharo dhanurvedo daṃḍo damayitā damaḥ । aparājitaḥ sarvasaho niyaṃtā'niyamo'yamaḥ ॥ 92 ॥ sattvavān sāttvikaḥ satyaḥ satyadharmaparāyaṇaḥ । abhiprāyaḥ priyārho'rhaḥ priyakṛt prītivardhanaḥ ॥ 93 ॥ vihāyasagatirjyotiḥ surucirhutabhugvibhuḥ । ravirvirocanaḥ sūryaḥ savitā ravilocanaḥ ॥ 94 ॥ anaṃto hutabhugbhoktā sukhado naikajo'grajaḥ । anirviṇṇaḥ sadāmarṣī lokadhiṣṭhānamadbhutaḥ ॥ 95 ॥ sanātsanātanatamaḥ kapilaḥ kapiravyayaḥ । svastidaḥ svastikṛtsvastiḥ svastibhuk svastidakṣiṇaḥ ॥ 96 ॥ araudraḥ kuṃḍalī cakrī vikramyūrjitaśāsanaḥ । śabdātigaḥ śabdasahaḥ śiśiraḥ śarvarīkaraḥ ॥ 97 ॥ akrūraḥ peśalo dakṣo dakṣiṇaḥ, kṣamiṇāṃvaraḥ । vidvattamo vītabhayaḥ puṇyaśravaṇakīrtanaḥ ॥ 98 ॥ uttāraṇo duṣkṛtihā puṇyo duḥsvapnanāśanaḥ । vīrahā rakṣaṇaḥ saṃto jīvanaḥ paryavasthitaḥ ॥ 99 ॥ anaṃtarūpo'naṃta śrīrjitamanyurbhayāpahaḥ । caturaśro gabhīrātmā vidiśo vyādiśo diśaḥ ॥ 100 ॥ anādirbhūrbhuvo lakṣmīḥ suvīro rucirāṃgadaḥ । janano janajanmādirbhīmo bhīmaparākramaḥ ॥ 101 ॥ ādhāranilayo'dhātā puṣpahāsaḥ prajāgaraḥ । ūrdhvagaḥ satpathācāraḥ prāṇadaḥ praṇavaḥ paṇaḥ ॥ 102 ॥ pramāṇaṃ prāṇanilayaḥ prāṇabhṛt prāṇajīvanaḥ । tattvaṃ tattvavidekātmā janmamṛtyujarātigaḥ ॥ 103 ॥ bhūrbhuvaḥ svastarustāraḥ savitā prapitāmahaḥ । yajño yajñapatiryajvā yajñāṃgo yajñavāhanaḥ ॥ 104 ॥ yajñabhṛd yajñakṛd yajñī yajñabhuk yajñasādhanaḥ । yajñāṃtakṛd yajñaguhyamannamannāda eva ca ॥ 105 ॥ ātmayoniḥ svayaṃjāto vaikhānaḥ sāmagāyanaḥ । devakīnaṃdanaḥ sraṣṭā kṣitīśaḥ pāpanāśanaḥ ॥ 106 ॥ śaṃkhabhṛnnaṃdakī cakrī śār​ṅgadhanvā gadādharaḥ । rathāṃgapāṇirakṣobhyaḥ sarvapraharaṇāyudhaḥ ॥ 107 ॥ śrī sarvapraharaṇāyudha oṃ nama iti । vanamālī gadī śār​ṅgī śaṃkhī cakrī ca naṃdakī । śrīmānnārāyaṇo viṣṇurvāsudevo'bhirakṣatu ॥ 108 ॥ śrī vāsudevo'bhirakṣatu oṃ nama iti । uttara pīṭhikā ॥ itīdaṃ kīrtanīyasya keśavasya mahātmanaḥ । nāmnāṃ sahasraṃ divyānāmaśeṣeṇa prakīrtitam। ॥ 1 ॥ ya idaṃ śṛṇuyānnityaṃ yaścāpi parikīrtayet॥ nāśubhaṃ prāpnuyāt kiṃcitso'mutreha ca mānavaḥ ॥ 2 ॥ vedāṃtago brāhmaṇaḥ syāt kṣatriyo vijayī bhavet । vaiśyo dhanasamṛddhaḥ syāt śūdraḥ sukhamavāpnuyāt ॥ 3 ॥ dharmārthī prāpnuyāddharmamarthārthī cārthamāpnuyāt । kāmānavāpnuyāt kāmī prajārthī prāpnuyātprajām। ॥ 4 ॥ bhaktimān yaḥ sadotthāya śucistadgatamānasaḥ । sahasraṃ vāsudevasya nāmnāmetat prakīrtayet ॥ 5 ॥ yaśaḥ prāpnoti vipulaṃ yātiprādhānyameva ca । acalāṃ śriyamāpnoti śreyaḥ prāpnotyanuttamam। ॥ 6 ॥ na bhayaṃ kvacidāpnoti vīryaṃ tejaśca viṃdati । bhavatyarogo dyutimān balarūpa guṇānvitaḥ ॥ 7 ॥ rogārto mucyate rogādbaddho mucyeta baṃdhanāt । bhayānmucyeta bhītastu mucyetāpanna āpadaḥ ॥ 8 ॥ durgāṇyatitaratyāśu puruṣaḥ puruṣottamam । stuvannāmasahasreṇa nityaṃ bhaktisamanvitaḥ ॥ 9 ॥ vāsudevāśrayo martyo vāsudevaparāyaṇaḥ । sarvapāpaviśuddhātmā yāti brahma sanātanam। ॥ 10 ॥ na vāsudeva bhaktānāmaśubhaṃ vidyate kvacit । janmamṛtyujarāvyādhibhayaṃ naivopajāyate ॥ 11 ॥ imaṃ stavamadhīyānaḥ śraddhābhaktisamanvitaḥ । yujyetātma sukhakṣāṃti śrīdhṛti smṛti kīrtibhiḥ ॥ 12 ॥ na krodho na ca mātsaryaṃ na lobho nāśubhāmatiḥ । bhavaṃti kṛtapuṇyānāṃ bhaktānāṃ puruṣottame ॥ 13 ॥ dyauḥ sacaṃdrārkanakṣatrā khaṃ diśo bhūrmahodadhiḥ । vāsudevasya vīryeṇa vidhṛtāni mahātmanaḥ ॥ 14 ॥ sasurāsuragaṃdharvaṃ sayakṣoragarākṣasam । jagadvaśe vartatedaṃ kṛṣṇasya sa carācaram। ॥ 15 ॥ iṃdriyāṇi manobuddhiḥ sattvaṃ tejo balaṃ dhṛtiḥ । vāsudevātmakānyāhuḥ, kṣetraṃ kṣetrajña eva ca ॥ 16 ॥ sarvāgamānāmācāraḥ prathamaṃ parikalpate । ācāraprabhavo dharmo dharmasya prabhuracyutaḥ ॥ 17 ॥ ṛṣayaḥ pitaro devā mahābhūtāni dhātavaḥ । jaṃgamājaṃgamaṃ cedaṃ jagannārāyaṇodbhavam ॥ 18 ॥ yogojñānaṃ tathā sāṃkhyaṃ vidyāḥ śilpādikarma ca । vedāḥ śāstrāṇi vijñānametatsarvaṃ janārdanāt ॥ 19 ॥ eko viṣṇurmahadbhūtaṃ pṛthagbhūtānyanekaśaḥ । trīṃlokānvyāpya bhūtātmā bhuṃkte viśvabhugavyayaḥ ॥ 20 ॥ imaṃ stavaṃ bhagavato viṣṇorvyāsena kīrtitam । paṭhedya iccetpuruṣaḥ śreyaḥ prāptuṃ sukhāni ca ॥ 21 ॥ viśveśvaramajaṃ devaṃ jagataḥ prabhumavyayam। bhajaṃti ye puṣkarākṣaṃ na te yāṃti parābhavam ॥ 22 ॥ na te yāṃti parābhavaṃ oṃ nama iti । arjuna uvāca – padmapatra viśālākṣa padmanābha surottama । bhaktānā manuraktānāṃ trātā bhava janārdana ॥ 23 ॥ śrībhagavānuvāca – yo māṃ nāmasahasreṇa stotumicchati pāṃḍava । so'hamekena ślokena stuta eva na saṃśayaḥ ॥ 24 ॥ stuta eva na saṃśaya oṃ nama iti । vyāsa uvāca – vāsanādvāsudevasya vāsitaṃ bhuvanatrayam । sarvabhūtanivāso'si vāsudeva namo'stu te ॥ 25 ॥ śrīvāsudeva namostuta oṃ nama iti । pārvatyuvāca – kenopāyena laghunā viṣṇornāmasahasrakam । paṭhyate paṃḍitairnityaṃ śrotumicchāmyahaṃ prabho ॥ 26 ॥ īśvara uvāca – śrīrāma rāma rāmeti rame rāme manorame । sahasranāma tattulyaṃ rāmanāma varānane ॥ 27 ॥ śrīrāma nāma varānana oṃ nama iti । brahmovāca – namo'stvanaṃtāya sahasramūrtaye sahasrapādākṣiśirorubāhave । sahasranāmne puruṣāya śāśvate sahasrakoṭī yugadhāriṇe namaḥ ॥ 28 ॥ śrī sahasrakoṭī yugadhāriṇe nama oṃ nama iti । saṃjaya uvāca – yatra yogeśvaraḥ kṛṣṇo yatra pārtho dhanurdharaḥ । tatra śrīrvijayo bhūtirdhruvā nītirmatirmama ॥ 29 ॥ śrī bhagavān uvāca – ananyāściṃtayaṃto māṃ ye janāḥ paryupāsate । teṣāṃ nityābhiyuktānāṃ yogakṣemaṃ vahāmyaham। ॥ 30 ॥ paritrāṇāya sādhūnāṃ vināśāya ca duṣkṛtām। । dharmasaṃsthāpanārthāya saṃbhavāmi yuge yuge ॥ 31 ॥ ārtāḥ viṣaṇṇāḥ śithilāśca bhītāḥ ghoreṣu ca vyādhiṣu vartamānāḥ । saṃkīrtya nārāyaṇaśabdamātraṃ vimuktaduḥkhāḥ sukhino bhavaṃti ॥ 32 ॥ kāyena vācā manaseṃdriyairvā buddhyātmanā vā prakṛteḥ svabhāvāt । karomi yadyatsakalaṃ parasmai nārāyaṇāyeti samarpayāmi ॥ 33 ॥ yadakṣara padabhraṣṭaṃ mātrāhīnaṃ tu yadbhavet tathsarvaṃ kṣamyatāṃ deva nārāyaṇa namo'stu te । visarga biṃdu mātrāṇi padapādākṣarāṇi ca nyūnāni cātiriktāni kṣamasva puruṣottamaḥ ॥ iti śrī mahābhārate śatasāhasrikāyāṃ saṃhitāyāṃ vaiyāsikyāmanuśāsana parvāṃtargata ānuśāsanika parvaṇi, mokṣadharme bhīṣma yudhiṣṭhira saṃvāde śrī viṣṇordivya sahasranāma stotraṃ nāmaikona paṃca śatādhika śatatamodhyāyaḥ ॥ śrī viṣṇu sahasranāma stotraṃ samāptam ॥ oṃ tatsat sarvaṃ śrī kṛṣṇārpaṇamastu ॥