dhyānam – śāntākāraṃ bhujagaśayanaṃ padmanābhaṃ sureśaṃ viśvākāraṃ gaganasadṛśaṃ meghavarṇaṃ śubhāṅgam । lakṣmīkāntaṃ kamalanayanaṃ yogihṛddhyānagamyaṃ vande viṣṇuṃ bhavabhayaharaṃ sarvalokaikanātham ॥ kavacam – om । pūrvato māṃ hariḥ pātu paścāccakrī ca dakṣiṇe । kṛṣṇa uttarataḥ pātu śrīśo viṣṇuśca sarvataḥ ॥ 1 ॥ ūrdhvamānandakṛt pātu adhastācchārṅgabhṛt sadā । pādau pātu sarojāṅghriḥ jaṅghe pātu janārdanaḥ ॥ 2 ॥ jānunī me jagannāthaḥ ūrū pātu trivikramaḥ । guhyaṃ pātu hṛṣīkeśaḥ pṛṣṭhaṃ pātu mamāvyayaḥ ॥ 3 ॥ pātu nābhiṃ mamānantaḥ kukṣiṃ rākṣasamardanaḥ । dāmodaro me hṛdayaṃ vakṣaḥ pātu nṛkesarī ॥ 4 ॥ karau me kāliyārātiḥ bhujau bhaktārtibhañjanaḥ । kaṇṭhaṃ kālāmbudaśyāmaḥ skandhau me kaṃsamardanaḥ ॥ 5 ॥ nārāyaṇo'vyānnāsāṃ me karṇau keśiprabhañjanaḥ । kapole pātu vaikuṇṭho jihvāṃ pātu dayānidhiḥ ॥ 6 ॥ āsyaṃ daśāsyahantā'vyānnetre me harilocanaḥ । bhruvau me pātu bhūmīśo lalāṭaṃ me sadā'cyutaḥ ॥ 7 ॥ mukhaṃ me pātu govindaḥ śiro garuḍavāhanaḥ । māṃ śeṣaśāyī sarvebhyo vyādhibhyo bhaktavatsalaḥ ॥ 8 ॥ piśācāgni jalebhyo māmāpadbhyo pātu vāmanaḥ । sarvebhyo duritebhyaśca pātu māṃ puruṣottamaḥ ॥ 9 ॥ idaṃ śrīviṣṇukavacaṃ sarvamaṅgaladāyakam । sarvarogapraśamanaṃ sarvaśatruvināśanam ॥ 10 ॥ iti śrī viṣṇu kavacam ।